الســــاحــــرة الســــوداء🐦‍⬛🔮|🇲🇦

🐦‍⬛ظــــل الغــــراب🐦‍⬛|5

🔮💫الساحرة السوداء🔮💫
للكاتبة✒️:Victoria kaelin
💜📖الجزء 51💜📖
طوماس:جبتي كاع الضمادات لي محتاجاهوم؟
دايزي:اه خليني نضمد ليها الجرح غدا غنجيب ليها الطبيب
طوماس:مزيان ملي تسالي حبسي دوك الجوجات فالزنزانة
فجأة بداو اشعاعات ذهبية تيخرجو من الجرحة ديال هيلين مخلية دايزي حالة فمها بصدمة...
دايزي:طومااااس شووووف!!!!
طوماس تلفت بقا مصدوم...
الإشعاعات الذهبية تخلطات مع إشعاعات بيضاء مخلية أطراف الجرح تتقارب لبعضها حتى تلاصقو و اختفى الجرح مخليي الفايكاونت طوماس حال فمو بدون كلمة و الهاوسكارل دايزي من كترة الصدمة طييحات الضمادات من يديها...الإشعاعات اختفت و الجرحة كذلك بدون اثر مبيينة كرش هيلين كانها عمرها تقاست...
دايزي:الج..الجرررررحة اختفتتتتتتت!!!!!!!
طوماس:تأكدي دغياااا واش تتنفس
دايزي تأكدات:تتنفس عادي بحق السماء دايرة بحال الى عمرها تجرحات!!!
طوماس بقا تيفكر...
دايزي:واقيلة تنظن مخصناش نتفاجئو على كل الأحوال تتبقا خالدة واقيلة هادشي عادي بالنسبة ليها
طوماس:انك تكون خالد متيعنيش غادي تكون لا تقهر متنظنش بلي الخلود هو سبب اختفاء الجرح
دايزي:اذن كيفاش اختفى؟؟
بعقل بحال عقل طوماس حتى حاجة مغريبة عليه..واخا تكون متعلقة حتى بالسحر..شي حاجة كانت من 200عام قبل لدابا..بقا تيشوف فيها و يمعن و فنفس الوقت تيفكر جاوه شكوك ولكن فضل انه ميقول والو حتى يتأكد من شكوكو...
طوماس بابتسامة:الأهم دابا هو هي بيخير نساي هادشي دابا ملي تفيق غنحاولو نفهموها و نفهمو طبيعتها
دايزي:متنسااش حتى لووسيا خصنا نعرفو شنو وقع مع ديك الساحرة الشريرة
طوماس:عندنا كاع الوقت باش نسولوها و خصها حتى غدا فاش غنستجوبو القرويات تكون حاضرة سيري ترتاحي دابا غنسيفط صونيا تعتاني بيها
دايزي:واخا ليلة سعيدة طوماس...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 52💜📖
☀️فاليوم التالي☀️
كان طوماس واقف فغرفة الإستقبال و موراه واقفين القرويات محاوطينهوم 3 من الجنود ديالو حتى تمات داخلة بياتريس...
طوماس:شرفتينا انستي شكرا على حضورك
بياتريس بابتسامة:من دواعي سروري كيف بقات الساحرة ديالنا المصابة؟؟
طوماس:هيلين لباس عليها الجرحة ديالها تعالجات بشكل غريب و حتى هي معارفاش كيفاش
بياتريس:شحال السحر قوي..جذاب و فنفس الوقت رهيب حنا محظوظين حيت قررات ترجع لينا منقدرش نصدق كون...(تنهدات و شافت فالقرويات)واش هادو هوما القرويات المسؤولات؟
طوماس:اه انستي جبتهوم لهنا على ود الإستجواب باش يكون العدل خاص حتى هيلين تكون حاضرة درت الترتيبات مع الخياطة غتكون تتوجد راسها دابا
بياتريس:حسنا غنتسناوها..بغيت ندوي معاك على المذكرات قريت منهوم شوية لبارح بالليل و بغيت نعرف فاش تتفكر
طوماس:كيفما بغيتي انستي...
