دايزي:قدما باقي فرصة انه نلقاو رجالهوم خصنا نعاونوهوم ا طوماس
طوماس:خيارنا الوحيد هو نتسللو لداخل القصر الملكي و نعرفو الحقيقة الى تأكدنا بلي تشدو غادي نرجعو و نفكرو فشي خطة باش نعتقوهوم نقدرو نجربو نرشيو الجنود الملكيين على ود المعلومات ولكن هادشي غادي يزيد من الشك ديالهوم و غيخلي الانقاذ اصعب
هيلين:انا قادرة غير نطير بهيئتي الغرابية و نشوف اش واقع فالداخل
ميلتون:لا ا هيلين هادشي خطير بزاف!
طوماس:ميلتون عندو الحق السحر ديالك ماشي قوي لديك الدرجة هاد الساعة
دايزي تتفكر:الى هاد الرجال تسللو من تلقاء نفسهوم لداخل القصر يعني نقدر انا نيت بلا ميلاحظ حتى واحد
هيلين مبتسمة:انا ساحرة لي تولدات بقوة انا قادرة ندير هادشي..الطريقة الوحيدة باش نولي اقوى هي ندفع بالحدود ديالي
طوماس ربع يديه مطلع حاجب:واش نتي متأكدة من هادشي ا هيلين؟ الى تشديتي هاد المرة حتى واحد منا قادر انه يعتقك هاد المرة
هيلين بابتسامة:اذن خصني ندير جهدي انه منتشدش
و بابتسامتها المطمئنة شافت فالجميع تتقول ليهوم انها غتكون بيخير الفايكاونت طوماس اكيد معجباتوش الفكرة و لكن بعد تفكير قليل و بحالتهوم لي هوما فيها ستنتج انه هدا هو الحل الوحيد حاليا...
طوماس:واخا ا هيلين يمكن ليك تمشي ولكن غير واعديني بواحد الحاجة
هيلين بتسائل:نعام ا سيدي؟
طوماس:حضي راسك و رجعي حية
هيلين:غندير جهدي كاملو سيدي
طوماس:لا هادشي ماشي كافي..بغيتك تواعديني بغض النظر على هادشي لي غتلقايه متدخليش فيه و غتكوني على بال من حدود سحرك و متطوليش بزاف و مضغطيش على نفسك و قوتك قبل متهربي..بغيتك ترجعي ليا واخا يوقع لي يوقع
و كيفما متعودين على شخصييتو الرزانة الهدوء العقلانية و التفكير كانت هادي اول مرة تحس هيلين بنبرتو يكون فيها واحد النوع من القلق و الخوف عليها...
هيلين تنهدات:(مول شعر القهوي خايف عليا؟)غادي نرجع حية ا سيدي و انا عند كلمتي
طوماس بتاسم:مزيان
المرأة بحزن:حنا مدينون ليك ا الساحرة
المرأة2:شكرا لمساعدتك
هيلين:تنتمنى نرجع بأخبار جيدة ليكوم يا بشر
طوماس:هيلين قبل متمشي
جبد ورقة و تقدم لواحد الطاولة تما محطوط فوقها حبر و ريشة هز الريشة و غمسها فالحبر و كتب فالورقة بزربة...
ميلتون بتعجب:اش داكشي ا طوماس؟عمرني شفتك تتتكتب هاكا!
طوماس:هدا لغز بكتابة غير مفهومة حتى واحد مغادي يشك ف غراب رسول(يعني الغربان لي تيسيفطو بيهوم الناس الرسائل بحال النسور)واش موافقة على هادشي ا هيلين؟
بياتريس:فكرة مزيانة ا فايكاونت طوماس
هيلين:موافقة سيدي
خدات هيلين الورقة و دارتها فجيب فستانها:خصني نمشي دابا
ميلتون:من فضلك كوني فمأمن انسة ساحرة
دايزي مبتسمة:هيلين قوية كتر منتصورو غادي تولي بيخير
هيلين:(كلشي غادي يدوز بيخير)
هزات هيلين يديها و تحولات لغراب و ضربات بجنيحاتها فالهوا و خرجات طايرة من لينز مانور..دازت على البلدة كلها و هي طايرة حتى توقفات على البوابة ديال سيلڨيرڨال(البوابة لي كانت غتدوز منها كونما دايزي و خطة طوماس)
هيلين:(الملك الشرير قال و بوضوح انه ممنوع عليا ندوز من هاد البوابة الى تشديت ماشي غير انا لي غنتحط فالخطر..الدوقة..الفايكاونت مول شعر القهوي..دايزي و ميلتون كلهوم غادي يتعاقبو بسببي...ميمكنش ليا نفشل..ميمكنش ليا نتشد..)
طارت مرة أخرى و تتقول فخاطرها انه ميمكنش ليها تخسر هاد الفرصة الأولى باش تبيين للبشر انها ساحرة طيبة ماشي شريرة كيفما مفكرين...بقات طايرة فأرجاء القصر الملكي حتى لقات مدخل من واحد النافذة محلولة و دخلات منها طايرة بين الحيطان حتى هبطات لتحت...
هيلين:(غنشوف واش كاينين فالزنزانة)
يالاه رصات فالأرض و بدات تتمشا بقوائمها الغرابية و هي تسمع الهضرة فواحد الممر الخوف و الفضول تجمعو فداخلها هادشي لي خلاها تقرب متسلتة حتى تيبان ليها جندي من الجنود الملكيين و معاه خادمة مسنداه على الحيط...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 82💜📖
الخادمة حييدات ليه الدرع لي كان لابسو و بدات باغا تعريه من الفوق حتى حبسها شاد يديها...
الجندي:شنو تديري واش حماقيتي؟زيدي نمشيو ل الغرفة ديالي بعدا
الخادمة:و شنو فيها؟نديرو هنا نيت ولا خايف؟ اممم
الجندي:لا مخايفش ولكن شنو غيوقع الى جلالته هبط لهنا؟غادي يقطع ليا الرجولة ديالي
الخادمة عوجات عينيها:علاش جلالته غادي يهبط ل الزنزانات و ديك الثعلبة عندو فغرفتو؟ بسبابها ولا تيخصني نظف الغرفة بزاف د المرات فالنهار
الجندي باستغراب:بصاح؟؟جلالته و ديك الساحرة؟؟
هيلين:(ساحرة؟همم ممكن البشري قال عليها هكاك كإهانة)
الخادمة:و شكون يتصحابليك داك الجناح الرخامي الأبيض لمن؟ (بتقزز)سمعت جلالته قال ليها بغا يلحس جسمها العاري المغطي بالخمر(حطات يديها على فمها) هادشي علاش تدارت ديك بحيرة الخمر
الجندي تيستامع ليها و تيتخيل...
الخادمة عقدات حجبانها:هيييه!!متخيلش جسم ديك المرأة السليطة!!و انا قدامك!!!
الجندي بتوتر:انا تنقسم ليك متنتخييلوش زيادة غتكوني نتي حلوة عليها
الخادمة بتاسمات:بصاح؟
الجندي:اكيد علاش منأكدش ليك هادشي؟
الجندي جر عندو الخادمة و بداو فمداعباتهوم كلشي قدام الغراب(هيلين)...
هيلين:(شحال مشمئزة من منظرهوم هاد الخدامة باينة فيها منساجمة و باغا لي تيديرو فيها داك الفاسد عكسي من قبل...على كل خصني نتحرك ولكن حابسين عليا الطريق)
بعد تفكير قررات انها تدوز من فوق راسهوم بسرعة طبقات الخطة ولكن محسات حتى تشدات من طرف الجندي مزيير عليها حتى بدا تنفسها فالتقطع...
