تقلبت حياتي بسباب انا زهري

جزء تاني

الجزء التاني
...وقف عليا داك خونا هو و شي صحابو معرفتوش اش بغا حتا انا معرت اش وقع ليا حسيت بشي بلااان سولني كيداير اولدي لباس بيخر و كذا و شاد ليا ف ايدي و دوك خوتنا لي معاه تاهوما غي تيحققو معرت مالهم مهم تنجاوبو حسب السؤال و تنتسناه يقول اش بغا شوية هو يقوليا واش كتسكن هنا عرفتو باغي يدي و يجيب معايا فالهضرة قلت ليه اه و دابا زربان مصخر زربت عليهم مشيت للحانوت تقديت شي تويشيات مشيت للدار مكاين ميدار تنتلف الوقت فبلاي و التلفزة و صافي ضربات ديك العشية هو يجي الواليد غي بوحودو سولني شنو درت هاذ النهار و كذا مقلتش ليه على داك.خونا و اصلا مدرتوش فبالي و مشا من بالي صولتو على الواليدة قاليا بيخير راه ولدات دري غدا الصباح غادي تجي خلا ليا شي ماكلة جابها من برة وصاني على البوطات و الضو منقربش ليهم و مشا انا تعشيت و قبل منعس تنفكر ليه فشي سمية عرفتي كاع السميات تيطيخو على بالك كتحير مكتجي فين تختار وحدة حتا كطيح علك وحدة خرا حسن منها من حيث لا تدري مهم نعست تنفيق على صوت البعلوك تيغوت احح ولا عدنا الضجيج و فين نتلاهاو سلمت على الواليدة بست لها راصها شفت اابعلوك باقي صغيور كيوت كيكونو ملائكة فهاذ الفترة دابا هاذا راه تعدا ليا على 180 مليون حيوان منوي حربي 😂   مهم جاو العائيلة ديال الواليدة و الواليدة الخوال و العمام العائلة صغيرة الحمد لله الدار هاذ ليامات عاامرة شي داخل شي خارج ولكن راه جمعت صريفة على ضهر البعلوك فختانتي و مجمعت هاذ البركة يمكن مهم تدريجيا الدار بدات تتخوا من العائيلة و الجيران شي يوماين و هوما عدنا اوطيل حنا ملي صافي سالا هاد الهراج و الصداع عاد سالينا للبعلوك نشوفوه على خاطرنا و نشوفو لمن تيشبه و كذا هو فالصراحة تيشبه ليا شوية دابا بقا لينا البلان ديال السمية تنفكرو شنو نسميوه كل واحد تيلوح سمية من جهة الجيران و العائيلة تاهوما كل واحد واش تيقول هاذوتا السمية دخلو فيها انووضو جمعو هاديك سيرو ديرو و ولدو و سميو لي بغيتو مغاربة ديال النمي  قاليا الواليد شنو نسميوه قلت ليه فوت غي سميات الزهر و السعد و سميه لي بغيتي بقا تيضحك قال صافي  انسميو سعيد نقزات الواليدة معجباتهاش السمية قالت لا عزلو شي سمية بعقلها بقينا هاكاك سمية من هنا سمية ملهيه البعلوك طلع ليه الدم بدا تيبكي قال ليا الواليد هاك جيب ليكوش طيارة خرجت للحانوت و معارفش شنو ممكن يوقع يعني فرمشة عين تقدر توقع لك اي حاجة غادي تنجري طيارة مع تنخرج للدرب تتبان ليا واحد الميرسيديس نوار كلشي نوار جاج تاعو كحل متحركاتش شريت ليكوش و راجع طيارة ثاني غادي تنجري حتا كنضرب على ديك الميرسيديس بدات كتحرك شوية هي تحرك جيهتي تخلعت عرفتتهم من عند الله قاصديني فرمشة عين تنلقاها قدامي خرجو منها 3 الرجال جاو قاصديني و انا واقف ليا الما فالركابي حط ليا واحد فيهم كلينيكس فنيفي فيه واحد الريحة كتغيب و هزوني جوج بديت تنغوت و نتركل عليهم تما و الدنيا تما خاوية جات تل ديك ساعة بالضبط و خوات وا عتقو اولاد الناس بانو ليا شي دراري صغار تيلعبو كورة علقو هربو ملي شافو داك الديكور داكشي داز بالزربة مبقيت عاقل على والو من اللحظة لي طلقت فيها ليكوش غيبت كيما قلت مبقيت عاقل على والو تنحل عيني وسط واحد البيت بوحدي مكتف مفهمت والو بديت نغوت نغوت و تنحاول نفك راصي ولكن والو  شي نص ساعة كنضرب على الباب تحل....
