بيت العنكبوت
الفصل 17
في غرفة فارس:
فارس :معبي البانيو مويه ومبسووووط والماء يصب فوق راسه له ساعه تحت الدش سرحان بشكل دلال ويتخيل صدمة شجون يوم تشوفها سكر المويه ولبس روب الحمام وطلع تنشف وعطر جسمه ولبس ثوب ريتشي سكري جديد وشماغ جديد كان محدد سكسوته وراسمه زين كل شوي وهو يعدل بشماغه بعد شوي عن المرايه والله ماحد قدك ياولد يندر من جد خطيرررر مالوم دلول يوم وافقت علي اجنن مررة رش عطررر اللور وكثر وفتح الباب تمنى تقابله شجون بس مالقاها فيه قال ايه يارب تكون تحت عند أمي علشان اغيظها وهو يسكر باب جناحهم الا يسمع صوتها عند شعاع انقهر مايقدر يدخل غرفة شعاع او يقرب صوبها نزل تحت وشاف أمه لابسه ومتكشخه
ام فارس: كانت جالسه وبحضنها عبايتها تنتظر ولدها وسرحانه انتبهت من سرحانها على ريحة عطر ولدها فزت من مكانها تف تف بسم الله عليك الله يحفظك من عيون حسادك قريت وردك يمه
فارس: بكل ثقه وهو يعدل الكبك حقه ايه ماعليك يمه هاهـ عجبتك
ام فارس: من حينك زين بدون كشخه كيف عاد وأنت كاشخ
فارس: يمه ابيك تشوفينها لي زين وتدققين فيها تراني ماشفتها ابوها يبي يتعرف عليكم قبل بعدين اشوفها
ام فارس: تغير وجهها ان شاءالله ياوليدي
فارس: ايش فيك يمه تغير وجهك ؟!؟!
ام فارس: مادري رحمت هالمسيكينه الي فوق
فارس: فكينا منها لاتخربين جوي بطاريها تراني ماصدقت انزل ولا اشوف وجهها علشان مايخرب جوي >>> ماكأنه يترقب شوفتها
ام فارس: ربك يعين
فارس: المهم وين ابوي
ام فارس: مادري انا لبست ونزلت
فارس: يناظر الساعه ياليل نبي نتأخر على الناس كذا
ابو مشاري: خير تراهم مو طايرين لايحترق رزك بس
فارس: يبه ترا هذولا ناس عووايل انت يمكن تعودت على ناس غيرهم حنا نحدد معاهم الموعد علشان ناخذ بنتهم منهم ونفكهم منها ومن عارها
ابو مشاري: ناظره بعصبيه مافيه روحه روح لحالك علشان مرة ثانيه تحشم بنات الناس
فارس: يبه خلاص اسحب كلمتي الله يهديك
ابو مشاري : ايه هذاني ابسحب كلمتي اني ابروح معك وابجلس واشوف هالنا س الي فرحان فيهم يعطو نك او لا ؟؟؟
ام فارس: استهدي بالله يابندر ترا الولد ماكان قصده
ابو مشاري: جتنا هذي الثانيه الي تبي تجلطني تدافعين عنه وانتي تشوفينه يسب الضعيفه الي ماقالت له شي وماعمره اسأت له
فارس: بعصبيه انت اصلا ماتحبني وتبي تحرجني قدام الناس بس يوم الناس الي مايشرفون وانت مهتم تزوجني لهم يوم اخترت طريق سعادتي وقفت بدربي ليه لو إنه مشاري ماسويت كذا
ابو مشاري: ايه ماحبك لتصرفاتك لتعاملك السيء مع خواتك وزجتك حتى ولد عمك ماخليته متى ماصرت رجال كفو زي مشاري يومها تعال لومني ليه اعاملك كذا
فارس: طيب هالزواج من هالبنت الي فوق مابيه وزي ماتخيلت عني يوم خطوبتي انا ابتخلى عنها وارميها عند ابوها ونشوف ايش يسوي فيها
ابو مشاري: رفع يده أعلى مابخيلك اركبه البنت مستغنيه عنك وراح للمقلط
فارس: فسخ شماغه ورماه من القهر شفتي يمه شفتي ابوي مايحبني
