Exceeding The Lightlessness Of Present (EX Series 3)

Kabanata 2

Honeymoon

"What? Hindi ka pwedeng magpakasal sa isang Fuertez!" sigaw ni daddy.

Sinabi ko na sa kanila ang tungkol sa kasal namin ni Dickson pero hindi ang dahilan. Hindi pwedeng sabihin ko na for convenience lang ito dahil siguradong mas gusto nila akong ikasal sa mga ibang lalake kung ganoon lang din pala ang dahilan.

"Daddy, please. Mahal po namin ang isa't isa, gusto ko pong maikasal sa kanya."

Kadiri man ang ginawa kong dahilan pero wala na akong choice, 'tsaka mukha namang kapani-paniwala. Childhood sweethearts? Hindi naman pwedeng dahil gusto nyang makuha ang mana nya kaya kami ikakasal at bina-blackmail nya ako gamit ang sex video namin. Kapag sinabi ko iyon ay baka hindi lang sampal ang abutin ko.

"Nababaliw ka ng bata ka. Nakalimutan mo na ba ang ginawa ng pamilyang iyon sa amin ng mommy mo? Sinabotahe nila ang negosyo natin kaya nalugi. Muntik na tayong mabaon sa utang. Kaya kahit anong pakiusap mo sa akin, hindi ako papayag," sabi ni daddy.

Paano na? Anong gagawin ko? Sasabihin ko na ba?

Umiling ako. Hindi pwede, lalo silang magagalit sa akin.

"Kahit hindi kayo pumayag ay magpapakasal po ako sa kanya. Pasensya na po pero kailangan ko naman pong magdesisyon ng sarili ko," sabi ko at tumalikod na sa kanila ni mommy. This is the first time that I will disobey them, para rin naman ito sa amin. Kung hindi ko ito gagawin ay pare-pareho kaming babagsak. Hindi lang para sa kahihiyan ko ito, para rin sa mga magulang ko.

"Sige, magpakabaliw ka sa lalaking iyon. Pero sa oras na ikinasal ka sa kanya, wala ka ng mga magulang na babalikan. Wala kang makukuha sa amin kahit singko. Tandaan mo 'yan, Loren! Pairalin mo ang kawalang-utang na loob mo," sabi ni daddy.

Umalis ako at nagtungo sa aking kwarto. Umiyak ako dahil hindi ko na alam ang gagawin ko. Akala ko magiging madali lang ang lahat pero bakit ganito?

Kahit kailan ay hindi ko naramdaman na mahal ako ng mga magulang ko. Siguro dahil ampon lang ako. Pero ginawa ko naman lahat para masiyahan sila sa akin. Sinunod ko lahat ng gusto nila, ginalingan ko sa school, sa sports pero kulang pa rin sa kanila. Masakit na lagi nila akong kinukumpara sa ibang tao, ayoko ng ganoon. Laging pagtanaw ng utang na loob lang ang nararamdaman ko. Walang pagmamahal, kahit ganito ang buhay ko ay kulang na kulang pa rin ako.

They never see me as a daughter but as an investment. Nandyan lang sila kapag may mga tamang bagay akong nagagawa, 'yun bang maipagmamalaki nila sa ibang tao. Pero kapag nagkamali ako, hindi nila ako mapapatawad. Hindi nila ako anak kapag nakakahiya ang nagawa ako. Ampon ako kapag mali ako at anak nila ako kapag tama ako.

Magpapakasal ako kay Dickson, 'yun ang desisyon ko. Kaya kong mawala sa akin ang mga magulang ko at ang mga kayamanan nila pero hindi ang mga taong sumusuporta sa akin, ang mamamayan ng bayan na masayang nakatingin sa akin. Mababaliw ako kung pati sila ay huhusgahan ako. Sa kanila lang ako humuhugot ng lakas ngayon. Sila lang ang dahilan para magpatuloy ako.

Alam kong dapat kong piliin ang pamilya pero masisisi nyo ba akong hindi ko man lang naramdaman ang sense ng pamilya buong buhay ko? Mas naramdaman ko pa iyon sa ibang mga tao, sa pamilya ni Harry kaya pinangarap kong maging parte ng pamilya nila. Kaya naging desperado ako kay Harry dahil gusto kong maranasan ang maalagaan. Iyon lang naman ang gusto ko.

Siguro naman ay hindi magiging magulo ang pagsasama namin ni Dickson dahil magkaibigan naman kami simula noong high school. Mayabang nga lang sya, 'yun siguro ang magiging problema namin.

Pumasok ako sa munisipyo na mabigat ang loob. Hindi kami nagpansinan sa bahay ng mga magulang ko. Lagi na lang ganito kapag may gusto ako na ayaw nila at sa bandang huli ay sila pa rin ang nasusunod. Hindi kailanman ako nakagawa ng naaayon sa kagustuhan ko.