حب لا ينتهى

الحلقة التاسعة

اول ما فريدة واحمد وفيروز سمعوا صوت مامتهم طلعوا يجروا من الاوضة ...
لقيوا بباهم مُغمى عليه حاولوا يفوقوه لكنه مافقش وكان الحل ان احمد يكلم الاسعاف
جه الاسعاف اسعفه ونقلوه المستشفى وكلهم راحوا معاه .. فاطمه ركبت معاه الاسعاف واحمد وفيروز وفريدة ركبوا العربيه وراهم ...
فى المستشفى :
الدكتور: هو عنده السكر !!
فاطمة:لا معندوش
الدكتور:بس دى كانت غيبوبة سكر ، واضح انه مريض بالسكر بس مكنش يعرف
كلهم فى نفس واحد: غيبوبة سكر !!!!
فاطمة:طب وهو فاق من الغيبوبة دى ولا لا !!
الدكتور:اه الحمد لله احنا عملنا اللازم وهو هيستريح هنا شوية وهيروح معاكوا ان شاء الله
بعد شوية دخلوا يطمنوا عليه وهما قاعدين معاه :
فريدة:مالك يا فيروز لونك مخطوف ليه كده
فيروز:عندى الم فى جنبى هيموتنى
فريدة:بعد الشر عليكِ الم ولا مغص
فيروز :مش عارفة يا فريدة شوية وهيخف
بعد شوية بدأت فيروز تفقد اعصابها من شدة المغص وصوتت من الالم
بعد ما الدكتور كشف عليه قال : لازم تعمل عملية الزايدة حالاً
اتنقلت فيروز للعمليات وعملت العملية واتحجزت فى المستشفى اسبوع لان الزايدة كانت انفجرت وسببت تسمم ..
فريدة اتصلت بنيرة:
فريدة:الو ازيك يا نيرة
نيرة:تمام الحمد لله وانتى
فريدة:الحمد لله ، عيزاكى تاخديلي اجازة لاخر الاسبوع
نيرة:ليه يا فريدة خير !!
فريدة:بابا كان تعبان جاله غيبوبة سكر
نيرة:هو عنده سكر اصلاً
فريدة:بقى عنده ، وفيروز عملت عملية الزايدة وهتتحجز اسبوع وانا لازم اكون معاهم
نيرة:الف سلامه عليهم ده كله حصل امتى !!!
فريدة:من حوالى ست ساعات
نيرة:الف سلامه وبكرة هجيلك ان شاء الله هما فى مستشفى ايه
فريدة:مستشفى المعادى
نيرة:بكرة هجيلك ان شاء الله
وخلصوا المكالمه
*_____________________________________________**___________________________*
تانى يوم الصبح فى شغل فريدة ونيرة:
خالد:صباح الخير (واداله الوصل اللى هيستلم بيه النتيجه)
موظف الاستقبال:صباح النور، طب اتفضل حضرتك استريح لحد ما اطبعها
خالد:هى دكتورة فريدة مجتش
موظف الاستقبال:لا لسه
خالد:طب هتجى امتى
موظف الاستقبال:لا معرفش هى مواعيد الشيفت بتاعها من ٩-٤ غير كده معرفش
خالد:اوكى متشكر
هنا دخلت نيرة وخالد راح عندها ....
خالد:لو سمحتِ يا انسة
نيرة بنبرة سريعه : خالد !!!!
خالد:حضرتك تعرفينى ؟؟
نيرة:اه ، لا لا بصراحة اه اعرفك فريدة حكتلى عن اللى حصل منك
خالد:كويس اوى وفرتى عليا كلام كتير هى هتيجى امتى
نيرة:هى مش هتجى النهاردة ولا الاسبوع ده خالص
خالد بصدمه:ولا الاسبوع ده !!!!! ايه الحظ ده بس ، طب مش هتجى ليه
نيرة:عندها ظروف بباها تعبان واختها عملت عمليه
خالد:ممكن تساعدينى انا محتاج حد يساعدنى عشان فريدة مش مديانى فرصة هى مرتبطه !!
