كأنه غيهب

البارت الثامن عشر

مساء الخير
كأنه غيهب. البارت الثامن عشر

كنز

ممكن انو تنفي الضحكة
بخبر سيّء
يخلي مشاعرنا تتحطم الى اجزاء صغيرة
وقلبنا ينكسر بقوة
وكان الدنيا اشتدت علينا
وكان حيطان البيت
تملي علينا
ومتخلينا نتنفس
كلمات تكون كفيلة
بانهيار شخص
او موته
او دخوله المستشفى
يمكن مرات نتمنى لو مسامعين
وعايشين طول عمرنا غشيمين

رجعت للبيت والضحكة ماليه وجهي
بعد ما كملنا الفطور حضرت چاي
النا وعمو طلع للجامع علمود صلاة التراويح
قرب العيد ما بقى شي اقل من اسبوع
ورح يجي تموز والحر

ثاني يوم محجيت وَيَه امير
ابدا بس هُو من شافني
ابتسم وراح

حسّيت هُو الي متردد
واحسن لان اني ابدا مِو مستعجلة
اريد كلشي يمر بهدوء بدون تعب وعذاب
او تفكير
كلشي هُو يمشي بكيفه
شلون ما هُو مقدر ومكتوب
ماكو داعي للاستعجال ابدا

بدينا نعزل البيت وغراضه
ونحضر للعيد

امي ولا شفتها ولا خابرت عليها
بس ذَاك اليوم شفت ايهم
يكول متعاركة وَيَه رجلها وهسة مِو بنفس البيت
ومطلعين رائد من السجن وراجع متزوج نازك
علمود الطفل

كل هذا يصير واني ماعرف
كاني غريبة واسمع عنهم بس
مهتميت
لان الموضوع صار مياثر عليه
هُم الي سوولي الغاء من حياتهم
واني وافقت عليه
واتقبلته

ورى الفطور طلعنا وَيَه عمة
اشترينا ملابس للعيد
اخذت تنورة بلون اسود
ميديم مِو طويلة كُلش
ىياها مثل قميص زيتوني
وياهم حذاء بلون بيجي بس طوخ
يعني درجته عالية
وضليت شكد ادور شال بنفس للون الحذاء
يلى لكيت

حتى عمتي تعبت تكول لو جهاز عروس هُم مِو هيج
واني اضحك بوكتها ايهم ودانا ورجعنا
واخذ للبنته فستان بلون زيتوني اني اختاريته
حتى نفس ملابسي

احب تحضيرات العيد مع اني اضوج
لان شهر رمضان يخلص
بس شسوي

بليلة القدر بلشت الصلاة من وكت
وبنيتي اوصلها لل100 ركعة
بيومها مدعيت على احد ابدا
دعيت بس للوطني والنفسي
وبوكتها جان العراق وبغداد مليئة بالانفجارات
الي نسمعها كل يوم وماكو امان
نخاف نروح مكان لا منرجع منه

2016 /7/2

يوم 27 رمضان بقى بس يومين للعيد
احنا مشترين كلشي
التقيت بامير بالصدفة
ورى وقت الفطور بالليل
جنت كاعدة اشرب چاي بالبلكونة وَيَه عمة
احنا نطلع من الشارع هادىء ومابيه ناس
شكل امير ابدا مِو مطمئن