الســــاحــــرة الســــوداء🐦‍⬛🔮|🇲🇦

🐦‍⬛ظــــل الغــــراب🐦‍⬛|6

الأميرة البشرية كانت فالحمام وسط الماء تخبيت فالظل باش متشوفنيش باش ملي تسالي نتبعها للغرفة و نفضي معاهوم ولكن بدات تدوي..."
الأميرة كاترين مبتسمة حاطة يديها على كرشها بحنان:امتى غير نقول لباباك عليك
" فواحد اللحظة كان تيتصحاب ليا بلي البشرية قشعاتني و مستعدة تمشي تقول ل الساحر عليا حتى من مدام خايفة من قوتو يعني مغنقدر انا حتى نوقف قدامو فهاد اللحظة كنت غادي نضرب بجنيحاتي و نطير بعيد على هنا ولكن بيديها لي تدوزهوم على كرشها الأميرة دوات مرة اخرى"
كاترين بحزن:كون غير قادرة...ولكن مبغيتش نحطو فهادشي مرة خرى ماشي من بعد جوج إجهاضات(بابتسامة)غيخصنا ندوزو من الشهورا التلاتة الأولين صغيرتي ديك الساعة غادي تكوني شادة بلاصتك مزيان فكرش ماما ديك الساعة غادي نقولها ل ليونارد و غادي يكون فرحان بينا بجوج(تنهدات)
"الأميرة كان فداخلها طفل..مكنتش عارفة كيفاش تيوقع هادشي ولكن عارفة بلي البشر الصغار تيتولدو من البشر الكبار كان خصني نستنزف حياة جوج من البشر ماشي تلاتة رغم كاع الأرواح لي تغديت عليها عمرني مآديت شي واحد بريء و بهاد الإكتشاف قررت نخلي الأميرة و منقتلهاش من بعد ما خليتها فالحمام سلتت حتى دخلت تحولت لهيئتها و فستاني الأسود باقي عليا و دخلت عند الساحر لي كان تيتسنا فزوجتو و لي تيتصحابليه هي انا..."
ليونارد مبتسم:اوه فستان ليلي جديد من أجل الأمسية ديالنا حبي؟
هيلين حركات ليه راسها ب اه مبتسمة...
"الحرفي ليونارد هو البشري لي ختار انه ميكونش مخلص هاد البشري هو لي خصو يموت هو الأول من بعد و نرجع نكمل مهمتي مدام غتقرر مصيرها من بعد ما نقول ليها على الطفل لي فداخلها"
ليونارد:من بعد هاد الوقت كامل باقة تتفاجئيني كيف كل مرة
"هاد البشري ليونارد بصاح هو ساحر قوي ولكن فجميع الأحوال تيبقا رجل و استنزاف حياتو غتكون مبالغة شديدة"
قربات منو و بداو فتبادل القبل...
" الأميرة كانت باقة فالحمام و كان خاصني نزرب دغيا محدو باقي طايح فالوهم ديالي كنت متوترة بزاف فاش كان تيدوي معايا حيت انا قادرة نغيير شكلي فقط ماشي صوتي الى دويت غادي يعرف بلي انا ماشي الأميرة داكشي علاش تمنيت انه يحبس الهضرة...كان مختلف على الفاسدين لي تغديت على ارواحهوم من قبل كان حنين بزاف كل لمسة منو كانت مليئة بالحب لأول مرة فحياتي محسيتش بالنفور اتجاه الفريسة لي تنعس معاها و هادشي خدا ليا وقت أطول من حصد الأرواح العادي لي تنديرو و في النهاية النافذة تحلات و ركزت السحر ديالي على روحو فالوقت فاش كان هو غارق فالحب و ديك الساعة سالا كلشي ولات روح أقوى ساحر بين يديا دابا و امتصها الجسد ديالي..جسمو الميت فوق السرير حتى فلحظتو الأخيرة تصحاب ليه بلي كان تيمارس مع أميرتو الجميلة حسنا البشرية لي خانها غتكون تتبغيه بحال هكاك ولا اكتر فاش شفت بلي مهمتي سالات قررت نرجع لهيئتي و نمشي طايرة للكوخ ولكن لسوء الحظ الأميرة رجعات من الحمام فاش شافتني تصدمات و رجعات خطوة لور اما انا بالصدمة التحول ديالي حبس و بقيت بهيئتها و فهاد اللحظة غيكون ساهل نستنزف حياتها بسحري..الروح ديال اقوى ساحر والو قدام روح بشري عادي و السحر تنحسو تضخ فالدم ديالي هادشي ماشي شي حاجة جديدة عليا ولكن فاش شفتها بديك الحالة.."
كاترين شادة راسها:شكوون نتي؟؟؟و علاش تتباني بحاالي؟؟؟ و شنو درتي ل ليونارد ديالي؟؟؟؟
"هدا مكانش السؤال لي غنجاوب عليه و بدون تفكير درت داكشي لي قادرة نديرو تحولت لغراب و طرت من النافدة بلا منتلفت لور...فاش رجعت للكوخ لي فالغابة مدام مكانتش تما فين غتكون مشات؟؟و بهيئتي الغرابية طرت و قلبت الغابة كلها و اخيرا لقيت مدام فالقمة ديال الجبل كانت تتغني بواحد اللحن كئيب و حولها صنعات مطر من الشعلات الخضراء المضيئة..كان صوتها حزين بزاف كانت هادي اول و اخر مرة نشوف مدام هاكا المرارة لي كانت فلحنها خلاتني نكون حزينة بنفسي كانت بحال الى فشي حداد..مكنتش باغة نقاطعها داكشي علاش بقيت تنتسنا و نتسنا حتى سالات..هزات يديها و توقف داك المطر ديال الشعلات المضيئة و انا نقرب منها..."
هيلين بابتسامة:انا رجعت ا مدام
لوسيا:واش ساليتي؟واش ماتو؟
هيلين:مدام..الأميرة معاها طفل..مخديتش حياتها
لوسيا بدهشة:شنو؟؟؟!!
هيلين بتوتر:فكر....ت.....