...مبقيت عاقل على والو من اللحضة لي طلقت فيها ليكوش تنحل عيني وسط داك البيت صغير رابطيني بحبل المشنقة ممتيقش راصي وايلي انا بصح مخطوف بصح واحل فهاذ البلان الخلعة فأوج العطاء ديالها تيطيحو علبالك كاع السيناريوات لي ممكن يوقعو لك وليت تنتخايل غي الموت و الدبيح و الدم هادشي تاع الإختطاف كنت غي تنسمع بيه فالتلفازة فمختافون و الجورنال و الأفلام هاني وليت مجربو حتا انا بداو تيطيحو عليا دوك الأفكار ديال النمي غادي يدبحو ديلمي هنا و ياخدو الكلوة و الكبدتان و يبيعوهم هادشي لي كانو تيقولو لينا واليدينا على هادوك لي تيتخطفو ايه هاعلاش لوسيور ها علاش الواليد كان تيوصي و يعاود يوصي فيا تنضرب على الباب تحل دخل واحد خاينا وجهو كاgول ممبينوش مع دخل رد من وراه الباب و جبد واحد الموص موايان تزعزعت انا فديك اللحضة و مع ايدي و رجلي مربوطين كملاات بديت تنترطا و هو جاي قاصدني بديت تنغوت واعتقو والو علم الله فين جايبيني كل خطوة تيقربها تنموت 10 المرات نفسيا تخيل معايا غي تخيل...وصل عندي خونا صحيح هزني قلبني بحال شي دجاجة غادي يذبحها و انا منيتي تنشهد صافي فقدت الأمل شوية تنحس بإيدي ترخفو خونا قطع الحبل باش رابطيني بيه و مشا خرج هو راه كان غي باغي يفك ليا ايدي و انا يسحابليا غادي يصفيها ليا حنين هاذ المجرم شوية هو يعاود يدخل و هاز معاه بلاطو عامر ماكلة غادي خارج تنسولو شكون نتوما ! اش درت ليكم ! متيجاوبش قلت ليه حميمتك طلقني ( 😂) والو خونا متيهضرش قلت ليه ثاني غي جاوبني غدبحوني ياك و غتبيعو ليا الكلوة خونا تعصب قاليا عرفتي الى مسكتيش غنحيدو لك القلوة ماشي الكلوة    Dslمنعاودش نخصر الهضرة 😂 سورت الباب و مشا ديك الماكلة مقربتش ليها تنحاول نحرر رجليا هزيت واحد الجاجة تحت داك السداري قطعت الحبل و بديت تنغوت و نضرب فالباب والو تا واحد ممسوق ليا دازت شي 3 السوايع متبدل والو والديا كون تخلعو معارفيني تا فين مشيت غيكونو دوك البراهش لي هربو ملي شافوني دارو الواجب الوطني و ديعوها اضافة الى فيخرات هادشي تيجري لنا فالدم و لله الحمد على نعمة الحضية هي هاديك ضرني الجوع تيبان ليا داك البلاطو فالبلان هو فالصارحة كيتهلاو فالضحايا ديالهم حاطين بانيني و الفريت و العاصير بيتزا و الما فكروني غي فالحولي فالليلة تاع العيد تنتهلاو فيه قبل منذبحوه هكاك انا واقيلا يمكن قصيت داكشي بنين تبارك الله فالدار و متناكلش هدشي تكيت تنخمم شنو ندير فهاذ الوحلة تيبان ليا الشرجم عالي بزااف و البيت خاوي طاح الضلام تيبان ليا غنبات هاذ الليلة هنا أول مرة.منباتش مع دارنا تحل الباب ثاني جا داك.