كأنه غيهب

البارت الاول

مساء الخير
كانه غيهب. دانية رسول
البارت الاول

ألهوا عالي اليوم والسما صافية والقمر مكتمل
وصاير بدر احس ألهوا يضيق عليه اكثر
ويخنقني ماكدر أتنفس براحة كل ما اتذكر
ترجع نخنقني العبرة كل شي يذكرني بالي صار
المرجوحة الي كنّا نكعد عليها سوى
والحديقة الي قضينا وقتنا بيها

كمت من مكاني لان صار البرد يدخل عبالك
بجسمي
دخلت للبيت الكهرباء طافية والكل نايم
بالعادة هم بهيج وكت ينامون
صعدت بخفة للغرفتي ونمت على السرير
واني اتذكر كل لحظة عشناها سوى
وكل ذكرى حلوة بيننا
ماعرف شلون غفيت وفزيت الصبح
من وكت تقريبا من الساعة 6
بدلت ملابسي حتى اروح للدوامي
ماكدر اخذ بعد اجازة من كثر الي أخذتهم باخر ثلاث أشهر

نزلت جوه محد كاعد بس اكو چاي مخدر يمكن
غسان طالع للدوامه ومخدر
طلعت برا ولبست جاكيتي الجلدي وجنطتي الكتفية الصغيرة

بالعادة اروح مشي المكان قريب عليه بعد حوالي الشارعين عني واني احب المشي يشعرني بالراحة
اكثر
مريت من جنب محل صغير يمنا نعرفهم بيتهم بالفرع الي قريب علينا
دخلت حتى اشتري كيكة لان متريكت

اخذت قطعة  وياها حليب
هو خله بعلاكة وكلي
- البقية بحياتج
جاوبته. تسلم حياتك الباقي واخذت الكيس منه
واني أتمشى هل كلمة هواي سمعتها باخر ثلاث أشهر
وكل مرة اسمعها بدني يقشعر وعيني تسود بس حاليا كمت اتمالك نفسي اكثر

وصلت للمختبر الي اداوم بيه نزعت جاكيتي ولبست
لاب كوت مالتي تقربت مني رند وكأنها بداخلها كلام تريد تقوله بس تراجعت عنه  بالحقيقة كل الموظفين هيج بداخلهم اسئلة هواي بس خجلانين او ميعرفون شلون يحجون

بديت اشتغل الكل يعرف اني هادئة كثير بشغلي
وماحجي قليل  من زمان هذا طبعي
بعد ما خلصت كلشي رجعت للبيت
لكيت ماما كاعدة تحفر الخضروات للحد الان كسرتها واضحة حزنها مبين عيونها الذبلانة حسراتها المتتالية دمعتها على خدها ورجفة ايدها احساس بالندم بالالم والفقدان

رحت بستها شلونج ماما
ام غسان :- الحمدلله  شلونه دوامج
-والله عادي ماكو شي جديد نفسه
صعدت للغرفتي وبدلت ملابسي كل مرة احس المح
ابتسامتها وكأنها تقترب مني وتختفي
خيالها يلاحقني احسها دتكلي لا تنسيني

باوعت للصورة الي حاطتها تجمعني اني وياها سوى
نزلت دموعي واني اشوف ضحكتها وفرحتها بيومها

اليوم مر ثلاث أشهر بالضبط على وفاة اختي الاكبر مني اليوم مر ثلاث أشهر على فقداني للجزء مني
من يومها فقدت كلشي كنت متعلقة بيها كنت أتأمل ترجع وأهلي يسامحوها بس للاسف الموت اخذها أسرع
باليوم الي اتصلوا بينا وبلغنا زوجها بوفاتها انهاريت
صرت انسانة جامدة ماكدر احجي ولا شي
اريد اكول كلمة اريد اصرخ اريد ابكي ماكدر
عبالك اكو شي جمدني وميخليني أتحرك