حب لا ينتهى

الحلقة الرابعة عشر

محمود واحمد وفيروز سمعوا الصوت وجريوا على اوضة فريدة
محمود: فى ايه يا فاطمة مالها فريدة
فاطمة بتعيط :بصحيها مبتردش عليا ولقيت دم على المخدة
محمود : دم !!!
فاطمة : اتصرف البنت هتروح منى
محمود : احمد روح خبط على عمك ياسين اللى فى الدور اللى تحت وقوله اللى حصل خليه يجى بسرعه
احمد : حاضر يا بابا
فاطمة : ياسين مين البنت لازم تتنقل مستشفى
محمود : اصبرى يا فاطمة دكتور ياسين هيشوفها ممكن يكون ده من زعل مش عايزين نستعجل
فاطمة : يا برودك !!! البت غايبة الوعى وبتنزف وتقولى منستعجلش بت يا فيروز كلمى اي مستشفى يبعتوا اسعاف
فيروز : يا ماما اهدى بابا بيتكلم صح انا قبل ما اسيبها كانت زعلانة
فاطمة بانهيار : يا ناس دى مريضة قلب اى غلطة ممكن تروح فيها
(وهنا دخل دكتور ياسين واحمد ، بدأ دكتور ياسين يكشف على فريدة واول حاجه قاس الضغط)
ياسين: فريدة ضغطها عالى جداً والدم ده بسبب شعيرات فى منخيرها نزفت من علو ضغطها
فاطمة ومحمود فى نفس واحد: محتاجه تتنقل مستشفى
ياسين : للاسف اه هى حالتها مش خطيرة بس عشان ظروفها الصحية اُفضل انها تتنقل مستشفى
( وبالفعل اتنقلت فريدة للمستشفى وظبطولها الضغط واخدت مهدأ وعملت تحاليل واشاعات للاطمئنان على القلب وكل حاجه تمام وخرجت من المستشفى الصبح)
*_____________________________________________**___________________________*
الصبح فى شغل خالد:
ادهم : صباح الــ ...... بوزك ده ميوحيش بخير ، ايه اللى حصل
خالد: حصل كل خير
ادهم : امال مبوز ليه
(حكى خالد لادهم كل اللى حصل فى مقابلة فريدة)
ادهم : طب ما تمام اوى اهو فى قبول وهتكلمك عشان تقولك امتى تجى تقابل ابوها
خالد: ما هى المشكلة ان من ساعة ما مشيت وموبايلها مقفول
ادهم : بص هو منطقى يعنى انها مش من اول يوم تدلق زى الجردل وتكلمك حتى لو عايزة تكلمك من باب البرستيج تتقل عليك بس لو انت قلقان كلم صاحبتها
خالد : ما هى خلتنى اوعدها ان مهما كانت الظروف مكلمش صاحبتها او اختها
ادهم : امممممم البت دى مش سهلة
خالد : بت فى عينك ما تتكلم عدل عنها
ادهم : يا سيدى اسف بس هى مش سهلة باللى عملته ده هى كانت بتاخد حضرتك على قد عقلك
خالد : ايه !!! بتسكتنى يعنى !!! ازاى انا عارف بيتها وشغلها يعنى مش سهل تخلع منى
ادهم : اصبر يومين لو متصلتش روح لها شغلها
خالد : يومين :(
ادهم : هههههه مش مستحمل يومين يا كميلة
خالد : اه صحيح نسيت اقولك اللى حصل مع ولاء (وحكاله)
ادهم : انت لازم تقابلها او تكلمها حتى وتفهمها عشان متتعلقش بيك اكتر
خالد: عندك حق النهاردة هكلمها
*_____________________________________________**___________________________*
فـى بيت فـريدة:
فيروز: معلش يا ديدا مضطرة اسيبك واروح الجامعه عندى سيكشن مهم
فريدة : لا يا حبيبتى انا كويسة جداً الحمد لله وبكرة هنزل شغلى ان شاء الله بس معلش كلمى نيرة وفهميها اللى حصل
فيروز : اوكى انا نازلة سلام
فاطمة : ممكن اعرف كان مالك امبارح وايه وصلك لكده
فريدة : مفيش يا ماما كنت مخنوقة شوية
فاطمة : من ايه بس يا حبيبتى
(فريدة سكتت شوية وسرحت بس قررت انها تحكى لمامتها وحكت لها حوار خالد من اوله لاخره )
فاطمة : يا بنتى متحسبيها شوية بمشاعرك
فريدة : واظلمه يا ماما
فاطمة : اذا كان هو مش محملك اى مسئولية وبيقولك انه هيبقى مبسوط
فريدة: يا ماما هو بيقول كده عشان الممنوع مرغوب
فاطمة : خلاص هو يجى يقابل ابوكى ونعمل خطوبة ونشوف بقى فى فترة الخطوبة هيحصل ايه
فريدة : لا يا ماما
فاطمة : يا بنتى طاوعينى واسمعى كلام امك تكسبى خلينا نعمل خطوبة اهى دى بقى مفيهاش ظُلم ، قولى موافقة بقى ريحي قلب امك
فريدة : ماشى يا ماما لو كان ده هيريحك
فاطمة : ان شاء الله انتِ اللى هتكوني مرتاحه ده انا نفسي اعمل فرح لمجرد انك غيرتى فكرتك عن موضوع الارتباط
فريدة : ماما احنا قولنا خطوبة مؤقتاً
فاطمة : خطوبة خطوبة انا راضية بركاتك يا شيخ خالد
*_____________________________________________**___________________________*
فى جامعة احمد وفيروز :
رغدة واقفة مع فيروز واصحابها شافت اياد استأذنت منهم وراحت له
رغدة : صباح الخير يا اياد
اياد: صباح النور اذيك يا رغدة
رغدة : تمام الحمد لله ، انت تعرف ان انا وايمن اتصاحبنا
اياد : والله لحقتوا بالسرعة دى ؟!!
