قفل الباب عليها بقات تبع فيه بعينها و عقلها كلو عند سراج تخمم وش لي خلاهم يستدعيوه ويحكموه ، رجع منصف طلع حتى هو ومشاو بقاو لزوز ساكتين حتى قررت هي تسأل علاه سراج في المركز
سمرا : علاه حكموه؟
منصف كان مركز مع الطريق وتفكر المشهد لي صرا قدامو ليلتها سراج مع أمين ولي تقال كل ، صح وش قال عليها؟ تع صح هي من نوع البنات هذا ؟ محسش على روحو وهو يكبس في يدو على المقود من بعد شاف فيها
منصف : ضرب امين وهو شكا بيه
اذا كان وجها من قبل ابيض دوك رجع كأنها سمعت على غول ولا نهاية الكون سكتت ودورت وجها منو ، يعرف هذا بحكايتها مع امين؟ حتى قال اسمو هك على أساس رح تكون تعرفو ؟ ولا يمكن في بالو بما انو كان شريك سراج اكيد تعرفو ، تبهديلة كبيرة لسراج قدام صحابو اذا هوما يعرفو حكايتها وأمين وياريت تكون غالطة ، مرجعتش حكات خلاص وقعدت تخمم في امين كي قالها انو سراج ضربو مكانش في بالها انو رح يشكي بيه صح
من غير ما تشوف معاه مرة أخرى سألتو
سمرا : علاه ضربو ؟
منصف : منعرفش مكنتش موجود
كان في راسو الف سؤال يحب يفهم وش العلاقة بينهم في 3 بصح ميقدرش يسقسي أصلا من حقو ، وصلو للدار بعد ما نعتتلو سمرا الطريق كي قربو وقف برا
منصف : استناي ندقدق الاول ونجي
مشا دقدق الباب جات ام سراج حلت الباب
- سراج هذا ..
قصت كلامها كي شافت انو مش هو
منصف : انا صاحبو و وصلت المدام لانو سراج مزال في المركز
ضربت صدرها وصاحت
- بنت الكلب الا ما كلات راسو وخلاتو تع حباسات كلو من سمر الهاملة كلو منها
منصف : الحاجة بلعقل
- خلينا ندخلو الطفلة الاول ، وقلي وش عملت بنت الكلب هذيك ؟ اكيد لقات كش تهمة تحب تدي الاولاد اه يا ناري كون نحكمها ناكلها بسناني
تحكي وترغي وهو يسجل في كلامها سمر ...؟ شكون سمر ؟! حل الباب لسمرا وعاونتها هي تنزل مشا معاهم حتى باب الدار من بعد بقاهم على خير و راح
دخلت سمرا و امو تعاون فيها جات مايا تجري و تبكي تحضن فيها
مايا : مامي مامي وحستك مامي لوحيس طبيب خلاص
- اصبري ابنتي خليها تقعد
قعدتها في الصالة وتلاحت عليها مايا بزوز يدين تحضن وكأنو خايفة تسيبها ترجع تروح ، ضمتها سمرا ليها
- عملت منوحة كبيرة طول ما انتي مكانش
شافت سمرا مع امو متحيرة كيفاه تعامل فيها مليح حتى أنها خافت تنطق كشما تقول غالط و تفسد كلش
سمرا : هاني رجعت مايا خلاص راني معاك
ضربت العجوز على فخاضها
- اه من بنت #### دخلت بني الحبس اه وش ندير انا دوك يلزمني نكلم امين نقلو يشوف صاحبو يمشي يخرجو من تم
سمرا : لااا امين ...
كانت رح تقولها انو معادش شريكو وانو تخربت بيناتهم لكن سكتت تخاف تلصق معاها وترجعها هي السبب وتتقلب عليها
- وش بيه امين ؟
سمرا : يمكن يكون معاه ؟ وزيد المحامي اكيد معاه
- ولو يلزمني نطمن عليه
مشات هزت تيليفون تعها تكلم في امين ، مردش عليها خلاص حطت من يدها ورجعت قعدت تبكي وتندب وحالة سمرا من سيء لأسوء حتى كي حبت دير شوي كوراج امو فسدت عليها
منصف طار لعند سراج و فؤاد دخل المركز سأل عليهم جا المحامي لعندو
منصف : خير حكيتو مع رئيس النيابة؟
فؤاد : محبش يقابلنا رح يهبلني
منصف : ومكانش غيرو هنا بش يطلعو ؟
فؤاد: شفت واحد من معارفي قال دوك يلقا حل ،وصلت المدام؟
منصف : ايه ، استنا نكلم واحد نعرفو جنرال يمكن فيها امل ادعي برك يكون هنا
مشا هز تيليفون تاعو كلمو وفرح كي رد عليه
منصف : اهلا هههه بيك بيك يعيشك الله لا يغيبك ، وي تعرف مع الخدمة و كلش ، صاحبي وش نقلك علابالي مش قاعد منطولش عليك.... عندي هنا واحد حبيبي حكموه في المركز تع ***** ومحبوش يخليوه يخرج ... حكاية تع ضرب واحد و قالك حتى غدوة يشوفو معاه ومرتو مريضة وعندو ولاد كون تشوفلنا نخرجو بكفالة برك و يرحمها ربي من بعد .... صحا نتكل عليك صاحبي يعيشك ، ايه سلم على الحاجة
قص تيليفون ورجع عند فؤاد
منصف : سايي دوك مكالمة كلش يكون مفروز استنا
فؤاد : يعطيك الصحة... ليزوم
منصف : لا مدرت شي
بقاو واقفين يستناو حتى لقاو باب المكتب تحل وخرج النائب يقلب في خليقتو
- انت امشي خرج مسيو عياشي
- حاضر
شاف معاهم ودخل
- تفضلو
