روايــة #حي_الزهور 💐
الحلقة الأولى
( بقلم مسرة أسامة )
في سنة 1991 ✨
ساعة 11:00 ص 🌹
ركبت ليلى فوق الحيط ( السطح ) و هي تكر في خيط الأرضي معاها ,, قعمزت تحت الساس و علقت الخيط في السبينة و ضربت الرقم .. ☎️
حطت السماعة في وذنها و عيونها في باب الدروج تراقب , خايفة خوها سالم يركب فجأة و يعلق عليها
بعد لحظات انفتح الخط ..
مراد : الو ؟
ليلى : مراد !!
مراد بفرحة : ليلى ؟؟
ليلى : صباح الورد حبيبي
مراد : صباح ورد الجوري و التوليب ياعيوني
ليلى سكتت و ابتسمت
مراد بلهفة : وينك ياعمري مغيبة عليا و مسكرة خط الأرضي ؟ على شوي جيتك الحوش
ليلى : وين تجيني الحوش يا مراد و خوي سالم قاعد
مراد : قصدك سالم روح من الجيش ؟
ليلى : ايه روح .. هذا علاش معادش اتصلت بيك من اللي روح و هو داس خيط الأرضي عليا لأن عارفني نتكلم .. توا خليته راقد و خنبته منه باش نتطمن عليك
مراد علَى صوته : تي خيره يتصرف هكي البلي الاحرف تي رانا قاريين الفاتحة و انتي مرتي قدام ربي و خلقه
ليلى : شن بدير هي هكي عقليته هوا .. حتى خطيبته مايكلمش فيها نهائي قال للعرس
مراد : اليوم العشية تو نجي نحدد موعد مع امك .. نبي العرس يكون نهاية الشهر معش قادر ع التعطيل اهوا .. ماصدقت ان المرحوم بوك وافق عليا و قرينا الفاتحة قبل مايتوفى مش ناقص تشحوير و بهادل اكثر من هكي ياسر فترة العدة متع امك
ليلى متفاجئة : شن نهاية الشهر يا مراد و حني عندنا عرس بنت خالتي الأسبوع الجاي لاهيين فيه
مراد : ماخصنيش في حد نبي نلم روحي و ناخدك ياسرني تخمام بين شغلي و بينك يا ليلى افهميني
ليلى : و عيلتك يا مراد ؟؟ مش المفروض هما اللي يقرروا !!
مراد تأفأف : ليلى الموضوع هذا داويين فيه من قبل مافيش داعي ينفتح من جديد
ليلى : ضروري بوك هوا اللي يجي يتكلم مع خوي مش انت
مراد تعفلق : شن مش مالي عينك اوه ؟
ليلى خافت : لا مش قصدي حبيبي .. حاشاك و حاشى قدرك , لكن اني نقصد ان ضروري كبير عيلتكم يجي هو اللي يتفاهم مع كبير عيلتنا هكي الأصول تقول
مراد ارتخي : مادوريش التفاهات هاذي يا لَلّوش هو تاريخ بينحط و تم الكلام .. و بعدها تبدي طول العمر في حضني و قدام عيوني
ليلى ابتسمت و بدت توشوش بذوبان : اااخ مش قادرة نصبر يا مراد
مراد : هانت ياعيوني هانت .. كلها أسبوعين ثلاثة و تكوني جنبي
ليلى سكتت و بدت تلوي في خصلتها بدلع
و فجأة تسمع صوت أمها تنادي من الجنان
جميلة : ليلى !! ليلى ؟؟؟؟ .. وينك يا بنتي من بكري ندور فيك
ليلى استاقضت ؛ نزلت السماعة و علت صوتها : هيا يما جااااية
و ردت السماعة لوذنها 📞 : امي تنادي عليا حبيبي لازم نسكر قبل مايفيق سالم بصوتها
مراد : باهي امالا وتيلي روحك ساعة ستة
ليلى :حاضر ياعيوني انت .. شن تبيني نلبسلك
مراد ابتسم : قفطانك الأبيض المورد اللي شفتك بيه اول مرة في سوق المشير .. الله الله مع هذوكا الشعيرات الذهبيات الي لونهم زي لون شروق الشمس يا شقرتي
ليلى تضحك : حاضر حبيبي ادلل
