عــــزوة
الحلقـــــة الثالثة 🔥♥️ .........
_________________
( طــريق كلها كانت عبــاره عن تبادل احاديث .. كُل مره موضوع .. كـان عز مايسكتش يجيب مواضيع من رأسه باش تهدرز فيهم سمرا ويسـرح فيها هوا كالعاده ..
قصُــر طريــق ووصلـو للحوش )
____________
( الحـوش )
....
عـز :: ميت من جووع . ( يفتح ف باب الحوش ) بناكل وبننرقد ..
سمرا :: مش ماشي لشغل ؟
عز :: لالا . كانه في حاجة طارئة تو يكلموني .. ( وخشو )
...
خيرية :: ( سمعت باب الحوش ) هاذم اكيد عز وسمرا جوو ..
مرام :: ( رتبت تقعميزتها )
سماح :: ( ساكته )
سمرا :: ( خشت الاوله ) سلام عل(قبل ماتكملها ) ااستني عز ماتخشش عندنا ضيوف ....سلام عليكم ( وخشت تسلم )
مرام :: ( قلبت عيونها )
سماح :: ايح عليك يابنتي . احني ضيوف ؟ .. عادي مش برانيه
سمرا :: ( تشبح لي مرام وتسلم ع سماح ) ماه مرام مش لابسه هذا علاش ...
خيرية :: البسي ع راسك خلي يخش يسلم ع امك ...
سماح :: تعالي جنبي ياابنت ( وقعمزت سمرا جنبها ) .. اااشييه كاابره ومحلوه يافرخه
سمرا :: هذا من ذوقكك .. ( مبتسمه )
مرام :: ( لبست ومتعفلقه .. كان همها انه يخش عز هكي ويلمحها من غير وشاح ... تفكير سطحي ع اساس لو شاف خصلتها بيحبها وقتي )
خيرية :: خخخش عزز .. تعالى وليدي خالتك سماح تسأل عليك ....
عـز :: ااحم .. سلام عليكم ( خش طول لي سماح سلم عليها ) كيف حالك خالتي سماح نورتينا والله
سماح :: نور نوركم ياغالي .. كيف حال صحيحتك وشغلك
عز :: ف نعمه الحمد لله ...( شبح لي مرام ومن بعيد بدون مايسلم ) خير مرام كيف حالك ...
مرام :: ( زادت ولعت ) اهلين بيك ... الحمد لله
عز :: ( باس راس حناه وقعمز جنبها ) شن صححة ؟
خيرية :: بخير ياوليدي .. شن مامشيتش العمل اليوم ؟
عز :: لا لا . استنيت سمرا وروحت بيها .. مافيش شغل هلبا ( شبح لي سمرا ) شن غزالتي مافيش ماناكلوو .. والله بنطيح خلاص
سمرا :: ااي هي .. خلي نبدل ونصلي ونحطلك ... تغديتو ميمه ؟
خيرية :: اي من بكري بنيتي .. حطو انتم ف المطبخ وكولو بري ..
سمرا :: تمام .. ( وناضت لي دارها )
مرام :: ( بأبتسامة خبث ) كانك ماتقدرش تصبر نحطلك انى عادي ...
عز :: ( شاد تلفونه ) لا منورة مرام .. بنتغدى معاها اصلا تو نستناها ... ( ناض ) هي نستأذن منكم تووو ( ومشي لي داره )
مرام :: ( تنفخت وشدت تلفونها )
خيرية :: ( فاهمه تصرفات مرام ومركزه فيها )
___________________________________
( في طرــيق مليانه سيـارات .. ترــفع وتجيــب ... كانت من ضمنهم سيــارة دُنيا البيضاء العالية .. مصكرة رواشنها وفاتحه اغاني ع لهــادي .. رن تلفونها )
دُنيا :: ( شبحت لي رقم وفصلت وركزت تاني ف سواقه )
( رجع رن رقم تاني .. رجعت فصلت .. وثالث وفصلت .. لين جت سيــارته جنبها وتلفتت )
سند :: ( يأشرلها ردي ع لموبايل .. )
دُنيا :: ( ردت عليه ) سند امشي في حالك خليني نسووق ماتوترنيش .. تشووف ف دنيا كيف زحمة
سند :: نتتصل بببيك ليـــا اسبوووع انى ولا ؟؟ خيرك ماترديش
دُنيا :: سند ع رحمة والدديك خطاني وخليني نعرف نسووق .. امشيي ف حالك بالله عليك
سند :: هيا هكي ؟؟ بااه .. ( لف سيــارته قدامها صكر عليها ونزل )
دنيا :: ( شدت فرينو .. حدفت تلفونها وقعدت مقعمزة تشبحله )
سند :: ( خبط ع روشن ) ااافتحي
دنيا :: ( تنفخت وفتحتله ) هذا شن يسمو فيه ؟
سند :: كم مره اتصلت . وكم مره بعتت مسج . كلمت سهير وتجديتها تخليك تكلمييني .. علاش هكي تتصرفي فهميني
دنيا :: ( شبحت قدامها وغمضت عيونها بعدين شبحتله ) ع لحال هذا مش ح نقدرو نكملو ..