نمشيو دابا عند هيلين لي كانت واقفة فغرفتها تتاخد ليها الخياطة القياسات و دايزي و ميلتون واقفين بعاد عليها شوية...
ميلتون بدهشة:كيفااااش وقع هادشي؟؟؟
دايزي:القرويات قدرو يستعملو ساروت حتى قدرو يدخلو.. حراس الدوريات فييقوني لبارح بالليل فاش كتاشفو البوابة بلي محلولة كيف ديما مشيت تنجري لغرفة طوماس نتأكد هو الأول واش بيخير من بعد دزت لديال هيلين و لقيت القرويات تما
ميلتون:نتي الحامية ديال عائلة لينز ا دايزي نتي درتي الشيء الصحيح..فاش هيلين خلات الكوخ القرويين بقاو غاضبين غير هو متصورتش يوصلو لهاد المواصل
دايزي:الخلود ديالها عاونها و تسدات الجرحة خسرات بزاف ديال الدم(بغضب) الدوقة بياتريس خصها دير من دوك القرويات عبرة انا فاهمة الغضب ديالهوم ولكن تيبقاو معندهوم حتى شي حق يديرو هكداك
ميلتون بحزن:هيلين تغدات على ارواح ازواجهوم انا تنتفهم الغضب ديالهوم...ولكن العنف غادي غير يخلق دائرة لا نهاية ليها من التنافر..تنتمنى غير الدوقة بياتريس متعاقبهومش بشدة
دايزي:الانسة ديالنا حاكمة عادلة هي عارفة شنو غدير
فنفس الوقت هيلين سمعات المحادثة كاملها فالوقت لي كانت الخياطة تتجمع ليها الفستان و تقادو على جسمها..
هيلين تتخمم:(كيفاش اختفت الجرحة ديالي بوحدها؟؟عمرني تجرحت فحياتي بحال هكداك؟مدام كانت تتأديني هي نيت براسها و حتى الرجال لي كنت خديت ارواحهوم بعد المرات كنت تنوصل لخدوش طفيفة معاهوم ولكن كانو تياخدو وقت طويل باش يختافيو...البشر قراو مذكرات مدام ممكن نلقا الأجوبة لي تنقلب عليها تما..)
الخياطة شافت فدايزي:صافي خديت العبار انستي..من جميع الفساتين لي جبت جوج منهوم فقط لي غيجيو مناسبين مع جسمها بغيتي تختاري؟
دايزي:انا هنا غير باش نكون حريصة متخرجش ب ثوب النوم فقط...متيهمش لي ختارتو هي مزيان فرأيي
هيلين:علاش كاع الفساتين زرقة؟؟
الخياطة:الأزرق هو اللون الوحيد لي تيبغيه سيادته
دايزي:الأزرق كان لون راية عائلة لينز لعقوود داكشي علاش تتشوفي طوماس لابس بذلات زرقاء غالبا ولكن هيلين ماشي لينز يعني مكاين لاش..عندك شي فساتين بألوان خرى؟؟
الخياطة:اه عندي غير هو ماشي من تصميم يليق بآنسة من الطبقة النبيلة
دايزي:اه صافي
الخياطة:غادي نخلي الفساتين هنا ختاري لي بغيتي فيهوم انستي
ميلتون:اذن نستأذنو منك
دايزي:نخليوك تبدلي ا هيلين
خرجو بجوج و حتى الخياطة...
هيلين عوجات عينيها:(مول الشعر القهوي و الهوس ديالو بالترتيب بفف ولكن هو عتقني من الملك الشرير و على الأقل تيعاملني حسن بزاف من كيف تتعاملني مدام اقل حاجة نديرها على قبلو هي نلبس فساتين لي خييط ليا و نلبس مزيان)
شافت فالفساتين و قررات تلبس اللون الأزرق هزات واحد منهوم هو لي عجبها تصميمو لبساتو و هي تدخل صباعها فشعرها...