الجندي:اش هادشي؟؟؟
الخادمة:شوف ديك المخطوطة لي فيه تنظن هدا غراب رسول ولكن كيفاش وصلات بيه يوصل لهنا كامل؟
الجندي عطا ليها الغراب تشدو و جبد المخطوطة و بدا يقرا...
هيلين فيدين الخادمة:(تصحابليهوم انا غراب رسول كيفما فكر مول شعر القهوي)
الجندي بغضب:اش هاد المهزلة مفهمت والو!!
هيلين:(معنديش الوقت لي نضييعو)
ضربات بجنيحاتها بين يدين الخدامة لي طلقاتها مغطية وجهها و طارت داخلة ل الزنزانة...
هيلين تخبات فواحد القنت و تحولات لهيئتها الأصلية شافت هنا و لهيه لقات الزنزانة خاوية و استغربات...
هيلين:(الفلاحين مكاينينش هنا؟همم يمكن متشدوش اولا عدمهوم الملك الشرير؟ولكن كون كان هادشي غيتقال همم ممكن كاينين فبلاصة خرى)
خرجات هيلين من الزنزانة و بقات غادة بين الممرات الفارغة و يديها على قلبها لي تيضرب و عينيها لي تيتحركو خايفة لتشد حتى خرجات لواحد المخرج غير لمحات جوج من الجنود واقفين قدام واحد الباب دغيا رجعات اللور تتحاول تحول ل هيئة الغراب ولكن مقدراتش و بسرعة بان ليها واحد البرميل خشبي كبير تخبات موراه تتلتاقط انفاسها...
هيلين:(غادي نتخبا مورا هاد البرميل حتى نقدر نتحول تاني لغراب)
بقات تطل على الجنود لي كانو فحوار بيناتهوم...
هيلين:(امم غادي يكون صعيب ندوز قدامهوم ولكن فاش غيكونو تيدويو؟)
الجندي:بصاااح شفتيها؟؟
الجندي2:لا جلالته ممخليهاش تخرج من غرفتو تصور بنا ليها جناح خاص غير باش تبقا تما هاد المرأة غتكون بجمال خاص
الجندي:سمعت على هادشي و على انه فرغ الخزينة اللعينة غير على ود هادشي!!
الجندي2:و زيد عليها حتى ضاعف الضريبة على الشعب من غير الناس لي من سيلڨيرڨال متأثروش اوغاد محظوظين!على كل الاحوال هاد الصباح دخلات دفعة من الخمر المونوبي المصنوع من الورد خصك تمشي دوقو تيقولو المداق ديالو مميز بزاف
الجندي:واش باغي تموت داك الخمر لديك الساحرة فقط و انا متأكد بلي سمعتي لي وقع لدوك الدخلاء
الجندي2:دوك جوج فلاحين الحمقى
هيلين:(الفلاحين؟اذن كانو فالقصر الملكي)
الجندي2 بغضب:خلاونا نبانو خايبين فعينين جلالته لدابا باقي تيضرني ضهري بسبب داك الجلد لي خديت
الجندي:على الأقل متعاقبناش غير هكاك
الجندي2:كلنا قسمنا انه نحميو الملك ديالنا بلا خوف ولكن الفكرة ديال انه ممكن يكون مصيرنا بحال دوك الفلاحين...انه جسمك يبدا يتفسخ بالسحر ماشي بحال الى متي فالمعارك بعدا على الاقل غيكون جسد لي يتدفن...
الجندي:صااافي سكتتتت مبغيتش نفكر فهادشي
هيلين شادة قلبها بخوف:(ساحرة...سحر...تفسخ...مكانتش اهانة فالواقع كاينة ساحرة فالقصر الملكي هي قوية لدرجة انها تمحي جوج من البشر بسحر صافي...منين غادي تجي ساحرة هائلة؟)
🔮💫الساحرة السوداء🔮💫
للكاتبة✒️:Victoria kaelin
💜📖الجزء 83💜📖
هيلين بتوتر:(متيهمش دابا انا خصني نخرج من هنا الى تشديت مغتكون عندي حتى فرصة قدامها خصني نمشي نحذر البقية)
بقات تتفكر بشي طريقة للهرب حتى طاح فبالها كلام دايزي على انها تقدر تستعمل سحر الوهم باش تعمي الأعداء...
هيلين:(مغنقدرش نتحول دابا لغراب ولكن نقدر ندير شوية د الاوهام)
هزات يديها و بدا ضوء ساطع مغطي وجوه الجنود بجوج...
الجندي:اش هاااادشي!!!متنشوفش!!!
و بدون مقدمات ضرباتها بجرية خارجة من الممر لي سلكاتو تحولات لهيئتها كغراب و خرجات طايرة فالسما المظلمة و الشتا لي خيط هابط منها هيلين غادة ضاربة بجنيحاتها بأقصى سرعة...
هيلين:(للأسف هازة اخبار سيئة ل البشريات ولكن على الأقل خرجت سالمة خصني نوصل دغيا نبههوم بخصوص هاد الساحرة القوية)
بقات هيلين تطير حتى فجأة بدات تفقد توازنها فالطيران و هي تحول لهيئتها البشرية جاية طايحة فوق العشب المبلل...
هيلين بألم:(اووه السحر ديالي تستنزف)
ناضت بتثاقل شافت فستانها لي تغييس و شافت قدامها:اووه خصني دابا نكمل على رجليا ولكن على الأقل فت البوابة بعدا و قدما انا ف سيلڨيرڨال يعني انا فأمان
بقات غادة هيلين فالطريق و فنفس الوقت قدام بوابة لينز مانور كانت دايزي واقفة بقلق تتقلب بعينيها فالأرجاء و ميلتون حداها...
ميلتون:منتصف الليل هدا ا دايزي و فهاد الشتا غادي تكون متجمدة بالبرد فشي بلاصة
دايزي:غادي ترجع ا ميلتون متهزش الهم..هااااهياك جااات
تمات جاية عندهوم هيلين لي كانت كلها فازگة و شعرها هابط على وجهها و فستانها كحال من التحت بالغيس...
دايزي بقلق:شنو وقع ا هيلين؟؟
ميلتون:واش نتي بيخير؟؟؟
هيلين باستغراب:(بقاو تيتسناو فهاد الشتا و البرد و الليل غير على قبلي؟)عندي اخبار سيئة فين البقية؟
دايزي:كاينين فالردهة طوماس كان بغا يتسنا معانا على برا ولكن ميقدرش يخلي الدوقة بياتريس من غير حراسة
هيلين تنهدات و قربات منهوم بجوج بحزن:دايزي...ميلتون الفلاحين البشريين...بجوجهوم ماتو...
دايزي:شنو؟؟ واش الملك عدمهوم؟؟
هيلين شدات راسها بتوتر:لا لا واحد الساحرة...هي...هي(سخفات)
دايزي:هيلين!!
ميلتون بفزع:هي ماشي بيخير خصنا ندخلوها لداخل
دايزي بخوف:زييد زييد نهزووها خصنا نديوها لغرفتها و نسخنوها!!
👑فالقصر الملكي👑
دخل الملك لواحد الغرفة لي كانت واقفة فيها لوسيا عاطية بضهرها بفستان ملكي و جواهر مزيناها و تاج فوق راسها...