لوسيا غوتات:ياااك قلت ليييك خووودي حيااتهووم بجوووج!!!انا متيهمنيش تكون بالطفل ولا لاااا داك الجنين لي فكرشهااا هو النتيجة ديال الخطيئة ديالهوووم يعني خصوو يمووووت
"الغضب ديال مدام صدمني فداخلي هي تتكره الأرواح الفاسدة كره شديد ولكن طفل بريء؟؟؟"
لوسيا:العاهرة و النسل الشرير لي فكرشها مغاديش يغادرو القصر غادي نتعامل معاهوم من بعد(هزات عليها صبعها) واش ستعملتي قوة حياتك كلها فاش بغيتي تاخدي روح ليونارد؟؟(بتوتر) هو...هو...متعدبش بزاف ياك؟
" التعبير المفاجئ الحزين لي فوجهها لي مكنتش متوقعاه"
هيلين:نتي قلتي ليا بلي قوة حياتي خصها تستعمل فاهداف عديدة فاش الأميرة مكانتش معاه قررت ناخد هيئتها و نحصد روحو
"فاش سمعات كلماتي داك الحزن ليكان فعينيها تحول لواحد الغضب شديد"
🔮💫الساحرة السوداء🔮💫
للكاتبة✒️:Victoria kaelin
💜📖الجزء 62💜📖
لوسيا بغضب:نتي شنو؟؟؟؟نعستي مع ليونارد ديالي؟؟؟؟
هيلين بدهشة:ليونارد ديالك؟؟(حطات يديها على قلبها بصدمة)
"و اخيرا فهمت دابا كلشي...رغبتها نستعمل قوة حياتي..الكره اتجاه ولدهوم..مطر الشعلات المضيئة..اللحن الحزين..هداك كان الحداد ديال الحبيب ديالها الساحر لي بغاتو بزاف و لي خانها على قبل الأميرة و انا صدقت دايرة بحال لي دارتو الأميرة شاركت كل قطعة من لحمي مع الرجل لي حباتو..."
هيلين بخوف:ع عفاك مدام سامحيني....انا.....
لوسيا:انا غنقتلك يا الشيطانة الملعونة
" و فوسط من الذعر ديالي مدام خرجات واحد الغوتة من اعماقها و فنفس الوقت بان واحد الشعاع ناري سحري محيط بيها كنت غادي نجلس فالأرض و نطلب منها الرحمة ولكن داك السحر كان تيحرق بشرتي هنا فين عرفت بلي مدام غاضبة بشدة مني كانت مصممة انها تحرقني حتى نولي رماد ديك الساعة تبعت الغريزة ديالي و ضرت تنجري..و مع مدام و السحر ديالها المدمر ستاولات على الجبل كولو مكان عندي حتاشي حل من غير نجري لعند الجرف مكان حتاشي طريق اخور و مدام كانت عارفة هادشي..كان باستطاعتي نتحول لغراب و نطير من هنا ولكن مدام خلقاتني و رفعاتني منقدرش نمشي و نخليها كانت كلشي بالنسبة ليا"
هيلين ببكاء:مدام...عفااك.سامحينييي مكنتش عارفة بلي هو الرجل لي نتي...نتييي...
لوسيا بلغوات:داااك الرااجل مبقااا تيعني ليااا حتى حاجة مزااال و حتى نتييي يا المتشردة الفاااسدة
"و انا تنشوف فمدام سحرها تجمع فيديها مشكل قبضة من الشعلة النارية مكان عندي حتى شي خيار اخور من غير نتحول لغراب ولكن تعطلت..مدام ستعملات تعويذة تشويش العقل عليا و بسبب هادشي التحول ديالي فشل و انا طحت على ركابيا و يديا فالأرض قدام سحر مدام القوي معندي حتاشي فرصة نوقف قدامها من بعد كلشي تنبقا مخلوق خلقاتو"
قربات منها لوسيا:قولي ل ماماك و لوخرين المستحضرة تتسيفط ليكوم تحياتها
" معرفتش اش قصدات ب "ماماك" و "لوخرين" و فهاد اللحظة كانت مدام مستعدة انها تحرقني حتال الموت و انا عند رجليها تنشوف فالأرض تنتسنا فالموت الوشيك ديالي..فاش اصابتني مدام بسحرها الناري حسيت بواحد الاندفاع من السحر بغا ينفاجر من جسدي مقدرتش نتحكم بيه و التصادم فالسحر ديالنا خلق هزة ارضية خلاتنا بجوج نطيحو مدام كانت واقفة قريبة بزاف من الحافة و الهزة الأرضية خلاتها تلاح من تما و هكا مشات مدام..تعتقت من طرف واحد السحر لي مكنتش تنملكو كان كلشي من الأرواح لي تغديت عليها..الساحر ليونارد عتقني انا و قتل مدام نجح فخيانة مدام مرة خرى حتى و بعد موتو..من بعد ما مشات مدام دوزت اسابيع فالكوخ تنتسنا فيها ترجع..مدام كانت تتعرف لجميع انواع السحر ولكن متقدرش تحول كنت متأكدة من هادشي و كنت تنتمنى غير تبقا حية و تسامحني فلي درتو و نرجعو كيفما كنا ولكن عمرها رجعات..و فلحظات السحر ديال ليونارد بدا يتلاشا من جسدي فهاد الأسابيع كاملها عمرني ستعملت السحر و في النهاية تضائل..امتلاك روح ليونارد و فقدانها حذر الجسم ديالي و الدافع ديال التغدي على الأرواح ولا كبير بالنسبة ليا و هاد الدافع مقدرتش نتخلص منو..مدام غتكون مشات ولكن الهدف ديالي من هاد الحياة مغيتبدلش قدما انا عايشة خصني نتغدا و نحصد ارواح الرجال الفاسدين و الأزواج الخائنين..."
💥الحاضر💥
هيلين:قبل منبدا فالصيد طرت ل القصر باش نشوف الأميرة و طفلها(بحزن) ولكن حتى هي مشات شفت غير القبر ديالها لي كان فالحديقة معرفتش كيفاش وقع هادشي ولكن انا مآديتهاش
طوماس تيفكر...
بياتريس:الوقت و سبب وفاة الأميرة غيكون مسجل انا تايقة بلي هيلين مدارت ليها والو ولكن علاش موتها متسجلش؟
طوماس:تيكون ديما اختيار الملك الى شي حاجة متدارتش فالسجلات كاين سبب وحيد لي يخلي الملك يتاخد هاد القرار و هو العار
بياتريس:بغيتي تقول...
طوماس:الى كان لي تتقولو هيلين صحيح..الرباط لي بين الأميرة كاترين و الساحر ليونارد قوي و احيانا فقدان شخص عزيز علينا و تنبغيوه تيخلينا بعقول ضعيفة..همم واقيلة لقيتها الملك نيڨيليت عرف بلي لي قتل الساحر ليونارد هو مستعمل سحر ولكن هيلين موراتش هيئتها الحقيقية ل الأميرة اذن هادشي تيبيين كاع صيد السحرة و تحريم طقوس السحر هو لوم الملك ل السحر على موت بنتو
ميلتون:طوماس على حق انستي فاش كنت تنتدرب باش نكون كاتب ملكي تقال ليا بلي بعد الحاجات تيتحدفو بأمر من الملك و لكن الأعضاء الملكيين لخرين ممسموحش ليهوم
بياتريس بحزن:كان طفل فبطنها علاش غتكون....
طوماس:كيفما قالت هيلين الساحر ليونارد و الأميرة كاترين دازو من محنة صعيبة و صدمة بحال هاديك غتكون مميتة بالنسبة لجنين بغض النظر على امو الحزينة
🔮💫الساحرة السوداء🔮💫
للكاتبة✒️:Victoria kaelin
💜📖الجزء 63💜📖
دايزي حطات يديها على فمها:الى الأميرة كاترين خسرات الشيء الوحيد لي كان تيربطها مع ليونارد...(تنهدات بحزن)
ميلتون حادر عينيه بحزن...
