حب لا ينتهى

الحلقة الخامسة عشر

فيروز: اياد !!!
اياد : انا عايز اقولك حاجه
فيروز: لو سمحت يا اياد امشى احمد واقف بره ولو شافك ......
اياد يقاطعها : انا مش خايف منه انا دخلت البيت من بابه على فكرة
فيروز : وانا رفضتك
اياد : ممكن اعرف السبب
فيروز : اولاً لان الانطباعات الاولى تدوم واكيد انت فاهمنى وثانياً لانى مبحبكش
اياد : وهتحبينى ازاى وانتِ متعرفنيش
فيروز : اياد انا لا عايزة اعرفك ولا احبك وياريت تسبنى فى حالى كفاية اوى اللى عرفته عنك من احمد ومن رغدة
(فى الوقت ده كان كريم وصل واحمد قاله ان فيروز جوا ودخلوا هما الاتنين يجيبوها وشافوها مع اياد)
احمد : اياد !!! انت بتعمل ايه هنا
كريم بصوت واطى : اياد !!!!!
اياد : انا .....
احمد: انت ايه ، مش قولتلك مفيش نصيب وملكش دعوة بيها ..(لفيروز) وبعدين انتِ ايه اللى موقفك معاه (وشدها من دراعها)
اياد: اهدى يا احمد هى مكنتش عايزة توقف معايا والله وبعدين انا مكملتش دقيقة
احمد: وحياة ابويا لو شوفتك واقف معاها تانى ولا حتى بتبصلها مش هعديهالك يا اياد
(اياد مشى من غير كلام ، احمد بيبص لفيروز نظرة كلها غضب ، وكريم واقف متضايق وغيران على فيروز )
فيروز: والله يا احمد ما اتكلمت معاه دقيقة كامله هو قالى ......
احمد بعصبية: خلاص مش عايز اعرف قالك ايه اللى حصل حصل بس اخر مرة اشوفك بتكلميه
كريم : ولو اعترض طريقك بنظرة حتى عرفينى
فيروز لكريم : ما سيادتك لو كنت جيت فى معادك مكنش كل ده حصل
كريم بابتسامة عريضة : مانا لو اعرف انك هنا كنت جيت بسرعة البرق
فيروز بابتسامة اعرض : يا سلام ايه البكش ده
كريم بحنية : لا والله مش بكش بتكلم جد
احمد : ياختى جميلة !! اجبلكوا شجرة واتنين ليمون ولا نجيب المأذون على طول
(فيروز وشها احمر واتحرجت من كلام احمد)
كريم : ايه يا عم الفصلان ده بنت عمتى وبرحب بيها
احمد: يالا بينا من ام المكان ده (وركبوا العربية وراحوا كافيه)
كريم : بصوا بقى انتوا الاتنين انا عايز ابويا وعمتى يتصالحوا
احمد : بس الحوار ده عدى عليه سنين
كريم : ماهو عشان عدى عليه سنين زمانهم هديوا وبعدين مينفعش يفضلو ا كده احنا المضرورين
احمد : مش عارف والله انا عمر الفكرة دى ما خطرت على بالى
كريم : لازم نعمل كده ونفكر سوا
فيروز: كريم بيتكلم صح احنا لازم نصالحهم على بعض
احمد : اممممم طب هنصالحهم ازاى
كريم : وانا لو عارف هسألك
فيروز: انا عندى فكرة
كريم : ايه هى
فيروز : هقول لماما ان خالو عيان ولازم تزوره
احمد : بس خالك هو اللى غلطان فى امك ومفروض تجى منه هو سورى يا كريم بس هى دى الحقيقة
كريم : خلاص نقول لابويا ان عمتى هى اللى تعبانه
احمد : اممممم اوكى قول كده وبلغنا الاخبار
كريم : تمام(وقعدوا شوية وبعد كده روحوا)
*_____________________________________________**___________________________*
تانى يوم الصبح فى شغل فريدة :
فريدة اتصلت بـ خالد
فريدة : سلام عليكم
خالد : وعليكم السلام ورحمة الله وبركاته ، اذيك يا فريدة
فريدة : الحمد لله انت عامل ايه
خالد: بصراحة زعلان انتِ فين من ساعة ما كنا مع بعض
فريدة : معلش حصلت ظروف
خالد : ظروف ايه خير
فريدة : تعبت شوية وروحت المستشفى
خالد : تعبتى ومستشفى وانا معرفش يا فريدة
فريدة : انا بقيت كويسة يا خالد الحمد لله
خالد : الحمد لله يارب دايماً ، هاا مفيش جديد
فريدة : انا كلمت ماما وحكت لها وقالتلى اكلمك عشان تجى تقابل بابا
خالد (بفرحة ) : بجد طب امتى
فريدة : شوف اليوم اللى يناسبك وانا هبلغ بابا
خالد : النهاردة
فريدة : هههه لا مش للدرجه دى يوم الخميس كويس
خالد : كمان يومين يعنى اوكى ماشى ولو انه بعيد
فريدة : اوكى هنستناك على خمسة العصر كده
خالد: طب متخليها ستة يكون المغرب أذن
فريدة : لا معلش خليها خمسة التوقيت ده هيفرق معايا اوى
خالد : ممكن اعرف ليه
فريدة : لما تجى ان شاء الله هتعرف وهكلمك تانى لما اتأكد من موافقة بابا
خالد : اوكى بس انا هاجى لوحدى
فريدة : وبالنسبة لاهلك
خالد: خلى المقابلة الاولى بينى انا وبباكى بس ولما يوافق ان شاء الله هجيب امى واخويا ونجى تانى
فريدة : اوكى هروح انا عشان شغلى وعشان معطلكش عن شغلك
خالد: خدى بالك على نفسك ، سلام
*_____________________________________________**___________________________*
فى بيت خالد :
خالد : ماما انا هروح اتقدم لـ فريدة
امينة : فريدة مين ؟
خالد : البنت اللى انا كنت قولتلك عليها ولا انتِ لسه عايزة ولاء
امينة ما هما رفضوك اصلاً
خالد (بارتياح) : احسن
امينة : وهنروح امتى
خالد : انا هروح الاول يوم الخميس اقابل ابوها ولما يوافق نحدد معياد تانى ونروح انا وانتِ وايمن وعمى فؤاد
امينة : ماشى يا ابنى ربنا يكتبلك اللى فيه الخير ان شاء الله
ايمن : وانا كمان يا ماما ادعيلي
امينة : ويكتبلك الخير يا ايمن يا حبيبي
خالد : راح فين كده
ايمن : رايح لـ اياد
امينة : مش خالد اخوك هيخطب
ايمن : والله بجد
خالد : اه ان شاء الله
ايمن : الف مبرووك يا خالود
(هنا تليفون ايمن رن ، ايمن رد وحاول ميوضحش حاجه من المكالمة)
ايمن : ايوة
رغدة: انت فين يا ايمن
ايمن : اهاا موجود
رغدة :ممكن تجى تقابلنى دلوقتى
ايمن : لا مش هينفع
رغدة : طب ولو قولتلك انى موافقة على اللى طلبته
ايمن : طب ان شاء الله هشوف وهكلمك . سلام يا معلم
ايمن : طيب انا نازل بقى عشان اياد مستنينى سلام