لوسيا:انطلاقا من تقاليد مملكة ديانا مخاصش تشوفني جلالتك هاد الليلة
الملك:و كيفاش توقعي انه غندوز ليلة بوحدي من غيرك فغرفتي؟ بالاضافة الى معايا لوسيا القوية ديالي مغنخاف من حتى حاجة
لوسيا ضحكات ضحكة خفيفة و رجعات ملامحها لملامح بحال شي وحدة مسكينة:واش متأكد جلالتك من هادشي؟انا تنأكد ليك بلي غنخدمك من كل قلبي ولكن انا ماشي اميرة و ماشي حتى من دم نبيل...
الملك:حتى وحدة متستاهل هادشي من غيرك يا جميلتي لوسيا فراسك بلي ختي كانت اميرة دابا راها مجرد دوقة متدنية انا لي تنختار لي ذو قيمة و لي معندوش ا حبي ماشي من السلالة..بياتريس ختي و انا طردتها من القصر الملكي غير حيت انا قادر على هادشي
لوسيا:طردتي ختك؟
الملك:و علاش لا؟ كانت مجرد ازعاج غدا غادي نديك لمدينة سيلڨيرڨال غير بان نبيين ليها قداش ضعيفة قدامي و نتي غادي تبييني ليها هي و هادوك لي تتحكم السلطة ديالك
لوسيا بتحلوين:الملك ديالي الوسيم قوي بزاف حتى من ساحرة قوية بحالي مغتقدرش تقاومك
الملك:مكرهتش نحييد ليك هاد الفستان ولكن مبغيتش نخسر ليك هاد اللباس اللعنة شحال بقاو فيه دوك الخياطين فالصنع ديالو و انا بغيتك تباني غدا بكامل اناقتك قدام ختي
لوسيا:متديرش فبالك جلالتك خصك تمشي ترتاح شوية
الملك:مغنمشي حتى ناخد قبلة منك يا ملكتي....
🔮💫الساحرة السوداء🔮💫
للكاتبة✒️:Victoria kaelin
💜📖الجزء 84💜📖
☀️فاليوم التالي☀️
و فلينز مانور و بالضبط فغرفة هيلين هاد الأخيرة لي كانت باقة غايبة على الوعي فوق سريرها حتى تم داخل الفايكاونت طوماس هاز صينية صغيرة فيها قطعة من الحلوى الجميلة و وردة من ورود الحديقة تقدم بخطواتو الثقيلة حتى حطهوم فوق الطاولة لي حدا راسها و بقا تيتأمل فيها و هي ناعسة شوية قرب و هز الغطا و غطاها مزيان و خرج من الغرفة...
بعد مدة من خروج طوماس بدات هيلين تتحل فعويناتها لي ستقبلو اشعة الشمس لي منورة الغرفة هادشي لي خلاها تكمشهوم...
هيلين:(ضوء النهار؟..سرير ناعم؟..النهار هدا و انا فغرفتي..فيناهوما البقية؟)
ناضت من السرير و و ساست فستانها لي لاحظات بلي بدلوه ليها اكيد حيت لاخور كان مغييس شوية بانت ليها الصينية المحطوطة فوق الطبلة و هي تبتاسم باعجاب و عينيها تيلمعو...
تقدمات بخطوات سريعة و هزات الوردة شماتها و هزات قطعة الحلوى داقتها:حلوة بزاف هه
فنفس الوقت فواحد القاعة من قاعات لينز مانور...
كانو فيها العيالات و بياتريس و جانيت دايزي و ميلتون حتى دخل عليهوم طوماس...
طوماس:باقة تترتاح غتكون ستنزفات السحر ديالها البارح مغنقدر نقول والو حتى تفيق
دايزي:يعني نتوما بجوج سيرو ل داركوم و رتاحو
المرأة بحزن:مغنمشيوش ل الدار
المرأة2:حتى نعرفو رجالنا كيفاش ماتو
بياتريس:انا فاهمة الحزن و الاحباط ديالكوم ولكن انطلاقا من كيف ماتو رجالكوم هوما ماتو كأبطال التفاصيل غادي غير تجيب ليكوم و لاطفالكوم الم اكبر متيهمش كيفاش ماتو قدما تيهم السبيل لي ماتو على قبلو
ميلتون:اسماء رجالكوم و بطولتهوم خصها تسجل فكتاب السجلات باش الأجيال القادمة يعرفو بهادشي
دايزي:غالبا متنتافقوش انا و ميلتون ولكن هاد المرة متافقة معاه العدالة غتسود ديما
طوماس:سيرو ل الدار و قولو ل اطفالكوم لي مشا مشا ولكن منساوش لي باقي عندنا على قبل مستقبلهوم خصكوم تعيشو و تزيدو لقدام
المرأة:اه سيدي عندك الحق
المرأة2:شكرا على الصدق ديالك انستي غنمشيو لعند اطفالنا و غنربيوهوم يكونو شجاعين بحال والديهوم
بياتريس:عمركم تفقدو الشجاعة و ركزو ديما فلي عندكوم ماشي على لي فقدتوه
المرأة:شكرا انستي من فضلك بلغي سلامي ل الساحرة لي خاطرات بحياتها باش تعرف الحقيقة
بياتريس:اكيد..جانيت ممكن ترافقيهوم لديورهوم؟
جانيت:اكيد انستي
بياتريس:ولكن قبل متمشي...
فكات بياتريس شعرها و هزات منو مشبك شعر زوين بزاف و مداتو ل جانيت...
بياتريس:خودي هاد المشبك راه مصنوع من الفضة الحقيقية و كريستالات القمر الصافية بادليه بقطع ذهبية و عطيهوم ليهوم غادي يكونو كافيين يغديو اطفالهوم لوقت طويل
المرأة2 بدهشة:منقدروش نقبلو هدية غالية بحال هادي انستي
جانيت:واش متأكدة انستي هاد المشبك عزيز عليك بزاف هو تذكار من امك
بياتريس مبتسمة:تيبقا مجرد قطعة من الجواهر
طوماس:قيمة التذكار اكبر من قيمة كريستالات القمر بنفسهوم..جانيت من فضلك سيري لعند الحراس لي فالجناح الشمالي يسحبو 50قطعة ذهبية من الخزينة
بياتريس بدهشة:واش نتا متأكد ا فايكاونت طوماس؟هاد المبلغ كتر من لي غيجيبو المشبك ديالي
طوماس:متهزيش الهم انستي
المرأة2:شكرا بزاف حنا فخدمتكوم وقتما بغيتونا
المرأة:شكرا ل لطفكوم من بعد اذنكم غنمشيو
نصارفو العيالات و معاهوم جانيت...
دايزي بعصبية:الملك روبيرت ميستاهلش العرش!كون غير كانت قادرة المرأة تحكم ف ديانا....
بياتريس بدهشة:رضي لبال لكلماتك ا دايزي الى طاحت هاد الهضرة فالأذن الغلط غادي تشاركي نفس مصير الفلاحين
دايزي:هادشي حيت خوك طاغية ا انستي كون تختاريتي نتي تحكمي كون الناس مغديين مزيان و حتى واحد مغادي يعاني
بياتريس تنهدات بعمق...و هنا دخلات هيلين...
ميلتون بدهشة:هيلين!!!كيف دايرة؟و واش حاسة بيخير؟
هيلين:انا مرتاحة دابا و تنحس بالسحر ديالي بدا تيتملئ
ميلتون مبتسم:انا سعيد بسماع هادشي
هيلين:فيناهوما العيالات؟انا مستعدة نقول ليهوم اش وقع
طوماس:هوما فراسهوم بلي رجالهوم ماتو خصنا نسيفطوهوم لديورهوم ا هيلين
هيلين بتسائل:واش مهتاموش لكيفاش ماتو؟
طوماس:الى عرفو السبب هادشي غادي غير يزيد من الألم ديالهوم
هيلين:(مول الشعر القهوي عندو الحق سمعت فالقصر بلي عاناو و تألمو بزاف فالموت ديالهوم)(تنهدات بعمق)(هادشي فكرني فالضحايا ديالي حتاهوما ماتو بالألم و المعاناة واش هادشي تيخليني شريرة بحال الملك؟)
🔮💫الساحرة السوداء🔮💫
للكاتبة✒️:Victoria kaelin
💜📖الجزء 85💜📖
و بسبب تذكرها ل افعالها القديمة غرقات هيلين فالتفكير و ملامحها حزينة حتى دوات بياتريس...