نيرة:توء مش مرتبطه
خالد: طب بُصى انا مش هعطلك ممكن تاخدى رقم موبايلى ووقت ما تكونى فاضية تكلمينى
وخدت نيرة رقم خالد وقررت انها تساعده لان نفسها صاحبتها تحب وتتحب
*_____________________________________________**___________________________*
فى جامعة احمد وفيروز :
رغدة بمياصة : هاااى ازيك
احمد: مردش هو عمل كده O.o
رغده: مش انت برضه اخو فيروز
احمد:اه انا
رغدة:انا صاحبتها ، هى مجتش النهاردة ليه
احمد:عندها ظروف ومش هتعرف تجى
رغدة:اوكى ميرسي قولها رغدة بتسلم عليكى
احمد لنفسه : بقى المايصة دى صاحبت فيروز !!!!!
احمد كان واقف مع اصحابه وجه اياد فضلوا يتكلموا شوية ويهزورا بس احمد مداش اياد وش
اياد:ايه يا معلم اللى واخد عقلك بتحب ولا ايه
احمد: لا مبحبش
اياد:ليه بس ده حتى البنات على قفا مين يشيل
احمد: متعرفنى على اختك يمكن تطلع حلوة
اياد بصدمة: ايه يا احمد عيب اللى بتقوله ده
احمد بزعيق : ولما انت عاملى فيها دكر وعارف العيب بتعاكس اختى ليه !!!
اياد بصدمة اكبر : حتى لو حصل يعنى انا مكنتش لسه صاحبتك
احمد : وانت جيت صاحبتنى ليه عشان ابقى كوبري لحضرتك
اياد : والله ما حصل منى حاجه وحشة انا كل اللى قولتهلها انى عايز اتعرف عليها وبعد كده اعتذرتلها لما انت جيت علينا وبعدها اتصاحبنا وانا مقربتلهاش من بعدها
احمد : والمفروض انى اصدقك واكدبها
اياد : براحتك يا احمد تصدق او لا (ومشى)
*_____________________________________________**___________________________*
فى بيت نيرة :
نيرة فضلت محتارة تكلم خالد ولا لا وفى النهاية اتصلت
نيرة: الو ، خالد معايا
خالد : ايوة مين حضرك
نيرة: نيرة صاحبة فريدة سورى نسيت اقولك اسمى واحنا فى المعمل
خالد: لا ولا يهمك انا مستنيكى اصلاً
نيرة: انا مكنتش هتصل ، خوفت تشك ان فريدة عارفه وتاخد عنها فكرة وحشة او تعرف بعد كده ان ساعدتك وتزعل منى
خالد: انا متأكد انها متعرفش وتأكدى ان كلامنا ده محدش هيعرف بيه بس انا فعلاً محتاجك تساعدينى
نيرة: اوكى بس انا ايه اللى اقدر اعمله
خالد: بصى انا عارف كويس انها صعب تصدقنى بس انا .....
نيرة تقاطعه: حتى لو صدقت مش هترتبط بيك
خالد : هو انا وقيع اوى كده
نيرة: هههههه لا طبعاً مقصدش فريدة رافضه فكرة الارتباط تماماً
خالد : ليه
نيرة:عشان ظروفها الصحية
خالد : لا انا هغير فكرتها ،طب انت مصدقة انى بحبها بجد
نيرة:اهو بعد بحبها بجد دى صدقتك
خالد: طب ازاى فريدة تصدقنى
نيرة: لما فريدة ترجع الشغل هعزمها على خروجه فى اى مكان وانت تكون موجود واول مانا اقوم تجى تقعد معاها وتقولها كل اللى فى نفسك بس طبعاً هتقول انك كنت ماشي ورانا بالعربية
خالد: طب مانا قولت ومصدقتش
نيرة: قول تانى وتالت هتخسر ايه يعنى واالاقناع سيبه ليا انا اتفقنا
خالد:اوكى اتفقنا
نيرة: عن اذنك انا مضطرة اقفل
خالد: اوكى بس كلمينى طمنينى عليها
نيرة: حاضر مع السلامه

*_____________________________________________**___________________________*
تانى يوم فى شغل خالد :
ادهم: ايه ده يا باش مهندس ايه اللى جابك هنا انت اتحلقلك ولا ايه
خالد:فكك منى يا ادهم مش طلباك خالص
ادهم: الله مالك يا خالد في ايه وايه لوية البوز دى
خالد: مانت نبرت فيها .. هى كمان خدت اسبوع اجازة من شغلها
ادهم: ههههههههه انا اللى نبرت فيها ولا انت اللى فقرى ههههههه
خالد:انت بتضحك ليه يالا انت
ادهم:اصلها صدفه عجيبة جداً الاسبوع اللى انت تاخده اجازة هى كمان تاخده اجازة
خالد:بوزك فقر مش انت اللى خدتهالى بس عموماً انا عرفت صاحبتها وكلمتها
ادهم: انت اهبل ياااد رايح تصاحب صاحبتها
خالد: انت اللى عبيط وحمار انا كلمت صاحبتها عشان تساعدنى
ادهم: اه هههههه مانا قولت كده برضه ، طب صاحبتها دى حلوة
خالد:ليه ناوى تخطب
ادهم: والله لو حلوة وكويسة مفيش مانع يمكن نبقى عدايل ههههههههه
خالد:ادعيلى بس ربنا يعدلها
ادهم:هدعيلك بس لو ظبطت معاك ظبطتنى مع صاحبتها
خالد: بس ده معناه خطوبة وجواز مش صحوبية
ادهم: صحوبية ايه يا عم خالد احنا كبرنا على الحاجات دى
خالد: كده تمام
*_____________________________________________**___________________________*
فى الجامعة ..