هيلين:رغم كلشي كنت انا السبب...مدرتهاش مباشرة ولكن هي و الطفل ماتو بسببي مدام خلقاتني باش ندير هادشي(بحزن) الوجود ديالي مجرد غلطة
ميلتون:لا ا هيلين هادشي مكانش الخطأ ديالك
دايزي:نتي خليتي الأميرة كاترين رغم انه لوسيا امراتك انك تقتليها حتى حاجة مكانت غتوقع من هادشي كونما لوسيا مدااارتش....مدااارتش(زيرات على يديها بعصبية) خصنا نقولو ليها ا طوماس انا عارفة بغيتي تعرف بنفسها من المذكرات ولكن شوف فيها..خصها تعرف الحقيقة
طوماس تنهد شاد راسو:هيلين...المستحضرة لوسيا مخلقاتكش كنتي وحدة من الناس ديال الحرفي ليونارد و كنتي مزيودة بالسحر فدمك لوسيا قتلاتهوم كاملين و من ضمنهوم حتى ماماك نتي نجيتي من السحر ديالها الأسود و فقدتي ذكراياتك كلها نتي ماشي ظل الغراب نتي كنتي انسان بحالنا...
و بالكلمات لي سمعاتهوم من الفايكاونت طوماس حطات يديها على قلبها بصدمة بحالا غرس سهام فصدرها...
هيلين تيتهز قلبها و يتحط مخرجة عينيها:(انا؟؟؟بشرية؟؟؟مدام مخلقاتنيش؟؟كانت عندي أم؟؟كنت بحالهوم؟؟هادشي لي كانت تتقصد ب "ماماك" و "لوخرين" ؟؟)
دوزات حياتها كاملها و تظن انه مدام هي الخالقة ديالها و بسبب الوفاء ديال هيلين ليها كانت تظن انها تدير شي حاجة مزيانة و تتخدم الهدف ديالها بإخلاص و فجأة كلشي ولا واضح..كانت مجرد أداة باش ترجع ل ليونارد الرجل لي حطم قلبها و بامتلاكها لوحدة من الناس ديالو و لي غتخليها تاخد روحو غادي يخلي الإنتقام أحلى اكتر بالنسبة ليها...
هيلين:(مدام خلاتني نصدق بلي حصد أرواح الرجال هو هدف وجودي من هاد الحياة...كاع دوك الرجال لي نعست معاهوم..كاع الأرواح لي حصدت و تغديت عليها...مكانش عليا اصلا ندير هادشي)
و هنا نفاجرات بالبكا و بدات تتفهم علاش ختارت الأميرة كاترين تنهي حياتها بنفسها هي مخسراتش كاع لي تتبغيه فليلة وحدة بحالها ولكن محطمة كيفما كانت...
ميلتون:انسة ساحرة...
دايزي:هيلين...
هيلين عقدات حجبانها:انا ممحتاجاش ل التعاطف ديالكوم يا بشر!!
خرجات من الغرفة تتجري منهارة بالبكا...
طوماس تنهد و شد راسو:ها علاش بغيت نخليها تعرف الحقيقة بوحدها هي مزال مقادرة تستوعب هادشي
بياتريس بحزن:خلينا نعطيوها الوقت باش تستوعب هادشي...
داز النهار على طولووو و جاا الليل🌙🌙...
و فغرفة هيلين هاد الأخيرة لي كانت واقفة مقابلة مع الحيط تتفكر فكاع لي قالتو و لي دارتو ليها مدام...
هيلين بحزن:(مدام عمرها تسوقات تدير شي حاجة مزيانة لهاد العالم...عمرها..كرهات الساحر حيت خانها و سلطات هاد الكره على اي رجل فاسد و خائن فهاد العالم عن طريقي انا لي خلاتني نتغدا على ارواحهوم..خلاتهوم يعانيو و عانيت حتى انا...هداك هو انتقامها لينا...البشر قراو هادشي فمذكرات مدام هادشي علاش معلماتنيش كيفاش نقرا)
فجأة تسمعو خطوات داخلين لغرفتها كانت بياتريس...
بياتريس بابتسامة:هيلين
هيلين و الحزن فوجهها:انستي
بياتريس:مخرجتيش من غرفتك من هاد الصباح كلهوم مقلقين على حالك
هيلين:هوما؟؟حتى من مول الشعر القهوي؟؟...(بتوتر) حتى من سيادته؟؟
بياتريس بابتسامة:اكيد حتى هو انا عارفة هو مبينهاش بحال ميلتون و دايزي ولكن هو مهتم بحالتك كيفما هوما مهتمين بيها و مكانش غادي يخليني نعتقك
هيلين تتحك يديها بتوتر و تتشوف فيها بعويناتها...
بياتريس:على كل الأحوال مخصكش تبقاي بوحدك خليهوم يدويو معاك ا هيلين
هيلين:مكاينة حتاشي شي حاجة خرى منقول ليهوم قلت ليكوم كاع لي تنعرفو من فضلك..خليوني بوحدي
بياتريس:لا ا هيلين حنا مغاديش نستجوبوك ولا نسولوك مزال هوما ببساطة بغاو يرافقوك و يساعدوك تحسن حالتك للأفضل الى نتي تتظني بلي بتلاتاهوم كتار اش بان ليك تدوي مع واحد فيهوم؟ غادي يخلي احاسيسك تخرج من صدرك
هيلين تنهدات:(انا مبغيتش ندوي ولكن تكون شي رفقة دابا ماشي فكرة خايبة...مابقيتش قادرة نفكر فمدام مزال غادي نتسطا) شكون لي غادي يدوي معايا انستي؟
🔮💫الساحرة السوداء🔮💫
للكاتبة✒️:Victoria kaelin
💜📖الجزء 64💜📖
بياتريس بابتسامة:هدا اختيارك نتي..شكون لي بغيتي تدوي معاه؟
هيلين بتوتر:واخا..ندوي..مع الفايكاونت طوماس انستي؟؟
بياتريس مبتسمة:واخا غادي نقول ليه يجي(انصارفات)
مشات بياتريس و بعد دقائق تم داخل طوماس...
طوماس مبتسم:مساء الخير هيلين
هيلين تتشوف فالأرض بحزن...
طوماس:انا تنعتاذر حيت مقلتش ليك على لي قريتو فالمذكرات من قبل انا ببساطة كنت تنحاول نحميك انا مقصدتش حتاشي حاجة خايبة من فضلك حاولي تفهمي
هيلين بحزن:مدام مشات و كونما قلتي ليا هادشي عمرني نعرف
طوماس:واخا الحقيقة تتكون غالبا مؤلمة ولكن تتكون احسن من انك تضيع فعالم من الأكاذيب
هيلين تتشوف فالأرض...