بياتريس:واش عرفتي شنو دار خويا ا هيلين؟
دايزي:شنو وقع ا هيلين؟و شنو لقيتي؟
ميلتون:واش الفلاحين بصاح ماتو؟ واش شفتيهوم بعينيك؟
طوماس:ميلتون و دايزي قالو ليا بلي ذكرتي ليهوم ساحرة شكون غتكون برأيك؟
هيلين بتوتر:انا...انا...
بياتريس:حنا سولناها اسئلة كتيرة دقة وحدة(شافت فهيلين) هيلين عاودي لينا لي شفتيه من فاش مشيتي حتى رجعتي من القصر الملكي
و هنا عاودات ليهوم هيلين كلشي من كيف دخلات حتال فاش كتاشفات انه ساحرة قوية عندها دور كبير فقتل الفلاحين...
هيلين بأسف:كنت قادرة نستكشف القصر اكتر بهيئتي الغرابية ولكن السحر ديالي تستنزف الهيئة ديالي مغتقدرش تصبر كتر من هكاك
طوماس مبتسم:نتي رجعتي بأمان هادشي لي تيهم
دايزي:راك كتاشفتي بزاف د الحوايج لي اصلا حنا مسولناش عليها
ميلتون:تماما و مكنتش غنسمح نفسي كون وقعات ليك شي حاجة خايبة فالقصر الملكي
هيلين تنهدات...
طوماس:على كل الاحوال هيلين كنتي عارفة شي مستعملة سحر من غير لوسيا؟
هيلين:لا مدام كانت اخر ساحرة نتعرف عليها
طوماس تيفكر...
بياتريس:هيلين عاشت كتر منا كلنا يعني منين غادي تخرج هاد الساحرة؟
دايزي:ممكن من الممالك الأخرى؟
بياتريس:انطلاقا من السجلات التاريخية الشعوذة تمارسات فقط فمملكة ديانا
ميلتون:ممكن شي دجالة و يتصحاب ليهوم ساحرة؟
دايزي:اذن كيفاش تفسخو الفلاحين بالسحر؟
ميلتون:ماشي بالضرورة ممكن تستعمل العافية
طوماس باقي غارق فالتفكير حتى دخلات الخدامة تتجري و تلهث...
الخدامة:جلالته...جلالته..كاين هنااا ا سيادة اللورد
طوماس بصدمة:شنو؟؟
الخدامة:اه سيدي اصحاب الجلالة كاينين دابا فساحة البلدة و تم طلبك انستي
ميلتون:علاش جلالته هنا؟ واش عرف ب شنو دارت هيلين؟
طوماس:لا انطلاقا من لي قالتو هيلين معندو كيف يعرف بأمرها حنا بوحدنا لي عارفين اش وقع فالليلة الماضية
بياتريس شدات راسها باحباط:انا عارفة خويا جاي غير باش يبيين الهيمنة ديالو تاني(تنهدات) هو الملك و خصني نفد الاوامر ديالو من فضلك قولي ليهوم يجهزو العربة ديالي
طوماس:قولي ليهوم يجهزو ليا الحصان ديالي خصني نرافق الدوقة بياتريس ا مادلين
الخدامة:فالحال سيدي..انستي
بياتريس بحزن:مغتمشيش معايا ا فايكاونت طوماس هاد العبئ ديالي بوحدي مكاين حتاشي سبب تذل بيه نفسك معايا
طوماس:انا غنبقا ديما نساندك انستي
دايزي:و اكيد غنرافقوك حتى حنا انستي
بياتريس بحزن:لا ماشي هاد المرة يا اصدقائي...(انصارفات)
دايزي:شغنديرو ا طوماس؟ميمكنش نخليوها تدير هادشي بوحدها
طوماس تيفكر:غنمشيو فالزقاق المعاكس هاد الطريق غتخلينا نتخالطو مع الحشد
ميلتون:ولكن غنكونو بعاد على الدوقة بياتريس و الى وقعات ليها شي حاجة؟
طوماس:هادي هي الطريقة الوحيدة لي عندنا ا ميلتون غتكون غير مع جلالته
دايزي طلعات حاجب:داك الطاغية من الاحسن ميفكرش يقيصها ولا ديك الحنجرة لي مخلياه يعلي صوتو غنعفس عليها
طوماس تنهد:المهم خصنا نتحركو دابا هيلين..كاينة شي حاجة تقدري ديريها باش تحييد الشبوهات الغير الضرورية من شكلك؟
هيلين حركات راسها ب اه:فالحقيقة البارح فاش دفعت بحدود سحري حسيتو تقوا اكتر من لي مولفاه شوية و تنظن قادرة نغيير الهيئة ديالي و نتقمص شي هيئة خرى حتال الغروب
حركات هيلين يديها بشوية و بدا ضوء اصفر تيلمع من جسدها حتى تحولات ل لنفس هيئة الخدامة مادلين بالضبط...
طوماس:التحول لوحدة من الخدم ديالي همم(بتاسم)هادي بديهة سريعة منك
دايزي:فكرة مزيانة حتى واحد مغيعرف هيئتك الحقيقية ا هيلين الا الى شافو مادلين هاد الأخيرة لي خصنا نبهوها تبقا فلينز مانور النهار كاملو
ميلتون:تنظن سمعت العربة ديال الدوقة بياتريس خرجات من البوابة خصنا نتحركو
🔮💫الساحرة السوداء🔮💫
للكاتبة✒️:Victoria kaelin
💜📖الجزء 86💜📖
طوماس:علميني فاش تحسي بسحرك تيضعف ا هيلين اخر شيء نبغي نديرو هو نحط حياتك فالخطر مرة خرى
هيلين حركات ليه راسها ب اه....
فنفس الوقت و فالساحة ديال البلدة...لي كانو مجموعين فيها الناس من جميع الطبقات الاجتماعية من الفلاحين و العمال ل النبلاء و علاش لا و الملك ديالهوم حاضر اليوم لي اكيد محاضرينش فرحا ليه...
الجندي تقدم فين واقف الملك لي كانت واقفة حداه لوسيا..
الجندي:حنا جمعنا 10قطع فضية من كل بيت ف سيلڨيرڨال جلالتك
الملك:مابيهومش تيبان ليا خصني نلقا شي طريقة نحط الضريبة على الناس د هنا حتاهوما اممم كنت واعدت ختي منقربش ليها لا هي ولا ناسها
لوسيا:نتا لي واعدتي جلالتك ولكن انا لا
الملك:اه ديري هادشي على قبلي ا لوسيا نتي مواعدتيش ختي بحتى حاجة
لوسيا:مغيكونش مزيان ملك بحال يخلف بالوعود ديالو(غمزاتو)
الملك غمزها و بداو يتبادلو نضرات الحب حتى وقفات عليهوم بياتريس...
