أسيرة مختطف {من تأليف و كتابة Macilia Ch}

الحلقة 18

أسيرة_مختطف⁦♨️⁩⁦♨️⁩
#بقلمي_macilia_ch
الحلقة 18:

نزلو على الدروج حاكمين يدين بعض ...وصلو للتحت و دخلو للصالة وين كانت محطوطة طابلة العشاء و غيث و لبنى قاعدين يستناو دانيال حتى يجي حتى يبداو ياكلو
على دخولهم الزوج طلع غيث راسو جات عينو فعين ريناد لي تقحرلو بشر
تبسم بمكر يحك فلحيتو أما لبنى رسمت نظرة البراءة في وجهها تخزر في باباها
جبد دانيال الكرسي لريناد و قعدت مقابل لبنى و غيث جنبها ...قرب دانيال من لبنى و باسها من راسها يتبسم معاها بعدها راح قعد في بلاصتو على راس الطابلة دقايق حتى بداو الخادمات يسربيو فالماكلة ..بداو ياكلو بسكات كل واحد لاهي فصحنو ...بعدما كملو تعشاو
طلعو لغرفهم حتى يرقدو بكري بما أنو غدوى راح يكون يوم مهم و لازم ينوضو بكري
دانيال راح يرقد هو اللخر بعدما رقد لبنى و حكالها قصة ماقبل النوم
دخل لجناحو ...نزع الفيستا تاعو و رماها على الفوتاي ...بدل حوايجو و تسطح على السرير تعبان حتى يرقد
مع الصباح ...تسللت أشعة الشمس فغرفة ريناد. ...تقلقت من ضوء الشمس لي سطع في عيونها دارت للجهة الثانية حاطة يدها على عينيها ...شعرها مفروش على المخدة و الغطاء طايح على الأرض ...حست بيد تمسحلها على خدها بحنية ...فتحت عيونها قابلها دانيال راقد جنبها يتبسملها
دانيال: صباح الخير يا عروس
تنفضت من بلاصتها و ناضت تقعدت على السرير تحك في عينيها و تحكي
ريناد: شحال الساعة ؟؟
دانيال: راهي الثمنية تاع الصباح
تأفأفت تحكي
ريناد: اففف مزال الحال خليني نرجع نرقد
حبسها بيدو يحكي
دانيال: لا نوضي تفطري بعدها على ساعة راح يجو حتى يجهزوك للعشية هيا مكانش وقت
عقدت حواجبها باستغراب تحكي
ريناد: شكون راح يجي ؟؟
دانيال: يا هبلة اليوم عرسك ..حجزت طاقم تجميل مخصوص ليك لهاذ اليوم بالذات هيا نوضي في يدك عشر دقائق حتى تغسلي وجهك و تفرزي حالتك ..بعد شوي راح يجيبولك الفطور و كيما قتلك على ساعة راح يجو حتى يجهزوك ..
ريناد: و نتا وين راك رايح؟؟
غمزها بطرف عينو يضحك
دانيال: حتى انا نروح نجهز روحي لليلة
حكمت المخدة لي جنبها و ضرباتو بيها على وجهو تحكي
ريناد: جايح أخرج
خطف بوسة خفيفة من خدها و هو يضحك و خرج
تبسمت على شكلو و تبهليلو معاها ...توردو خدودها و رجعو حمر كي تذكرت كلامو الليلة راح تبات بين أحضانو ...مجرد الفكرة خلات قشعريرة تسري فكل جسمها
ناضت الدوش غسلت و فطرت ..
بعد نص ساعة جاو الطاقم حتى يجهزوها من مصففة الشعر للماكياج ...
شدوها مع اللول حطولها ماسكات على وجهها اشكال و الوان بعدها دخلت للحمام خذات دوش عالمي و رطبت جسمها خرجت لافة كاب على جسمها و منشفة على شعرها... قعدت مقابل المرايا بداو بشعرها ...حبت تخليه مطلوق على كتافها مع شوية لمسات من عندهم ...عملولها ماكياج آخر شي بعدها عاونوها حتى تلبس روبتها البيضاء لي اختارها دانيال من قبل و شراها قبل حتى ما تجي لانو كان محضر روحو قبل ...و مع كلشي جاز بسرعة مكانتش عندها الوقت حتى تخرج و تشري
جاز الوقت بسرعة ...بعدما كملو من تجهيزها خرجو من الغرفة و هي قعدت واقفة مقابل المرايا تخزر لروحها و تبسيمة مرسومة على شفافها
بعد لحظات دخل دانيال ..لابس كوستيم أسود مع شوميز بيضاء ...فاتح القفالي الزوج الفوقانيين من الشوميز مرجع شعرو للور بالجال و ريحة برفانتو تضرب من بعيد
تلفتت لعندو تتبسم منبهرة بطلتو ...بلعت ريقها بصعوبة و كبست روحها حتى ما دوخش من حضورو الطاغي
حتى هو داخ فيها و فعيونها و ملامحها لي رجعو واضحين كثر من الماكياج و لا الروبة لي جات عليها تقتل ..
دانيال: جيتي تهبلي
تبسمت بسمة كبيرة و نزلت راسها بحشمة
قرب منها و شد يدها طلعها لعندو و باسها منهت تبسملها و جبد علبة من جيبو فيها خاتم ياخذ العقل كي شافتو لمعو عيونها من الفرحة
شدو بين صوابع يدو و يدو الثانية حكمت يدها ...لبسلها الخاتم و خطف بوسة خفيفة من شفافها لي مطليين بالروج ...مدلها يدو يحكي
دانيال: جاهزة؟؟
تبسمتلو بفرحة و حطت يدها و شبكت في ذراعو تحكي
ريناد: جاهزة
نزلو لتحت وين كانت الجنينة مزينة بالورود و تابي حمر مزين بالورد الأبيض ....غير خرجو طاح عليهم ورد أحمر و انطلقت موسيقى هادية ...تمشاو الزوج فوق هذاك التابي و لحقو لطابلتهم ...بداو الناس يتجمعو و يباركولهم ..عدات عينها على الحاضرين لعلى تلمح يماها اما لمحت شيبة الشر واقف وحدو في طابلة بعيدة عليهم يقصر و يضحك مع المدعوين لي تم...
تنهدت بحزن على حالتها هي و يماها ...فرحتها ناقصة بلا بيها كيفاه راح تكمل فرحتها و يماها مكاشها صح جاز كلش بالخف أما غياب يماها نهار عرسها محى التبسيمة لي كانت مرسومة في وجهها من شوي