ام فارس: انت الله يهديك اغلطت على شجون وتعرف يكره الي يرمي عليها كلام
فارس: الله ياخذها ويفكني منها يااااااارب
ام فارس: خلاص لايسمعك انا ابروح له وانت لاتخرب الي ابسويه راحت عند ابو مشاري وجلست عند ركبه اطلبك يابندر وماترد لي طلبي لاتخلي ولدي بموفق مثل هذا
ابو مشاري: كان معصب لف عنها وتنهد بضيق وقال لا اله الا الله
ام فارس : دمعت عينها عارفه مالي غلا زي المرحومه بس اجبر بخاطري هالمرة تراك تجرح قلبي ان جرحت وليدي
ابو مشاري: باسها مع جبينها لك كل الغلا يام فارس وقف ومسكها مع يدها ووقفها وحضنها دموعك مابي اشوفها كم مرة اقولك
ام فارس: الله يخليك لي
ابو مشاري: طلع قبلها وبدون مايناظر فارس وربي مارحت الا لخاطر الغاليه أمك بس وطلع قبلهم
فارس: ناظر أمه وباسها مع راسها فديتك ياأحن أم
ام فارس: وهي مبسوطة لان اثبت بندر إنه يحبها يالله مشينا قبل يغير رايه
****************************
في بيت ابو عبدالرحمن
غلا: شفتي فويرس اليوم يبي يروح يخطب
سحر: من جدك
نوال: ايه صادقه خالتي وابوي وامي راحو يخطبون له
سحر: غريبه عمي ابو مشاري يرضى يخطب له
نوال: فديتها شجون هي الي قالت له
سحر: رفعت حواجبها مستغربه معقوله وحده تقنع اهل زوجها يخطبون له
غلا: بلاها موحاسه إنه زوجها ماغير يعشيها ويغديها تحطيم
سحر: عدلت جلستها لو تهتم بشكلها شوي يمكن تحرك شعوره
نوال: بحكمه اصلا تحسيها مهمله نفسها بعنايه ماتبيه يحس فيها سبحان الله أحسها مو متقلبته ابد اصلا يبان الوحده الي تحب زوجها وتكابر والي جد ماتبيه
غلا: فديت أمي الي تعرف الناس بدون مايتكلمون
سحر: صح خاله كيف تفرقين ؟؟؟
نوال : سحر يقولون العيون هي تتكلم تفضح الي جوا القلب
سحر: ارتبكت وابعدت عيونها عن نوال
نوال: ابتسمت وسكتت
غلا: تحك راسها الله يستر مافضحتيني يمه
نوال: لاأنتي مريحه الي عندك احمد ربي مافيه احد حاط عينه عليك كان جننتيه وربي افكر بالي بعدين راح يتزوجك ايش راح تسوين فيه
غلا: صدقيني يمه انه راح يصير اسعد الناس من يحصل له غلا بنت محمد تتزوجه
سحر: الا الله يعينه
غلا: تبي تقهرها الا يقولون حمتو مشتاق لسحورته وملاكها قرررب
سحر: اووووف تعرفين مابيه طاريه وجعل هلملاك يتأخر أكثر
غلا: ايه وبكره بعد ماتجيبن درزن عياله منه انتي الي تركضين وراه وتخويني حمتو سوا حمتو شال ياقلبي ياحمتو ياعيني ياحمتو
سحر: ممكن تسكتين
غلا: بكل برود لا
سحر: طيب مو لازم تسكتي
غلا: التفت على أمها اول مرة اقولها لا وتسوي مؤدبه ومااا ..... تبي تقول ماتطقني الا تجيها مخدة على راسها غلا ههههههههههههههههه وربي اقول سحر ماتصبر
سحر: ماتت ضحك عليها
نوال: تضحك معاهم وتدعي بقلبها الله لايبعد عنك هالابستامه ياسحر زي مابعدت عن مشاعل
**************************
في بيت ابو دلال
ام فارس: تنتظر خروج دلال عليها
ام دلال: الا ماقلتي لي ايش ترجعون له أي قبيله
ام فارس: غريبه ماقالوكم فارس
ام دلال: الا قالنا بس ابيها منك أنت
ام فارس/ احنا نرجع للقبيله .....