هيلين:واقيلة غيخصني حتى نقاد شعري بحال البشر..اممم..واقيلة غنعييط على دايزي تعاوني
🔮💫الساحرة السوداء🔮💫
للكاتبة✒️:Victoria kaelin
💜📖الجزء 53💜📖
خرجات من غرفتها و هبطات مع الدروج لقات ميلتون و دايزي مجمعين و حداهوم الخياطة...
دايزي:ها هيلين!مستغرقتيش بزاف د الوقت باش تختاري فستانك
هيلين:انا تيبانو ليا بحال بحال
ميلتون بقا تيشوف فيها بابتسامة اعجاب...
هيلين:(علاش تيبتاسم هكاك؟..الرجال كانو تيبتاسمو فوجهي فاش كانو تيبغيو يحييدو ليا حوايجي..ولكن هاد الإبتسامة ماشي بحالهوم..واقيلة نرد ليه الإبتسامة؟)
و بابتسامة مماثلة بتاسمات هيلين فوجه ميلتون هاد الأخير لي لمعو عينيه فاش شاف ابتسامتها الجميلة...كانت بالنسبة ليها أصدق و اطيب ابتسامة شافتها فحياتها عمرها شافتها ولو فوجه الرجال لي نهشو فلحمها و هاد الإبتسامة خلات هيلين تحس باحساس غريب عمرها حساتو من قبل..احساس دافئ
دايزي:حسنا هيلين دابا وجدات راسها خصنا نمشيو ل الردهة
الخياطة:اذن خدمتي سالات هنا انسة
دايزي:شكرا ليك
ميلتون:انا نوصلك انسة
مشا ميلتون مع الخياطة و تلفتات دايزي لعند هيلين...
دايزي:واش نتي مستعدة تقابلي طوماس و الدوقة بياتريس؟
هيلين بتوتر:دايزي..انا..واقيلة خصني نقاد شعري ياك هادشي لي تيديرو البشر؟
دايزي:شعر البشر بحالو بحال ديالك و الى بغيتي تبدلي تسريحتو هاد الإختيار متعلق بيك نتي
هيلين:اه بغيت
دايزي:اذن زيدي معايا
داتها دايزي لواحد الغرفة كبيرة و جلساتها فواحد الكرسي قدامو كوافوز بمرايتو هزات المشطة و بدات تتمشط ليها فشعرها...المرايا الدائرية لي قبالتها فكراتها فوحدة من المرايات لي كاينة فالكوخ ديالها..مدام كانت ديما تتشوف فيها ملي تتبغي تمشط شعرها عمرها مافهمات علاش تتبقا داك الوقت كامل قدام المرايا...
دايزي:شعرك رطب بزاف تنحس بحال الى تنمشط فقماش حريري اسود
هيلين:قماش حريري؟؟
دايزي:اه القماش الحريري مصنوع من خيوط دودة القز و كاينين فقط فمملكة مونوبا و هو نادر بزاف حتى و مع أفضل النساجين صعيب تصنعي قطعة من الثوب الحريري المونوبي تتاخد بزاف د الوقت
هيلين عوجات عينيها:(غير البشر لي تيديوها فهاد الأمور فقط) هادشي مفرط بزاف
دايزي:طوماس عندو جوج فالمخزن كانو هدية من الدوقة بياتريس فاش كانت باقي أميرة و طوماس ممسوقش بزاف لبحال داكشي اصلا تيلبس نوعية وحدة من الأثواب ديما و بالتالي منافعينو بوالو فالحقيقة ممكن ينفعوه الى اخيرا قرر يتزوج عرفتي نص الآنسات لي ف سيلڨيرڨال حاطين عينيهوم عليه
هيلين:(غيكونو معجبات بمول الشعر القهوي؟بشر صعيب تفهمهوم)
دايزي:حسنا سالينا من طوماس و الثوب الحريري ديالو ضوري نكمل ليك شعرك
كملات ليها مشيط الشعر هزات خصلات منو و ضفراتهوم ليها و خلاتو مطلوق فاش سالات بقات تتحنزز فيها...
