#أسيرة_مختطف
الحلقة 2: 🔥🔥🔥
مجد: ما زال باه تموتي ...و مستحيل نخلي الموت يزورك طول ما أنا عايش
ضرب قلبي بقوة وسط صدري كلامو لي قالو و هو يهمس في وذني خلاني هايمة و بركان تاع مشاعر انفجر داخل قلبي
بعد عليا و سحب يدو لي لافها على كرشي و راح ..قعدت جامدة في بلاصتي بلا أي حركة و عيوني مغمضين ...كلش جاز بسرعة ما قدرت نفرق إذا حلم و لا واقع أنا الشي لي متأكدة منو حسيت بدفا بدنو و كي بعد حسيت بالبرد يلفح في عظامي من جديد ..أما كي كان قريب مني و لاسق فيا فتحت عيوني شوية و قدرت نلمح وشم صغير في يدو و نظن الوشم الشي الوحيد لي راح يخليني نتعرف عليه من غيرو ما نعرف عليه شي حتى وجهو كيفاه داير...خذيت نفس قوي و سندت يديا على الأرض و نضت من بلاصتي ...نمشي كي السكرانة مزالني مرهوجة بقربو لهاذ الدرجة شخص غريب ما نعرف عليه شي قدر يخليني فأول لقاء جمعنا أنو نحس بهاذ الطريقة حتى نسيت روحي و توقف الوقت بالنسبة ليا فهاذيك اللحظة ...غير خرجت من الشركة عاودت تفكرت كلام شيبو الشر برهان تنهدت و ركبت فسيارتي رايحة للفيلا حتى نحكي مع امي الله أعلم واش قاللها ...المفروض إذا حبيت نتزوج نفاتح امي فالموضوع مش حد ثاني يحكي معاها فبلاصتي دوك بسبتو وين راح نحط وجهي ...تبهدلت رسميا مع ماما و أكيد راح تغيضها روحها بسبة هاذ الشي ...بعد شي نص عشرين دقيقة لحقت للفيلا و دخلت من الباب الكبير بعدما فتحلي العساس الباب ...ركنت سيارتي قدام المدخل و دخلت نمشي على روس صباعتيا طالعة لغرفتي أما قبل ما نطلع جاني صوت امي من ورايا
رضوى: وين هاربة يا لالة الحقيني للصالة تشوف
درت نص دورة و نزلت من الدروج مغلوب على امري ..دخلت للصالة لقيتها قاعدة حاطة رجل على رجل و مطلعة حاجبها اليسار
رضوى: تفضلي اقعدي و ابداي تحكي
بلعت ريقي لي شاح و تمشيت نكركر رجليا و قعدت على الفوتاي لي مقابلها نفرك في يديا ..نزلت راسي و بديت نحكي
أنا: ماما شي ..أنا
رضوى: نتق واش ؟؟ احكي و طلعي راسك ..حطي عينيك في عينيا و احكي
تنهدت و طلعت عيوني نخزر لوجهها المقلوب باينة متغششة عليا كي خبيت عليها موضوع الزواج ههه الشي لي يضحك أنو راهي متغششة في باطل لأني فالأصل ما خبيت عليها شي
أنا: ماما الحقيقة أنا ..حكيتلها واش قالي شيبة النار بالتفصيل و سكت نخزر لردة فعلها ...شفتها كي تنهدت و ناضت من بلاصتها قعدت جنبي تحكي
رضوى: شوفي يا بنتي مكاش حاجة تحشمي منها خصوصي مني و فهاذ الموضوع بالذات و انا فرحانة أنو قررتي تتزوجي و تبني دار أما الشي لي ما حبش يدخللي راسي كيفاه راح تتزوجي بولد نايف لي ماشي حاملتيه كيفاه حبيتي ولدو و تاني حابين تتزوجو بأسرع وقت و هو ما عندوش شهر من لي تعافى و ما تنسايش وضعو هو دوك مقعد يعني راح تقدري تحملي هاذ المسؤولية الكبيرة على كتافك؟؟
تبسمت بقلة حيلة و الدموع متحجرين في جفوني أصلا ماشي حابة هاذ الزواج أصلا ماشي لأنو العريس مقعد لا أما ماشي حابة نتزوج بهاذ الطريقة و خصوصي بشخص لا نعرفو ولا نحمل باباه الفاسد و عايلتو لي مبنية على الكذب و الخداع ...تنهدت نحكي و شفافي يرجفو راسمة بسمة مزيفة على وجهي
أنا: أنا راضية أني نحمل هاذ المسؤولية ...صدقيني الحب يصنع المعجزات ههه ...
رضوى: كيما تحبي يا بنتي و انا راح نوقف جنبك مهما صار ..تبسمتلها و حطيت يدي على يديها حكمتهم و بستهم
أنا: ربي يخليك ليا
أنت تقرأ
أسيرة مختطف {من تأليف و كتابة Macilia Ch}
Narrativa Storicaأسيرة مختطف《مكتملة》 صحفية تختطف يوم زفافها لتقع أسيرة مختطف و تتوالى الأحداث داخل إطار تشويقي (باللهجة الجزائرية) {من تأليفي Macilia Ch} ❌( ممنوع النقل ) ❌ بدأت في جوان 2020 إنتهت في سبتمبر 2020
