جيت راجع البيت من الشغل لقيت ايان ورام ببكوا نزلت ليهم بخوف وقلت: في شنو ي بابا؟.
ايان : ماما ماما.
قمت بسرعة دخلت ليها لقيتها في الحمام بتستفرغ مشيت ليها بسرعة ساعدتها وقفت ضميتها علي وقلت: في شنو ي ماما.
هزت راسها بﻷ وقالت: اكلت كتير بس.
هزيت راسي بطيب فكتني وطلعت لايان ورام شالتهم في حضنها وهدتهم مشيت جبت ليها عصير قالت: ما عايزة يا رءوف انا استفرغت لانو بطني مليانة شديد.
هزيت راسي ورجعته المطبخ ورجعت ليهم لقيت رام بتتكلم: ماما ويسة؟.
نور بوستها وقالت: انا كويسة يا ماما ما تخافي.
دخلت الحمام ادوشت وطلعت لقيت نور بتخت في الغداء قعدت الاولاد وقعدت هي مشت على المرسم قلت: نور تعالي يلا حبيبي.
نادت وقالت: رؤوف ما جيعانة قلت ليك.
اتنهدت وخليت الاولاد يتغدوا ولميت الصفرة ومشيت ليها كانت بترتب في الفرش ضميتها وقلت: نونو مالك حبيبتي.
ابتسمت وقالت: ولا حاجة.
المساء كانت بتعشي في الاولاد بدري لانو كانوا نعسانين قمت اجهز انا العشاء طلعت اخت على الصفرة لقيتها طالعة من غرفتهم ابتسمت وقلت: يلا يا نور العشاء.
هزت راسها بﻷ وقالت: ما عايزة.
ختيت من يدي ومشيت وقفت قدامها قلت: نور ممكن اعرف مالك؟
- مالي انا يا رءوف.
-- دا الحابي اعرفه يا نور ما ملاحظة انو ليك شهر تصرفاتك متغيرة؟
- رؤوف الله يخليك خليني في حالي
-- نور حبيبتي بس..
داخت علي مسكتها بسرعة وشلتها واخدت مفتاح العربية ونزلت حتى بدون ما البسها حاجة وصلت المستشفى لقيت الدكتورة دخلوها غرفة الفحص طوالي شوية والدكتورة جات مبتسمة قمت ليها بسرعة قالت: ما تخاف دي من الاعراض الطبيعية للحمل وهي بس شكلها ما ماكلة من مدة خليها تكمل المغذيات وممكن تطلع ومبروك.
مشت خلتني وانا مصدوم وما قادر اوقف اتذكرت ايان ورام ضربت لماما قلت ليها تطلع ليهم الشغالة قالت: في شنو يا رؤوف ليه صوتك كدا نور كويسة؟
- نحنا في المستشفى شوية وبنطلع
-- انا جاية في شنو يا رؤوف
- طيب جيبي معاك حجاب نور.
قفلت منها و دخلت ليها كانت صحت ومدياني ضهرها قعدت في الكرسي الجمبها وانا ما قادر اقعد زاتو ما اتكلمنا وقت بعدين قلت: نور مبروك.
دموعي نزلت ابتسمت لي وقالت: رءوف..قاطعتها
- دا ولد منو يا نور.
كشرت بإستغراب قالت
-- رؤوف انت بتقول في شنو؟.
الباب دق ودخلت امي جات بوست نور وقالت: الف لا بأس عليك حبيبتي.
التفتت لي وقالت: قال شنو الدكتور يا رؤوف.
عاينت لنور وقلت: نور قولي لي والله ما ح ازعل منك انتِ عارفة انا بحبك صح؟ انا ح اربيه كأنه ولدي وح اخليه اخو رام وايان بس قولي لي ابوه منو بس دا العايز اعرفه بس ي نور ما ح اخليك بوعدك بس قولي لي ابوه
امي ضغطت على اسنانها وقالت: رؤوف برا
- امي عايز اعرف من حقي اعرف منو غيري قرب على مرتي.
مسكتني من يدي طلعتني وقفلت الباب في وشي فضلت ماشي وجاي بعصبية سمعت صوتها بتبكي من الغرفة شوية والممرضة جات ادتها مهدئ قالت: مدته ساعة وح تصحى وممكن تطلع.
هزيت راسي ماما فضلت معاها قعدت ماسك راسي وما قادر اعمل حاجة ودمي بغلي شوية وامي طلعت قالت: نور صحت خلصت اوراقها؟
- ساعديها تجهز ح امشي اخلصها.
مشت خلتني مشيت خلصت الاجراءات ورجعت ليهم كانت ماسكة نور من يدها نزلنا العربية كانت خاته راسها على كتف امي ومغمضة عيونها وصلنا وطلعنا طوالي غنوة واريام كانوا منتظرين بخوف مشوا ليها بسرعة ابتسمت وطمنتهم وبقوا مبسوطين شديد انها حامل انا دخلت الغرفة بعصبية ليه كل مت قلبي يتعلق بوحدة بتخوني ليه؟.
شوية ونزلوا نور جات دخلت الحمام من سكات شوية وطلعت لابسة ملابس نومها طلعت اتطمنت على ايان ورام كانوا نايمين رجعت لقيتها بتصلي قعدت على السرير شوية وخلصت قمت غرفة اغطية السرير والفرش شلت مخدة وغطا وطلعت نمت في الهول كان ممكن انوم في اي غرفة تاني بس كنت عايز هنا علشان احس اذا حصلت ليها حاجة شوية وجات طالعة تشوفني عملت نايم وهي حست اتنهدت وغطتني وباست راسي ومشت ونمت بدون ما احس صحيت الصباح تعبان صحيت قبل ما تصحى اتجهزت بسرعة ومشيت بوست الاولاد جات طالعة من الغرفة وهي ضاغطة على عامود انفها وجايبة شعرها بالجنبة عاينت ليها بحنية ودموعي جات نازلة طلعت بسرعة ونزلت ﻷمي سألت من نور قلت: خلي الشغالة ما تنزل بعد تخلص شغل خليها تفضل معاها علشان صحتها والاولاد يمكن يتعبوها او شوفيها اذا ح توافق تنزل ليكم.
بست يدها وطلعت الشغل جيت راجع بالليل لقيت ايان ورام نايمين بوستهم وطلعت لقيت الشغالة داخلة المطبخ وقفتها وقلت: نور والاولاد حصل معاهم حاجة الليلة؟.
هزت راسها بﻷ وقالت: ﻷ ابدا حياتهم الطبيعية.
هزيت راسي وقلت: اتفضلي انزلي وشكرا.
ابتسمت ونزلت
