#أسيرة_مختطف♨️♨️
#بقلمي_macilia_ch
الحلقة 14:
بلعت ريقي نحاول نستجمع الكلمات في راح نحكي بيهم
انا حابة نعرف علاه متجاهلني و تعاملني ببرود مدامني اختك علاه دير فيا هك أنا محتاجتك جهاد أكثر من أي وقت ..يكفي انو ما شفتكش من سنين ولا سمعت صوتك ولا قدرت نعرف اخبارك و دوك رانا فنفس البلاصة نحكو كيما الغرباء
جهاد: كملتي !!
يعني حتى نتا ماشي ناوي تجاوبني ؟؟ اوكي كيما تحب ما راحش نزيد نقلقك
درت رايحة خلاص قريب ندخل للفيلا ...أما كلامو لي قالو خلاني نحبس و نرجعلو
جهاد: حابة تعرفي مالا علاه متجاهلك خليني نقولك مالا حتى ماتزيديش تسقسيني ولا تحكي معايا من اليوم و رايح
لهاذ الدرجة وجودي مقلقك
جهاد: أكثر مما تتصوري
زميت شفافي راح نبكي من كلامو ...علاه يكرهني واش صرا حتى صرنا بعاد قاع هك
احكي مالا و خلصني و خلص روحك
جهاد: راح نحكيلك حكاية صرات صح حتى نختصر الكلام .. الحكاية تاع وحدة تزوجت زواج تقليدي فعمر صغيرة أجبروها والديها أنو تحبس قرايتها و تتزوج بلي ختاروهولها
ما لقات غير ترضخ الأمر الواقع و تزوجاتو
لي تزوجت بيه كان معيشها عذاب نفسي كان مريض و مهووس بيها علابيها تزوجها ...كي شافها متمردة و ماشي راضختلو و الأسوء كي اعترفتلو بلي تحب شخص ثاني و تزوجت بيه سيف عليها و راح طلقوا مع الوقت و رفضت انو يمسها تما وين جن جنونو و شافت وجهو الحقيقي فهذاك النهار اغتصبها و مارس كل انواع العنف معاها ...هربت عند واليدها حتى يساعدوها أما جاو ضدها و رماوها عند راجلها كانو ناس متشددة و فنفس الوقت عماهم الدراهم لي جات من راجل بنتهم فالأصل باعوها ليه مقابل الدراهم و ما همهش فيها
جازو عامين لقات روحها حامل فشهرها الثاني ...فرحت فرحة كبيرة أما راجلها كانت ردة فعلو غير ما هتمش للأمر ..بعد أيام جاو
الشرطة و اعتقلوه و دخل للحبس و هي ما صدقت تهنات منو ..زادت رفعت دعوى طلاق عليه و ربحت القضية و طلقت منو بصعوبة ...كانت فشهرها الثامن كي طلقت منو ...كي رجعت للدار حاوزوها خواتو من تم لقات روحها بين ليلة و نهار فالشارع مع جنين في بطنها بلا مأوى بلا والو راحت لبيت اهلها طردوها من تم من الاول كانو ضد قرار طلاقها ...أما الحظ كان في صفها ...و هي تمشي برا فالبرد و الليل مخيم على البلاصة ...من شدة التعب و الجوع طاحت على الأرض ...تم كان واحد جايز و شافها مرمية ..حملها و اسعفها و من هذاك النهار طورت و بداع قصتهم مع بعض ..لزوج قلوبهم دقت ...هذاك الراجل كان ارمل و عندو طفل...بعدما زيدت بخمس شهور تزوجوا و البنت رجعت بنتو و على إسمو هو....من هذاك النهار رجعو عايلة وحدة متحابين و متضامنين أما السعادة ما دامتش بعد عشر سنين رجع راجلها الاول شبح حياتها ظهر ...قتل راجلها الثاني بدم بارد وبلا ما يخلي وراه اثر و زور الأمر كأنو صرالو حادث بعد عام عاودت رجعت ليه و تزوجو
سكت جهاد للحظة و انا من جهة الخوف بدا يتملكني من هاذ الحكاية و من جهة أخرى واش دخل هاذ الحكاية فالوسط
علاه رجعت ليه ؟؟
خذا نفس و كمل يحكي شفت نظراتو تبدلو و رجعو يخوفو
جهاد: رجعت ليه و تزوجاتو لأنو هددها ببنتها كيما قتل راجلها الجديد كي خبرها من اول رجعتو تخليه و هي ماسمعتلوش
على هك قتلو كي ماحبتش تخليه ؟؟
جهاد: ما عرفتش انو صار اخطر و اقوى من قبل ...مالا رضختلو و تزوجاتو و خذات بنتها معاها و ولد راجلها معاه لي كانت دايراتو وليدها تان ..أما كي كبر شوية و رجع في عمرو 17 سنة اكتشف حقيقة موت باباه بالصدفة و خرج من هاذيك الدار و اختفى بلا رجعة
واش دخل هاذ الحكاية فالوسط؟؟
جهاد: تحبي تعرفي مولات الحكاية شكون؟؟
بلعت ريقي شحال من خطرة خايفة من إجابتو لي راح يقولها ..دق قلبي بقوة وسط صدري ...هزيتلو براسي أنو يكمل يحكي
جهاد: مولات الحكاية هي أمك رضوى
فجأة حسيت الدنيا دارت بيا ..مقدرتش نستوعب كلماتو الآخرة لي قالهم من شوي ولا ماشي حابة نستوعبهم
حطيت عيني في عينو نحكي بصوت غالباتو غصة تاع بكى
أنت تكذب هاذي حكاية الفتها من راسك ماش هك
أنت تقرأ
أسيرة مختطف {من تأليف و كتابة Macilia Ch}
Historical Fictionأسيرة مختطف《مكتملة》 صحفية تختطف يوم زفافها لتقع أسيرة مختطف و تتوالى الأحداث داخل إطار تشويقي (باللهجة الجزائرية) {من تأليفي Macilia Ch} ❌( ممنوع النقل ) ❌ بدأت في جوان 2020 إنتهت في سبتمبر 2020
