العزف على جراح الماضي

الثالث

#العزف_على_جراح_الماضي
الثالث
بقلمي فردوس عبد اللطيف
مساء الورد 🌹
اشكركم حبيباتي على عالتعليقات الحلوه وتشجيعاتكم ،،،
وان شاء الله راح تستمتعون بهذه القصة وتستفادون من العبره الي بيها
~~~~~

لا يصل الناس إلى حديقة النجاح دون أن يمروا بمحطات التعب، والفشل، واليأس، وصاحب الإرادة القوية لا يطيل الوقوف فـي هذه المحطات.

سمر  اهلي ضغطوا علي ولازم التقي بالعريس
قررت اطفره
يمكن راح دكولون انت متأثره بالافلام العربيه القديمه 😃
لبست ملابس ماترهم لجسمي القميص عريض جدا ولونه
برتقالي وهاللون بالذات من البسه يضرب ع وجهي يصير كركمي 😃
وبنطرون كيلوت عريض وألوانه مال معدان وطلعت مثل القرقوز مراهم القميص عالكيلوت
اما المكياج شحجيلكم جبت ولطخت على كوله المصريين
عروسة المولد جريت الكحله وثخنت الحواجب والحمره برتقالي 😉
اما شعري فتحته وخليت خمسين ماشه ولبست شحاطه بيضا
بيها وردة حمرا
صاحتني ماما وكلهم كاعدين يم العريس
عود جيت دخلت عليهم سلمت
وقدمت العصير
من الضحك ماكدر اباوع لوجه ماما وبابا واخوتي
لان كلهم سكتو من شافوني الي فتح حلكه مصدوم
وابوي طلع جكاره واخوتي طلعوا من الخطار واسمع ضحكهم للغرفه
ماما طلعت بسرعه وصاحتني
كلت خل اخذ نظره عالعريس
باوعتله من جوه شفته يمسح بالعرك ومدنك بس يريد يفلت
طفرت وطلعت تلكتني ماما لزمتني من ايدي وجرتني لغرفتها

لازمه شعري واني اكولهه لا عفيه يوجعني شعري

ام سمر ولج سحيله ام الخلاكين ولج قرقوز امداه هالخلفه
كلنا طالبه بمعهد الفنون بس مو تطلعين مواهبج براسنا
ولج فشلتينا خزيتينا
وكفخ تضرب بي واني ماكدر اصيح ولا هي
سمعنا الولد طلع واجه ابوي واخوتي

ابو سمر من الاول جان رفضتي ليش هالتصرفات ؟

سمر بابا كتلهه لماما ماريد اتزوج وهي معانده
ام سمر ولج مو صوجج صوجي اني اريدج تعيشين عيشه
دلال وخير ورجال متمكن ماديا
ماما تضرب وبابا يجرني من شعري واخوتي كل واحد
يكفخ ويروح وصارت كتلتي عمل شعبي

سحبت روحي ورجعت لغرفتي مدري اضحك مدري ابجي من الضرب
المهم اني طفرت العريس
ورطتهم هي ماما من الصبح تجي دكولي لبسي فلان كوستم
يطلعج كبار ونازكه
بعدين ترجع دكول لا لبسي بنطرون كاوبوي وفستان طويل
وشعرج بالشيسوار سرحي
واني اكولهه حاضر لحد ما خليتهه تطمن وراحت كعدت ويه الخطار واني فاجئتهم 😆

حلمي وينج معوده شكد دزيتلج رسايل وانت ماكو
سمر حقك ماتدري بس اليوم الحاسمه ورطتهم اهلي
وطفرت العريس وهسه امي تسميني سحيله ام الخلاكين
حلمي احجيلي اطربيني خل اشوف حبيبة كلبي شلون كدرت تنتصر على اصرار اهلهه
سمر مو انت تعرف ماما تحب الفلوس وبابا تابع يردد كلامها
شدكول هو يعيد الحجي عبالك مسجل
اوكف خل ادزلك صورتي من رحت للخطيب
لان صورت نفسي وراح ابقيها للتاريخ يشهد عليها