#العزف_على_جراح_الماضي
الاول / القصة حقيقية
بقلمي فردوس عبد اللطيف
تجري الرياح كماتجري سفينتنا
تحن الرياح ونحن البحر والسفن
ان الذي يرتجي شيئا بهمته
يلقاه لو حاربته الأنس والجن
(للمتنبي)
~~~~~~~~
حلمي انت ليش مجاي تفهميني كتلج ماكدر اجي اخطبج
ظرفي ميسمح بعدني طالب وآخذ مصروفي من ابوي
واجي اكوله تعال اخطبلي
تكدرين تعترضين على العريس
سمر كل مره اطلع حجه وارفض هالمره اهلي يكولولي
العريس مابي عيب شنو حجتج حتى تكمله دراستي بالكليه
موافق نتزوج واكمل
ظروفه الماديه جيده جدا محامي وعنده مكتب وبيت وسياره
عنده علاقات واسعه
شحجي حلمي مو عيوني ورمت من البجي
حلمي لج اني متسمم مجاي اعرف شسوي روحي دا تطلع
تدرين حبيبتي اذا تنزفين لشخص غيري ؟،،،،،
لج المن اعيش بعد المن اشتم الهوى الموت ارحم
سمر اني هم حياتي بدونك مابيها طعم فكر بحل
حلمي نطيني عنوانه خل اروح احجي وياه هالكلب
سمر لا عفيه تالي اهلي يعرفون وانفضح فدوه حلمي
ترى اخوتي يذبحوني والله
حلمي اني اختنكت حروح للمتنبي اليوم اكو أمسيه موسيقيه
حايشاركون بيها فنانين وهواة
ليش ماتجيبين اخوج وتجين
سمر حتى ابقى ابجي خصوصا اليوم دكتوره حنين حاتعزف
ومعزوفاتها كولهن يبجوني يدخلن بكلبي
حلمي ححاول اسويلج بث اسمعي
سمر ماشي من تعزف دزلي مسج وبثلي او سجله
~~~~~~
حلمي ختنكت مدري وين اروح بعد ساعه ع موعد الامسيه
كلما افكر سمر تروح مني انجن اتخبل
وين احلامنا الي حلمنا ها سويه وين طموحنا وين المستقبل
كل حياتي مهدده بسبب الوضع المادي
اوووف هسه لو ابوي غني شيصير
جان رحت خطبتها وماعندي مشكله
اخ اخ حلمي وين وداك الحلم وصلت المنتدى واني بغير عالم
اتخيل نفسي سلطان زماني واكدر اخطب حبيبتي
وابوهه يقدمها بايده يسلمياها
~~~~~
كاعدين مجموعه من الفنانين يتناقشون بمعزوفاتهم وألحانها
وكل واحد مسمي معزوفته
سلمت وكعدت يمهم هذه اول مره اتكلم مع الدكتوره حنين
اذا تسمحيلي دكتوره أبث فقرة عزفج لزميلتي بالمعهد
حنين ليش لا ماكو مانع اني منتبهه عليكم انتو ثنائي ممتاز
اشوفكم تعيشون ويه العزف تسرحون بعالم آخر
حلمي بصراحه دكتوره احنا نحب عزفج عالعود
لان مميز مختلف والألحان تدخل بكلوبنا
حنين تسلملي هذا من ذوقك اني اشجع الشباب الطموح
واذا تحتاج شي اني مستعده اساعدك
حلمي من كرم اخلاقج دكتوره شكرا لتشجيعج
~~~~~
بده وقت العزف واول واحد
يعزف احد الهواة على آله الكمان ،،،،،، حلو اللحن اسمع وقلبي متصور وحزين والدمعه بطرف عيني
خايف لا تنزل دموعي وينتبه احد لان الموجودين نفس الوجوه تتكرر بكل جلسه
بعض طلاب معهد الفنون ومجموعه من الهواة وبعض العازفين ،،،،
دزيت مسج لسمر
حبيبتي راح افتحلج بث بدء عزف الدكتوره
سمر اوك
حلمي من بدت تعزف نزلت دموعي لان اللحن يدخل لقلبي
وكانما سيوف تخترق أحزاني
سمر اني اتفرج عالبث وابجي ماكدر أتخيل حياتي بدون حلمي الي حبيته وتعلقت بي
~~~~
كملت الدكتوره عزفها( عالعود ) وحلمي ممنتبه بس يبجي والمتفرجين طلعوا وهو باقي
انتبهت عليه الدكتوره
حنين شو بعدك باقي شتنتظر وين سرحت وليش هالدموع ؟
اسئله كثيره دارت براسي واني اعزف ومنتبهه عليك وانت
حزين ودموعك غلبتك ونزلت بدون توقف
حلمي اسف اسف دكتوره مانتبهت سرحت بعالم الحزن
حنين وين طريقك ؟
حلمي بيتنا بالبياع
حنين اوصلك يم مستشفى اليرموك وهناك اصعد بسيارات البياع اني بيتي باليرموك
