كأنه غيهب

البارت التاسع

كأنه غيهب. البارت التاسع
دانية رسول

ليلى

ايامنا صارت تتشابه
مابيها اختلاف
كلشي يتكرر
كل يوم اكعد الصبح اتريك وَيَه امي وغسان
واروح للدوام
ارجع من الدوام
اتغدا انام اكعد احجي  وَيَه اهلي
انام
اكعد ثاني يوم  الصبح
نفس الشي نفس التكرار
تعودنا على الحياة بهاي المنطقة
جيراننا ناس طيبين

الي مقابيلنا اقاربنا
يصير ابن عّمه للبابا وزوجته هُم بنت  عمه
يعني هُم اولاد عّم ومتزوجين
منعرف بس ذوله
هُو عّم بابا عنده اولاد هواي
بس مشاكل بينهم لذلك احنا مِو مقربين منهم
بالاحرى كل العوائل
سواء من بابا او ماما مِو مقربين منهم
دائما بحالنا ومنتدخل باحد

بدات علاقتي وَيَه زيد تطور
صرنا نسولف اكثر ونحجي
بمواضيع خاصة وعن الشغل
كلامه صار يضحكني ويشعرني بالراحة
كل ما اضوج هُو الي يخليني اسعد
صار يحجيلي عّن دينا
وانو كانت علاقتهم قوية
وانو  كانت سعيدة بحياتها
بس دوم تفقدنا وتسال عني
كلامه يفرحني وبنفس الوقت
يحزنني
افرح انها كانت سعيدة
ومرتاحة بحياتها
وبنفس الوقت احزن لان عافتنا ومكدرنا
نفرح وياها
سالته عّن انو مصار عدها اطفال
جوابه كان انو "زين" هُو الي مجان يريد طفل
وشكد حاولت وَيَاه ‏ بلا جدوى رافض الفكرة
هنا هُم  مادري اضوج لانها مفرحت بطفل
لو اكول الحمدلله جان هسة طفلها
تيتم وهو صغير ومشاف امه

زيد صار يحاول يكون علاقة قريبة
اكثر ويتعرف عليه وعن عائلتنا
هواي يسالني وحتى يتذكر  كلشي 
مشكلة بيت عمي وحادث غسان
ودائما يعرض المساعدة عليه
انو اخلص منهم او شي
بس اني ارفض وخصوصا هسة
هُم سافروا بعد خلصنا منهم
بس للحد الان محد يعرف
انو هُم الي ضربوا غسان
ومو حادث
صار زين من يريد شي من المختبر يدز عليه اول شي
بدل ما يدز على المسؤول عنه
حتى الي ويايه  بدؤا
يلاحظون هذا الشي
بالايام الي ما اشوفه بيها
او ميجي هُو للمستشفى
اضل ادور
واحس اليوم يكون ناقص
بس بنفس الوقت
احاول اخفف التقائي بيه
احس هذا الشي غلط كبير
وميصير بالنهاية
زيد انسان ماعرف عنه ولا شي

بيوم كاعدة بالبيت امي نايمة وبابا وغسان
طالعين دك تلفوني
باوعت رقم غريب
عفته ما ارد على ارقام غريبة
بس ضَل يلح
كلت خاف احد من كرايبي او شي

فتحته اجاني صوت رجل
ليلى - العفو منو حضرتك
- باعي ليلى اني " زين "

ليلى : اللهم مطولج يا روح مرح نخلص منك

زين : سمعيني شوية
اريدج دائما بعيدة عن زيد 
ماشي اني صح عندي مشاكل وَيَاه بس يبقى اخويه
تمام لذلك اريدج بعيدة كل البعد عنه لان انتي
مثل اختج هُم رح تطلعين مريضة نفسية
وتنتحرين وتحركين گلبه مثل ما سوت اختج
لذلك انقلي من هل مستشفى ونقلي بيتج
شتسوين سوي المهم ما يشوفج هُو