#أسيرة_مختطف
الحلقة 12:🔥🔥🔥
#بقلمي_macilia_ch
دورت وجهي منو نحكي
على واش ناوي ؟؟ و وين رايحين ؟؟
شاف فيها ثواني بعدها نفخ يحكي
دانيال: كلشي فوقتو حلو المفاجأة تقعد مفاجأة عيب نفسدها ماش هك ...شفت فيه بنظرات نار و هو ولا عبالو يتبسم و ماشي هامو ...فجأة سمعت صوت إنفجار قوي ...شهقت من الصوت و تلفت نشوف من السيارة ...لمحت دخان فالسماء ... كنا بعدنا بزاف علابيها ماقدرت نلمح شي أما مع هك الصوت كان قاوي
رجعت لبلاصتي و قلبي يدق بقوة وسط صدري
ماشي مصدقة أنو جهاد ورا هاذ الشي
تلفت بسرعة لعندو نحكي
و مجد و لي كانو فالفيلا واش صرالهم ؟
دانيال: راهم فقصري و مجد معاهم
دور وجهو لعندي و عدا عيونو على كامل وجهي
دانيال: حتى بنتي معاهم
جمدت فبلاصتي و عقدت حواجبي نخمم علاه جبد بنتو فالوسط
و انا واش دخلني سألتك على مجد هو الوحيد لي يهمني
شفتو كي كبس على قبضة يدو و شاف فيا بخزرات يخوفو كأنو يتوعد فيا
بلعت ريقي و تلفت نخزر من زجاج السيارة
ساد الصمت للحظات ...رميت عيني نخزر فيه ...لقيتو مغمض عينيه و ساند راسو للور
بلا مانفيق لقيت روحي سارحة فتفاصيل وجهو
قريب ناكلو بنظراتي ...عديت عيني على كل تفصيلة فيه ..من عينيه المغمضين لنيفو و لشفايفو لتفاحة آدم ...بلعت ريقي بصعوبة و انا شادة روحي و يدي لي تحكني أني نمرر صوابعي على تفاحة آدم ...نفضت راسي من الفكرة و رجعت تقعدت فبلاصتي و حطيت راسي على زجاج السيارة نحسب بالثواني وقتاه نوصلو
ماحسيتش بروحي حتى غفيت و دخلت فسبات
فقت نحك فعيوني ...فتحتهم و انا نخزر للسقف ..عقدت حواجبي مستغربة .. تقعدت فبلاصتي نخزر لوين راني ... نزعت الغطاء و وقفت نخزر للغرفة الكبيرة لي راني فيها ولا نقول جناح أفضل ...مررت يدي على شعري نتذكر ماشي كنت فالطوموبيل واش جابني لهنا مالا ماشي متذكرة كيفاه جيت ...و انا واقفة حسيت بيديه دارو على كرشي و جبدني لعندو يحكي و يهمس قدام وذني
دانيال: أهلا بيك فقصرك ..
جبدت يديه من عليا و درت ليه ..جيت مقابلاتو قدقد نحكي
واش راك تخرف ؟؟
حط يدو على كتفي العريان و مرر صوابعو يحكي و يخزر في عيوني ...تشوك لحمي من لمستو ...بلعت ريقي نخزر لشفافو لي يتحركو
دانيال: انتي وافقتي أنو تعملي واش نحب مالا اول طلب هو أنو راح تتزوجيني
جيت نفتح فمي حتى نحكي أما هو سبقني و حط صوابعو على شفافي سكتني قبل ما نهدر
دانيال: أول شي راح يجو الصحفيين لهنا و ندير لقاء صحفي راح تخبريهم أنو أنا أنقذتك من الخاطف لي خطفك و انا بعدها راح نخبرهم بلي الخاطف كان مهددني بيك و اكيد راح يسقسوا علاش مالا راح نجاوبوهم و نخبروهم بلي كنا فعلاقة و راح نتزوجوا و الخرطي الباقي تعرفيه نبلعطوهم بشوية كلام و فرات
نحيت يدو نصيح
انت هبلت و لا تتمهبل بعد كلشي درتو فيا من كل عقلك تظن اني راح نقبل أني نتزوجك و انا نضحك
حك لحيتو يخزر فيا بطرف عينو يتبسم
دانيال: ايه هك راح ديري ولا حابة أني نستعمل معاك القوة و التهديد ..هاذ الزواج راح يفيدنا حنا الزوج من قبل عرضت عليك الزواج أما نتي رفضتي ولا نسيتي
وقتها كنت متزوج و كذبت عليا و نتا تخزر لعيوني وقتها استغليتني و انا كي الحمارة مصدقاتك
دانيال: أما هاذ المرة غير
ضحكت باستهزاء نحكي بقهرة
نفس الشي لو تحبني بلاك نقول بلي يحبني أما نتا فالمرة لي فاتت استغليتني حتى تحصل على الفلاشة و هاذ المرة علاه ؟؟ الفلاشة ما راهيش عندي روح اجري ورا لي سرقهالك علاه جاي تخرب فحياتي لي بسيف حتى رجعت لمسارها الطبيعي بعد الحالة لي وصلتني ليها
قرب مني و حط يديه الزوج على وجهي يحكي و نفسو السخون ضارب في وجهي ...غمضت عيوني نستمتع بقربو مع أني كارهاتو أما كي يقرب مني نذوب مزالت لمساتو و قربو يأثرو فيا
دانيال: صح ما نحبكش و ما نحسش بأي شي جيهتك لأنو ماعنديش قلب و مشاعر حتى أما ...
فتحت عيوني بصدمة نخزر لوجهو لي قريب من وجهي
رمشت عيوني مرات ورا بعض نستوعب في كلامو لي مزال يرن في وذني كي اللحن دمعو عيوني و حسيت انو قلبي تفتت من واش قال
دانيال: أما من أول لقاء جذبتيني و كي ملكتك و حطيت بصمتي عليك رجعتي من املاكي و كل حاجة ملكي فاللخر رجوعها و مكانها عندي
أنت تقرأ
أسيرة مختطف {من تأليف و كتابة Macilia Ch}
Historical Fictionأسيرة مختطف《مكتملة》 صحفية تختطف يوم زفافها لتقع أسيرة مختطف و تتوالى الأحداث داخل إطار تشويقي (باللهجة الجزائرية) {من تأليفي Macilia Ch} ❌( ممنوع النقل ) ❌ بدأت في جوان 2020 إنتهت في سبتمبر 2020
