الراهبه والطيار (مكتمله)

البارت 23 الجزء الثاني

مساء الخير أحبتي
أتمنى لكم قراءه ممتعه ❤

بقلم: زهراء البياتي Zahraalbayati

بالاول اريد اكول اعتذر البارحه منزلت بارت بس جنت مشغوله بسوالف رمضان و المسواك وتعرفون بعد انتو
وثاني شي كل عام وانتو بالف خير ينعاد عليكم بالصحة والسلامة وأسأل الله أن يتقبل منا ومنكم صالح الاعمال ❤❤

اليوم البارت طولته لعيونكم❤

تذكر چنت من تعتنيلي بلهفتك
مشتاگ حتى تشوفني
وتلگاني روحي مشگگه
ولمسات إديك تروفني
تتركني هسة قررت !
ينطيك گلبك ننتهي
وبس بالأحلام تشوفني
تتركني هيچ بلا ذنب
بررللّي حتى لو چذب
مليت كلي گمت امل
شيحمله ليلي بوحدتي
ماينحمل بُعدك ترا !
وچذبت گتلك ينحمل .

ريناد..صفنت بقيت مصدومه بحلم لو شنو باوعت يمي ماكو هاله يم الحجيه موديهه
باوعت علي حاضني و نايم اريد اوخر جان يحجي بهمس
ادم..لا ريناد مشتاقلج
كمت اتنفس على السريع و كلبي حيطلع من مكانه من دكاته.. بقيت بالعشر دقايق اني بس صافنه ماعرف شصرف بس الاعرفه اني ذليت نفسي اله وهو رفضني و مو بس رفضني هم فشلني كدام الكل و داس على كرامتي يم اهله كتلني و طيح حضي و يم بت عمه فشلني و طردني و يم طليقته مخله اعتبار الي و خاني وياهه.. غمضت عيني بصبر و جان ادفعه و اكوم اوكف
هو فز باوع عليه مستغرب

رحت لجربايه الحجيه شلت هاله على كيف و طلعت من الغرفه وهو اجه وراي يمشي و يبتسم
ابتسمت بكلبي بعدك مشايف شي صعدت واول مدخلت للغرفه قفلت الباب عليه اني و هاله
جان يدك الباب و يفتح باليده
ادم..ريناد افتحي البااااب رينننناد شهل تصرف هذا ريناد افتحييي الباب
..روح ادم يم الحجيه الفراش موجود و تندله انته
ريناد..افتحي داكلج
..ما افتح وبعد لدك راح تكتد هلوله و رجاءا روح بدون صوت لان انريد نرتاح شوي نام و انته تصبح على خير
سمعته يسب و يكفر وراهه راح صوته يمكن نزل يم الحجيه

رحت للجربايه حطيت هلوله يمي و نمت يمهه واني اضحك احس منتصره وكولش فرحانه
نمت بسرعه من الفرحه وكعدت ثاني يوم على صوت هاله وهيه تبجي
شلتهه وكمت اهز بيهه..باوعت على الساعه بال 12 الظهر حيل شكد نمت و هلوله سوده عليا موته نفسهه من البجي
اخذتهه و رضعتهه وبعدين اذكرت ادم
رحت فتحت الباب ونزلت جوه
دخلت على غرفه الحجيه ماكو مموجود و بالصاله هم ماكو وراهه رحت طبيت للمطبخ شفته كاعد على الميز و يشرب جاي و زهراء دتسوي الغده
اول مدخلت رفع راسه وخزرني
بصراحه خفت منه خاف هم يضربني بس سويت نفسي عود مخايفه منه

زهراء..صباح الخير
..صباح النور هاج زهراء بس اخذي هاله اريد اصعد اغسل و ابدل حته اجي اني اكمل الغده
ادم..انطينياهه الي
مد ايده واخذهه و اني محجيت شي صعدت فوك بدلت لبست اسود لان كل البيت لابس اسود حداد و سرحت شعري بس حطيت شوي حمره ورديه و كحله
نزلت للمطبخ شفته كاعد ويلعب هاله
زهراء..اني اكمل الغده انتي ارتاحي ميحتاج
..متردين مساعده
زهراء..لا اني هاي ملتهيه
انقهرت عليه من ماتت اختهه وهيه تنظف و تطبخ تريد بس تلهي نفسهه ومن تكمل تصعد للغرفه تبجي عليهه بس شوي هسه صايره احسن تحجي و تتفاعل ويانا