ام دلال: والنعم طيب كم راتب فارس
ام فارس: استغربت من أسألتها راتبه 6 الآف
ام دلال: ول ول
ام فارس: ايه الحمد لله كثير وهو لسه صغير
ام دلال: لا موقصدي كثير قصدي ستة ايش تسوي كل شي صار غالي
ام فارس: بضيقه البركه من الله لا بقل المال ولا بكثرته
ام دلال: بس تراه معلق زوجته يعني زواج صوري والا بنتي ماتصير ثانيه الحين كأنها الاولى بحياته
ام فارس: ياروحي هو ماخذها الا من بره لأبوهـ رحمها وحب يستر عليها
ام دلال: بس الحال ماراح يطول اول ماتنحل مشكلتها يطلقها
ام فارس: انقهرت بس ماحبت ترد عليها الا وين العروس ماشفناها
ام دلال: دقايق وتجي ميري ميري
ميري: سمي مدام
ام دلال: نادي مس دلال
ميري: اوك مدام
دلال: كانت لابسه فستان عنابي توب ماسك على جشمها وقصير تحت الركبه بس فيه فتحه على الجنب طويله شعرها ناعم بس قليل وقصير مسويه بف ورافعته دخلت على أم فارس
ام فارس: بسم الله عليك الله يحفظك
دلال: قربت وصافحت ام فارس
ام فارس: كانت منزلة راسها تنتظرها تبوسها بس صرفت الموضوع وجلست
في المجلس
ابو دلال : البنت شرطها تسكن ببيت مستقل
ابو مشاري ساكت مارد
فارس: مايحب أي بنت تتشرط عليه بس مضطر يسكت ويطيعها الي تبغاه يصير راح استأجر لها شقه
ابو دلال: خلاص اجل مابقى الا تشوفها
فارس: متحمس يشوفها على خير
ابو مشاري: بكل هدوء وقف الله يتمم عليهم بخير انا الحين استأذن
ابو دلال: بدري يابو مشاري
ابو مشاري: بحزن يخفيه بدري من عمرك عن اذنكم
ابو دلال: لف على فارس كأن ابوك مو راضي عن هالزواج
فارس: لاياعم بالعكس فرحان اننا راح ناسبكم بس ابوي تعبان شوي وطبعه هادي بعدين ياعم انا الي راح اتزوج مو دلال
ابو دلال: الله يسعدكم بس ماوصيك عليها تراها جوهرة ومارزقني ربي بغيرها من البنات وماجبت اخوانها لانهم مسافرين يدرسون للخارج بس شاورتهم وراضين بس اكرر وصيتك هي حطها بعيونك
فارس: بقلبه ياكثر قرر هالشايب لاتهم ياعم دلال بعيوني
ابو دلال: شويات واناديها عن اذنك
فارس: اخيرا طلع مابغى يسكت سمع صوت كعبها يقرب رفع عيونه شاف بنت بيضاء دبدوبه شوي مملوحه بس بيضاء قربت وجلست قدامه جنب ابوها عجبته وابتسم كيفك دلال
دلال: بدلع الحمد لله
فارس: دوم الله لايغيرها عليك
دلال: رفعت عيونها له وقالت بدلع اكبر وانت كيفك
فارس: ابتسم ابتسامه ذوبت دلال الحمد لله ماعلي
ابو دلال: يالله يابنتي نمشي وراح ودخلها ورجع لفارس
فارس: خلاص ياعم انا بكره ابسوي التحاليل وانتم لاتتأخرون علشان ابي الزواج بعد شهر
ابو دلال: على خير ان شاءالله يوم طلع راح لدلال وكانت جالسه بحضن أمها ماشاءالله دلولتي سرقتي قلب الولد
دلال: تعدلت بجلستها وبكل دلع اكيد بنت بابا وماما والكل ينجنون من زيني