*_____________________________________________**___________________________*
فى شغل فريدة :
نيرة : يالا بينا يا فريدة
فريدة : ممكن نروح نتغدى فى اى حتة عايزة اتكلم معاكى شوية
نيرة : خير
فريدة : يالا بس وهنتكلم
(.فى مطعم.)
نيرة : خير بقى يا بنتى
فريدة : هو انتِ هتوافقى على محمد ليه
نيرة : ليه يعنى السؤال ده
فريدة : اصلك قولتى امبارح كلمة كده فى المكالمه بس انا مكنش عندى مزاج اتكلم
نيرة : كلمة ايه
فريدة : قولتى انك هتوافقى عليه من باب اللى نعرفه احسن من اللى منعرفوش فى حين ان ممكن يكون مُعتصم احسن من محمد بس انا مش عيزاكى تبصى للجواز من مُنطلق مين احسن او اللى نعرفه احسن من اللى منعرفوش
نيرة : انا مش فاهمة حاجه يا فريدة انتِ عايزة تقولى ايه
فريدة : عايزة اقولك اتجوزى اللى بتحبيه يا نيرة
نيرة (باندهاش) : ايه ده !! مين اللى بيتكلم الكلام ده ، فريدة !!!!
فريدة : وايه المشكلة ان لما اقول الكلام ده
نيرة : انت حبيتى خالد ؟
فريدة : حبيته !! مظنش ممكن اكون اعجبت او انبهرت بيه بس لسه موصلتش لحب وبعدين خلينا فيكى
نيرة : بصى يا فريدة ، انا ومحمد متربين سوا بحكم وفاة امى واننا فى عمارة واحدة وكنا قريبيبن اوى من بعض رغم انه خجول بس لما دخلنا الجامعه محمد بعد معرفش ليه ، من حوالى اربع شهور محمد رجع يقربلى تانى بس بحدود عشان هو خجول وانا بصراحة مرتحاله وكنت معجبة بيه او يمكن بحبه الله اعلم بقى
فريدة : طب كويس اوى طمنتينى عليكى يا بت انتى
نيرة: هههههه اطمنى قوليلى بقى اخبار موضوع خالد ايه
فريدة : هيجى يقابل بابا يوم الخميس ولو اتفقوا هيجيب اهله ويجي تانى ان شاء الله
نيرة : ان شاء الله يا حبيبتى يالا بينا بقى عشان اتأخرنا(ومشيوا)
*_____________________________________________**___________________________*
فى خلال اليومين دول ....
-فاطمة كلمت محمود عن خالد ووافق انه يقابله
-كريم اقنع ابوه ان كفاية خلافات مع فاطمة كده ولازم يصالحها ، وبالفعل راح زارها وخلصت المشاكل اللى بينهم
-نيرة قالت لجدتها انها موافقة على محمد بس تستنى شوية لحد ما ابوها يصرف نظر عن مُعتصم
-ايمن لسه مش عايز يكلم رغده عشان تقتنع اكتر انها تروح معاه الشقة
*_____________________________________________**___________________________*
يــــوم الـــخـمـيـس فــى بـيـت فــريــدة :
محمود : هو قال انه جاى امتى
فريدة : خمسة يا بابا
محمود : يا بنتى دى الساعة داخلة على خمسة ونص
فاطمة : الغايب حجته معاه يا محمود
احمد : طب ممكن آكل ساندوتش لحد ما يجى ولا المفروض افضل متمسمر فى الكرسي كده وبعدين هو انا لازم اقابله
فاطمة : طبعاً يا حبيبى مش انت اخوها الرجل
محمود : يعنى من اولها كده مواعيد بايظة
فاطمة قالت لـ فريدة بصوت واطى : ما تكلميه يا فريدة تشوفيه فين
فريدة بعصبية : لا يا ماما مش هكلمه عايز يجى اهلاً وسهلاً مش عايز يبقى اريح
هنا جت فيروز من اوضتها وقالت : الحقى يا فريدة الحقى ....