طوماس:هيلين...انا عارف بلي تتكرهي راسك على الأمور لي خلاتك لوسيا تديريهوم ولكن مكانوش منك نتي كلشي من المشعوذة لوسيا
هيلين بحزن:واش هادشي تيهم؟؟ليونارد...و كاع دوك الرجال يديا ملطخين بدمهوم...انا ماشي ظل الغراب..انا مجرد قاتلة بجسم قذر لي تلوثات ب مئات الرجال
طوماس:لا نتي ماشي هاكدا نتي مجرد روح ضائعة بقلب خالص
هيلين:تظن بلي انا خالصة؟
طوماس:لوسيا ببساطة ستغلات التعاطف لي فيك و ربطاتو مع الشر ديالها
هيلين:البشر تيعييطو ليا ب "الساحرة الشريرة" هوما تيظنو بلي انا شريرة
طوماس بابتسامة:اذن برهني ليهوم العكس ا هيلين وريهوم شكون نتي فالحقيقة..غادي ياخد هادشي وقت ولكن نتي خالدة ولا لا؟
هيلين تنهدات:(ممكن هادشي ياخد سنوات ولا حتى قرون ولكن البشر غادي يسامحوني شي نهار) غادي ندير جهدي كامل باش نحسن نفسي بين البشر
طوماس مبتسم:انا سعيد بسماع هادشي و حنا كلنا معاك باش نوريوك الطريق الصحيح ا هيلين
هيلين بتاسمات...
طوماس:حسنا خصك دابا ترتاحي دايزي غادي تبدا تدربك من غدا غادي تحتاجي لبزاف ديال الطاقة لهادشي..ليلة سعيدة هيلين
هيلين نقزات:تسناااا ا مول الشعر....(بتوتر) سيادته...
طوماس:شنو؟
هيلين:واش تقدر تبقا اكتر مزال؟ منقدرش نبقا بوحدي منقدرش نحبس التفكير فمدام
طوماس:واخا غنبقا حتى يديك النعاس
حركات ليه راسها بابتسامة و مشات تكات فوق الناموسية و هو جلس فوق الكرسي حداها...من بعد نهار من الوقوف فاش تكات فوق سريرها الناعم كانها فالنعيم مدام كانت تتخليها تنعس فوق الأرض المغبرة القاصحة و ولفات هادشي...و فجأة كتاشفات قداش الفايكاونت طوماس لطيف معاها هاد مول الشعر القهوي لي عطاها الماكلة و المأوى ماشي حيت محتاجاهوم ولكن الدوقة بياتريس كانت على حق على خلاف مدام هو مهتم لحالتها..مكانتش غادي تكون عايشة اصلا كونما حاول يساعدها..لي وقع معاها و مع مدام كان مشؤوم و باقي تيألمها ولكن دابا كاينة حياة جديدة قدامها و حياة احسن كاع...
هيلين:ليلة سعيدة سيدي
طوماس:ليلة سعيدة هيلين
بهاد جوج كلمات حسات بالطمأنينة خارجة من فمو سدات عويناتها و خلات عقلها يعوم ففراغ و بسماع تنفسها المنتظم وسط احلامها الفايكاونت ناض بعدما تأكد انها ستسلمات لنومها و حاول ميفييقهاش ولا يزعجها من بعد كلشي هادي غرفة انسة ماشي من اللائق بالنسبة ليه يبقا معاها كتر خصوصا بعد الظلام تلفت شاف فيها بنظرة اخيرة قبل ميخرج و بتأملو فوجهها الجميل بدا الفايكاونت تيفكر كيفاش بدا هادشي..فاش تلاقاها اول مرة كان تيحاول غير يغري قاتلة تطيح فالفخ ديالو و يخليها تعدم..رجل نبيل بحالو غني وسيم ذكي و بسمعة مزيانة كان محط الأنظار..و البنات لي كانو بالرفقة ديالو كانو تيصبغو فكمامرهوم بالحمر و العكر و مستعدات يديرو اي حاجة باش يتعجب بيهوم رجل بحالو...حتى من جمالها معصوب من الخطأ بالنسبة لطوماس كانت مجرد وجه جميل غير ديال التأمل..على كل الأحوال و بينما هي ناعسة بسلام طوماس بدا تيحس بالذنب شوية فاش خدعها داك النهار فالحانة عمرو ما تلاقا بإمرأة زوينة بزاف و فنفس الوقت جاهلة من جميع النواحي و فجأة الفايكاونت طوماس ستوعب الرفقة ديالو مع هاد الساذجة قداش ممتعة و بهاد الفكرة الفايكاونت رجع جلس فوق الكرسي و تيبان ليه انه غادي يجلس مزال شوية...فقط هاد المرة...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 65💜📖
فنفس الوقت و فالقصر الملكي...
الملك روبيرت متكي فوق سريرو عريان و قدامو جوج عاهرات بملابسهوم الداخلية تيلبسو فحوايجهوم فاش سالاو انصارفو و ناض هو حتى لبس حوايجو و هو يبدا يعييط على جنودو...
الملك:يااا جنووود
تم داخل واحد الجندي حنى راسو ليه:بغيتي راقصات خرين جلالته؟
الملك:لا انا مليت من الراقصات لي عندنا
الجندي:واش أسائو السلوك جلالته؟؟
الملك:هااه! كنت تنتمنى هادشي كان غيكون المرح اكتر
الجندي تيشوف فيه باستغراب...
الملك:مفهمتي والو ياك؟من الجيد نعس مع امرأة لي تتميل و تفهم شنو محتاجو ولكن فاش تيكونو مطيعات بزاف تيولي الملل انا بغيت نتدوق مرح ترويض حصانة هنا و لهيه..كان غيكون افضل كون داك الشيء مولات الشعر الغامق ماشي ساحرة قذرة
الجندي بتوتر:واش نقول ل الراقصات يتعاملو بطريقة مختلفة جلالتك؟؟
الملك بنفاد صبر:ماشيي هداك هو الحل انا عارف بلي غادي غير يتقمصو الدور و هادشي ماشي ممتع..مسيفطيش رجالك يجيبو ليا امرأة مؤهلة بين السكان؟؟(ربع يديه بتذمر) علاش لدابا متنشوف وجوه جديدة فهاد القصر؟؟
الجندي:الناس ماشي فرحانين من فاش...من فاش..
الملك طلع حاجب:من فاش بياتريس مشات؟
الحندي بتوتر:الدوقة بياتريس كانت غالطة حيت محتارماتكش جلالتك..ولكن الناس تيبغيوها
الملك بغضب:بطبيعة الحال غادي تفسد الناس لي تنحكم(تنهد) واخا و شنو ندربو راقصات جداد؟غادي غالبا يكونو مملين ولكن على الأقل غادي نشوف حاجة جديدة
الجندي:جلالتك..راقصات مملكة ديانا كلهوم تيتختارو فعمر صغير بزاف خصهوم يتدربو لسنوات باش يوليو راقصات منقدروش نديرو هادشي فليلة وحدة اش بان ليك ف درافت كيفما تيديرو مملكة تينديا جلالتك؟؟بهاد الطريقة غادي تقدر تختار بنات جميلات من النبلاء فالمملكة كلها و غادي تخليهوم ف قصرك ك إمبراطورات و ملكة غادي تفيد مملكة ديانا بزاف
💡درافت و هو حفل تيتدار فقصر الملك تيجيو ليه بنات من عائلة نبيلة تيرقصو فيه ولا تيديرو فيه اي حاجة تيتقنوها من مواهب و هوايات لي تخلي الملك يتعجب بيها و اكيد المظهر عامل كبير و اساسي و لي تختارت و نعس معاها الملك تترقا.
