حب لا ينتهى

الحلقة الثامنة

اول ما فريدة نزلت من التاكسى لقيت عبد الرحمن ( اللى كان متقدملها )
فريدة بصدمة: عبد الرحمن !!
عبدالرحمن : اذيك يا فريدة
فريدة : تمام الحمد لله وانت
عبدالرحمن : بُصى انا جاى اوضحلك حاجه مهمة لما والدى كلم والدك كان بناءاً على رغبتى انا وانا طلبته منه يخطبك ليا يعنى دى مش رغبة ابويا
فريدة: مش فاهمة
عبدالرحمن: قصدى انى انا اللى عايز اتجوزك يعنى مش رغبة بابا ولا انه طلب منى بس قولت بدل ما اجى اتكلم معاكِ ادخل البيت من بابه ولما رفضتى خوفت تكونى فاهمه ان بابا ضغط عليا
فريدة : يا عبدالرحمن انا مرفضتش لعيب فيك بالعكس انت انسان كويس جداً واى بنت تتمناك المشكلة مش فيك اطلاقاً المشكلة فيا انا
عبد الرحمن : فى حد تانى !!!!
فريدة: لا اولانى ولا تانى ، انا مش هقدر افهمك بس صدقنى ده لمصلحتك انت
عبد الرحمن : لا لازم افهم عشان دماغى هتفضل تودى وتجيب
فضلت فريدة تحاول تتهرب منه وهو مصمم يعرف السبب فى الوقت ده كان خالد قاعد فى عربيته بيكلم نفسه : ايه ده بقى !! مين ده !! هما واقفين كل ده بيقولوا ايه !! هو خطيبها !! لا لا لو خطيبها كانوا طلعوا وهى مش لابسه دبله ولا حتى هو . اممممم يمكن مرتبطين !! يادى النيلة هما بيقولوا ايه كده !! اوووووف اتصرف ازاى دلوقتى ...
بعد الحاح عبد الرحمن فريدة قالت : انا هقولك السبب بس متسألنيش عن اى تفاصيل
عبد الرحمن :قولى بس يارب اقتنع !!
فريدة: انا مريضة
عبدالرحمن (مصدوم): انتِ بتقولى ايه ، انتى بتقولى كده عشان ترفضينى بذوق صح
فريدة: لا يا عبد الرحمن هى دى الحقيقة عن اذنك
عبدالرحمن: طب استنى بس(وحاول يوقفها)
فريدة: يا عبدالرحمن وقفتنا غلط وميصحش كده انا قولتلك الحقيقة وياريت تقدر ده ومتجرحنيش اكتر من كده
عبدالرحمن: اسف بجد اسف مكنش قصدى عن اذنك (ومشى)
وبعد كده طلعت فريدة ......
*_____________________________________________**___________________________*
فى عربية خالد :
خالد بيكلم نفسه : يعنى حبكت يجى الاخ ده يقف معاها مش كان زمانى روحت كلمتها دلوقتى اوووف استغفر الله العظيم وبعدين مين ده اصلاً ويبقالها ايه
فاق خالد من سرحانه على جرس موبايله لقى المُتصل رقم مش مستجل
المُتصل: الو ازيك يا خالووود عامل ايه
خالد:خالود !!!! مين معايا
المُتصل :ايه ده يا خالد انت مش عارفنى
خالد:لا مش واخد بالى مين حضرتك
المُتصل:انا ولاء يا خالد
خالد: اهااا ولاء اذيك عامله ايه
ولاء:تمام انت مش مسجل رقمى ولا ايه
خالد:واضح كده انى نسيت اسيڤه او سيڤته مرتين المهم فى حاجه ولا ايه
ولاء: هو لازم يكون فى حاجه عشان اكلمك
خالد: لا مقصدش طبعاً انتِ عامله ايه
ولاء:تمام بس انت مكلمتنيش ليه استنيتك تكلمنى من ساعة ما خدت الرقم
خالد:انا خدت الرقم !!! اه اه واحنا فى المستشفى لما رنيتى على نفسك وكده
ولاء : اه مستنياك من ساعتها
خالد: ساعتها ايه بس يا ولاء الكلام ده كان امبارح
ولاء:برضه مكلمتنيش ليه
خالد:مكنش فى مناسبه تخلينى اكلمك
ولاء:هو احنا لازم يكون في بينا مناسبات للكلام
خالد:امال هتصل من باب الفراغ ولا ايه
ولاء:قصدك انى فاضية صح متشكرة اوى
خالد: فى ايه يا ولاء هو كل كلمة هقولها هتمسكى فيها
ولاء: واضح انك مش مبسوط من مكالمتى ليك عموماً اسفه على الازعاج سلام(وقفلت الخط)
خالد لنفسه: ايه المجنونة دى هو حد جه جنبها !!! اصلاً مش وقتها خالص
*_____________________________________________**___________________________*
فى جامعة احمد وفيروز ...
