بعد نهار طويل مشا شاف فيه بزاف من معارفو رجع نص خايب نص متأمل ، كانت الدار ساكتة كي دخل مايا مجاتش تجري اكيد رقدت لانو فاتت العشرة تع الليل ،لكنو كان مضطر انو يزرب في تحركاتو و يشوف اكبر قدر من الناس في اقل وقت ولا رح يعرف امين ويفسد عليه واكيد رح يحاول حتى هو يخليهم معاه
نزلت سمرا شافتو تاعب وجهو خايب
سمرا : سراج ؟
تيليفون كان في يدها الوقت كل وهي تخمم تكلموا من بعد تتراجع حتى رجع وحدو نطقت بخوف
سمرا : توخرت بزاف
حرك راسو ايه معينوش في هدرة غلب راسو من كتر الهدرة اليوم
سراج : رح نعمل دوش ونرقد خلي صباح وسقسيني
حركت راسها ايه مكانتش رح تسقسيه وين كان حبت تعرف علاه وجهو هكذا ميتفسرش وتقلقت عليه ،مشا خلاها و طالع فوق طلت عليه في دروج
سمرا : تعشيت ؟
سراج : ايه
كمل طلع وهي تنهدت ومشات هزت صحنو لي خلاتو يستناه خباتو و لمت الطاولة ، بعد ما كمل دوش لقاتو نزل مرة أخرى رح يرقد في الصالة محكاش وحتى هي ما قالت شي ... مشات بهدوء رقدت و مرقدتش في نفس الوقت لانو كل تفكيرها في لي حكاه الصباح ، رح يخليها تحبو ؟ هي تشك انو تقدر تزيد تحب اي راجل بعد اللي شافتو من امين ، رح تحب ولدها و تكتفي بيه فقط ورح تطلق اكيد كي يكون الوقت مناسب ليه وللأولاد
الغدوة كيف فات نهار آخر عليه مع اللوكال يحوس على مكتب مليح كبير و في بلاصة مليحة لكن المشكل كلهم كانو يحوسو على دفع عام مسبق ولا اكتر ، و هو حاليا ميقدرش يخاطر بعام كامل ، فات نهارو كلو تمرميد ، وسمرا بعد لي حكاه شافت انو بعد اكتر عليها يقصد انو كي يبعد عليها رح تحبو ؟ هو صح خلاها تخمم فيه وتنشغل بيه بصح اذا في بالو تحبو يكون غالط
قعدت تنفخ في البالونات ل مايا و هي مغششة ومش عارفة اصلا هي علاه مغششة ، كأنو صح رح تتوحشو ولا تتوحش الكلام معاه ؟ هو اصلا كان مشبعها كلام ناقص ومعايرة احسن كي مراهوش يحكي
تلاقا سراج آخر النهار مع المحامي بش يعرف وش صرا في حصتو والأسهم
فؤاد : علابالي مش رح يعجبك
سراج : بيع لغيرو
فؤاد : امين حاب هو لي يشريهم نظن يحب الفايدة كل ترجع ليه وحدو ميحبش شريك آخر
سراج : لانو حمار هكذا حتى الخسارة رح يتحملها وحدو
فؤاد : يمكن واثق بزاف في نسيبو
سراج : سمعت انو عمل صباح اجتماع مع المتعاملين أن شاء الله لي تفاهمت معاهم البارح ميكونوش بدلو رايهم ، توخر الوقت منقدرش نتصل بيهم دوك
تنهد المحامي و هز شرب من قهوتو
فؤاد : ارجع للدار دوك وغدوة يرحمها ربي راهي ظلمة
سراج : ايه احسن وانت تاني امشي تروح ولا الليلة تبات برا
فؤاد : الليلة اكيد بايت برا ، البارح النسا كلاو بعضهم في جرت الاولاد ضاربو
ضحك سراج عليه ووقف وحط دراهم على طاولة
سراج : الله يعينك يعني زوج نسا راك بطل ، ناس وحدة مقدروش عليها
وقف المحامي وهو يضحك تاني
فؤاد : وتحسب محامي مليح هكذاك برك ؟ عن تجربة صاحبي الضغط في الدار اكتر من اللي نشوفو في القضايا تاعي ههههه
خرجو لزوز يضحكو كل واحد مشا فيهم لدار وصل سراج اول ما حل الباب جات مايا تجري
مايا : بااابي وحستاااك
هزها باسها و يشوف مع لبستها تع البرانساس و مشطتها و العصا السحرية لي في يدها
سراج : وشنو هذا كل ههههه ؟ علاه لابسة هكذا ؟
مايا : سمرا ابستني
دخل وهو هازها شاف صالة كلها بالونات تعجب
سراج : وشنو هذا ؟
مايا : فاساغ وايو وايو
سراج : وشنو ؟
مايا : فاساغ وايو وايو و اوووف