الملك:انا تنقلب على شي امرأة لي ترضي عينيا و تخليني فرحان فالليالي ماشي السلاسل و القيود كون بغيت امرأة تنكدها عليا كون رجعت بياتريس من شحال هادي
الجندي معرف شنو يقول...
الملك:خرج عليا من هنا كلكوم بلا فايدة
و فنفس الوقت فالحديقة الملكية...
كانت لوسيا واقفة قدام قبر ليونارد...
لوسيا:هنا فين دفناتك أميرتك الملعونة هاه؟(باستغراب)ف الحديقة الملكية؟؟؟(تتفكر) و دابا فين غادي تكون العاهرة و ولدها الحقير؟؟
بقات تتشوف هنا و لهيه حتى وقفو عليها جوج من الجنود كانو دايزين...
الجندي:متتبانيش لينا وحدة من الخادمات يا امرأة!!
الجندي2:شكون نتي انستي؟و اش تديري هنا؟
لوسيا مطلعة حاجب و مبتسمة ب شر:تنقلب على الأميرة كاترين علاش متقولوش ليا يا السادة الأفاضل فين كاينة؟....
🔮💫الساحرة السوداء🔮💫
للكاتبة✒️:Victoria kaelin
💜📖الجزء 66💜📖
الجندي باستغراب:الأميرة كاترين؟؟مكاينة حتاشي أميرة اصلا فمملكة ديانا
لوسيا بصدمة:شنو؟؟؟؟
الجندي2:غير شدها ا صاحبي هادي باينة شي مسطية
لوسيا حمرات فيه عينيها:متقولش عليا مسطية يا الفاااسد!!(ربعات يديها مطلعة حاجب)قادة نرجعكوم أشلاء غير بحركة من صبعي و الحرفي ديالكوم ليونارد مكاينش هنا باش يعتقكوم هاد المرة
الجندي باستغراب:الحرفي ليونارد؟؟؟قصدك اخر ساحر لمملكة ديانا؟؟؟
الجندي شد راسو مخرج عينيه بحالا تفكر شي حاجة:الأميرة كاترين!!الحرفي ليونارد كان مزوج بيها
لوسيا هزات عليه صبعها بغضب:ايييه قول ليا فين كاينة ديك الملعونة دابا!!
الجندي2:راها مييتة كتر من 200عام
لوسيا بدهشة:كيفاش؟؟؟ واش كنت ناعسة فهاد المدة كاملها؟؟
الجندي:علاش اصلا تندوييو مع هااادي؟؟؟هي قتاحمات القصر من غير علم الحراس خصنا نديرو استجوابات هنا
الجندي2:تحرك نعقدو ليها يديها
لوسيا عوجات عينيها:اوه بصاح؟ بغيت نشوفكوم تتحاولو
يالاه هزات لوسيا يديها لي تتدفق بالسحر و ابتسامة مرسومة على وجهها حتى وقف عليهوم الملك...
الملك:اووهوووه شكون عندنا هنا
الجنديين نداهشو...
الجندي:جلالتك!!
الجندي2:من فضلك جلالتك بعد من هاد المرا راها خطيرة
الملك متحركش من بلاصتو و متسوقش لتحديرات جنودو هو حاليا تيتفحص هاد الآنسة مولات الشعر الأبيض لي قدامو...حتى هي ماشي من العاگيزين تفحصاتو بعينيها و فهمات من طريقة كلام الجنود بلي هو ملك...
لوسيا:هي نتا هو الملك ديال هاد العصر هاه؟
الملك:هاد العصر؟
لوسيا بعد دقائق من التفكير:اذن معندي علاش نبقا هنا مزال(ربعات يديها مطلعة عينيها بتكبر) عتابر نفسك محظوظ يا الملك الشاب كنتي غتكون مقتول كونما كنتي وسيم(بتاسمات)طلعتي أوسم حتى على ليونارد ديالي منقدرش نخلي نفسي تحطم شي حاجة جميلة
الجندي غوت عليها:كيفااااش تجرأتيي!!!!جلالته هو الملك ديال ديانا....
قاطعاتو الضحكة ديال الملك:ههههه واش تتقولي ليا دابا كون كنت خايب كون قتلتيني؟
لوسيا:ممكن هادشي تيقتاصر على المزاج ديالي يا الملك الشاب
الجندي2:هاديي مسطية جلالتك بغيتينا نربطوها؟ ؟؟
تجاهلهوم الملك مرة اخرى طالق تبسيمتو و عينيه لي تيتفحصوها...
الملك مبتسم:عرفتي شنو نتي صغيرة بزاف على انك تعييطي عليا بالملك الشاب
لوسيا مطلعة حاجب:تظن بلي انا شابة هاه؟عرفتي شحال عندي فالعمر؟؟
الملك: تتباني اصغر من اختي لي كبيرة عليا ب 3 سنين
لوسيا هنا تصدمات:مرااايااا!!! انا محتاااجة مراياااا!!!
الملك:عندي مرايا كبيرة فغرفتي بغيتي تمشي معايا؟؟
لوسيا غتسطا:اااه دينييي بغييت مراياااا
الملك:كيفما بغيتي
الجندي:من فضلك جلالتك هاد المرأة راها دخيلة مخصناش نديرو فيها الثقة
الملك بغضب:براكة!!!انا غنديها معايا لغرفتي و قول ل الجنود لي حدا غرفتي ينصارفو مبغيتش حتى واحد يصدعني(شاف ف لوسيا) تبعيني
نصارفو بجوج تحت انضار الجنود المندهشين....
🔮💫الساحرة السوداء🔮💫
للكاتبة✒️:Victoria kaelin
💜📖الجزء 67💜📖
👑فغرفة الملك👑
جالسة لوسيا قدام مرايا كبيرة جنابها كلهوم من الذهب تتشوف الإنعكاس ديالها بابتسامة رضى ماشي حيت يتصحاب ليها مبقاتش زوينة و انما كاين فرق كبير بين وردة عاد تتفتح و بين وحدة تفتحات و عطات ريحتها الحلوة لي مقادرش حتاشي راجل شاب يقاومها..بالنسبة ل لوسيا تتفضل تكون الزهرة لي تفتحات داكشي علاش دوزات حياتها الخالدة بنفس الوجه الشبابي لي تتشوفو قدامها دابا و من بعد كلشي ساهل بزاف على الرجال الشابين ينجذبو ل الوردة المنفتحة...
