بقات هي فاطنة دارت قهوة ليها وقعدت في غرفة الاولاد تتفرج مع الشباك وقطرات النو (مطر) برا تضرب في الزجاج ، تشرب في قهوتها وغاصت في افكارها ...زعمة كون يكون صح ولدو هذا ؟هي مش حابة تخاطر انو يفقدوه لأنها جربت وش معناه تفقد ولدك...لكن ! هل هي مستعدة تخسر سراج ؟
مرات من كثر فرحتها مع سراج والاولاد تنسى كلش وتنسى انها غريبة في نصهم ومرات كي ترجع تتفكر انو هذا كل مش ملكها انو مش تعها سراج وانو يخص سمر و الاولاد ولاد سمر تحس قلبها راح يخرج ... نزلت دمعة من خدها تتفكر في كلام امها تع سمر ... زعمة كون هي عندها ام؟ كانت رح دافع هك عليها ؟ هي تتفكر انو امها كانت طول عمرها مرا تع حق مكانتش رح دافع عليها كون هي خانت راجلها كانت اصلا رح تتبرا منها كون جات حية وشافت امين وعملتها معاه وكون عرفت هي كيفاه تزوجت موحال كانت تخليها تتزوج سراج ، هي غالطة وتعرف هذا الشي ... كون امها حية كانت تحشم تقول عليها بنتي
ناضت متوخرة النهار هذاك ، لقات روحها رقدت في غرفة الاولاد والغطا عليها شافت معاه ... أكيد يكون سراج لي غطاها عدلت شعرها بيديها وناضت مشات تشوف وينو لقات دار فارغة مكان حتى حد قعدت في الصالة وحطت يدها على خدها ... حاسة انو المشاكل مش رح تخلص ولا هي رح تعرف تتهنى من تأنيب الضمير لي عايشتو ، لأنو نيتها كانت مش مليحة وهي لي دخلت بيناتهم فمش راح تتهنى
هي هكذاك تخمم والباب تحل ودخلت مايا تجري ناضت كي سمعت حسهم لقات سراج في الباب وفي يدو لؤي
مايا : سمرااا
حكمت في رجليها تحضن طبست ليها باستها
سمرا : توحشتك يا خنفوسة
مايا : ايدوش دوني ماني حبس انا حبس اوح
ضحكت عليها وهزت راسها شافت مع سراج لي حط لؤي
سمرا : مسمعتكش كي خرجت
سراج : خرجت بكري كان عندي خدمة محبيتش نوضك
حركت راسها ايه وهو مشا وخلاها سكتت وتشوف معاه كي طلع فوق في عينيه حاجة مبدلة على لبارح ... يكون كشما صرا ؟ مشات هزت لؤي
سمرا: هيا نبدلك يا طبوز
تبوس فيه و مايا وراها تحكي وتعيط وتقص في مغامراتها في دار جداتها
في جهة اخرى أمين كان تاني هذاك وين فاق وصحصح من دوخة تاعو راسو يحس فيه يوزن قنطار هز عينيه يشوف وين كان راقد لقا روحو في الصالة ملوح فوق الفوتاي قعد ويحك في عينيه فاتت مرتو هز راسو ليها
امين : شحال راهي الساعة
خزرت فيه من بعيد ومشات وخلاتو قلب عينيه ورجع تكا على وراه
امين : ديريلي قهوة نصحصح منيش قادر حتى نحل عينيا
عاودت فاتت جيهتو و وقفت تخزر فيه
رميسة : قول لسمرا تجيبلك القهوة
بقا يشوف معاها و تهز من بلاصتو راح يسقسيها ويني سمرا حتى يقولها ليها من بعد فاق مع روحو
امين : كيفاه ؟
رميسة : سمرا لي ليل كل تهوتر باسمها
خزرت فيه من فوق لتحت ومشات ناض تبعها
امين : شكون جابني
دخلت الكوزينة وهو وقف في الباب
امين : جابني ؟
ضحكت على جنب ودورت ليه