بياتريس:صباح الخير اخي العزيز
الملك:بالنسبة ل امرأة بحالك تضل تعنق فلكتوبة نسات كيفاش تخاطبني؟
بياتريس بحزن:كيف احوالك جلالتك؟
الملك:و دابا احسن
بياتريس:شنو لي جابك ل سيلڨيرڨال جلالتك؟
الملك:امم كيفما تتشوفي ا بياتريس انا تزوجت بهاد المرأة الجميلة لي قدامك
بياتريس شدات راسها بصدمة:كيفاش!!!تزوجتي؟؟
لوسيا مبتسمة:شرف ليا نتلاقا بيك ا الدوقة بياتريس
بياتريس بلا متشوف فيها:واش نتا عارف مزيان هاد المرأة؟ ميمكنش ليك تجيب امرأة غريبة تزوجها و تتوجها كملكة ليك ا روبيرت
الملك هاز حاجب:تيبان ليا مفرحاناش ليا اختي؟
لوسيا:متدويش و كأنه انا محاضراش يا الانسة الصغيرة
الملك:غيخصني واقيلة نهذب اختي الوحيدة قدام شعبها(بلغوات) خاطبي الملكة ديالي بلباقة
بياتريس حدرات راسها بحزن:سمح ليا جلالتك
فنفس الوقت هيلين و الثلاثي بقاو يتمشاو وسط الناس حتى وقفو فواحد القنت مضرگ...
طوماس:تنظن هاد القنت مزيان نتخباو فيه
من بين الناس كانت واقفة الكونتيسة مارڨل بان ليها طوماس و بدات تشيير ليه مبتسمة...
طوماس:الكونتيسة مارڨل!
دايزي بخوف:الى بقات تتشيير لينا غادي يلاحظو الناس لخرين وجودنا
طوماس حط صبعو على فمو داير ليها اشارة انها زعمة تلتازم الصمت و حتى هي فهماتها طايرة و قررات تحتارم رغبتو حتال من بعد و تسولو...
دايزي:اش واقع تما متنشوف والو
ميلتون تيشوف فالناس:معرفتش ولكن تيبان ليا الناس غاضبين لشي سبب
طوماس:تيبان ليا بلي الدوقة بياتريس تدوي مع انسة بشعر ابيض
دايزي بتسائل:انسة بشعر ابيض؟
طوماس:اه حاولي تبقاي ساكتة باش نعرف اش تيقولو
لوسيا:دابا فاش عرفتي السلطة ديالي عندنا فاش ندويو يا الدوقة بياتريس
بياتريس:فاش بغيتي دوي معايا جلالتك؟
الملك:فالحقيقة ناسك ا ختي تيسرقو من ناسي
لوسيا:القطع الفضية لي جمعناها من ناسك هاد الصباح اكتر من المدن المجاورة
بياتريس بصدمة:ميمكنش انا لي تنحكم سيلڨيرڨال ميمكنش ليك تجي حتال هنا و تطييح الضريبة على ناسي ا جلالتك نتا واعدتيني
الملك:انا مخلفتش بالوعد ديالي ا بياتريس
بياتريس:اذن علاش كاينين جنود ملكيين ف سيلڨيرڨال؟و علاش ناسي خديتو منهوم الضريبة؟
لوسيا:الملك قبل كاع الشروط ديالك و لتازم بيهوم انا هي لي جبت الجنود الملكيين ل الحماية ديالي و انا هي لي خديت الضريبة من ناسك..سيلڨيرڨال هي قطعة من ديانا و انا الملكة ديال ديانا واش نتي غاضبة حيت انا الملكة ديالك ا الدوقة بياتريس؟
بياتريس بغضب:ميمكنش ليك دير هادشي ا روبيرت!انا عاد خديت منهوم الضريبة داك النهار باش نصلحو سيلڨيرڨال ميمكنش ليهوم يدفعو حتى ضرائبك!
الملك:اذن قولي ليهوم ميبقاوش يتكاسلو و يخدمو اكتر ا بياتريس
بياتريس شادة قلبها لي تيضرب بالجهد و الاعصاب راكبينها مخرجة عينيها فيه...
هيلين:اش واقع تما؟
طوماس:مقادرش نسمع مزيان ولكن الانسة لي شعرها ابيض هي الملكة الجديدة و عندهوم شي خلاف بخصوص الضرائب
هيلين:واش بانت ليك الساحرة؟
طوماس:لا الملك و الملكة و الجنود الملكيين فقط الا في حالة كانت الملكة مولات الشعر الابيض هي الساحرة
هيلين:ساحرة...شعر ابيض؟؟
تقدمات هيلين بخطوات متسارعة محسات حتى دفعات طوماس و خرجات من داك القنت...
طوماس بغضب:هيلين خصك ترجعي لبلاصتك!
ميلتون:من فضلك رجعي لهنا غادي يشوفو فيك
هيلين حاطة يديها على قلبها لي غيخرج من بلاصتو و صدرها تيطلع و يهبط و عينيها خارجين بصدمة فلوسيا لي كانت واقفة بعيد مع الملك و بياتريس...
هيلين:مدام....هاديك راها مدام....
🔮💫الساحرة السوداء🔮💫
للكاتبة✒️:Victoria kaelin
💜📖الجزء 87💜📖
شادة راسها بصدمة:مدااام واقفة حدااا الملك الشرير!!!
دايزي بصدمة:شنو؟؟
طوماس بدهشة:واش تتقولي بلي لوسيا هاديك؟؟؟ياك قلتي لينا بلي طاحت من الجرف د الجبل؟؟
هيلين مكايناش فهاد العالم يديها باقة على قلبها تطلع النفس بزز و الخوف متحكم فيها و ذكرايات مدام المؤلمة و لي دارتو فيها بداو يستوليو على عقلها...
دايزي:ممكن غير شي وحدة تتشبه ليها
ميلتون:هيلين دوزات سنين مع لوسيا ميمكنش تغلط فيها اكيد لوسيا هاديك!!
دايزي بغضب:كيفاش قدرات ترجع من الموت؟؟ و كيفاش بحق الجحيم ولات الملكة د ديانا؟؟؟؟
طوماس:و الى مماتتش اصلا؟
دايزي:واش نتا تتقول ليا دابا بلي نجات من الطيحة من فوق الجبل؟؟؟
ميلتون:بالإضافة فين غتكون فهاد السنين كاملها؟؟علاش عاد بان ليها تبان؟؟
طوماس تيفكر:لوسيا مبانتش حتى ولات هيلين تحت الرعاية و المسؤولية ديالنا هادشي ميمكنش يكون مجرد صدفة
ميلتون شاف ف هيلين لي باقة واقفة تتقفقف بالخوف:واقيلة غنرجع هيلين ل القصر هادشي مأثر عليها بزاف و الى بقات هنا مزال غتضرر
طوماس تنهد:هيلين خلي ميلتون يرجعك لقصر حنا غنتكلفو بكلشي هنا متهزيش الهم
هيلين:(الى مدام بغات تقتلني مكاينا حتى حاجة تقدرو ديروها باش تحبسوها يا بشر ولكن الدوقة بياتريس عتقاتني من الملك الشرير فاش كان بغا يقتلني ميمكنش ليا نخليها هنا معاه و نمشي و خصوصا و مدام كاينة) كلكوم عتقتو حياتي و مغنخليش لوسيا تأدي حتى واحد فيكوم
دايزي ربعات يديها مطلعة حاجب:تأديني ديك الساحرة الحقيرة؟ديك الساعة غتشوف اش غيوقع
ميلتون:نتي عارفة شنو وقع ل الفلاحين ا دايزي!
