حس على وحدتها و تع صح يمكن ضروف بصح رغم هذا يبقا قرارها انها حامل وبالحرام ، يمكن لو صبرت أكثر كانت رح تكون احسن حال من هكذا ، رجع نزل راسو ياكل و مزادش حكا
بعد ما كملو العشا ناضت من بلاصتها هز عينيه فيها استأذنت
سمرا: رح نحط الاولاد في بلايصهم يرقدو
مقال والو حرك راسو ايه وهي مدت يدها ل مايا
سمرا : هيا نروحو نرقدو
مايا : ليلة عيدة بابي
باست باباها وحكمت يد سمرا نزلت من بلاصتها ومشاو بقا يتبع بعينيه من بعد تنهد ، يمكن هو غالط معاها يمكن لانها وحدها و صغيرة مكانش لي وقف في جنبها صرا معاها هكذا واستغلوها ، صعيب يتقبل بصح مكانش ضرر انو يحاول يفهم منها
سمرا بدلت ل لؤي و عطاتو حليبو و بدلت ل مايا و قعدت جنبها تحكيلها
سمرا : نحكيلك مغامرة في حديقة الحيوان؟
مايا : حبس هدي احكيلي انوبة
سمرا : كل يوم نحكيلك ارنوبة ؟ هههه معليش
مايا : ايني ماما ؟ وحشتها
مسحت على شعرها وتنهدت
سمرا : راحت عند طبيب
مايا : رح ابقى مع طبيب ؟
سمرا : لا رح تجي تشوفك
مايا : مش رح اعرف زي هنا هي
سمرا : تعرف هي كبيرة تعرف الطريق
مايا : انا كبيرة ؟
سمرا : ايه
مايا : اعرف طريق لوح عند ماما ؟
سمرا : لالا متعرفيش بابا يديك
مايا : انتي ماما تاني ؟
بقات سمرا مسمرة قدام السؤال هذا معرفتش وش تقول وش تفهم الطفلة هذي وهي اصلا مشي فاهمة هي وش تكون مرتو ولا حجة دفاع برك في المحكمة حكمت يدها الصغيرة بين صوابعها و باستها
سمرا : انا بنتك يخي انتي ماما وانتي كبيرة
مايا : انا كبيرة انا ماماك
سمرا : ايه
مايا : هيا روحو عند ماما
سمرا : رح نروحو دوك لازم ترقدي راهي الظلمة برا
حست انها كانت سبب لي بعدت الاولاد على امهم وانو هي لي فرقتهم بأنانيتها و في لحظة تسرع تستاهل وش صرا فيها
سمرا : ماماك تحبك بزاف متنسايش هذا خلاص
مايا : حبها انا تاني
سمرا : صحيتي
سراج كان قدام الباب كان رح يدخل يبوس الاولاد من بعد تراجع كي سمع سيرة بنت الحرام هذيك وتساءل اذا سمرا تحكي هك عليها مع مايا علاه جات حكاتلو ؟ لانو مش مبين انها تحقد عليها كاين حاجة ورا لي دارتو بصح وش هي بالتحديد مقدرش يعرف
مشا قعد في الصالة يخمم مع روحو وقت لي شافها خرجت من عندهم
سراج : سم...
سكت منطقش اسمها ورجع قال
سراج : اذا ممكن ديريلي قهوة
سمعتو كي محبش يقول اسمها ، زعمة لدرجة هذي يشمئز منها؟ جاوبت ببرود
سمرا : حاضر
مشات ديراكت للكوزينة دارتلو قهوة وحطتها في صينية هز راسو ليها لقاها جايبة فنجان واحد
سراج : كون جبتي واحد ليك تاني حاب نحكي معاك
توترت و زمت شفافها حطلتو القهوة من بعد قعدت وفي قلبها تدعي ما يبهدلهاش على وش دارت
سمرا : منقدرش نشربها في الليل منقدرش نرقد منها
سراج: ايه معليش
شرب من فنجانو و شاف معاها وتنهد معرفش منين يبدا يفرك في يديه و الجمل دخلت بعضها في راسو ، كانت ملاحظة التوتر تاعو و زاد وترها اكثر قعدت تلعب بصوابعها نزل عينيه يشوف فيهم و قرر يحكي بلا ميشوف في وجها عالاقل يقدر يتحكم في الغضب تاعو كون ميشوفش تعابير الوجه تعها
سراج : وش كنتي ناوية تحكي كي كلمتيه؟
حست دموع بداو يتجمعو في عينيها وتقاوم بش مينزلوش هاه راح يزيد يبهدلها
سمرا : مهم صح تعرف ؟
سراج : ايه
سمرا : حبيت نقلو ...
نزلو دموعها و صوتها تقطع هز راسو شاف معاها
سمرا : كنت راح نقولو انو لي صا....ر صار و انو حد مضربني على يدي
تحكي وتبكي
سمرا : بصح ياريت يمدلو اسمو .... و ..ويكون..معاه ميقولوش ولد حرام
رجعت تبكي بشهقة قلب عينيه ياريتو ما سأل اكتر حاجة يكرها في دنيا هذي لي تحكي معاه يبكي
سراج : تحبي يمدلو اسمو؟
سمرا : ايه
مسحت دموعها بكم تريكو تعها صوتها يرجف من البكا
سراج : نقدرو نحطوه على اسمي بشرط
هزت عينيها فيه مشوكية ، وش رح يشرط عليها مكفاش انو يستنا فيها دير علاقة معاه رح يزيد شرط آخر! هو سكت تاني يخمم مش متأكد من لي رح يقولو بصح في الأخير هو في الحكاية كل غايضو طفل بريء معندو حتى ذنب