حلمي طلعنا من المنتدى توجهنا للكراج
سيارتها من العاليه حديثه
انسانه ناجحه مثقفه شعجب مو سعيده
احترت اسألهه لو عيب
سبقتني هي بالسوآل
حنين احجيلي حلمي ليش الدموع والحزن انت بعدك طالب
ليش شايل هموم الدنيا ؟
حلمي دكتوره حبيبتي جاييهه خطابه واهلهه موافقين
واني احبها وماكدر اتزوجها ،،،،
حنين (جرت حسره )
الحب اوووف
ولي فؤاد إذا طال العذاب به
هام اشتياقا الى لقيا معذبه
~~~~~
حلمي ممكن اتجرأ واسالج دكتوره ؟
وكفنا بالترفك لايت
التفتت علي ممكن تفضل اسال ولو اعرف شراح تسألني
حلمي حضرتج ذكيه وتقرين الافكار
حنين هههههههه
عشت قصة حب مؤلمه
حلمي معقوله حضرتج انسانه ناجحه طبيبه معروفه وشخصيه قويه والج مكانتج بالمجتمع
الي يشوفج يكول حضرتج اسعد انسانه بالدنيا
بس الي يسمع عزفج !!!!!!
يفهم اكو حزن والم
اني وسمر نحب نسمع معزوفاتج بس كولهه حزينه اكدر اعرف السبب
حنين سوآلك عالجرح يا حلمي واني راح احجيلك قصتي
لان باقيه بداخلي وشكد اريد اكتمها تعبت محتاجه احجي
لشخص اثق بي واني اشوفك انسان طموح وعاشق سمور
لاتستعجل اذا مكتوبتلك تتزوجها لاتخاف
حلمي شو توقفتي ؟
حنين هذا موقف سيارات البياع
حلمي وقصتج شوكت تحجيلياها
حنين باجر توكفلي عبر الشارع بالعشره الصبح
لان جمعه وماعندي مستشفى اخذك لمكان نكعد نسولف براحتنا واحجيلك قصتي
بس ها اريدك تروح لبيتكم تاخذ دوش وتنام مرتاح وتوكل ع الله صدكني كولشي بالقسمه ،،، وسلملي ع سمر
~~~~~~
حلمي نزلت من سيارتها وراحت لحد ما صحاني صوت سايق احد الكيات بيا ع بياع بياع
صعدت بالسياره واني افكر بكلامها
معقوله هالدكتوره وراها قصة حزينه ؟
الي يشوفها يكول سعيده لبسها وأناقتها وسيارتها وظعها
وثقتها بنفسها
وصلت لبيتنا وفعلا مثل ماوصتني اخذت دوش ارتاحيت
يمكن طن تعب راح مني
ام حلمي يمه تتعشى ؟
حلمي شعندج عشا حجيه ؟
ام حلمي سويتلك باذنجان شوي ولوبيا
لو تريد اكليلك كبه
حلمي سويلي كبه
تعشيت وراسلت سمر مجاوبتني يمكن غالقه النت
بقيت اكلب بالتلفزيون لحد ما نمت
~~~~~~
ام حلمي كوم يمه ترى ساعه تسعه مو كتلي اكعدك
حلمي بيش ؟؟؟؟
طفرت من الفراش وركض شربت الشاي واني واكف
علما وصلت للمكان الي كالتلي انتظرها ،،،،
الحمد لله الساعه عشره الا ربع همزين ما تاخرت
جتني مسج من سمر
هلو حبيبي اسفه جنت نايمه البارحه وانت مراسلني
توني كعدت
حلمي شلونج ياعمري بعدج تعبانه ؟
سمر ححاول اليوم ويه ماما اطلعلي اي حجه
حلمي فديت العسل ❤️❤️❤️❤️
~~~~~~
سمعت هورن الدكتوره
فتحت الباب
صباح الخير
حنين صباح النور اصعد
حلمي صعدت بالسياره
مواصفات الدكتوره
يمكن نهايه الثلاثين او عمرها بالاربعين
تمتلك جمال طبيعي بدون مكياج وعمليات تجميل
ماتحتاج جمالها رباني
شعرها سرح طويل تفتحه وبعض الاحيان ترفعه لونه اشقر
بيضا طولها متوسط رشيقه
شكلها مامتزوجه ؟ ممعقوله هالجمال والاناقه ومامتزوجه
طيب ليش يكولولهه ام يزن
انيقه بشكل مرهمه الشنطه والعفو الحذاء مع الوان ملابسها
حتى العطر الي مخليته هادي وصوتها ناصي
وصلنا للكراده اكو قهوة رضا علوان يجلس بيها المثقفين
يظهر هي من رواد المقهى
اخذنا مكان بعيد عن الهوسه
اجه العامل
اهلا دكتوره شتشربون
حنين نفس الكهوه ساده وانت حلمي ؟
حلمي عالريحه سكر قليل
حنين ها طمني شلونك اليوم ؟ وسمر شخبارهه ؟
حلمي نفس الوضع ماكو تغيير
حنين لازم اكو حل !!!!