فاش سالات التأمل و التحديق فوجهها ناضت على الكرسي و وقفات قبالت الملك لي محييدش عينيه عليها...
الملك:نتي انسانة غريبة
لوسيا:كاينين بزاف د الحوايج معارفهومش عليا يا الملك الشاب
الملك:اذن علاش متوريش ليا المزيد؟؟
الملك معارفش قداش مميتة هاد الساحرة القديمة لي قدامو و بصراحة هو ممسوقش لهادشي اصلا كاع لي فراسو دابا هو امرأة زوينة واقفة قدامو دابا و فغرفتو..قرب منها و حط يديه على خصرها لي بدا تيتلمس فيه و فنفس الوقت تيقلب على خيوط الفستان باش يفكو ولكن مع من طاح هاد الساحرة القديمة مغتخلي حتاشي راجل يقلل احترامها بهاد الطريقة دفعاتو على جهدها يالاه تكمش وجهو بالغضب و هي تلاح عليه لوسيا بتعنيقة خلاتو مفاهم والو و بدات تتقبلو فعنقو هادشي لي خلاه متحمس اكتر و نسا الدفعة من بعد القبلات لي طبعات فعنقو طلعات لفمو و بدات تتقبل فيه و هو منساجم معاها تيروي فشهوتو حتى حس بيها بعدات منو بابتسامة مكر...
لوسيا:ماشي بهاد السهولة يا ملكي الوسيم
الملك عندو جوج أفكار على هاد المرأة دابا يا ايما بالخاطر ولا غتشوف العواقب لأول مرة فحياة هاد الملك الشاب ميعرفش كيفاش يتعامل مع امرأة جميلة و هادشي محمقو فعقلو...
الملك:شنو بغيتي يا امرأة؟
لوسيا:همم هدا سؤال جيد..شنو بغيت مزال؟
الملك:انا الملك ديال ديانا و قادر نعطيك كلشي بفرقعة اصبع مني قادر نسيفط قوات يجيبو مملكة على قدها غير قولي
فالبداية هاد المشعوذة جات للقصر باش تنتاقم من لي سرقات منها المحبوب ديالها متوقعاش انها غادي طيح تحت يد ملك ديانا و جنودو هي بصاح منتقمة ولكن ماشي متهورة هي كانت عارفة من الأول اش كان باغي هاد الملك الشاب فاش جابها معاه لغرفتو و مغاديش تعطي راسها غير هكداك منذ مئات السنين كانت تتبغي واحد الرجل فقط كاع لي دارتو سوا زوين سوا خايب كان على قبل داك الرجل فقط..و دابا شي حاجة ف روبيرت خلاتها تنجذب ليه هو غيكون تيبدل فالعيالات بحال كيف تيبدل ملابسو الداخلية هادشي مافيهش الشك ولكن عندو السلطة فمختلف الأشياء و حتى عاطي للعين تيكون احساس انه رجل شاب تعجب بيك ديما زوين و بالنسبة ل خالدة بحالها كان عندها الترف ديال الوقت و دابا بلا الإنتقام لي كان فدماغها معندها متدير مزال علاش متسليش راسها رفقة ملك شاب؟؟لي السلطة ديالو هي لي غادي تزودها بهاد التسلية...
لوسيا بصوت حنين:بغيتك نتا ا الملك ديالي
الملك:هادشي لي تنتسنا نسمعو منك..بغيت نحييد ليك هاد الفستان
لوسيا:ولكن انا ماشي اي امرأة يا ملكي
الملك:شنو؟
لوسيا:خصك تكسبني هو الأول بعدا
الملك:نكسبك؟؟
لوسيا:انا مغاديش نعس معاك حتى يكون تراضي بيناتنا خصك تدوز من تجاربي عاد غنقدرو نتشاركو انا وياك كلشي
الملك بغضب:ولا غنربطك مع السرير ديالي و ديك الساعة نبدا فخدمتي
لوسيا بتاسمات بخبث:مغتقدرش تحط صبع واحد عليا حتى نسمح ليك انا بهادشي و بالإضافة مغاديش تكون المتعة بهكاك و ماشي ساهل باش تكسب قلبي ولكن راه غادي نرجعك رجل فرحان بزاف جلالتك
الملك:هي نتيا امرأة خطيرة هاه؟ علاش جيتي للقصر ديالي؟ كيفاش قدرتي تدوزي قدام رجالي؟ و شنو سميتك؟
لوسيا:نقدر ندير شي حوايج تتفوق الخيال ديالك جلالتك و بالنسبة ل سمييتي يمكن ليك تعييط ليا لوسيا
الملك:لوسيا هممم..نتي اول امرأة تفاوض معايا و هادشي خلا اهتمامي بيك ينزاعج
لوسيا:غادي نخدمك من كل قلبي الى ربحتي انجذابي ليك
الملك:حسنا شنو هوما الشروط ديالك؟؟
🔮💫الساحرة السوداء🔮💫
للكاتبة✒️:Victoria kaelin
💜📖الجزء 68💜📖
لوسيا:خصك تطبق جميع شروطي و اولها مغتسولنيش شي حاجة خرى على راسي منبقاش نسمع كيفاش دخلت ل القصر و كيفاش تخطيت حراسك
الملك:موافق..شنو الشرط التاني؟
لوسيا:هو نتعامل على اساس الملكة ديالك
الملك عقد حجبانو:شنو قلتي؟؟
لوسيا:نتعامل على اساس هادشي ا جلالتك ماشي تتوجني بغيت نعيش ف اكبر غرفة فهاد القصر بغيت نلبس أروع الفساتين و ناكل أشهى الأطباق و المأكولات بالإضافة نمشي لفينما بغيت
الملك:هادشي ساهل غنكلف حراسي يبداو فالإجراءات توقعت تحديات صعيبة باش نربح امرأة بحالك ا لوسيا
بسماع جواب الملك طلقات لوسيا ضحكتها الخفيفة...
لوسيا:و أخيرا جلالتك ابتداءا من دابا مغاديش تنعس مع امرأة خرى
الملك:ديك الساعة غيخصك تنعسي معايا نتي..شكون لي غادي تسخن ليا فراشي؟؟؟
لوسيا بابتسامة:ربح قلبي جلالتك ديك الساعة كل قطعة من جسدي غتولي ديالك
و بهاد الكلام ملك ديانا بقا تيخمم مع راسو لوسيا من ضمن اجمل النساء لي عرفهوم فحياتو كاملها و على حد لي شافو الساحرة مولات الشعر الغامق هي الوحيدة لي فاقت جمال لوسيا ولكن ظل الغراب كانت بحال شي قطعة فحم مشتعلة مقادرش يقيصها من غير ميحرق يديه اما لوسيا بالنسبة ليه لؤلؤة فداخل محارة تتسناه يحلها و هاد اللؤلؤة الامعة غادي تولي ديالو...الى كان قادر على هادشي بالطبع...
