#أسيرة_مختطف
الحلقة 10:🔥🔥🔥
#بقلمي_macilia_ch
قرب مني أكثر و انا تراجعت خطوات للور جيت نطيح على السرير أما يدو كانت اسرع جبدني من خصري بقوة حتى تخبطت فيه...حط يدو الثانية ورا رقبتي ... حسيت برعشة خفيفة سرات فكل طرف من جسمي ....حطيت يديا الزوج طبعتو بشوية و تجاوزتو ...خذيت نفس نحكي
ريناد: ما يهمنيش واش حكيتو ...لا هو يهمني ولا نتا
تبسم على جنب و قربلي كثر يحكي
دانيال: متأكدة؟؟ مثلا ماشي حابة تعرفي علاه خطفتك ؟؟ أكيد عندي طن من الأسئلة حابة تعرفي جوابهم مني
ريناد: ايه حابة نعرف علاه؟ و فنهار عرسي تحديدا
دانيال: تسميه هذاك عرس ههه المهم اخت مجد سرقتلي فلاشة مهمة و خوك خطفها و تزوجها و ماشي عارف أنو عندها فلاشة مهمة قادر تورطني و تورط باباك و تورط شحال من واحد معانا
أنا: و انا واش هي علاقتي ب### تاعكم
دانيال: فهاذي عندك الحق انا حبيت نضرب عصفورين بحجر واحد منها نجيبك عندي و منها نتحصل على الفلاشة قصدي اخت مجد و باباك مقبيل اقترح عليا أنو نعقدو صفقة اقترح أنو يجيبلي الفلاشة مقابل أنو نرجعو شركاء و تاني
أنا: و تاني؟؟
دانيال: نتزوجك
ضحكت باستهزاء نحكي
أنا: تصدق أنو ما استغربتهاش منو لي يجي يعرضني عليه كيشغل سلعة للبيع حاجة تضحك نحمد ربي أنو هو ماشي بابا
حك لحيتو يخزر فيا بنص عين
دانيال: متأكدة؟؟
أنا: واش قصدك؟
دانيال: شي انساي ..انتي ارتاحي بعدها نكملو
دار رايح عاطيني بظهرو خارج ..زربت شديتو من ذراعو نحكي
ريناد: و مرتك وينها؟؟ انت ماشي راجل و رخيس لهاذ الدرجة!!! مرتك ماشي دايرلها قيمة حتى و جايب وحدة ثانية فوسط دارها؟؟ شفت بنت صغيرة تحت كي طليت من التاقة و عرفتها بنتك لأنها تشبهلك مالا أكيد مرتك هنا
تلفت لعندي يخزر فيا بعيونو الحمر ...خزرتو خوفتني ...جبدت يدي من ذراعو و تراجعت خطوات للور نبلع فريقي بسيف
دانيال: قلتي ماشي راجل مالا ...غمزني و تبسم بشر يحكي
دانيال: كي ماشي راجل أرواحي نوريلك بلي راجل و نص ...صح البنت لي شفتيها بنتي ...واش رايك نجيبولها اخ ولا اخت هااا؟؟ غمزني بطرف عينو و مد يدو راح يشدني ...بلعت ريقي و هربت من قدامو ...فتحت بابةالدوش و دخلت غالقة الباب بالمفتاح ...قلبي يضرب بقوة وسط صدري
...سندت ظهري على الباب نحكي مع روحي
مهبول هذا و ما يحشمش ....غمضت عيوني و فنفس الوقت نتفس بشوية نحاول نلتقط انفاسي لي حبسهالي من الخلعة
خبط الباب تاع الدوش يحكي من ورا الباب
دانيال: افتحي ريناد و بلا لعب ولاد صغار ما تخلينيش نكسر الباب ...أنا متأكد أنو تعرفي بلي مرتي ماتت من سنتين افتحي
أنا: لا ماراحش نفتح روح منا و خليني وحدي
مهما درت راك غير قاعد تغلط و أنا مستحيل ننسى لي درتهولي من ربع سنين ...أنا نكرهك و مهما درت و حاولت تأثر فيا مستحيل نرضخلك
دانيال: بعدي من الباب راح نكسرو
أنا: قتلك اخرج و خليني وحدي ...بعدت من الباب بعدما رجع يخبط فيه بقوة .... تراجعت للور شوية شوية حتى لسقت فالحيط ...ضميت يديا لصدري خايفة نخزر للباب ....ثواني حتى تفتح الباب بقوة ...ولا خليني نقول كسرو أحسن
بلعت ريقي نخبي فخوفي داخلي ...
شفت فيه كيفاه شد على قبضة يدو بقوة ...صدرو طالع هابط شعرو مفرفش و عيونو و وجهو حمر من الزعاف
قرب مني يجري و حكمني من كتافي يخض فيا بقوة ... عروق رقبتو بارزين
دانيال: و نتي مهما قاومتي راح ترضخيلي مع اللخر و ترجعي تحبيني كيما قبل
تبسمت في وجهو نحكي باستفزاز كبير و داخلي يغلي من الخوف
أنا: أنا مستحيل نرجع نحب واحد خاين كيما نتا يا جنرال و خصوصي و انا انتزعتك من قلبي من زمان و رجعت نحب راجل ثاني
صاح في وجهي بقوة حتى خفت مد يدو حسبت راح يضربني ...غلقت عيوني و زيرت عليهم نستنى فيه يضربني ...فتحت عيوني مخطوفة بعدما سمعت حس تكسار جنبي ...دورت راسي شفت المرايا مكسرة و قطرات دم لاسقة فالزجاج المكسر العالق فالحيط
شهقت و حطيت يدي على فمي مصدومة ...هزيت راسي لعندو نخزر فيه بجمود
نزلت راسي ليدو المجروحة جيت نحكي أما بلعت الكلام لي كنت راح نقولو فحلقي بعدما شفت عينيه لي يتطاير منهم الشر ...كبس على ذراعي بقوة يحكي و يصر على سنانو بقوة ...حتى عظام فكو برزو
دانيال: شكون هذا ؟؟ احكييييي
تهزيت على صوت عياطو و نطقت لا إراديا و أنا نخزر لعيونو بلا ما نخمم فالعواقب
أنا : مجد
أنت تقرأ
أسيرة مختطف {من تأليف و كتابة Macilia Ch}
Ficção Históricaأسيرة مختطف《مكتملة》 صحفية تختطف يوم زفافها لتقع أسيرة مختطف و تتوالى الأحداث داخل إطار تشويقي (باللهجة الجزائرية) {من تأليفي Macilia Ch} ❌( ممنوع النقل ) ❌ بدأت في جوان 2020 إنتهت في سبتمبر 2020