ام دلال: فديت دلوعتي بس لفت على ابو دلال حتى أمه شكلها عجبتها دلوتي حيل
ابو دلال: جلس جنب دلال مالومهم أحد يشوف دولولت ابوها وماتعجبه
دلال: بدلع حضنت ابوها فديت بابا ياعالم
*****************
ام فارس: طالعه مع ابو فارس وخلت فارس يشوف دلال لحاله
فارس: ركب السيارة مبسوط ويتذكر شكلها صح موجميله ذاك الدرجه بس احلى مليون مرة من الشيفه الي عندي على الأقل احس بأنوثتها طاغيه موزي شجون مافيه أي معالم انوثه ايه ياشجون ابشوف وجهك يوم تشوفينها ومافيه وجه مقارنه بينك وبيها الا وسكت شوي الا بعيونك الاذبحتني وهدوئك الي تفقعين فيه مرارتي ونظراتك الي اتمنى افسرها وقوتك الي تقهرني وثقتك بنفسك الي راح اهزها بيوم بس كل هذا راح يروح يوم تشوفين دلال
*************************
بيت اهل صلاح
صلاح: دخل توه راجع من السفر
ام صلاح: اهلين ياقلبي اشتقنا لك
صلاح: باسها اهلين ياروحي كيفك بشريني عنك
ام صلاح: الحمد لله ماعلي
صلاح: وين البنات؟
ام صلاح: اختك ياقلبي تعبانه شوي ونايمه اما زوجتك هي الله يهديها من سفرتك واحنا مانشوفها اما عند أهلها او في غرفتها لاحس ولاخبر
صلاح عصب وطلع غرفته فتح الباب بدون مايطق
العنود: كانت ترتب غرفتها فرحة يوم شافته لأنها مشتاقه له صح جارحها وطاعنها بقلبها بس ماتنكر شوقها له الي ذابحها شافته وهو كاشخ ببدلته وساطع فيها غصب عنها ابتسمت بفرح وراحت تسلم عليه تنتظر منه يضمها يبوسها يحسسه بشوقه لها زي ماهي مشتاقه له بس للاسف سلم عليها ببرود
صلاح: بعد ماسلم جلس على الكنبة
العنود: جلست جبنه عسى ماشر حبيبي لايكون تعبان من السفر
صلاح: طالعها بنظرة عتاب ليه سويتي كذا العنود ؟؟؟
العنود: ايش مسويه !!!
صلاح: امي تقول من سفرتي ابد ماتشوفك ياعند أهلك يافوق بغرفتك
العنود: صلاح مارحت عند أهلي الا يوم سافرت كنت تعبانه وانت تذكر انك وديتني لأهلي وانا تعبانه واخوي سلطان توه جايه وبعدها ملازمه عند أهلك بس ترا أمك مو متقبلتني حتى أختك تغيرت حيل علي ماكانها صديقتي الي قبل
صلاح: خلاص حصل خير مو مشكله عن اذنك ابقوم انام تعبان مرة مو فاضي تستقبليني بشكاوي يالعنود يالله تصبحي على خير
العنود: تلاقي خير تنهدت بضيق من بروده معاها قد ايش تحبه وقد ايش هو بارد معاها صح مايهينها ويحترمها بس ماتحس بحبه لها تناظره وهو نايم سبحان الله كأن الله يذوقني تصرفاتي مع مشاري حطت راسها على الكنبه الله يذكر بالخير يامشاري كانت ايام ولا اروع كنت احس اني معاه كالأميرة بس خلاص كل شي انتهى ولازم احافظ على صلاح وماكون شماته لبيت عمي
*********************
في بيت ابو مشاري
