حب لا ينتهى

الحلقة الثالثة

دخلت دكتورة بتشتغل فى المعمل وقالت : ايه ده مش معقولة خالد !!!!
خالد : مين ؟!!! ولاء !!! ( ولاء جارة قديمة لخالد )
ولاء : يااااه يا خالد وحشتنى جداً عامل ايه وطنط امينة وايمن عاملين ايه
خالد : تمام الحمد لله كلنا بخير انتِ اخبارك ايه وبباكِ ومامتك واخواتك عاملين ايه
ولاء: تمام الحمد لله بس بابا تعيش انت
خالد : البقاء لله ربنا يرحمه
ولاء: وخلود عامله ايه وحشانى اوى
خالد: خلود اتجوزت وسافرت مع جوزها
ولاء: بجد الف مبروك ربنا يسعدها
خالد: الله يبارك فيكِ بس انتِ بتعملى ايه هنا
ولاء : انا بشتغل هنا دكتورة تحاليل
هنا دخلت فريدة اللى لفتت انتباه خالد جداً لدرجة انه مكنش سامع ولاء بتقول ايه
بعد ما فريدة دخلت قعدت وكان بتقرأ فى الملف الطبى بتاعها
ولاء لخالد : ايه يا خالد روحت فين كده انا بكلمك
خالد: سورى يا ولاء معاكى
ولاء : معايا !!! طيب عن اذنك عشان عندى شغل وابقى اسأل سلام
بعد ما مشيت ولاء .....
قعد خالد قصاد فريدة ومكنتش واخدة بالها منه اصلاً لكن خالد مكنش قادر ينزل عينه من عليها لدرجة انه سرح تماماً فى كل تفاصيلها لفتت انتباهه براءة وشها ودمعه فى عينها مش عارف دمعة فرح ولا حزن ومن شدة سرحانه مخدش باله ان مامته خرجت وكان زعلان جداً ان مامته خلصت ومضطر يمشى بس هو عرف يتصرف ....... .....
خالد/ماما تعالى اوديكِ كافتريا المستشفى لحد ما اخلص حاجه فى الحسابات
امينة/هتتأخر عليا
خالد/ لو تعبانه يالا اروحك يا حبيبتى
امينة/ لا يا ضنايا انا بس عايزة اروح عشان اجهزلكوا غدا
خالد/ ريحى النهاردة وهنجيب اكل من بره
وصل خالد مامته الكافتريا ورجع على المعمل وكان بيقول لنفسه / يا ترى البنوته دى بتعمل ايه هنا دكتورة ولا عيانه ولا ايه وليه حزينة كده وياترى كانت سرحانه فى ايه ولا مستنيه مين خيبة لا تكون متجوزة
وصل خالد المعمل بس للاسف ملقاش حد ... ... وهو ماشى سمع صوت بيقول : هههه والله يا ديدا انتى غريبة امال لو مكنتيش يا بنتى دكتورة كنتِ عملتِ ايه بس ..
كان صوت محمود بيكلم فريدة
خالد مشى وراهم ... لحد ما وصولوا المكان اللى بيتعمل فيه رسم القلب وقال لنفسه / اكيد ده بباها وعيان وهى بتجى معاه عشان دكتورة والله وصبرت ونولت ياااد يا خالد بنت زى القمر ودكتورة ،، فووق يا اهبل ايه اللى بتقوله ده انت تعرف عنها حاجه اصلاً وفاق على صوت فريدة بتقول / بابا تعالى معايا متسبنيش لوحدى
هنا صُعق خالد وقال لنفسه / دى اكيد عيانه لا لا ممكن بتعمل فحص طبي كامل
خلصت فريدة رسم القلب كل ده وخالد مستنى ونسي مامته خالص ولما افتكر انه سايبها فى الكافتريا لوحدها جاتله فكرة وهى انه خلى فريدة خارجة وخبط فيها مُتعمد فطار فايل طبى من ايد فريدة اعتذر خالد وناولها الفايل ومشى وطبعاً قدر يعرف من الفايل اسمها بالكامل ورقم الفايل الطبى بتاعها فى المستشفى
*_____________________________________________**___________________________*
فى الكافتريا ..