الملك طلع حاجب:و الى عمرك عطيتي نفسك ليا؟؟انا مغندوزش الليالي بوحدي
لوسيا:كلما تتزيد تخليني فرحانة كلما تتزيد تقرب من أكل فاكهتك جلالتك و حتال ديك الساعة
قربات منو باستو و خلاتو حتى نساجم معاها و بعدات...
لوسيا:خصك تصبرك جلالتك
عطاتو بضهرها مخلية شعرها الأبيض طاير حداه و تمشات خطوات للأمام حتى خرجات من غرفتو مخلياه متبع ليها العين و ابتسامتو مرسومة على فمو..لأول مرة امرأة تدخل لغرفتو و تخرج منها و هي مسلماتش ليه نفسو مخلية قلبو تيضرب تنهد فاش تفكر شروطها و جلس غارق فتفكيرو...
🏰فلينز مانور🏰
كانت واقفة دايزي تتسنا فالحديقة ديال القصر حتى تتبان ليها هيلين جاية...
دايزي مبتسمة:اوه جيتي بكري
هيلين:اه..واش بصاح غادي تعلميني كيفاش نقاتل؟؟
دايزي قربات منها:اه بصاح ولكن ماشي ليوما غادي نبداو ب القوة و تدريب التحمل و حتى التقنيات الدفاعية
هيلين مفاهمة والو:امم اه
دايزي:هكا باش دربت ميلتون و طوماس خصك تعرفي بلي من غير تقنيات النجاة الأعداء غادي يغلبوك واخا تكوني قوية على كل الأحوال واش مستعدة نبداو؟
هيلين حركات راسها ب اه...
دايزي:عارفة بلي راك لابسة فستان ولكن خصكي تكوني عارفة فين تحطي رجليك فموقف قتالي بحال هاكا جربيها
قوسات دايزي ضهرها شوية و جمعات يديها عندها بحال وضعية البوكس شافتها هيلين و حاولات تقلدها...
دايزي بابتسامة:لا بأس دابا غادي نضرب كتفك اليسري باش تفادايها خصكي تحركي جانبك الأيمن
هجمات دايزي و فنفس الوقت هيلين فالبلاصة تفاداتها كون ما غريزتها لي حسات بالخطر كون جات فيها الضربة...
دايزي مبتسمة:احسنتي هيلين راك غادة مزيان
هيلين فرحانة عجبها الحال حيت دارت حاجة مزيانة...
دايزي:و دابا غادي نحاول نطييحك برجلي
هزات دايزي رجليها و يالاه غادي تجيب الضربة فجنب ركبة هيلين حتى تتنقز هاد الأخيرة و رجل دايزي دازت على الخوا
دايزي:مزيااان احسنتي طلعتي احسن من ميلتون فاش بديت ندربو اول مرة...
🔮💫الساحرة السوداء🔮💫
للكاتبة✒️:Victoria kaelin
💜📖الجزء 69💜📖
دايزي:الإعتراض هو من ضمن التكتيكات المهمة
هيلين باستغراب:الإعتراض؟
دايزي حركات راسها ب اه:بعد المرات الهجمات تيكونو قاصحين بزاف باش تفادايهوم و الأعداء يقدرو يشلو الحركة ديالك ولا يحاصروك قبل ميضربوك و ميخليوش ليك حتاشي مجال ل التفادي يعني الحل الوحيد هو تحبسي الهجمات ديالهوم غادي نهاجمك تاني ا هيلين و نتي تقدري تفادايها ولا تحبسيني من يدي غير حاولي تكوني خفيفة باش تواكبي السرعة ديالي
خدات دايزي وضعية الإستعداد عاطية لهيلين مهلة تفكر لتحركاتها..
هيلين:(دايزي بشرية قوية و الى رضيت على ضربتها واخا هكاك غيكون الم شوية ولكن نضرب يديها باش نتصدا لضربتها غيضرها حتى هي..هي تتحاول تساعدني دابا و انا مبغيتش نضرها شنو ندير؟)
دايزي:حسنا هيلين واش نتي مستعدة؟
خدات هيلين وضعية القتال حتى هي..تصوبات قبضة دايزي على هيلين هاد الأخيرة لي جمعات يديها بجوج مشكلين درع تصدات بيه لضربتها...
دايزي مبتسمة:رد فعل سريع هيلين واش نتي بيخير؟ واش تقصحتي؟غالبا هاد الضربة غتكون قوية
هيلين:غير شوية و صافي ولكن الى قارنتيها مع لي دارتو ليا مدام راه والو
دايزي:الألم لي تنهزوه تيساهم فالقوة ديالنا ا هيلين..و تيخلينا أقوى
هيلين حطات يديها على فمها بدهشة:واش حتى نتي مدام ديالك كانت تضربك؟
دايزي:لا ماشي هكداك و معنديش شي مدام اصلا انا داوية على التدريب ديالي باش نولي هاوسكارل ل عائلة لينز ولكن هادي قصة نخليوها لشي نهار اخور هادي وقت لغدا خصنا نمشيو طوماس مغيعجبوش الحال الى تعطلنا
حركات ليها هيلين راسها ب اه و مشات هي وياها...
🛋️فنفس الوقت فغرفة الجلوس🛋️
كانو جوج انسات جالسين بملابسهوم الجميلة و اطلالتهم الراقية لي تتبين انهم من عائلة نبيلة وحدة فيهوم باين عليها كبر العمر و الثانية باقة زهرة متفتحة حتى دخل عليهوم طوماس و معاه بياتريس...
طوماس مبتسم:انسة مارڨل...العمة فلورا شكرا لقبول دعوة غدائنا اليوم
فلورا ناضت مصدومة:امي...اميرة بياتريس؟؟
بياتريس:فالحقيقة الدوقة بياتريس دابا
طوماس:الدوقة بياتريس مقيمة فلينز مانور مؤقتا
الكونتيسة مارڨل:وصلني الخبر ديال منصبك الجديد و انا محتارمة قرارك لي بيين اللطف ديالك انستي و بالنسبة ليا نتي الأميرة الأولى ديال ديانا واخا يوقع لي يوقع
بتاسمات بياتريس ل الكونتيسة...
💡الكونتيسة و هي امرأة نبيلة بمكانة اجتماعية مرموقة.
مارڨل:و كوني أكيدة انستي الى خاصاك شي حاجة انا مارڨل ڨانگيس فالخدمة ديالك
بياتريس:شكرا ليك كونتيسة مارڨل سمعت بزاف على افعالك الجيدة و نتي محبوبة عند ناس مدينة سيلبا
فلورا:و ممكن حتى سيلڨيرڨال..أغاني دمج لينز(عائلة طوماس) مع ڨانگيس(عائلة مارڨل) خصها تغنا من طرف ناس ديانا عن قريب(القصد ديالها هو خص هاد الجوج عائلات يترابطو)
مارڨل بتوتر:انسة فلورا انا و فايكاونت طوماس ماشي...ماشي..(سكتات)
بياتريس بقات تتفكر لدقائق و هي تضور تتشوف فطوماس لي بدا تيكح ضحكات ضحكة خفيفة و تلفتات شافت فمارڨل..
