سمرا : صح باباك رآه هنا و رقدي عندو و أنا المرة الجاية نرقدك عندي
مايا: لاااا بابا اعلفش يحكي حكايات كيفك انتي
سمرا: رح نعلمو
مايا : لااا
دزت باباها وتلاحت عند سمرا دز في لؤي
مايا : حطيه هذا حطيه
سمرا : خوك صغير يا روحي خليه
بقات تشوف معاها ومعاه وتبعد في شعر سمرا على كتافها وحكمت فيه واقفة
مايا : وانتي تاني خوك ؟
ضحكت و سراج فسخ ضحك حتى هو
سمرا : ايه خويا وانتي ختي صغيرة
مايا : انا كبيرة
سمرا : هيه كبيرة ههههه
مايا : انا كبيرة و خويا صغير و نتي صغيرة و ماما صغيرة و بابا صغير
سراج : هههه خلاص انتي هي جدانا
مايا : انا ماماك
حضنت سمرا بزوز يدين دور راسو شاف فيها و حتى هي شافت فيه طاحت عينو في عينيها لقاها بسرعة بدلتهم منو وخدودها طلعو حمر حاشمة منو .. تبسم على جنب ووقف
سمرا : هيا دوك تبقاي عاقلة ماما وغدوة نرجع؟
مايا : لااااااا
دزتها ورجعت تبكي
نفخ سراج و ضرب اللعبة تعها لي كانت في الارض بغش
سراج: مدموزال مش رح تسكت هذي خليها رح يروح عليك الحال تبكي تبكي اخرتها تسكت
سمرا: خلاص ارواحي نقعدو نحكيلك حكاية دوك و غدوة نديك معايا اوك ؟
مسحت دموعها وشافت معاها
مايا : احكيلي ارنب صغير
سمرا : اقعدي
بقا يشوف معاها كيفاه تعامل في ولادو ، تع صح سمر كان عندها حق كي حطت ثقة فيها تقعد مع الاولاد
سراج: ديزولي مدموزال سمحيلي بزاف
سمرا : معليش مسيو مش مشكل
تبسم و مشا لغرفتو قعد على حافة السرير تنهد وخرج تيليفون تاعو يكلم في سمر ما تردش ، بعد مرتين ورا بعض حط تيليفون وتمد ورا يريح راسو ...
سراج : سمر مكانش عليها تروح وتخلي الاولاد هكذا
بعد ساعة و سمرا تحكي لؤي كان في بلاصتو شربتو حليب مرة أخرى ورقد ومايا كبشت ولا حبت تسكت وتخليها ظلام برا و قلقت اكثر لأنها رح تضطر تروح في وقت هكذا كون جات صيف كان نورمال بصح دوك حتى الكلب ومكانش برا في جو هكذا
رجع سراج وهو يمسح على وجهو
سراج : مدموزال سمرا مزالك هنا ؟ سامحيني والله داتني عيني من تعب منيش نرقد الاولاد و الخدمة سامحيني حاشم منك كون غير نوضتيني
ناضت وكان واضح في وجها انها قلقت ومعجبهاش الحال
سمرا : معليش مسيو انا لازم نروح والله بزاف راح الحال
مايا : سمرا ديني معاك سمرا
سمرا : مسيو سراج نقدر نديها ؟ واضح مش رح تسكت
شاف مع الجو برا ظلام و المطر
سراج : كل ليلة تبات تبكي راهي توحشت ماماها وإذا مانغلبوكش تباتي معاها اليوم بلاك ترقد مليح والله رآهم يبيتوني حي فالليل وزيد ظلام وبرد نتي تاني متروحيش
وقت سمعت مايا كلام سراج تلاحت على سمرا عنقتها تبوس فيها من وجها
مايا: سمرا نيني معايا انا حبك
لفت سمرا يديها على مايا تحضن فيها
سمرا : سامحني مسيو سراج منقدرش
انها تبات في دار راجل مزوج ولو على الاولاد جاتها كبيرة وش تقول سمر كون تعرف ولا الوكالة تقدر حتى تتحاوز
سراج : عندك كل حق بصح رح ديري مزية كبيرة فيا و فيهم كون تقعدي
مايا : نيني معايا و لؤي
حشمت منو معرفتش وش تحكي
سراج: طبعا إذا ماعندكش لي يستناك و لا عندك موعد و راح نعطلوك
سمرا: لا لا ما عندي حتى واحد يستنا فيا
سراج: اقعدي ؟
تنهدت بقلق ورجعت شافت مع مايا
سمرا : اوك خلاص
تبسم كي مارجعتوش و قبلت تبات مع الاولاد عالاقل يرتاح هو الليلة هذي
سراج: شكرا كبير مدموزال سمرا تاع الصح اليوم راح نرقد هاني و تهنيني منهم ومن بكاهم فالليل و الخلاص تع الليلة تديه منعرفش كيفاه تحاسبتي مع مرتي
سمرا: لا ما عملت حتى حاجة في خاطرهم كلش يهون كي تجي المدام ان شاء الله نتفاهم معاها
سراج : مرسي ..