فارس: دخل يدور على أمه مالقاها قال اكيد بغرفتها راح لغرفتها ولقاها توها مغيره ملابسها هاهـ يمه بشريني عجبتك اولا؟؟؟
ام فارس/ ابتسمت بحان البنت ماشاءالله عليها حليوه وبيضاء ودبودبه بس ماتقارن بجمالك >>> ماعلمته بكلام ام دلال ماتبي تخرب على ولدها فرحته
فارس: اهم شي انها حليوه نادرا تلقين جمال طبيعي يمه بالزمن كله صناعي
أم فارس: شرطو عليك شي
فارس: شرطو بيت مستقل
ام فارس: حطت يدها على صدرها يعني تبعد عني ياضناي
فارس: ابدور شقه قريبه منكم لاتخافين مافيه قوة بالعالم تبعدني عنك يمه
ام فارس: وماشرطو شي ثاني >>> خايفه شارطين عليه طلاق شجون اول ماتنحل مشكلتها
فارس: عقد حواجبه لا ليه قالو لك شي
ام فارس: لا ماقالو بس ترا ياوليدي لبسها لك عليه
فارس: ماعليك يمه خليها تجي عندي وأنا اعدلها
شجون: طلعت من غرفة شعاع وراحت للجناحهم شمت ريحة عطر فارس وشافت باب غرفته مفتوح لقتها حوووسه والأغراض مرميه ترددت ترتبها اولا بس قالت مومعقوله تظل حوسه كذا دخلت تمسحها وترتب الأغراض
فارس: دخل وهو مبسوط حاط شماغه على كتفع بس عليه طاقيته وباين طول شعره من تحت الطاقيه اختفت ابتسامته يوم شاف شجون جو الغرفه
شجون: مانتبهت لدخوله لأنها تمسح وتكنس
فارس: عصب مرة وجاها مندفع هيه أنتي
شجون: ببراءة سكرت المكنسه ايش بغيت !؟!؟
فارس: ايش تسوين
شجون: شوفة عينك امسح وانظف هالحوسه
فارس: قرب منها وشدها مع يدها مو محذرك من أول ليله ماتقربين غرفتي والا شفتيني خطبت خططتي تسوين لي سحر يصرفني عن دلولتي اعرف اشكال هالعوايل ماهرين بصرف والعطف
شجون: عصبت مرة وشوي تنفجر بوجهه غمضت عيونها واستغفرت كم مرة علشان ماتنفجر تفرحه عليها
فارس: يوم شافها مسكره عيونها فرح أنه اثر فيها تأكد انها ياراح تعصب او تبكي بين ايدينه وهذا الي يتمناهـ يتمنى يشوف دموعها وانسكارها لو مرة
شجون: خيبت كل آماله فتحت عيونها بإبتسامه بارده دايم اقولك انك تحلم كثيررر وتعطي لنفسك أهميه مين انت علشان ابيع ديني واسحرك
فارس: قرب لها شوفي ياشجون مهما كابرتي عارف ومتأكد انك تموتي غيره وتحترقي جواتك
شجون: معقوله فارس ولد بندر يسوي كل هذا علشان يحرك غيرة شجون الي معتبرها صفر على الشمال
فارس: ترك يدها بقوة اصلا ماهمتيني ولاحركتي فيني شعره من انتي علشان اتمنى تتحرك غيرتك علي
شجون: ببرود هدي ترا العصبيه راح تضرك ياعريس وطلعت وخلته
فارس: الله ياخذك ويفكني منك اكرهها ياعالم اكرهها مادري كيف تقدر تخليني افقد اعصابي وانا فشلت الف مرة اني اخليها تعصب اتمنى اشوفك ياشجون تبكين عند رجولي والله ياكبريائك لاكسره واحطمه ان كنت ولد ابوي بس اصبري علي وراح تشوفي شي مايخطر ببالك ...
