— PATAK
Iminulat aking mga mata
Hinawakan ko at ito na nama'y namamaga
Dahil sa paulit-ulit na pag-iyak
Walang tigil, mga luhang pumapatak
Iniisip ang ating nakaraan,
Nakaraan na sobra mo akong nasaktan
Sa pag-ibig nating hindi ko inaasahan,
Na ganito pala ang kahahantungan
Naalala ko pa kung gaano tayo kasaya,
Doon sa lugar kung saan tayo unang nagkita
Lagi mo akong pinapatawa sa bawat sandali,
Lagi akong umuuwi na may ngiti sa aking labi
Madalas mo akong binibigyan ng kulay pulang rosas,
At sinasabing ako lang ang gusto mong makasama sa bawat oras
Minsa'y nalulungkot sa aking naiisipan,
Ngunit sinasabi mong huwag akong mag-alinlangan
Pag ika'y pumupunta sa aming tahanan,
Nakahanda ka at lagi mo akong kinakantahan
Sa bawat paghampas ng mga daliri mo sa gitara,
Para bang sa tenga ko ay isang napakagandang musika
Bawat sinasabi mo ang salitang mahal kita,
Puso ko'y para bang tumatalon sa tuwa
Madalas mo akong bigyan ng mga yakap
'Pag tumitingin, mga mata natin ay nangungusap
Ngunit singbilis ng kisap-mata,
Pag-ibig natin ay naglaho nalang bigla
Ang dating tuwa at saya,
Ay napalitan ng patak ng mga luha
Mga pangako mo sa akin,
Ay hindi mo na tutuparin
Ang sumpaan natin sa isa't-isa,
Ay hindi na mangyayari pa.
