كأنه غيهب

البارت الثامن

مساء الخير
كأنه غيهب. البارت الثامن
دانية رسول

كنز
حياة جديدة ببيت جديد
كعدت الصبح مثل كل يوم ساعة 9
امي كاعدة مِو من عوايدها
يمكن لان نامت من وكت البارحة

رحت لنازك اريد احجي وياها
بخصوص الشغل الي لكاه رائد
اني خريجة اداب انكليزي و
تخرجت وكعدت بالبيت بعد لا اكو تعيين
ولا شي شكد دورت بس ماكو
وهسة داشوف بلكي رائد يعرف

دخلت للبيتهم نازك كاعدة داتفرج تلفزيون
وحدها كعدت يمها
كنز : اكلج نازك بالنسبة للوظيفة الي لكاها
رائد يعني وين واكيد

نازك : هااا اي والله ذكرتيني اعتذر منج
ماكدر يدبرها
كنز : ها لا عادي ماكو اشكال
نازك :اي والله حاول بس ماكو مكدر الا بمدرسة بس كُلش بعيدة هنا
كنز : لا خلاص عادي يعني
نازك : شلونج البارحة ارتاحيتي بالنومة لا
كنز : والله كُلش ارتاحيت
نازك : اي زين لعد تريكتي ؟؟
كنز : لا بعدني سويلي انتي

نازك : هههه ديله كومي هناك نسوي
بلشنا نحضر الاكل سوينا كريب تعرف نازك اني كُلش احبه
وكعدنا ناكل ونضحك وامي هُم جتي شاركتنا

كمت من مكاني داروح اغسل ايدي
فتت للحمام غسلت وكملت وداطلع جان
اشوف شي يتحرك على الباب
واني كبل بدون ما اركز ولا شي
كمزت بسرعة ورحت بعيد شوي من الباب
واصيح باعلى صوتي
لحكولي ابو بريص لحكولييييي
وامي ونازك ثنينهم يخافون
واكفين وخايفين

نازك : هذاا منين فات واجى حتى مِو صيف
كنز : مادري ساعدوني حبابين حموووت
ومن كل كلبي مقهورة ياربي حموتت
واريد ابجي كُلش لان عندي فوبيا مِو طبيعية من الحشرات بسرعة اتقعشر منهم واموت خوف
احسهم وحوش يريدون ياكلوني
امي عاد تشجعت وفتحت الباب واني اعيط
ومغمضة عيني جان اسمع صوت امي

سالمة : وعَمَى وثول اي والله
نازك : هسة اذا اكتلج احد يكلي ليش

اباوع طلع مجموعة خيوط بلون يشبهه لونه
متكورة وصايرة على هيج
يعني صدك جنت فازه والموقف يخوف
نازك : كل هل هوسة علمود هذاااااا انتي غبية لو غبية
دباعي عدل موزين ما اجتني الجلطة من عيطتج
وامي كل شوية تغمني تكولي الثول وين يوصل بعد
يعني منين يجي هسة لو حارة وصيف ماشي
بس مِو هيج وكت يا ذكية

واني خربانة ضحك على روحي مدري شلون
شفته ابو بريص الحمدلله طلع خيوط بعدين

ايامنا بهذا البيت هادئة مابيها اي شي
صح مِو كُلش اتاقلمت وَيَه الوضع
بس اتقبلته
امي ابد متروح يمهم ماعرف ليش
تكول نبقى هنا احسن
وكامت تضل بالبيت مِو مثل قبل
كل خمس دقايق رايحة مكان
هسة لا تكعد وتبقى وتحضر اكل
داتتغير هواي كلت اي الحمدلله
فادتها الجيه هنا