**************************
في استراحة الشباب
الكل تفرق مابقى غير غلاب وفارس
غلاب: اجل سويتها يابطل والله انك كفو كل شي تبيه تسويه
فارس: بغرور ايه مايعصى علي شي لا ومحمد يقول ماتقدر تجيبها متحديني قلت اجيبها وانا ولد ابوي اصلا انا فارس مافيه بنت ترفضني وضحك ضحكة عجب وتكبر
غلاب: ابتسم وبقلبه يغلي راح اشوفك يوم تتحسر يافارس وجعل هاليوم قريب اكره غروروك وكرهت أختك بسببك بس انا غلاب ان مانتقم منك بأختك ماكون ولد الهنديه الي حاقرها اجل ايش راح تسوي بالبنت الي عندك
فارس: قصدك الي دبسني فيها ابوي
غلاب: ايه
فارس: فرحان وانا اتشفى فيها علشان تعرف اني فارس الي مو سهل تمثل عليه وبعده اذا سمح لي ابوي اشوتها واطلقها وافتك منها وترجع لمكانها بس يارب ابوها يموت ومايكون لابوي عذر يخليها عندنا
غلاب: والله انك رجال حمش تعجبني يابطل
فارس: بس تعرف غلاب بما انك نسيبي وصرت منا وفينا موزي أي واحد من ربعي فيه شي مضيق صدري وابغى افضفض لك
غلاب: يظها شخصية الحنون هاه/ قلي ياخوك سرك ببير
فارس: ياخي هاليله الي عندي غاثنتي وفاقعه مرارتي تخيل اسرتها عايبه وشايفه نفسها علي ومسويه البنت القوي هالي مايكسرها شي
غلاب: من جدك وربي كنت اختيلها ضعيفه ماتقدر ترفع عيونها بعين أي أحد الي زيها المفروض يعيش حياته وعيونه تحت بالأرض
فارس: قلتها المفروض بس شين وقوة عين احط عيني بعينها ابي اكسر عينها تطالعني بكل شموخ وكبرياء
غلاب: طيب انت تبي تكسرها؟؟؟
فارس: منى عيني اني اكسر خشمها منى عيني اشوفها تبكي قدامي لو مرة ياخوي فيني كره لها مو طبيعي ابي انتقم منها خربت حياتي ومابردت كبدي بالعكس معيشها بدلع ودلال مشكله قلبي رهيف مايعرف يقسى
غلاب: بقلبه ماظنتي قلبك ضعيف ابتسم بمكر يمكنك ماقربتها
فارس: اعوووووذ بالله اقربها ليه انا بايع نفسي مالقيت اقرب الا من هالاشكال اتمنى اليوم الي اشوتها واطردها من بيتنا تقولي ماقربتها
غلاب: اجل هذا الي مخليها قووويه
فارس: بالعكس المراه ان ماقربتها تكسرها وتحطمها لأنك تحسسها انه غير مرغوب فيها
غلاب: بالعكس اكثر كسر للمراه تاخذ منها الي تبيه بس بدون ماتحسسها انك منفتن فيها يعني تحسسها انك الي سويته لتطرب نفسك او مجرد انتقام وكسر ببس
فارس: حط عيونه بعيون غلاب وعقد حواجبه تقول هالكلام كأنك مجرب !!!