حلمي عوفج من قصتي احجيلي شنو وره الألحان الحزينه
والمعزوفات المبكيه
ابتسمت ابتسامه خفيفه
جابلنا الكهوه
~~~~~~
حنين
راح تسجل قصتي على مسجل
حلمي اني متاكد قصتج بيها تفاصيل هواي حبيت أسجلها واسمعها مره ثانيه بالبيت
حنين اوك
مراح احجيلك على طفولتي وفترة المراهقه
لان ماكو شي غير طبيعي اني بنت مثل اي بنت
نشأت باحد البيوت العراقيه ،،،
فتحت عيني عالدنيا داخل اسره تحكمها الالتزام بالعشيره
وبنت العم لابن العم مهما كان الاختلاف
طموحي اكبر من ان اكون زوجه لابن عمي الي عقليته عشائريه بحته وان المرأة مكانها بالبيت خلقت للخدمه
تخبز وتطبخ وتربي الاطفال ولازم تنضرب من اي ذكر موجود بالبيت حتى لو اصغر منها
طالما هي خلقت بنت وهو ولد
اسرتي متكونه من والدي والدتي اخواني اثنين
اخوي الجبير حمد طبعا ماكمل دراسه
اخوي الثاني كريم نفس الحاله هم ماكمل دراسته
وظعنا المادي ميسور
نسكن بمحافظه الكوت
طول فترة دراستي بالاعداديه ابوي واخوتي يحاولون
يبطلوني من المدرسه
مره بطلوني وجتي المديره وكم مدرسه حجوا ويه والدي
ووعدهم يخليني اكمل السادس اعدادي
وفعلا كدرت اجتاز امتحان البكلوريا بمعدل:5/ 98
هذا المعدل يدخلني كليه الطب
هنا بدت اول عرقله بحياتي
حنين بابا معدلي يدخلني كليه الطب !!!!
ابوحمد بويه احنا ماعدنا بنات تدخل جامعه وبعدين انت محجوزه لابن عمج جعيفر
بجيت توسلت بابوي رفض ماقبل اقدم عالجامعه والبنات صديقاتي كلهم قدموا
حلمي احجيلي ع ابن عمج ،،،،،
حنين ،،،، جرت حسره اووووف كولهه كوم وجعيفر كوم
انسان نذل بمعنى الكلمه ولان ابن عمي لازم اقبل بي
شهاده ابتدائيه مكمل يادوب يعرف يقرى
عنده بيكب ياخذ الزرع ويودي للعلوه يبيعه
هو مصيطر على بيت عمي لان هو اخوهم الچبير
عمي موصي ابوي كدام العشيره
وكايله لازم تنطي حنين لجعيفر
موضوع ابن عمي ماكدر اناقشهم بي
ولا اكدر اعترض
مشكلتي بس يوافق اقدم عالجامعه
حلمي بيا سنه ؟
سنة ١٩٨٨
ويه انتهاء الحرب مع ايران بذيج السنه الناس فرحانه والجنود رجعوا لبيوتهم والي عنده شهيد ومفقود
خيم الحزن ع بيوتهم من شافو الشباب رجعوا من الحرب وولدهم بعدهم المدفون والمفقود والأسير ،،،،،
أنت تقرأ
العزف على جراح الماضي
Short Storyحنين فتاة جميله ذكيه لديها طموح ان تدخل كلية الطب كونها من المتفوقات ،،،، تلتقي ب غسان بالجامعه ويعجب بحنين وكونه ابن مسول ومحد ترفضه يتفاجئ برفض حنين لحبه كونها محجوزه لابن عمها وهذه تقاليد العشيره الي ماممكن ترفضها رهام ابنة مسؤل تجد نفسها باخ...