هيلين:(هاد البشر تخلاو على شحال من حاجة على قبلي و عارفة بلي متنتقارنش بمدام ولكن ضروري غنقدر نلفت انتباهها ديك الساعة غنسلك ليهوم الطريق باش يهربو)
طوماس:تنتمنى جلالته ميكونش باغي غير يشوش على الدوقة بياتريس انستنا قوية و هادئة تنتمناو متأترش بلي غيقولو
ميلتون:بصراحة قمة الاذلال و حتى واحد ميستاهل هاد الموقف
دايزي:بهاد لوسيا فاش ولات ملكة الأمور غتولي أسوء
طوماس: دابا خصنا نردو البال و خصوصا مع هيلين ليوقع شي تهور
ميلتون بدهشة:صببر بحالا سمعت الدوقة بياتريس تدوي
بياتريس بصوت عالي:ميمكنش ليك تدير هادشي لناااسنا ا روبيرت!!!واخا سيلڨيرڨال تحت الحكم ديالي تيبقاو كلهوم ناسنا ميمكنش ليك تقهر الشعب باش تبنيو اشياء مفرطة بجوجكوم!!!
لوسيا مطلعة حاجب:عندك شي مشكل مع جناحي الرخامي الأبيض يا الدوقة بياتريس؟
بياتريس:الملكة تتجدد الغرفة ديالها يا جلالتك هادشي لي كانو تيديروه الملكات ديال ديانا كاملين
لوسيا:من غير مشاركة القذارة ديال سرير ملكات ميتات انا ماشي مولوعة بالألوان النابضة بالحياة زيدي عليها مبهرجين
بياتريس بدهشة:غتخلي شعبك يعاني غير على قبل هادشي؟(شدات راسها) هوماا جائعيييين جلالتك و مزال باغية تاخدي ضرائب منهوم؟؟
الملك بتكبر:الفلاحين مفروض عليهوم يرضيو الملكة ديالهوم يا اختاه و هادشي تيتضمن كاع السكان هادشي علاش درت اعلان حتى ف سيلڨيرڨال
بياتريس:نتا اصلا خديتي 10قطع فضية من كل بيت واش عارف قداش خاص كل عائلة تجمع هاد 10 القطع؟ واش مكفاوكش؟و باغي تاخد منهوم مزال؟
الملك بابتسامة شريرة:هادي غير البداية ا بياتريس...انا صافي درت اعلان بالقانون الجديد كل 15يوم غادي تجمع الضريبة و لي قيمتها 5 د القطع فضية على كل بيت ف سيلڨيرڨال
و بسماع الكلام ديالو كاع السكان لي كانو تما طاح عليهوم صمت مميت باقي ممصدقينش اش تيسمعو بودنيهوم حتى قاطعات هاد الصمت الكونتيسة مارڨل...
مارڨل:تنعتادر على التدخل جلالتك ولكن اغلبية الناس مغيقدروش يخلصوها
لوسيا:اووه الانسة النبيلة خصها تعرف حاجة احسن من انك ترثري و حتى واحد مسولك
بياتريس:فالحقيقة الكونت و الكونتيسة من بين اعلى مراتب النبلاء و عندهوم الحق يدويو فالأمور لي غتفيد فحكم ديانا و هادشي ف القوانين جلالتك
لوسيا عوجات عينيها بعدم اكتراث...
الملك:حسنا يا كونتيسة انا تنلغي هاد القانون لي تيخلي كاع النبلاء يتطفلو على شؤون مملكة ديانا...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 88💜📖
الملك:الى سمعت شي ثرثرة خرى من داك الفم عندك غنقطع ليك لسانك
مارڨل بصدمة:انا....(تنهدات) مفهوم جلالتك
بياتريس بحزن:عفاك ا روبيرت مديرش هادشي
الملك بتاسم فاش شاف الانكسار فعينين ختو الكبيرة لي طول عمرها عارفة كيفاش تسلك راسها و تخرج بالحلول الا هاد المرة لي كانت اول مرة تحزرو فحياتها الاذلال لي بغا ليها قدام شعبها و ناسها هاهو و لي كان جاي على قبلو هاهو هو واخا هكاك ممهتمش بزاف بأمور الضرائب حيت بالنسبة ليه مجرد اعمال مملة ملزوم بيها ولكن...
الملك بعد تفكير:فالحقيقة من بعد ما سالا جناح لوسيا انا...
لوسيا قاطعاتو:حبي انا عندي واحد الاقتراح لي ممكن نتافقو بيه مع الدوقة بياتريس و ناسها
الملك:انا تنسمعك
لوسيا شافت ف بياتريس:شحال من اسرة ف سيلڨيرڨال يا الدوقة بياتريس؟
بياتريس: باعتبار سيلڨيرڨال مدينة صغيرة فيها 650أسرة بمعدل 3 الأفراد فكل أسرة
لوسيا:هادشي تيعني بلي كتر من 3000 قطعة فضية غتجمع من سيلڨيرڨال كل 15يوم
بياتريس:بصيفتي الحاكمة جمعت منهوم نص هاد العدد من قبل و من العدد لي جمعت جزء منو فقط لي خديت لإصلاحات المدينة
لوسيا:بغيتيني نتنازل على هاد الضريبة ياكي؟
بياتريس:اكتر من اي حاجة جلالتك
لوسيا:اذن عندي ليك واحد الحل..و فطريقي ل سيلڨيرڨال شفت شحال الطرقان موسخين فمدينة ايلور مقارنة ب سيلڨيرڨال و هادشي معجبنيش
بياتريس:عندي قوانين قيد التطبيق باش شوارع سيلڨيرڨال تبقا ديما نظيفة واش تبغي تشوفي وثائقي جلالتك؟
لوسيا:هادشي ماشي مهم...الطريقة باش تنظف الحاجة هي الى نقيتيها ياك؟ شنو بان ليك تجي و تنظفي الشوارع ديالنا يا الدوقة بياتريس؟
بياتريس بصدمة:نتي باغياني شنو!!....
لوسيا:غادي تهزي بيدك اعفن القمامات و غتمسحي الأرض بيديك و غاديري هادشي فكل شارع و متقلقيش غادي نخلصوك..خلاصك غيكون 3000قطعة فضية كل 15يوم و اكيد يمكن لشي فلاحين يديرو هادشي بلاصتك ولكن الراتب ديال 3000قطعة فضية فقط ل اخت الملك ماشي لشي فلاح قذر
بياتريس حطات يديها على فمها بصدمة...
رجل من السكان دوا:مدييريش هااادشي ا انستي حنا غنضبرووو المبلغ
امرأة:عفااااك ا انستي غادييي نبيعو مدخراتنا و اشيائنا مديريش هاادشيي
بياتريس بحزن:لا يا شعبي لا...واخا تضبرو و تبيعو ماعندكوم هادشي مغيكفيكومش للأبد...غنديرها..غادي نظف شوارع ديانا بيديا
الملك بدهشة:غاديريها؟!!
بياتريس:الى هادشي غادي يعتق شعبي من المعاناة اكيد اه
لوسيا ضحكات بسخرية:اميرة سابقة غارقة فالقذارة حتال ركابيها هههه مقادراش نتسنا امتى نشوف هاد المنظر
بياتريس حدرات راسها بالحزن و مباغاش تطييح دموعها قدامهوم...
ميلتون بآسى:هاد لوسيا عندها هيئة الملاك ولكن فلداخل روحها سوداء
دايزي بغضب:ميمكنش هادشي يوقع خصنا نديرو شي حاجة!!
طوماس:تيبان ليا جلالته ممسوقش لموضوع الضرائب كون غير كانت شي طريقة نقنعوه بيها من غير متكون لوسيا
رجل من السكان:مغاااديش تديرييي هادشييي ل انستناااا يا العجوز الشمطاء مولات الشعر الأبيض!!!