غلاب: ابتسم بكل ثقه كيف مجرب ياشاطر انا ماعمري سويت شي حرام وماتزوجت الا قمر كوني مشاعل تتخيل هالعنبره راح اسوي فيها كذا
فارس: تنهد براحه اشوا وربي لو احس انك مسوي فيها قدر شعره ماتلوم غير نفسك
غلاب: اولا احنا مو صغار نهدد بعض يافارس ثانيا انا احب مشاعل ومستحيل اجرحها ثالثا انا شفتك ضايق ونصحتك يعني مو كذا يكون جزاي اواسيك وتقلبها علي
فارس: اعذرني ياخوك بس هالغثيثه قالبه مزاجي فوق تحت صرت عصبي وماتحمل أي كلمه من أحد متى اتزوج واستقر وارتاح
غلاب: متضايق من كلام فارس له قبل شوي عموما الله يسعدك عن اذنك
فارس:يطالعه غلاب يوم وقف وهو جالس ومتركي لايكون بخاطرك شي بعد كلامي لك قبل شوي اشوف وجهك قلب وقمت
غلاب: حنا اخوان مانزعل من بعض بس مواعد مشاعل وأمي اتعشاء معهم
فارس: يوم راح شكله زعل بس بالطقاق خله يعرف ان وراء مشاعل رجال مو مقطوعه من شجره
غلاب: ركب سيارته وتنهد بضيق ان مادهورت حياتك يافارس ماكون غلاب والا مصدق انك تجرح بنات الناس وانت واخواتك حاط لكم حصانه مغرور وراح تظل مغرور طول عمرك بس اول تقهرني ماعندي شي انتقم منك فيه بس الحين ياغبي تحت ايديني أختك ابرد حرتي منك فيها
فارس: ركب سيارته ويفكر بكلام غلاب دخل للبيت مالقى احد بالصاله دخل لجناحه شاف نور شجون مفتوح راح لغرفتها
شجون : جالسة على طرف السرير وفاتحة القرآن
فارس: دخل بدون مايطق الباب
شجون: تكره دخوله او الكلام معاه تعرف ان كلامه زي السكاكين على قلبها
فارس: استعدي بكره الصباح بدري راح اخذك للمستشفى
شجون: استغربت ليه ؟؟؟
فارس: مجرد تحاليل روتينه ابشوف سر شحوبك وهزلك ونتطمن عليك اخاف انك مريضه واحنا مانعرف شكلك ناقصك فتيامينات لازم يصرفونها لك يالله عن اذنك ابروح أنام
شجون: عقدت حواجبها يوم طلع استغربت معقوله مهتم فيني فارس ولد بندر مهتم بشجون ماتدخل العقل مو مرتاحه ابد ومابي اروح معاه بس ماقدر ارفض اخاف نيته زينه ويبي يفتخ معاي صفحه جديد هوانا ارفض بس قلبي ناغزني ماقرا بعيونه الخوف او الاهتمام اقرا بعيونه شي ثاني تعوذت من ابليس لازم احسن الظن فيه بس الله يستر
**********************
في بريطانيا
ياسر: قايم الصبح بدري تحمم ولبس اول يوم له بالجامعه طلع بسرعه خاف يتأخر
ابو صالح: طالع من شقته ومعاه بنت محجبه حجاب ساتر ومنزله عيونها صبحك الله بالخير ياسر
ياسر: وهو صاد علشان البنت صبحك الله بالرضا والعافيه
ابو صالح: وهو ينزل الدرج ايش اسم جامعتك؟؟؟
ياسر: وهو ينزل مو هاضمه ابد ومايحب كثر أسألته جامعة اوكسفورد
ابو صالح: سبحان الله نفس جامعة بنتي
ياسر: مارد
هيفاء: سحبت يد ابوها وهمست له يبه شكله ماله خلق يتكلم لاتضايقه
ابو صالح: بهمس احسه شايف حاله
هيفاء: كيفه الله يستر عليه
اخذو باص وياسر متضايق انه هالبنت معاه مايبي يحتك بأحد
ابو صالح:: ودع بنته انتبهي لنفسك والساعه خمس نفس الموعد ابجيك
هيفاء: لها ست شهور هنا ومصادقه ناس
ياسر: ماصادق أحد راح وجلس على أحد الطاولات حتى تبدا المحاضرة
هيفاء: راح تدور صديقاتها نورة وبشرى
نورة: هاي هوفا جينا اليوم قبلك
هيفاء : لاتفرحي دايم تتأخري
بشرى: بنات فيه واحد كويتي خلوق وطويب امس خدمني بالمكتبه حقت الجماعه تروحون تسلمون عليه