اياد بيدور على فيروز وملقهاش فى الجامعة خالص فراح لرغدة
اياد: بقولك يا رغدة متعرفيش حاجه عن فيروز
رغدة بمايصة: ايه يا يوودة انت بتحب ولا ايه
اياد: اخلصى يا رغدة
رغدة : امممم هقولك بس ظبطنى مع اخوها
اياد: انتِ مش هاين عليكى تعتقى حد من الجامعة .. (بزعيق) اخلصى تعرفى حاجه عنها
رغدة: لا معرفش
اياد لنفسه: جتك القرف لولا الحوجه مكنتش كلمتك ابو شكلك
اياد راح لاحمد ..
اياد: على فكرة بقى انت مش جدع
احمد: ده اللى هو انا
اياد: يا سيدى حقك عليا انت واختك والله ماكنت اقصد
احمد: عايز ايه يعنى
اياد: يا احمد انت جدع وانا مش عايز اخسرك
احمد: مانا عارف انى جدع عشان كده قطعت معاك بس
اياد: فى ايه يا احمد انت هتعيش عليا ما قولت اسف
احمد: وانا قولتلك خلاص بس مينفعش نبقى اصحاب هيبقى دايماً عندى احساس انك بتبص لاختى
اياد: حقك تغير على اختك وانا احترمك على كده ومش هفرض نفسي عليك
ومشى ....
*_____________________________________________**___________________________*
فى شغل خالد ...
خالد اتصل بـ نيرة :
خالد: صباح الخير ازيك يا دكتورة
نيرة: صباح النور انا تمام ازيك انت
خالد: بخير ، اسف لو هعطلك عن شغلك واسف اكتر لو بزعجك
نيرة: لا مفيش ازعاج ولا حاجه احنا اخوات وعلى فكرة اطمن فريدة بخير انا كنت معاها امبارح
خالد: هههه ربنا يطمنك ، بس انا عايز اطلب منك طلب صغير
نيرة:اتفضل
خالد: عايز اسم المستشفى اللى اخت فريدة فيها وكمان رقم الاوضه
نيرة: ليه !!
خالد: بصراحة لحد دلوقتى مش عارف ليه بس هفكر كده واشوف ممكن اعمل ايه
نيرة:اوكى هما فى مستشفى المعادى ، اوضه ٣٠٤
خالد:سؤال اخير ، هى فريدة بس اللى مع اختها ولا فى حد تانى
نيرة:هى فريدة الـ ٢٤ ساعه مع فيروز ومامتهم بتروح وبتجى لانها قاعده مع بباهم فى البيت لانه تعبان برضه
خالد: تمام اوكى يا نيرة انا متشكر اوى
نيرة:العفو
خالد: فى رعاية الله.... وقفلوا
خالد قاعد بيفكر يعمل ايه وبيسأل نفسه هو خد اسم المستشفى ليه!! المهم انه جاتله فكرة حلوة اوى وقرر ينفذها اول ما يخلص شغل ، يا تري ايه هى الفكرة .........