رجل2:الأميرة بياتريس هي لي خصها تكون الملكة ديالنا ماشي هاد البشعة!!!
لوسيا:تنشفق عليكوم يا الفلاحين المتدنيين...نتوما ماشي غير عميين جيهة الجمال ديالي نتوما عميين حتى من جيهة الغضب ديالي غنحل ليكوم عينيكوم دابا
هزات لوسيا يديها لي بدات تبرق بالحمر و فنفس الوقت دوك الرجال بجوج تيبرقو بنفس الضوء و بداو يتلواو بالألم...
هيلين بخوف:(لااااا)
بياتريس بصدمة:نتي ساحرة؟؟؟
لوسيا ممسوقاش:تنفضل نتخاطب ب الملكة لوسيا
بياتريس ممصدقاش:نتي لوسيا؟نتي المشعوذة لوسيا!!!!!
لوسيا:المشعوذة لوسيا..هاه؟مدة طويلة هادي مسمعت شي واحد عييط ليا هاكا(تنهدات)
بياتريس:روبيرت واش عارف قداش خطيرة هاد المرأة؟؟هي شريرة ميمكنش ليك تدير منها الملكة ديالك
الملك ممسوقش:لوسيا هي الملكة ديالي ا بياتريس هي التعريف ديال الجمال و القوة و انا وياها بجوج غنقهرو الممالك الأخرى و غنبنيو الإمبراطورية ديالنا
🔮💫الساحرة السوداء🔮💫
للكاتبة✒️:Victoria kaelin
💜📖الجزء 89💜📖
و بالإبتسامة الشريرة على وجهو الدوقة بياتريس حطات يديها على قلبها بخوف حيت ماشي غير توج اخطر امرأة كملكة ليه و انما بغا يتاحد معاها و يشعلو حرب ضد الممالك لخرين...
لوسيا:ايوا تحلو عينيكوم يا الفلاحين ولا مزال؟
واحد منهوم طاح على ركابيه تيتقطع بالألم:غ غ غيير..ق قتلينيي...يا الساح...رة الشرييرة عمرني غادي نخضع ليك
الثاني باقي صابر و واقف و تيتلوا بالألم...
لوسيا عوجات عينيها:شحال خاب الأمل ديالي موتوووو
يالاه هزات يديها حتى....
دايزي بغضب:صااافي حتال هنا و حبس!!!مغاديش تقتل ارواح بريئة خرين و انا واقفة هنا
جبدات دايزي الخنجر ديالها و شييرات عليه بلوسيا هاد الأخيرة لي تصدمات...
الملك بدهشة:لوسيا!!
الخنجر خلا جرحة فحنك لوسيا لي بدا دمها تيسيل...من بعد الاف السنين و لأول مرة تجرح بالنسبة ليها مكايناش شي حاجة اسوء من الجرحة فوجهها الجميل واخا كان قصد دايزي غير تلغي التعويذة ماشي تجرحها...التعويذة تبطلات و الفلاحين نجاو من الموت اما دايزي خرجات لعندهوم...
دايزي:واش نتوما بجوجكوم بيخير؟
الرجل شاد راسو:كان الم فضيع كان يتصحابلي غنموت شكرا ليك انسة دايزي
دايزي:انا ماشي انسة
الملك بغضب:كيفاااش تجرأتي تجرحي الملكة ديالي!!!! يا جنووود شدوووهاااااا
دايزي هزات عليه صبعها مطلعة حاجب:متنقصدش التقليل من شأنك ولكن غيخصك كتر من هادو باش تشدني يا جلالتك
ميلتون:دايزي خرجااات من هنا و تهجمات على لوسيا!!!اش غنديرو بحق السماء ا طوماس؟؟؟
و كيفما عارفين انه طوماس هو سيد الحلول و أذكى شخصية مرموقة فمدينة سيلڨيرڨال ولكن هاد المرة عجز العقل ديالو يلقا مخرج لهاد الموصيبة...
هيلين بدهشة:(شحال شجاعة دايزي واخا هي مجرد بشرية...الى قدرات بشرية تحدى مدام يعني حتى انا نقدر)(شافت فدايزي بقلق) (منقدرش نخلي مدام تخلي دايزي تعاني...مغنخليهاااش!)
دايزي بثقة:شوف حوليك يا الطاغية نتا حاط رجليك على منطقة تتحكمها الانسة ديالنا شوف فالناس و راك غير نتا و ديك الساحرة الشريرة و جنود قلال ضدنا شوف مزيان فينا واش يتصحابليك غادي تعذب فينا و تهين فالانسة ديالنا و نسكتو ليك؟؟
الرجل:حنااا غنقااتلو ميمكنش يبقا الحال هاكاااا
الملك:تيبان ليا الجو انقلب لتمرد يا ملكتي ممكن تهذبيهوم؟
لوسيا:من دواعي سروري ملكي
دايزي جبدات سيفها بغضب:ألم قليل مغيدير فيا والو يا الساحرة الشريرة
حركات لوسيا يديها و هي تنفاجر العافية من تحت رجلين دايزي خلاتها تهز لسما و تخبطات مع الأرض...
لوسيا:تتهضري بزاف يا الحشرة و دابا غنوريكوم الهضرة د بصاح
هيلين بخوف:(دايزي لااااا)
خرجات هيلين و مشات تتجري لعند دايزي السخفانة و العافية بدات تحرق فملابسها...
هيلين:دااايزي داااايزي
بدات هيلين تتحيد العافية على دايزي بيديها و ممهتماش بالحرارة لي شاعلة فيهوم حتى بدات تحس بألم فضيع طلعات راسها لقات لوسيا لقات عليها لا هي لا السكان كاملين تعويذة...
هيلين:(مداام ستعملاات تعويذة علينااا ناوية تقتلناااا)
شافت هيلين فالأرجاء الناس تيتعذبو حداها و عند رجليها أعنف مقاتلة شافتها فحياتها هاهيا اخرتها فاش تحدات لوسيا و من الجهة الأخرى طوماس و ميلتون تيشييرو ليها تجي لعندهوم معرفاتش شنو تيقولو ولكن الخوف لي فعينيهوم عمرها شافتو من قبل...
هيلين:(مول شعر قهوي و ميلتون بغاوني نجي لعندهوم ولكن ميمكنش غادي نلفت انتباه مدام و هوما مغيتسوقوش باغيين غير يحميوني...لاااا حتال هنا و حبس مغنخليش مدام دير لي بغاااات)
و فجأة و بصرخة خارجة من اعماقها طلقات هيلين كمية هائلة من السحر من جسمها خلات تعويذة لوسيا تبطل و السكان تحررو منها مدهوشين...
هيلين بصدمة:(واش درت هادشي؟؟؟واش انا فالحقيقة لغيت تعويذة من سحر مدام؟؟) (حسات بفقدان التوازن ولكن شدات راسها) (تنحس براسي ستنزفت السحر ديالي)
و بسبب استنزاف السحر ديالها الهيئة ديال الخادمة مادلين تلاشات مخلية هيلين تبان قدام لوسيا هاد الأخيرة لي تصدمات...
لوسيا:حسنا حسنا حسنا...و انا نتعجب فين مشيتي يا غرابتي الصغيرة....
🔮💫الساحرة السوداء🔮💫
للكاتبة✒️:Victoria kaelin
💜📖الجزء 90💜📖
لوسيا:ظنيت انني خلقتك باش تحققي مهمتك شتديري هنا يا الشيطانة البشعة؟
هيلين كاع الأحاسيس واش تخالطو ليها فهاد اللحظة مخليينها شادة قلبها لي غيخرج من بلاصتو...الخوف...خيبة الأمل..الضعف... ولكن احساس واحد لي غلب عليهوم كاملين و لي عمرها حساتو جيهة لوسيا و هو "الغضب"...