بياتريس:كونتيسة مارڨل فيا ديما واحد الفضول على علاقة عائلتك بمملكة مونوبا واش تقدري تعاودي ليا على تاريخ عائلتك الرائعة؟
مارڨل:شرف ليا انستي
طوماس:الغداء غادي يتقدم فقاعة الأكل فالأسفل انا و العمة فلورا غنرافقوكوم واحد شوية انساتي
سبقات بياتريس و مارڨل اما طوماس قرب من عمتو فلورا...
طوماس:خصكي تكوني حريصة..انا متفهم حيت كنت تنغازل الكونتيسة مارڨل فاش كنت مراهق ولكن دابا هي تتبقى كونتيسة مارڨل و انا تنبقى فايكاونت طوماس خص غير إشاعة وحدة تطيح فالوذن الغلط و غادي تدمر السمعة ديالنا بجوجنا
فلورا ربعات يديها مطلعة حاجب:الآنسة مارڨل تتبغيك ا طوماس مغاديش تخليها تسنا للأبد هي انسة طيبة ذكية و جميلة بالإضافة انها كونتيسة من عائلة ڨانگيس الى مطلبتيش يديها رجال خرين من مراتب اعلى منك غيديرو هادشي
🔮💫الساحرة السوداء🔮💫
للكاتبة✒️:Victoria kaelin
💜📖الجزء 70💜📖
طوماس شاد راسو:معرفتش ا عمتي فلورا غير هو ماشي الوقت المناسب دابا
فلورا:عامين لي دازت دابا ا طوماس ياك قلتي غتسنا حتى تحل جرائم القتل الغامضة لي وقعات ف سيلڨيرڨال داكشي كان عرقلة و ازعاج كبير ولكن و اخيرا تحل دابا شنو لي حابسك باش طلب يد الكونتيسة مارڨل؟؟؟(شدات وجهها بدهشة)متقولش ليا طحتي ضحية إغراء ديك الساحرة لي مسكنها عندك؟؟؟
طوماس:بحق السماء عمة فلورا..بطبيعة الحال لا!
فلورا:مزيان..انا عارفة بلي انا مجرد بنت عم باباك ا طوماس ولكن صدقني نتا عزيز عليا و دايراك بحال ولدي و انا بغيتك غير تلقا السعادة ديالك مع الآنسة المثالية و حتى من واليديك غيكونو باغيين ليك انسة بحال كونتيسة مارڨل
طوماس:ماما غتكون معجبة ب الانسة مارڨل و حتى بابا (شد راسو) تنتمنى كون مخييبتش الأمل ديالهوم كيفما خييبتو حتى ف اخر نهار فحياتهوم
فلورا:كنتي مجرد ولد شاب ديك الساعة
طوماس:كنت متعلم و عندي 17عام ا عمتي و كنت تندير قراراتي و ماشي جاهل(تنهد) و كنت ديك الساعة ولدهوم المتمرد الغير مثقف و المدلل الشقي
فلورا:غيكونو فخورين بكيف وليتي دابا..انا شفت قداش كبرتي ا طوماس و انا فخورة بيك
طوماس طلق ابتسامتو الجذابة...
فلورا:و دابا امتى غادي تطلب يد البنت المسكينة؟؟
طوماس:ملي نحس بالوقت المناسب ا عمتي انا مزال ممستعد ل الزواج
فلورا شادة راسها بحزن:واقيلة عمرني غنشوف شي لينز صغيور
طوماس ضحك:على كل الأحوال الغذاء غيكون محطوط دابا تفضلي عمة فلورا مخصناش نخليو الآنسات يتسناو
مشات معاه فلورا لقاعة الأكل...
🍴فقاعة الأكل🍴
الكل تجمع على هاد الطاولة لي مقدمة بطريقة راقية و مزيينها اشهى الأطباق و ألذ المأكولات بالإضافة ل ميلتون لي جالس معاهوم...العمة فلورا بقات تحنزز فهيلين و تصكاني فيها بعينيها حتى نطقات و هي عاقدة حجبانها...
فلورا:راك محظوظة حيت تعجب بيك طوماس يا الساحرة الى فكرتي تضري ولد خويا تنقسم ليك يحتى نقتلك
هيلين تتحك يديها بتوتر:(هي تتحذرني باش منأديش الفايكاونت طوماس؟) انا عمرني غادي نأديه
و بهاد الكلمات الفايكاونت عطاها نضرة معندها حتاشي معنى مخليها معارفاش فاش تيفكر ولكن الإبتسامة الخفيفة لي على شفتيه مطمئنة...
طوماس:تنقدر كلامك ا هيلين و محدك تحت السقف ديالي حتى واحد مغيأديكش حتى نتي(شاف فلورا) عمة فلورا..كيفما تتشوفي كون كانت هيلين ممزياناش مغاديش نعتقها
فلورا:انا تنشوف غير مصلاحتك ا طوماس انا تايقة فقرارك ولكن طهلا فراسك
طوماس:اكيد
مارڨل بابتسامة:الفايكاونت طوماس ديما قراراتو جيدة..غيكون عندك قلب جميل بحال وجهك انسة هيلين
هيلين:انا ماشي انسة و معنديش قلب جميل(بحزن) انا مجرد ساحرة رتاكبات اخطاء...بزاف بزاف ديال الأخطاء
مارڨل:وعلاه حنا متنديروهومش؟هادشي جزء من كوننا بشر ا هيلين
هيلين بدهشة:اخطاء؟؟من انسة نبيلة راقية بحالك؟
مارڨل:اكيد المنصب ديالي مغيحددش شخصيتي..الأب ديالي رباني على طريقتو المونوبية و ماما كانت متتحملش فاش تنسلت فالليل باش نقطف الأزهار البرية
هيلين مبتسمة:تيعجبوني الأزهار البرية حتى انا..فاش كنت عايشة فالغابة كنت تنجمع الأزهار من الجبل عرفتي فاش تيكونو مضوريني أزهار الربيع تنكون فرحانة
مارڨل:عندي حديقة صغيرة فقصري فيها أزهار من مونوبا و من مملكة لوثار الأصليين و مملكة سويتانا و مغتلقايش بحال هاد المجموعة ف ديانا غنديك لتما شي نهار و تقدري تجمعي قدما بغيتي منهوم
و لأول مرة تشوف الطيبة من انسان مسمعش القصة ديالها مقالت ليها حتى سميتها شكون ولكن هادشي مهامهاش حيت تعاملها و ابتسامتها الطيبة تدوي على كلشي بالنسبة ليها و حتى الفايكاونت طوماس باين بلي عاجبو تصرفها من ابتسامة الإعجاب لي تيشوف فمارڨل...
هيلين تتشوف فطوماس:(غيكون حتى هو معجب بهاد البشرية الضريفة هوما أضرف بشر شفتهوم فحياتي)
فجأة لمحات يد حطات واحد القطعة من الحلوى الجميلة و المزينة بطريقة تشهي قدامها...