سند :: نعم ؟؟؟ ( قام حاجبه )
دنيا :: ( خدت نفس ) انى وانت غلط .. من الاول غلط . كان المفروض نحسبوله الموضوع الف حسااب 💔.. ( تحط ف ايدها ع راسها ) ان(قص عليها )
سند :: ولعي سياارتك وامشي وراي .. تخشي يمين ولا يسار ماتلوميش الا روحككك ... ( ومشي لي سيـارته )
دُنيا :: ( تشبح لي سياارة سند وترعش مع بعضها )
سند :: ( يشبحلها ف لمرــايا وقلبه بيطلع من كلامها وولع سيــارته )
دُنيا :: ( عرفاته بيقعد يستنى فيها .. ولعت سيـارتها )
سند :: ( هوا طلع وطلعت ورااه )
_______________________________
( مقهـــى )
..
معتـز :: ( يرتب ف لوراق الي قدامه ) خلاص هكي مووضوووع وفتكيت منه ...
سالم :: ( ضربه ع كتفه ) وووين ياعيل .. ياابيووع امس راجيتك ( جبد كرسي وقعمز )
معتز :: اووووه هههه سلومه . شن ياكلب ماتعرفنيش الا كان في زردة
سالم :: ولا فاتك شوااااه خيال .. ديما بنكدك ياراجل ... شن خدمه امالا ؟
معتز :: ااي . قداش ليا ع شركة قلت نخدم برا ونمشي نسلم ولا خلاص ...
سالم :: خيرك معاش اداووم ؟
معتز :: معاش ليها هذيكا لخلوق ... المهم قولي توا معاش شفت حد من لقرووب ؟؟ من جي امس
( واستمــر لحاديث .. وسلمو ع بعــض وناض معتز وطلع بسيــارته لي شركة )
______________________________
( في مكــان تـــاني ... )
..
دُنيا :: ( ماشية بسيــارتها لي وصلت للمكان الي عرفاته من قبل حتى ماتجيه من قبل .... )
سند :: ( درس سيــارته وقعد مقعمز فيها )
دُنيا :: ( تشبح لي سيـارة سند ورجليها معاش تحس بيهم من الخوف )
سند :: ( نزل وصكر باب سيارة وجاها فتح باب سيارتها ) انزلي
دُنيا :: سند مايجيش منه لكلام هذا .. في تلفون نتكلمو فيه ان(قص عليها )
سند :: خلليتي ف امهااااا تلفون انتتتي .. اانزلي قتتتلك ..
دُنيا :: ( بلعت ريقها وتشبحله ) شن معناه جيتنا هنا ؟
سند :: ( يشبحلها ) انزلي ...
دُنيا :: ( شبحت قدامها شوية ونزلت )
سند :: ( قربع الباب وشدلها ايدها ومشي )
دُنيا :: باااه اارخيني نمشي بروحي ... ( وتشبح حواليها )
سند :: ( فتح باب الفيلا صغيروونه الي كــانت من برا منظرها خياال دخلـها لي جنينه صغير وصكر الباب )
دُنيا :: شوف سند .. الكل هنا يعرفوك خلاص مايجيش يشوفووونا هنا عيب .. اافتح الباب خليني نمشي ونتكلمو تلفون
سند :: شن معناها انى وانتي غلط ؟؟؟
دُنيا :: ( خدت نفس بصعوبه ) سند بالله عليك خلينا نمشو من هنا انى مانبيش نققعد ( وماتبيش تتشبح للفيلا )
سند :: شنننن معناها نننحسب الف حسااااب لما نبي ننكون معاااك فهميهااالي هيا دنيا ...
دُنيا :: ( مغمضه عيونها ) ماااتعيطش ...
