طبست تهز في حوايجها من الأرض عاود نحاهم ورماهم
سراج : مش رح نخليك ترجعي ليه قلتلك رح نمنعكم ولو آخر حاجة رح نعملها في حياتي
حكم يدها وكبس عليها يخزر فيها لوكان جاو الخزرات يقتلو راه قتلها
سمرا : مبين من تصرفاتك مش حاب تخليني نمشي لأسباب أخرى ؟
شافت معاه من فوق لتحت
سمرا : ممكن حاب تخليني هنا بش نقوم بواجباتي الزوجية كيما طلبت البارح ؟
سيب يدها وبعد عليها و ملامح التقزز على وجهو
سراج : فوتي روحك نخرج برا نجيب عشرة كيفك واحسن
سمرا : مالا أخرج برا جيب العشرة هذو لاني ماشية كنت نظن انك احسن من هكذا و كنت نلوم في روحي كي درت معاك هكذا
سراج : ايه تلومي روحك لأنك درتيني طريق لانتقامك
سمرا : وقلتلك ندمت وانت اصريت تتزوجني وانا رفضت
سراج : وعاودتي اتصلتي بيا و وافقتي
سمرا : زح وش ندير بش تصدق نقتل روحي بش تأمن ؟ منقدرش نعيش هكذا معاك حتى لو رايح تمد اسم لولدي صح وراني نشك في هذا تاني
سراج : ولدك هذا ديري مزية اصلا متجيبيهش
سمرا : منديرش المزيات بطلت معادش ندير الخير لانو يرجع عليا
مايا : مامي
دارو لزوز خزرو فيها واقفة تبكي وتشوكاو كي طلعت
( منين نقول تشوكاو اتخيلو المشهد تع الهنودة كي ينعتو وجوه الابطال بالواحد مع صوت موسيقى الصدمة )
سمرا : يا روحي كيفاه طلعتي ؟
مشات هزتها و سراج هبل كي سمعها قالت مامي
سراج : وعلمتيها تقول مامي هكذا بش يعني تتأكدي انها تبقا متمسكة بيك تحسبي تحكمي يدي لي توجع هكذا ونخليك معايا ؟
سمرا : شكون قالك خليني معاك؟ شكون ؟ راك انت لي مش مسيبني
سراج : ايه مش مسيبك ورح تبقاي هنا واذا تحبي نصدقك واذا صح ندمتي وحابة تصلحي اقعدي وخليني نشوف تع صح كيفاه رح تصلحي
مايا : مامي حفت
كبشت فيها مايا ضمتها ليها وتمسح على شعرها
سمرا : متخافيش بابا يلعب برك هيا ننزلو عند لؤي
مشات مزادتش حكات معاه نزلت تحت مع مايا شافت لؤي مزالو راقد رجعت للكوزينة وكملت وش كانت دير
سمرا : اقعدي نديرلك حليب مع ڨاتو و نديرو عشا مع بعضانا
مايا : ديرو باتيتي
سمرا : مش ناكلو سباڨيتي كل يوم
مايا : حبها
دورت توجدلها حليب تاكل لأنها متغداتش عند جداتها وفات وقت الغدا ، تخمم في لي صرا فوق و كيفاه قالها اقعدي وخليني نصدق اذا صح نادمة ، شبيه متمسك بيها هكذا ؟ علاه حست نبرة الصوت تاعو تبدلت ، علاه بدنو كلو كان مشدود من الغش و النظرة في عينيه تترجى فيها لانو ميعرفش وش يدير بلا ام هنا لاولادو ؟
، حست في لحظة انو ضايع بين انو ينقم عليها ولا يترجاها تخليه يتخطا الفراغ هذا ... يمكن هي هرموناتها الحساسة برك بصح متأكدة انو الجملة اللخرة تاعو كانت ترجي منو مش تحدي ليها حست قلبها يتقطع عليه وعلى حالتو هي رجعت واحد من الاسباب لي وصلوه هكذا ، تع صح راهي تخمم تقعد بعد ما تجرأت و وقفت في وجهو وقررت تمشي ؟ جرأتها لي استجمعتها فجأة تبدلت ورجعت حازنة على وضعو و لا على مايا لي تسمي فيها ماما ، تنهدت وحطت الحليب فيه ڨاتو بيسكوي تع الاولاد لمايا
سمرا : كمليه بش نخليك توجدي عشا معايا
مايا: باتيتي
سمرا : هههه ايه باتيتي
دورت تجهز في اكل مايا تع غدوة نهار كل و تخمم اذا صح تمشي ولا لالا لزت على سنيها و دورت تشوف في مايا تاكل
سمرا : كملتي ؟
حركت راسها ايه مشات مسحتلها وهزتها ل غرفتها وحطت العابها قدامها
سمرا : يا روحي اقعدي هنا تلعبي مزيديش تطلعي فوق طيحي و نديوك لطبيب