هيلين:(علاش تتشوف فيا هاكا؟)
دايزي:فاش كبرت باعتباري من عائلتي كلارك اخر همي كان المظهر الخارجي ديالي بالنسبة لمقاتلة بحالي الجمال هو القوة ولكن نتي..نتي زوينة بزاف
هيلين حطات يديها على فمها:تظني انا زوينة؟
دايزي نقزات:بطبييييعة الحااال اااه لدرجة الملائكة لي ف اللوحات الفنية متيتقارنوش بجمالك
هيلين:عمرك شفتي شي ملاك من قبل؟
دايزي بابتسامة:لا ولكن انا متأكدة بلي نتي الأجمل من الملائكة لي فالأساطير
هيلين مصدومة من كلامها...
دايزي:ظنيت بلي عمرني غنتسوق للمظهر ديالي مادام تنغلب الرجال فالمبارزات(تنهدات)تنظن بلي باقة مرا من بعد كلشي
هيلين بابتسامة:دايزي..انا تنظن بلي نتي زوينة بزاف
دايزي بدهشة:تظني هادشي؟؟
هيلين بتوتر:فالحقيقة..انا..انا معارفاش كيفاش نحدد جمال البشر غير انا عجبني شكلك
دايزي بتاسمات بخجل...
ابتسامتها فكراتها فابتسامة الطفلة الصغيرة لي بتاسمات فوجهها فاش عطاتها الحلوى و هنا محسات هيلين حتى بتاسمات حتى هي..كان التغدي على الأرواح احساس زوين بالنسبة ليها و هنا بدات تتفهم الإحساس ديال تخلي شي انسان فرحان قداش زوين و افضل بالنسبة ليها...
دايزي:عندي ليك واحد الحاجة
دخلات دايزي يديها فجيبها و بدات تتقلب حتى خرجات واحد الحاجة لي بدات تتبان ل هيلين بحال شي زهرة من زهور الغابة...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 54💜📖
هيلين شداتها بابتسامة:اووه شحال زوينة هاد الزهرة
دايزي:هداك مقبط شعر كان عطاه ليا طوماس من شحااال هادي و بطبيعتي ك هاوسكارل معندي مندير بالزخرفة بالإضافة غيجي زوين بزاف عليك كتر مني
هيلين بفرحة:(حتى واحد معمرو عطاني شي حاجة زوينة من قبل..دايزي ضريفة بزاف معايا)
من المفترض انه تشكرها ولكن هادي حاجة خرى معلماتهاش ليها مدام كيفاش غادي تعبر على الإمتنان ديالها و هي معارفاش كيفاش؟؟ولكن هادشي مكانش مشكل بالنسبة لدايزي حيت غير من ابتسامة هيلين عرفات ليكاين...
دايزي:المهم خصنا نمشيو ل الردهة دابا قبل ميبدا طوماس يقلب علينا واش مستعدة نمشيو؟؟
هيلين حركات ليها راسها ب اه...
خرجو من تما و بقاو تيتمشاو حتى دخلو لقاعة لي فيها طوماس و البقية كان معاهوم حتى ميلتون...
غير دخلات هيلين للقاعة اول حاجة شافتها و هي نظرات القرويات ليها لي كانو كلهوم كره و حقد...