سند :: ( لف وراه بعدين شبحلها ) عااارفه فيلا منو هذي ولا ؟؟؟ عاااارفه شن هيا ولااا ؟؟ بنيتتتها بببوووجع قلبي وبلللهفتتتي باااش نااخدكك تكووني حلالي وتعيشي فففيها... حاااالف بيمين ماااتخشلها وحده غغغيرك . تجي تقوليلي احني غلط ؟
دُنيا :: ( تشبح للباب وتبكي ) نبي ننروح
سند :: ( شدلها ايديها ولفها ليه ) نتكلم انى ....
دُنيا :: سند بالله عليك ننب ننبي نروح .. ( وتبكي )
سند :: لدرجة هذي معاش تحبيني ؟؟ .. من شن خايفه ؟ معقوله تشكي انه ممكن ندير فيك حاجة ؟ ( حط ايده ع قلبه ) انى يادنيا ؟؟؟؟
دُنيا :: ( تضغط ع فمها وتبكي ) للل لا لا مش هكي
سند :: امالا شنو ....
دُنيا :: ( شبحتله ) انى مانبيش نتكلمو هنا ..
سند :: علاش ..؟ .. شن سبب ؟؟
دُنيا :: ( تشبح للفيلا .. تتفكر فيه كيف يتكلم معاها فيديو . كيف لف كل زاوية ف لفيلا هذي وختارو كل شي مع بعض )
سند :: ماشي تمام ... يالله اطلعي .
دُنيا :: ( قامت راسها تشبحله )
سند :: هيا .. مش تبي تروحي .. ( جي بيطلع )
دُنيا :: ( شدتله ايده ) ااسفه ...
سند :: ( شبحلها ) ع شنو .. ع شن دنيا ماااتهبلنيش
دُنيا :: ننن .. .( ماعرفتش شن تقول تبصت راسها وتبكي )
سند :: ( قرب وقف قدامها قاملها راسها ) اشبحيلي نبي نفهم انى .. ع شنو تبكي .. ع شنو اسفه ...
دُنيا :: ماتخلننيش .. ماتخلنيش انى من غيرككك ولا حاجة وربي ( وتبكي )
سند :: انى تعبت ... تتتعبت من لمزااجية الي بتقتليني بيها هيا ..
دُنيا :: ( تبصت راسها خدت نفس وشبحتله ) ف الاول كانت مشكلتي معاك .. مشكلتي معاك انى مش عاطي ثقه ف كل شي تحكيلي فيه ... حتى مروه .. عرفت انها تبيك وتتوددلك من كلامك مع سهير .. كنت حاسه وكنت نقوله ياااسند انى حاسه بيها بس كنت تكذب عليا وماتحكيش
سند :: ان(قصت عليه )
دُنيا :: بالله عليك خليني نكمل ... خليني نكمل باش تعرف من الي تعب بجديات ...( تمسح ف دموعها ) .. كان كل همي نحط في عيوني انى . عيوني انى وبس مانبيش حد غيري يشبحلك نفس نظرتي .. يفكر فيك زيني .. يتمناك زي مانتمناك .. كل ليلة ندعي تكوني نصيبي وحلالي ونعيش معاك في بيتنا الي بنيناه مع بعض .. مروة ف كل مره تطلع ف كل كلام وكل حديث . لو نكلمك ضروري بنسمع صوتها جنبك . لما كنت تقولي مافيش شي وبنت عمي وبس .. كنت نقول منبيش نفتح عيونه ع شي هوا مش مركز فيه .. وتو نحلها انى
سند :: ( يشبح لي ملامحــها وقلبه بيتقطع ع كلامها وافكارها .. .. ديمــا شخص يحسب فيها من نفسه ومن كلامه ومن افكاره واحلامه . عمره مافكر ف شخص الي قدامه شن شعوره وشن يفكر .. لو نتشاركــو بس الي نحســو فيه قداش من آآه تخف وقداش من حب يكبـــر ... )
دُنيا :: بعدها انت طلعت عارفها وفاهمها وساكت .. تمام .. اي زعلت من هذي وقعدت نفكر علاش مانكونوش كلمة وحده وراي وااحد .. بعدين امك ..