رغدة : يعنى قربنا لبعض واتفقنا بسرعه واتصاحبنا
اياد: مبروك
رغدة : انا عايزة اسألك عن ايمن تعرف عنه ايه
اياد: اعرف عنه كل حاجه بس اكيد عمرى ما هقول حاجه وحشة على صاحبى
رغدة: بس انا بنت وانت واجب عليك تنصحنى وتوعينى
اياد: انتِ طول عمرك ماشية بدماغك يا رغدة وياما نصحتك تحافظى على نفسك وعلى سمعتك وانتِ مسمعتيش الكلام اشمعنى دلوقتى طالبة النصيحة منى
رغدة: عشان ايمن صاحبك واكيد انت تعرفه كويس
اياد: ماللى حذرتك منهم قبل كده كنت اعرفهم كويس
رغدة: اللى فات حاجه وايمن حاجه انا بحبه بجد
اياد: اوووووبس انتِ برضه عايزة ايه
رغدة : هو ايمن كويس ، شخص اثق فيه
اياد: اشمعنى
رغدة: بصراحة كده هو طلب منى اروح معاه بيته وانا محتارة
اياد: محتارة !!! تــيــت (قال كلمة عيب :D )
رغدة : ايه ده يا اياد عيب اللى بتقوله ده
اياد: واللى انتِ بتقوليه ده مش عيب!! محتارة فى ايه !! واحد مصاحبك مقدرش اقول بيحبك بيقولك تعالى بيتى هيكون عايزك هناك ليه هتقروا قرآن سوا واللى هتصلوا جماعه
رغدة: انت قصدك ان ايمن مش كويس
اياد: انا مقصدش ايمن بس اى ولد يطلب حاجه زى كده يبقى نيته مش خير
رغدة : اسمع بس انا عــ......
اياد قاطعها : خلاصة الفكسان اللى بتقوليه ده انك لو روحتى هتبقى رخصتى نفسك زيادة عن اللزوم وابقى اشربى بقى نتيجة غلطك ، سلام
*_____________________________________________**___________________________*
فى شغل خالد :
خالد كان خلص شغل ونزل عشان يروح وبعد ما ركب عربيته قرر انه يكلم ولاء ..
خالد: اذيك يا ولاء
ولاء : تمام يا خالد الحمد لله انت عامل ايه
خالد: بخير كنت عايز اتكلم معاكى فى موضوع بس اتمنى يفضل بينا عشانك انتِ
ولاء : موضوع ايه
خالد : موضوع الخطوبة فى حاجه انتِ لازم تفهميها
ولاء(بتحاول تخبى فرحتها): حاجه ايه
خالد: انى بعزك جداً وبحترمك جداً جداً انتِ فعلاً غالية عليا بحكم الجيرة العشرة بس .......
ولاء(بقلق): بس !! بس ايه يا خالد
خالد : بس انتِ زى خلود اختى
ولاء(بصدمة): اختك !!!! امال ليه اتقدمتلى
خالد : ده سوء فهم من ماما حقك عليا يا ولاء متزعليش
ولاء(بكبرياء): هههههه ازعل من ايه بس انت اصلاً اخويا وانا كنت مُحرجه ارفضك بحكم الجيرة والعشرة برضه وبعدين انا اصلاً مرتبطة
خالد(بارتياح واستغراب): ربنا يكملك على خير ان شاء الله ومتنسيش تعزمينا
ولاء : اكيد ان شاء الله
خالد: خلى بقى مامتك تقول لامى انك انتِ اللى رفضتينى ماشي
ولاء : اووكى معلش مضطرة اقفل سلام(قفلت ولاء وانهارت من العياط)
*_____________________________________________**___________________________*
فى بـيـت نيرة :
كوثر (جدة نيرة) : انا نفسى افرح بيكِ واطمن عليكى قبل ما اموت
نيرة: بعد الشر متقوليش كده
كوثر: طب انتِ متقدملك عرسين والاتنين بصراحة احسن من بعض اختارى واحد منهم ولا انتِ فى حد تانى
نيرة: ولا تانى ولا تالت والله يا ماما بس مين العرسان دول
كوثر:الاول اسمه مُعتصم محاسب فى شركة هو تبع ابوكى وابوكى هو اللى طلب منى اكلمك عنه
نيرة: مُعتصم !! الاسم ده مش غريب عليا اسمه مُعتصم ايه
كوثر : والله ما فاكرة يا بنتى
نيرة: والتانى !!