خالد/ انا اسف يا ماما اتأخرت عليكِ
امينة/ كل ده يا خالد
خالد/ معلش والله غصب عنى يالا بينا ... ومشيوا
*_____________________________________________**___________________________*
فـــى جــامعة احمد وفيروز...
اياد(زميلهم فى الكلية بس هو فى ٥ صيدلة) : لو سمحتى يا انسة
فيروز : افندم !!
اياد : انا هنا معاكِ فى الجامعة
فيروز : تشرفنا اى خدمة
اياد: بالراحة بس انا بس شوفتك كتير اوى ومعجب بيكِ وعايز اتعرف يعنى
فيروز : نعم !! ميرسي اوى بس انا مبتعرفش
اياد : ولا بتصاحبي
فيروز مردتش عليه ومشيت وسابته لكن هو فضل ماشي وراها وبيقولها كلام يضايقها راحت عند احمد اخوها ونادته من وسط اصحابه لانهم كانوا خلصوا وعايزة تروح
فيروز: يالا يا حمادة نروح انا زهقت
احمد: اصبري شوية يا زوزا هقعد مع صحابي شوية ونروح
فيروز: انت شارب سجاير يا احمد ( هى شمت ريحته )
احمد لسه هيتكلم فيروز قالتله : انا ماشية سلام
ومشيت واياد وراها : حلقلك الواد هههه والله تستاهلى عشان بتكدبى قال مبصاحبش قال هههههه ده انتى لافة ودايرة وركبت فيروز التاكسي وروحت وهى بتعيط بس مرضيتش تطلع غير لما احمد يوصل عشان مامتها متشكش فى حاجه
*_____________________________________________**___________________________*
فى بيت خالد ....
خالد قاعد سرحان ومشغول بفريدة وكل شوية يقول اسمها كأنه بيحفظه ودخلت عليه مامته وهو بيقول لنفسه بصوت عالى : اسمها فريدة وهى فعلاً فريدة اول مرة بنت تشدنى كده
امينة / ايه يا خالوود بتكلم نفسك
خالد : الظاهر كده انى اتجننت هههههه
امينة : بعد الشر عليك ، قولى مين دى اللى شدتك
خالد : بنوتة يا ماما زى القمر كلها براءة وطفولة وعفوية شوفتها النهاردة فى المستشفى
امينة / ودى تعرف عنها ايه
خالد/ ولا اى حاجة يا ماما
امينة/ يعنى يوم ما تعجبك واحدة تطلع متعرفش عنها حاجه
خالد/ انا عارف ايه الحظ ده
امينة/ طب يا ابنى دورلك على واحدة تانية خلينى افرح بيك
خالد/ مش عارف يا ماما اصل البنت دى شاغله تفكيري خالص وان شاء الله هعرف اوصلها
امينة/ ربنا يوفقك
*_____________________________________________**___________________________*
فــى بيت فريدة :
فيروز فضلت مستنية احمد فى مدخل العمارة عشان متدخلش من غيره وهنا وصل بباها واختها
فريدة : فيروز ايه يا حبيبتى فى ايه مالك قاعده كده ليه
محمود : انتِ متخانقة مع مامتك
فيروز : لا مفيش حاجه انا مستنية حمادة راح يصور ورق مهم لازم نذاكره النهارده
محمود : تقومى تستنيه هنا ماتطلعى فوق قومى يالا
فيروز : مانا يا بابا خوفت اطلع لوحدى ماما تتخض عشان متعوده اننا بنرجع سوا
فريدة بصوت واطى: مالك يا فيروز شكلك معيطة
فيروز : هقولك لما نطلع
طلعوا ودخلوا الشقة ... ....