خونا فالله حط ليا بلاطو خور و دا لاخور و لقاني فيا الجوع زعما ونعم المجرمين تيفكرو فالضحايا ديالهم ماشي بحال السيمو حايد حايد السيمو ممعاناش هادشي فيه داكشي تاع دكشي برعاية كوكاكولا البلاطو فيه بانيني خور هاذو طالععين غي بالبانينيات واقيلا بانيني فالغدا و بانيني فالعشا واش صافا ! مهم كليت دكشي محسيتش براصي تا نعست تنفيق على صوت الباب كيتحل تا راه مزال ممتيق هادشي انا واش بصح مخطوف ولا مطلعينها عليا دخل داك خونا ثاني حط ليا بلاطو خور فيه الحليب هاذ المرة ماشي بانيني بحالا سمعو مني البارح الله يرضي عليهم الكوفيتير الزيت العود بتيبانة الخبز راه قلت ليكم و نعم المجرمين كون خطفتونا شحاال هاذي الصاط وايلي مافعايل ما والو تال دب صراحة غي كنا واخدين فكرة خايبة على هادشي تاع الإختطاف كذبو علينا اه بصح مجرمين خطفوني علم الله اش غيديرو ليا ولكن راه بضمير متلازمة ستوكهولم صراحة غي داوي و صافي مكاين محسن من تكون وسط داركم و كذا الأمان انا راه يحطو ليا مال الدنيا فكف و والديا فكف غادي نختار مال الدنيا اش يحساب لك صافا ! لا لا غي داوي الواليدين اغلى كنز كاين تهلا فيهم ماعلينا نرجعو  ملي فطرت تنخمم كيفاش نهرب من هنا والديا كون راه داروني فمختافون تكيت فداك السداري هي دير ليا واحد الفكرة الطن فراصي وايلي علاش مطاحتش علبالي من لول وقفت داك السداري لشرجم درتو سلوم طلعت لفوق الشرجم صغيير بزااف ضربت طلة ولاد الناس جايبيني لغابة يعدموني تا واحد ميسيق ليا الخبار هي هاديك تنضرب على البعد لي غنقز فشلت انا شي 4 ميترو نقدر نقزها و ميطرا ليا والو زعما معديش خيار خور تنحاول نخرج رجلي مضارب مع الشرجم باش نقز هو يشوفني واحد خاينا جا تيجري مع تنقز تيشدني فيديه خونا عاامر ديال بصح مبنتش ليه دار ليا لحال شي دجاجة قاليا واش نتا بعقلك باغي تموت قبل الوقت تشا راه تيفكرو فيا ليعن حيات بات مك جا واحد عشيرو خور قاليه يالاه نديوه من هنا قبل ميدير شي فضيحة هزوني بجوج غاديين بيا شوية تنضرب على واحد الشويرة و واحد خور معاه جابين قاصدينا من اللور مكيديروش الحس الشويرف دار ليا اشارة بصبعو على فمو قاليا سكت داكشي درت ضربت الطم كانو هازين معاهم زراوط وصلو عدنا دقة دقة لواحد طاحو ولكن غي توعتو تا راه صحاح هوما يعاودوهم بدقة للعنق غيبو انا غي مسو رجليا لارض و انا نعلق تا نجري شوية و انا نشوف واحد ضاسيا فيها داك الشويرف و عشيرو جايين عدي وصلو عندي و انا مزال تنجري فديك الغابة قاليا الشويرف طلع طلع سربي متسوقتش ليه نزل تبعني قاليا طلع او تا طلع و متخافش مني قلت ليه ألااءح قاليا زهير ولدي طلع و متخاافش ملي قاليا هاكاك تحليت حسيت بالآمان غادي طالع هو يهزني هو شويرف ولكن شاد فراصو دار ليا واحد الشدة حسيت بالحنان بدا تيشوف فيا و كيقلبني و يسولني واش ضربوك و كذا دار فيا الشك أول مرة نشوف عاذ الوجه و جا عتقني اش كيجيني و باش عرفني هنا قاليا مهم نسا كلشي دب غترجع عند واليديك انا غي مصدوم و صافي بقينا غاديين شي ساعة نزل حطني قدام واحد الكوميسارية و مشا....يتبع