هيلين عاقدة حجبانها:حبسي عليا من الكدوب ا مدام (بلغوات) نتي مخلقتينييييش!!!!نتييي قتلتي الأم ديااااالي!!!!و اناااا ماشيييي ظل الغرااااب و عمرنيييي كنتهااااا!!!!دوزت 200عاااام 200عاااااام ديال العذااااب تنقتل فالآلااااف الرجاااال كلشيييي بسبااااابك نتيييي!!!مبقااااش هادشييي ا مداااام مبقاااش انا قريييت مذكرااااتك انا عاااارفة كلشي!!!
لوسيا:اممم هادشي ممزيانش..كنت باغا نزيد نعذبك للأبد ولكن تيبان ليا هادا ماشي اقتراح مزيان...اش بان ليك نساليو هادشي دابا و هنا؟
هزات لوسيا يديها و تشكلات كرة نارية شافتها هيلين و بحزم هزات حتى هي يديها تتحاول تخلق شي حاجة تصدى ليها ولكن للأسف حسات بداتها فشلات و جسمها خانها و الكرة النارية جاية جيهتها...
هيلين بتعب:(تيبان ليا فآخر المطاف غنموت هنا...سمحو ليا يا بشر...)
سدات هيلين عينيها و قبل مضربها الكرة جا ميلتون قدامها متلقي الضربة بلاصتها...
هيلين بصدمة:لااااا ميلتوووون
ميلتون بتقطع:هربيىي تحولي لغراب....انسة ساحرة....
و فقد الوعي حدا دايزي....
لوسيا نفاجرات بالضحك:هههههههه يا ربي شهاد الحمق!
هيلين المصدومة حلات عينيها على قدهوم فلوسيا:(حمق؟ميلتون خدا الضربة بلاصتي باش يخليني نهرب و قالت عليه حمق؟؟لا....لا...)(غوتات) لااااااااااااا غنخليييك تدفعي الثمن يا المشعوذة لوسيا!!!!!
و بخطوات سريعة جرات هيلين جيهتها ولكن سبق واحد الجندي ملكي و حاصرها...
لوسيا:وليتي متمردة ها؟تنعتارف بلي خديتي الاهتمام ديالي
فهاد اللحظة الاحساس لي مستولي على هيلين هو الكراااهية جيهة لوسيا و لكن ماشي من طبيعتها تكره ولا تواجه شي واحد بعنف هادشي لي مخليها واقفة بنضرات غاضبة...
لوسيا بضحكة خفيفة:ههه بلاصت ما تبقاي شاعلة ليا تما كنت تنتسناك تفاجي عليا شوية ولكن صدقت غالطة...يا جنود شدوها عندي بزاف ميدار بيها و متخافوش هي متتملكش حتاشي سحر مدمر
جندي:امرك جلالتك(شاف فهيلين) متحركيش يا الساحرة الصغيرة ولا غنضطر نخسر ليك داك الوجه الجميل عندك
لوسيا طلعات حاجب:شنو قلتي يا الجندي؟
الجندي:قلت ل الساحرة متقاومش جلالتك
لوسيا بغضب:لاا قلتي لهاد....لهاد الشيطانة بلي زوينة و شنو تتقصد بغتخسر وجهها واش تتقصد بلي انا خايبة حيت جرحاتني ديك العاهرة؟؟؟
الجندي بتوتر:لا مقصدتش هادشي جلالتك...
الملك:لوسيا رجالي مغيقولوش ليك...
لوسيا قاطعاتو مخرجة عينيها لي تيتشرشرو بالغضب:علاش تدافع عليه؟؟واش ديك الشيطانة السوداء تتبان ليك زوينة؟؟
الملك توتر فاش تفكر كاع الأمور لي قالها و لي دارها ل هيلين فاش شدها فالقصر الملكي و لي اكيييد و مؤكد مغيبغيش الملكة ديالو تعرف بيهوم...
الملك تينفي بيدو:اكيد لا...هاد الرخيصة متستاهل حتى تمشا على التراب لي تتمشاي عليه(شاف فالجندي بغضب)شنو تتسنا شد الساحرة!
لوسيا:و بغيتك تدير من وجهها لوحة فنية ولكن متقتلهاش هادشي غيكون سهل بزاف
الجندي:اومرك جلالتك
الجندي ضار شاف فهيلين هاد الأخيرة لي دايرة وضعية القتال مستاعدة تدافع على حياتها...
هيلين:(دايزي علماتني كيفاش ندافع على راسي انا ماشي ضعيفة...)
الجندي:غنهرس ليك سنانك يا الشيطانة
الجندي جمع القبضة ديالو جاي بيها جيهة وجه هيلين و بخفة تفاداتها...
لوسيا:اللعينة تعلمات تقنية فهاد السنين لي فاتو هرس يديها يااا جندييي!!مبغيتهاش تستعمل داك السحر الغريب مرة خرى فاش نشدها
الجندي:حاضر جلالتك
تقدم الجندي بغا يشدها من يديها ولكن تفاداتو...
هيلين:(بشوية د السحر لي بقا ليا غادي نستعمل وهم بسيط على عينيه باش يتعما و نسلط ضربتي القاضية هكا علماتني دايزي)
و فاش هيلين تتستاعد لهجومها فنفس الوقت واقف طوماس باقي فبلاصتو غارق فتفكيرو كيفاش غادي يخرجها من هاد الورطة الكبيرة؟؟بالنسبة ليها شجاعة كبيرة خرجات منها ولكن بالنسبة ليه مخاطرة كبيرة ميمكنش ليها تصمد فوجه الجندي و زيادة عليه ساحرة قوية بحال لوسيا فنفس الوقت قدامو صحابو حالتهوم خطيرة ولكن باقيين تيتنفسو...رغم انه من درجة متدنية شوية فسلم النبلاء ولكن تيبقا سيد حلول هاد المملكة و ضروري يخرج بشي حل....
هيلين:(هادي هي الفرصة ديالي)
حركات هيلين يديها و تشكل وهم ابيض فوجه الجندي مخليه أعمى و بسرعة و خفة وجهات القبضة ديالها بكامل قوتها الجسدية ليه نيشان لوجه مخلياه طايح فالأرض مغمى عليه...
لوسيا:مافيه حتى فايدة واش خصني ندير كلشي بنفسي؟(هزات يديها) عندك شي كلمات اخيرة يا الممسوخة؟
هيلين:حطيتيني فدوامة من الأكاذيب فهاد السنين الطويلة كلها و حاصرتيني فيها و حطمتي روحي بكل كلمة قلتيها ليا تقدري تديري بيا لي بغيتي بقوتك ا لوسيا ولكن عمرك غتبدلي كيف وليت بفضل البشر لقيت نفسي مرة خرى و غنكون فرحانة الى مت و انا دايرة شي حاجة مزيانة
أنت تقرأ
الســــاحــــرة الســــوداء🐦⬛🔮|🇲🇦
Viễn tưởng⛔ممنوووووع الإقتباااس جميع الأفكاار و الأحداااث من مخييلتي الخاصة⛔ ___________________________________________ 🔮🐦⬛الســـــــاحــــرة الســــــوداء🐦⬛🔮 ✑𝓥𝓲𝓬𝓽𝓸𝓻𝓲𝓪 𝓚𝓪𝓮𝓵𝓲𝓷 ___________________________________________ فالقرن التاسع عشر...