هيلين بحزن:(البشر عمرهوم غيسامحوني)
بياتريس:تيبان ليا كلشي هنا واخا نبداو فالإستجواب ا فايكاونت طوماس؟
طوماس:اكيد انستي..شكون لي بغيتي تسولي هو الأول؟
بياتريس:بغيت نبدا ب هيلين حيت هي الضحية هنا
دايزي:هيلين واش عقلتي كيفاش تخاطبي الدوقة بياتريس و الفايكاونت طوماس؟
هيلين حركات ليها راسها بابتسامة و شافت ف بياتريس:شنو بغيتي تعرفي انستي؟
بياتريس:شنو وقع بالضبط فالغرفة ديالك فالليلة د البارح؟
طوماس:قولي الحقيقة و متخافيش ا هيلين الأقوال ديالك عامل اساسي فالحكم لي غادي تعطيه انستنا فاش تقرر العقوبة
هيلين تنهدات:(العقوبة؟بحال كيف كانت تدير مدام ملي تندير شي حاجة غلط) البشريات جاو باش ينتاقمو لرجالهوم..كانت الغلطة ديالي فاش خديت ارواحهوم واخا حاولو يأديوني ولكن مخداوش حياتي كيفما خديت انا حياة البشر لي تيبغيو
بسماع الإخلاص لي خارج من لسانها شعلة الغضب الشديد لي كانت فعينين العيالات نخافضات شوية لكن حتى حاجة مغاديش تبعد الحزن بسبب فقدان لي عزيز عليهوم...
هيلين تنهدات:(مبغيتهومش يتعاقبو هادشي لي نقدر نديرو على الأقل لهاد البشر لي أديت من قبل) من بعد ما عتقاتني دايزي سحري عالج الجرحة و انا بيخير دابا..من فضلك متعاقبيهومش انستي
من بعد ماكانو عينيها على الدوقة بياتريس تحركو جيهة طوماس لي كان مستمع ليها باهتمام بدون أسئلة الفايكاونت ركز عينيه على عينيها تيحاول يعرف تحركاتها...
بياتريس:واخا تعالجتي هادشي متيغطيش أمر انه قتاحمو لينز مانور و اداوك..واش تظني بلي القرار الصحيح هو نطلق سراحهوم؟
هيلين بابتسامة:ملي نتوما عطيتوني فرصة تنظن حتى هوما يستاهلو فرصة خرى
الدوقة بياتريس بابتسامة دارت ليها إيماءة قبول:الرحمة ديالك تتعبر عليك ا هيلين(شافت فالقرويات) عندكوم اي اضافة يا قرويات؟واش هيلين قالت الحقيقة على لي وقع الليلة د لبارح؟
قروية2:الساحرة قالت الحقيقة..انستي جينا باش نقتلو الساحرة حيت حرماتنا من ازواجنا مكناش تنتوقعو نخرجو من هنا حيين
بياتريس:انا متفهمة التفكير ديالكوم ولكن الدم فالدم عمرو مكان الحل النهائي..القتل ديال هيلين عمرو غيرجع ازواجكوم مرة خرى شغادي يوقع لوليداتكوم؟؟هيلين خدات ابائهوم و نتوما كنتو غتاخدو أمهاتهوم تنتمنى تكونو تعلمتو درسكوم يا قرويات..يمكن ليكوم تمشيو
قروية2:شكرا انستي
القروية:عمرني مغانسامحك على قتل زوجي يا الساحرة ولكن غير من أجل هاد الندم لي على وجهك و مستقبل ولدي غادي نحبس الإنتقام منك
القرويات نصارفو و بياتريس شافت فهيلين بابتسامة:هيلين..بفضل السحر ديالك لي عالج الجرح غتكوني منهكة دابا..دايزي خودي معاك هيلين لغرفتها ترتاح شوية
دايزي:امرك انستي..تفضلي معايا لغرفتك هيلين
مشات هيلين مع دايزي...
ميلتون:غنصارف حتى انا غنرجع لكتاباتي انستي
بياتريس:من فضلك بغيتك تبقا ا ميلتون عندي ليك واحد المهمة
طوماس:واش نتي قلقة على هيلين انستي؟
بياتريس:عندك الحق فايكاونت طوماس...