نورة: يالله
هيفاء: آسفه ماقدر
بشرى: بلا ثقل دم هيفاء لاتصافحينه بس نسلم ونسولف بس وربي انسان خلوق
هيفاء: مابي احتك مع أي ولد
نورة وبشرى براحتك شوي ونجيك
هيفاء: كانت جالسه على الكرسي لحالها وتراقب الي الطلاب الي حاضن حبيتها ويتمشون سوا والي يسولف مع حبيته وموداري عن العالم والي جالس ومتكي ويتابع بنظراته أي بنت تمر ويرمي كلام ويضحكون وباين انهم خليجين من لهجتهم طاحت عينها على فارس الي جالس وفاتح الايفون وقرا فيه باين انه يقرأ قرآن من خشوعه ومو حاس بالي حوله ابتسمت بإعجاب سبحان من خلق وفرق ناس مشغلتهم دنياهم ومعاصيهم عن ربهم وناس مشغلين انفسهم بقراءة القران وذكر الرجمن عن المعاصي الله يثبته مستحيل يكون واحد ملتزم زيه متكبر بس شكل ابوي مافهم عليه
************************
في المستشفى
شجون: سوت التحاليل قالت للمرضه ممكن اخذ رقم جوالك واتطمن
الممرضه : اوك يامدام تفضلي
شجون: ماحبت تسالها الحين وهو معاها فارس خاقت الممرضه تعلم فارس ,,,, بس لو سمحتي لايعرف زوجي اني اخذت الرقم
الممرضه : اتطمني يامدام
شجون: عن اذنك وطلعت مع فارس
*********************************
في بيت ابو مشاري
فارس : بكره راح اعزمكم على استراحه بمناسبة خطوبتي ورجعت صديقي غريب من كندا
شجون: رفعت عيونها فز خاطرها يوم سمعت بإسم غريب معقولة هو غريب الي اعرفه لا يمكن غيره بس تشابه أسماء لاغير
ابو مشاري: هذا الي اليتيم صح
شجون: وجعها قلبها وتتابع رد فارس بشوق هي خلاص متزوجة وماراح تفكر بغير زوجها ومقتنعه وعارفه ان مجرد تفكيرها بشخص غير زوجها حرام بس حتى لو كان زواجها صوري بس برضو تعرف حرمة تفكيرها بغير زوجها بس تتمنى تطمن عليه وتعرف ايش صار هذا غررريب الي وقف معاها بطفولتها تناظر لفارس وتنتظر رده
فارس :ايوه بس ماشاء الله عليه الحين مهندس معماري وكان ساكن بجدة بس نقل للرياض علشان زوجته الناس الي ربوها ساكنين هنا
شجون: تخفي ابتسامتها فرحت انه حقق حلمه وصار مهندس وفرحت أكثر انها وتزوج صح كانت تموت فيه وزواجه لازم يحرك غيرتها وخصوصا انها تزوجت فارس وقسى عليها وأهانها يعني ماشبع الحب عندها محسسها بالنقص بس تغالب الشيطان وتضغط على قلبها وتفرح لغريب لأنها عارفه انه حرام تفكر فيه مجرد تفكير
ركبت السيارة ومو معاهم تفكر بغريب تغير شكلك او لا لسه عيونك حادة ونظرات القوة والحزم فيها مايذلك يتم ولاحزن ولاتعذيب عمك جاسم؟؟ .... لسه ملتزم او لا؟؟ اكيد لسه ملتزم هو الي شجعني التزم واترك مايغضب ربي تحس ان المسافه طولت متشوقه تشوفه مع إنها عمرها ماهتمت بشوفة رجال او حرك قلبها رجال غيره متشوقه تشوف زوجته اكيد مبسوطة معاه كيف ماتنبسط وانا اذكر حنانه وطيبته يارب ان ربي رزقه ولد ومايظل غريب بدنياه سبحان الله هذي حال الدنيا تجمع وتفرق وووو...............
--------------------------------------
يتبع
أنت تقرأ
بيت العنكبوت
Adventureطفل حرم من أسرته بسبب ذنب لم يقترفه حكم عليه انه لقيط وأمه مازالت على قيد الحياة احبه اخوانه بجنون لكن قدر عليه ان يعيش بعيدا عنهم يعاني الوحدة واليتم وقساوة الحياة بعيد عن احضان أم كرهته وهو في أحشائها مرت عليه السنين قاسية صعبه يكره نظرات الاحتقار...