سند :: ( علامات تعجب )
دُنيا :: اي امك .. جتنا ف لحوش . وبدت تهدرز شوي شوي وبدت توضح ف كلامها .. كانت تلمح انها مش ح تاخدلك الا من العيلة .. وبعدين قالت انه فترة العرس عجبتها مروة .. ولفتت اتباهه .. قالت حتى سند عاجباته ... وبالك نتقدم ونخطبهاله
سند :: ككيف ؟؟؟؟
دُنيا :: حلفت سهير ماتحكيلكش ..مرو عليا ايااام كانو موووت .. موت بطئ ليل مانرققدش فيه .. تخاايلت كل لحظة عشتها معاك . وف الاخير ؟؟؟ تجي وح(قص عليها )
سند :: لااا ااشش خلاص .. سمعتك بمافيه الكفااايه .. هذي امممي .. اامي ياادنيا . امي هكي قررت . مش انى .. يعني لو تجي تخيرني بينك وبينن مرووة اكيد ح نختتتارك ومش ح نخليها تخيررني اصلا
دُنيا :: ولو بيني وبينها ... بيني وبي ب بين امك
سند :: ( يشبحلها )
دُنيا :: اانى من حقيرة باش نبعدك ع امك ياسند ( نزلو دموعها ) مش ح نخليها تخيرك ... ح نخليك تختارها اصلا
سند :: مستحيل امي ادير هكي
دُنيا :: ( تبكي )
سند :: مانقدرش اصلا ... مانق(سكت وحط ايديه ع راسه ) مااااننفككرش حتى ف اللمووضووع انى مانتخيلللش حتى فيه المووضووع ..
دُنيا :: ( ساكته وتبكي )
سند :: ( قرب حط ايديه ع خدودها ) انتي .. انتي بس انى نعرف نختارك . ونتزوجكك .. وصغاري يكونو منك .. انتي بس الي متخيلها تلف فيه الحووش هذا .. متخيلها مرتي وحلالي ودنيتي كلها ... من يوم فتحت عيوني ع لحب وماتعلمتاش الا ع ايديك .. ماتحرمينيش انتي تااني وتخليني ندووخ ف دوامه هذي
دُنيا :: ( حركت راسها ) شن تبيني ندير ؟؟؟ نفرق الولد وامه ؟؟ نفرقهم بااش نكون انى فرحانه
سند :: مش ح تفرقي حد .. مش ح تفرقينا .. انتي ليا وانى ليك وتمت خلاص ....
دُنيا :: ( تشبحله بعيون يلمعو )
سند :: اوعدينني .. اوعديني انك تكوني معاي ع لمره قبل لحلوة .. تكوني معاي ونحلوها وحده وحده لين يجمعنا العالي
دُنيا :: ( ابتسمت براحة وسط دموعها للحظــة حست انه الحرب الي خافت تعيشها بروحها لقت فيها سنند ليها وسند لي وقتها وحبها ... )
سند :: دنيــتي اوعديـنـي ..
دُنيا :: وعد ...
سند :: ( ابتسم ) وربي العالي ف سمااه ماياخدك غيري يابنت مصطفــى .. ♥️
دُنيا :: ( توسعت لابتسامة لي ضحك وتبسطت تمسح ف دموعها )♥️
سند :: معاش ترعشيــني تاني .. كبرت راني معاش نتحمل ..
دُنيا :: ههههـ حاضر ياشيبانيياا ♥️😂...
سند :: ياااساتر وقتي صدقت لعزيز ♥️
دُنيا :: ( ضحكت )
سند :: ( سارح ف ضحكتها ) طيحتييلي قلبي ورحمة بوي ..
دُنيا :: أسفه 🥺... ( بعيون ذابله )
سند :: ( حضنها ) انى الي اسف .. وعد معاش ندس عليك شي انتي خليك معاي بس ♥️..
دُنيا :: ( ارتاحت ) وعد ...
___________________________________
( ليـــالي روايتنــا )
...
( في حوش خيريـــة )
( الحــوش الي كـان ملياان دفء وهدوء .. في دار جلوس مقعمزة خيرية حاطه نظارتها وتتفرج وتاكل ف سبول هيا وسماح ..
صالة كانت اضااءة خفيفه ... دار معتز كانت مصكره ودار عز كذالك ....
في دار سمرا ماكـنش في الا ضي سـهاره .. وهيا مقعمزة تقرا مسحت ع راسها من تعب وناضت بتمشي للمطبخ بديــر قهوة طلعت بخطوات تاعبة من لقراية ... وصلت وشدتها رجلها وقفت تتفرج عليهم .. شدها منظــر عز ومرام الي كانو مقعمزين ف لمطبخ ويضحكو مع بعضهم ..
__________________________________
( في حــوش جُمانــة )
..
كانت اصوات ضحكات العالية بين اسماعيل ومرته وامه ف المطبــخ ... ويجهزو في لعشــي ..
وبيــن دُنيا وبوها الي كانو يلعبو في بلاستيشن ف صالة وعرااكهم من يربح تاني ... وباقي اضااءة المنزل مطفي ...
..
___________________________
( طريـــق )