فاطمة : حمد الله على السلامه ، ايه ده فيروز ؟ فين احمد اخوكِ
فيروز : بيصور ورق وهيجى
دخلت فيروز وفريدة اوضتهم .... ....
فيروز بعتت مسج على الموبايل لاحمد عشان تفهمه اللى حصل
فريدة : مالك يا فيروز شكلك مخطوف كده ليه
فيروز : مخنوقة اوى
فريدة: طب احكيلى مالك
فيروز: واحد زميلى فى الجامعه عاكسنى النهاردة وقالى كلام كتير مستفز وخارج
فريدة: طب مقولتيش لاحمد ليه
فيروز: احمد عصبي وهيروح يتخانق معاه وممكن الموضوع يكبر وده عيل تافه ميستهلش
فريدة: طب بصى يا زوزا يا حبيبتى انت متحاوليش تحتكى بالواد ده والمكان اللى موجود فيه متقفيش فيه ولا تدخليه اصلاً وان اعترض طريقك كملى ومتوقفيش اوك يا حبيبتى
فيروز: ماشي يا ديدا ، اه صحيح عملتوا ايه فى المستشفى
فريدة : زى كل شهر يا زوزا
فيروز : ما تعملى العمليه يا فريدة خايفه من ايه احنا كلنا معاكِ وحواليكِ
فريدة : خايفه تكون سبب انى مكونش معاكوا وحواليكوا
فيروز: بعد الشر متقوليش كده ، وبعدين انتِ عارفه ان الموت ده بتاع ربنا والواحد ممكن يموت وهو نايم فى سريره من غير عملية
فريدة : هههههه ايه حكايتك انتِ ونيرة انتِ تدينى محاضرة عن الموت وهى تدينى محاضرة عن المرض والرضى بالقضاء والقدر
فيروز : نيرة ؟ ياااااه انا مشوفتهاش من زمان اوى
فريدة : خلاص نستأذن ماما ونزورها النهارده بالليل
فيروز : اوك ماشى
*_____________________________________________**___________________________*
فــى احدى الكافتريات
ايمن : ايه يا عم مالك سرحان كده فى ايه كده
اياد : فى بنت معايا فى الجامعة عجبانى اوى
ايمن : انت بتحب ياااد هههههههه
اياد : حبك بُرص بقولك عجبانى عايز اصاحبها
ايمن : طب متصاحب حد ماسك فيك
اياد : بُص بصراحه عمرى ما سمعت حد بيتكلم عليها كلمة ومشوفتهاش بتكلم ولاد الا ولد واحد معرفش يبقالها ايه
ايمن : تصدق يالا انك حمار ، متسأل حد من صحابها مين اللى هى ماشيه معاه
اياد : ايوة صح انت صح
ايمن : طول عمرى صح بس على فكرة لو سألت عليها هتلاقى عدادها مهرى ههههههه
اياد : بقولك مبتكلمش حد خالص
ايمن : هو انا اللى هفهمك يا اياد ما نص البنات مبتكلمش حد فى مكان دراستها او شغلها عشان الناس تقول عليها محترمة ومقضياها بره
اياد : اياً كان يعنى هو انا هتجوزها
*_____________________________________________**___________________________*
بالليل فى بيت نيرة... ....
فيروز وفريدة لسه هيضربوا الجرس سمعوا صوت نيرة عالى(بتكلم الموبايل) ......
نيرة : حرااااااام عليك بقى عايز ايه مش كفايه اللى عملته
نيرة : خلاص انا مبقتش عايزة منك اى حاجه ولا تزورنى ولا ازورك خليك فى اللى انت فيه .....
فريدة لفيروز: الظاهر كده ده مش وقت مناسب للزيارة يالا نروح
فيروز: طب استنى اكلم احمد يرجع ياخدنا يارب مايكون بعيد