فيروز : احمد ياريت متصاحبش اياد ده
احمد: فى ايه يا فيروز حاطه الواد فى دماغك ليه
فيروز : انا محطتوش فى دماغى هى اللى حاطتنى فى دماغه
احمد : نعم !!! انتِ بتقولى ايه
فيروز : مقولتش
احمد: لا قولتى الواد ده بيعاكسك او بيضايقك
فيروز: بصراحه اه عاكسنى قبل كده وضايقنى قبل ميتعرف عليك
احمد: طيب وبعد ما صاحبنى حصل منه حاجه
فيروز: بطريقه غير مباشرة
احمد:ومقولتليش ليه
فيروز : خوفت تعمل مشكله وهو عيل تافه ميستهلش
احمد: تمام حسابه معايا بعدين .. يالا خلينا نغور من هنا
وروحوا .....
*_____________________________________________**___________________________*
فى بيت خالد :
ايمن بيكلم اياد فى التليفون ...
اياد: يعنى قالك حاجه
ايمن: يا عم مانت عارف خالد بيعمل فيها ابويا قال كلمتين وفضينا الموضوع
اياد:انا مش عارف ياد انت طالع لمين خالد اخوك غيرك خالص
ايمن: كل واحد وله شخصيته فكك فكك ، عملت ايه مع البت اللى معاك فى الجامعه
اياد: اقولك حاجه ومتتريقش ، انا شكلى حبيتها
ايمن :ههههههه حبيتها هههههه كنت شاكك والله
اياد: انت بتضحك ليه دلوقتى
ايمن: بضحك على خبتك التقيلة من امتى واحنا بنحب بنات ماشيين معاهم
اياد: وانت مين قال لاهلك انى صاحبتها البنت لحد دلوقتى مش مديانى ريق حلو
ايمن:يا ابنى اصبر وهى هتقع ومع الوقت هتتأكد انها شمال
اياد:صدقنى شكلها مش كده خالص وبعدين انا بقالى اكتر من شهر بحاول معاها وهى مش مهتمه خالص
ايمن: شُغل بنات يا عم هو انا اللى هقولك يا يوده
اياد: ياااد انت افهم با بهيم احنا عرفنا بنات شمال كتير وبقينا نقدر نعرف البنت المحترمه من الشمال
ايمن:انت عايز دلوقتى قرفت اهلى بام البت دى
اياد:جتك القرف وانت سادد نفسي اقفل يالا .. سلام
ايمن لنفسه : ياترى شكلها ايه دى اللى وقعت اياد على بوزه!!!!
هنا دخل خالد...
خالد: انت مبتروحش جامعتك ليه
ايمن:مين قالك لا طبعاً بروح بس انا مُعتمد على الكورسات اكتر
خالد:طب شد حيلك يمكن ربنا ينفخ فى صورتك وتدخل سلك النيابه ولو انى مش عارف واحد صايع زيك يبقى وكيل نيابة ازاى هههه
ايمن:انا كان نفسي ابقى ظابط واشتغل فى الاداب يالهوى ده انا كنت ههيص
خالد:نصيحة من اخوك الكبير سيبك بقى من الحورات دى صدقنى يا ايمن الولد زى البنت لازم يحافظ على قلبه للبنت اللى يحبها بجد ويجوزها ، البنت اللى بتصاحب كتير سمعتها بتبوظ كذلك الولد ، يعنى لو اتقدمت لواحده وابوها عرف كل بلاويك هيوافق عليك اكيد لا
ايمن : يا عم خالد انا لا بتاع حب ولا بتاع جواز وحتى لو اتجوزت لسه بدرى بتاع ٩ سنين اكبت نفسى ليه بقى
خالد: ربنا يهديك امك لو عرفت بلاويك دى هتطب ساكته
ايمن:هههههه بلاوى ايه بس انت اللى مكبر الموضوع انا اخرى مع البنت خروجه وفسحه متخفش
خالد:ربنا يهديك
ايمن:طب سلام بقى عشان نازل الكورس
*_____________________________________________**___________________________*
فى بيت فريدة ....
فيروز : ايه يا دودو سرحانه فى ايه كده
فريدة : هااا امممم ولا حاجه
فيروز : لا بجد مالك
فريدة : اصل عبدالرحمن ابن عمك مصطفى اللى كان متقدملى
فيروز تقاطعها: ايه وافقتى عليه
هنا دخل احمد ....
احمد: ايه ده اللى وافقتوا عليه
فريدة: كويس اوى انك جيت يا حمادة اقفل الباب عشان احكيلكوا على حاجه مهمة
احمد وفيروز : خير
وحكت فريدة كل اللى حصل مع عبد الرحمن
احمد: انتِ ازاى يا فريدة تقوليله حوار التعب ده انتِ عارفه ان بابا مبيحكيش لحد
فيروز:استنى بس يا احمد مش يمكن ميبقاش عنده مانع
فريدة: انا لما قولتله كده قولت عشان هو الح عليا وانا كنت زهقت من الحاحه
احمد:هو انتِ موافقه عليه
فريدة:لأ
احمد:حصل خير متزعليش نفسك
فيروز:هو ايه اللى لأ ، ماله عبد الرحمن ايه عيبه
احمد بص لفيروز نظرة غاضبه: فى ايه فى فيروز ما هى حرة حتى لو مفيهوش عيب مش عيزاه ايه الغلط فى كده
طبعاً فيروز كانت فهمت وسكتت
بعد شوية سمعوا صوت امهم بتنادى وكان عالى جداً
فاطمة : يا فريدة يا احمد يا فيروز الحقووووووونى .....