رميسة : على ذكر شكون جابك ... الخرا صاحبك لي وصلك هنا وتلاح ليا و يحكي في كلام هك وهك
تشوكا وقرب منها
امين: وش حكا ؟ منصف يخي هو وصلني اسمو منصف
رميسة : منعرفش شوفك مع شكون بايت ساهر هو لي وصلك ... تحسب في روحك راجل كي تخلي واحد يوصلك عڨاب الليالي و يتعدى على مرتك
امين : وش راكي تحكي ؟ كيفاه تعدى عليك ؟
رميسة : مش رح نحكي افهم من عند ناس اخرى انا معندي والو
مشات وخلاتو يغلي ويتبع فيها من بلاصة لتانية محبتش تجاوبو .. هز تيليفون تاعو ديراكت وكلم منصف
منصف كان في مكتبو وقت صونا تيليفون تاعو شاف نومرو تع امين ، بقا ثواني يشوف معاه من بعد رد
منصف: صباح الخير شريكي
صاح امين ديراكت
امين : وش صرا وش لي راهي تحكي فيه مرتي قال انت تعديت عليها بالكلام و قلت شي ما يتقالش يا ####
لز منصف على سنيه طلعت متخبيش وتحكي كلش نفخ ورجع حط تيليفون على وذنو
منصف : رجع صباح الخير الاول وبلا ما تقلق المدام أكيد تكون فهمتني غالطة
امين : كيفاه فهمتك غالطة وش لي صرا بش يتفهم غالط وش قلتلها انت
فاق منصف انو هي مقالتلوش وش صرا بالضبط تبسم ورخف اعصابو اكتر
منصف : البارح كي وصلتك كنت سكران خلاص و باقي غير سمرا سمرا صدقني ملقيتش كيفاه نفسر لمرتك حاولت ندخلها الحكاية في بعض ولانها تغششت خرجت زعافها فيا وحتى انها ضربتني ... بصح حقها و اي شي تقولو عندها حق فيه
عض امين شفتو و قعد ساكت يخمم اذا يكون كشما قال على سمرا
منصف :بصح متلومهاش هي حتى انا زدت فيها شوية
امين : #### يا صاحبي والله مش خدمة تاني دوك راهي تقول عليا مش راجل
ضحك عليه لانو صح مش راجل
منصف : لا مش مني هذا اكيد مزال مغشة من حكاية حبيبتك لقديمة لي تهوتر باسمها
امين: مرة أخرى خليني برا مطايش متجيبنيش لدار
ضحك عليه وفي قلبو تمنى كون مشا طيشو صح في كش زقاق
منصف : مستعد نعتذر للمرا تاعك وش رايك نعرضكم على عشا برا نجيب انا حبيبتي وانت وهي و كلش على حسابي ... تعرف رانا شركاء دوك مذا بيا ميوقعش سوء تفاهم بيناتنا
امين : ايه احسن حتى انا مذا بيا تفهم منك لاني مش قادر حتى نتعامل معاها دوك
منصف : اوك عليا مالا انت متقولهاش برك انو انا لي عرضتكم زيد ترفض جيبها و نصالحكم شريكي
امين : خلاص منا للعشية نرجعلك دوك نروح نشرب قهوة لاني مش قادر نركز
منصف : سلام
حط تيليفون ومرر يدو على شعرو وهو يخزر فيه ، منين رح يجيب حبيبة دوك تروح معاه للموعد هذا بشكون يتصل دوك يقولها تخرج معاه؟ .. هز راسو لتيليفون المكتب وتبسم ومد يدو ليه أتصل بالسكرتيرة تاعو
- تفضل مسيو منصف
منصف : وش عندك اليوم؟
- بعد الخدمة ؟ شي
منصف : عندي اجتماع مع شريك ليا تقدري تحضري ليه ؟
- أكيد
منصف : عشا
سكتت
منصف : الخلاص تع اليوم دوبل
- موافقة مسيو منصف قلي وين و على قداه برك
منصف : رح نوصلك انا
قص تيليفون وتنهد
منصف : طلعتي مش بالسهولة هذي يا مدام