كوثر:محمد ابن خالك ممدوح
نيرة : ههههه محمد ابن خالى
كوثر : وبتضحكى ليه
نيرة: اصل محمد ده طول عمره بيتكسف منى ومبيرضاش يتكلم معايا خالص
كوثر: اهو اللى بيتكسف كبر واتجرأ وبقى عايز يخطب
نيرة: خلاص يا ماما ادينى بس وقت افكر
كوثر: ماشى يا بنتى ربنا يريح قلبك وفكرك
*_____________________________________________**___________________________*
فى سنتر كورسات :
احمد وفيروز خلصوا كورس ..
احمد: هتعرفى تروحى لوحدك
فيروز: لا الغول هياكلنى اكيد يعنى اعرف
احمد: ابو استظرافك المهم انك هتروحى لوحدك
فيروز: ماشى يا عم بس ليه
احمد: رايح اقابل كريم ابن خالك
فيروز(بلهفة):كريم !! بس انا لو روحت لوحدى امك هتقلق يا عم وهتعمل مناحه
احمد: مانا لازم اقابله
فيروز: ليه يعنى خير
احمد: معرفش هو قالى عايز اقابلك ضرورى
فيروز: خلاص بقى اجى معاك ونروح سوا
احمد: افرضى عايزنى فى حاجه سر
فيروز: هطلب ايس كريم واقعد فى ترابيزة لوحدى
احمد: ههههههه لا مينفعش استحملى وروحى لوحدك
فيروز: انت هتقابله فين
احمد: هو قالى هيعدى عليا هنا بعربيته
فيروز: يا اخى طب ما توصلونى بالعربية وبعدين تخرجوا بدل ماخد تاكسى
احمد: تصدقى ماجتش فى بالى
فيروز : عشان انا مش فى بالك
احمد : طب روحى اقعدى جوا لحد ما يجي
فيروز: اوكى
*_____________________________________________**___________________________*
فى بيت نيرة ...
نيرة اتصلت بـ فريدة
نيرة: عاملة ايه دلوقتى
فريدة: احسن الحمد لله هنزل الشغل بكرة
نيرة: استريحى كام يوم يا فريدة
فريدة: لا انا مبحبش قعدة البيت
نيرة: اللى يريحك يا حبيبتى ، كنت عايزة اخد رأيك فى حاجه
فريدة : خير
نيرة: انا متقدم لى عريسين
فريدة: اتنين مرة واحدة ، طب انا اعرف حد فيهم
نيرة: الاول مُعتصم مُحاسب ابن صاحب بابا والتانى محمد ابن خالى ممدوح
فريدة: مش محمد ده اللى بيشتغل مُترجم فى شركة
نيرة: اه هو
فريدة: طب انتِ عارفة مُعتصم ده
نيرة: اه بيتهيألى بس هو فى مُشكلة دلوقتى
فريدة: مُشكلة ايه
نيرة: مُعتصم ده تبع بابا ولو رفضته بابا هيقول امك هى اللى وزتك عشان تجوزى ابن ابنها ولو وافقت ماما هتقولى عشان تبع ابوكى
فريدة : لا لا مامتك مش هيفرق معاها محمد من مُعتصم هى هتبقى عيزاكى مبسوطه ومطمنه عليكى بس قوليلى بقى انتِ عايزة مين
نيررة: محمد ابن خالى طبعاً اللى نعرفه احسن من اللى منعرفوش
فريدة : هو ده السبب بس
نيرة: دلوقتى ازاى اوافق عليه من غير ما بابا يزعل
فريدة: بُصى يا ستى ، انتِ هتقولى لمامتك انك موافقة على محمد بس مش عايزة بباكى يزعل فهى تطلب من خالك يأجل موضوع محمد لحد ما موضوع مُعتصم يخلص وبباكى ينساه بعد كده محمد يروح لبابكى وان شاء الله والف الف مبروك ههههههه
نيرة: ههههههه تسلم دماغك يا ديدا ، هتعملى ايه فى موضوع خالد
فريدة: انا حكيت لماما واقنعتنى وان شاء الله اسبوع كده ويجي يقابل بابا
نيرة: يعنى هنتخطب سوا الله يا ديدا ويا سلام بقى لو نتجوز فى يوم واحد
فريدة: هههههه قولى يارب يالا بقى انا هقفل عشان النوم كبس عليا
نيرة: بدرى كده يالا تصبحى ع خير سلام
*_____________________________________________**___________________________*
فى سنتر الدروس ...
فيروز: ايه يا عم هو كريم هيخللنا ما تتصل بيه تشوفوه فين
احمد: استنى كده اكلمه
فيروز: هاااااا
احمد: مبيرودش
فيروز: مواعيد فالصو كان زمانى نمت ولا ذاكرت انا هستى جوا
احمد: ماشى
(دخلت فيروز جوا تستنى لحد ما كريم يجى وفجأة سمعت صوت من ورا ضهرها بيقول)
الصوت : اذيك يا فيروز !!