عــزوة
الحلقــة الثانية عشــرا 🔥♥️
__________________
( المستشــفى )
..
دكتور :: الحمد لله المريضـه فاقت .. الفترة كانت اقصر مما توقعنا . نبضها في تحسن . في بعض الحاجات الي محتاجين نطمن اكتر عليهم . بعدين مسموح تشوفوها
..
( الفرــحة .. الله علــى الوصف الي ممكن توصلوله ..
الممـر الي شهد على دموع كل واحد فيهم في الايــام الي فاتت
القلـوب الــي توجعت وونبضها تسرع من خوف كل لحظة تمر عليهم
العيون الي دمعت في اليوم مليون مره اول ماتتفكر
شووق ..
مكانها الي كان فاضي بشكل كبيــر ..
كان نفس الممر يشـهد للمره الاوله ع ضحكات الي تعلت بشكل جميل ودموع الفرح الي نزلت من كل واحد منهم ..
تبادلو الاحضان .. واصوات البكـاء القوية الي عبت المستشفى ..
كل واحد كالعاده اختار يعبر ع فرحته .. مصطفى واسماعيل وسند
ثلاثة اختارو نفس لمكان بدون مايركزو .. كلهم اختارو غرفة صلاة ..
الله ع سجود الي يشهد ع دموعهم القويــة .. اصوات دعاء الي طالعه من قلوبهم .. وشكر لله الي مابطلوشي
..
الله ع فرحة الاب برجعة بنته وجرعة سعادتته تاني
والاخ رجعتله فرحته وبيت سره ولحنونه عليه
اما سنــد
..
ف كان مستعد يدفع عمره مليون مره المهم تعيشله وتكون معاه ..
سند وخوفه وحبه الي عاشهم فترة الغيبوبه .. كان ف ليوم يموت الف مره المهم ترجعله ..
حس بتأنيب ضمير وكأنه سبب ...
كان كل شوية يخطر ف باله انه لو خسرها كيف ممكن يكمل ؟
بس كان قلبه وعقله لي اول مره يتفقو انها بترجعله ..
من يوم خشت حبيبته للغرفة وخشت في غيبوبه وهوا ماسيبش ساسها وطول ليل راقد ف نفس لمكان مستني يسمع كلمة فاقت ..
الام ومرت الاخ .. سهير الي كانت من الفرحة ادور في نفس لمكان وتبكي وتقول الحمد لله ومش عارفه شن ادير غير انها تبي تخش وتسمع صوتها تاني وترجع صاحبتها واختها لي حضنها كالعاده
اما جمانة .. كانت تشبح للممر ومبتسمه ودموعها ينزلو ولي يخطم تقوله بنتي فاقت الحمد لله وتبكي في لي شاركها وباركلها وفي لي كمل ودمعته نزلت وتأثر .. جمانة كانت تستنى فيها وتبي تسمع كلمة ماما تاني منها . تسمع صوتها وضحكتها وطلباتها تاني
__________________________________
( مكان تاني ...
..
سمـرا :: ( كانت حاضنه فرح وتبكي وفرحانه بطيــر لانه بنت جيرانها وصاحبة سنينها رجعتلها .. رجعت بتشوفها تاني .. لي كانت تحلم بخوف عليها لي كانت تقول ربي يشفيها وتقول يارب رجعهالي .. رجعتلها واخيرا . كانت تحضن ف لعيلة وفرحانه وتبكي وتترجى في عز يرفعها ..
فرح :: ( كانت فرحانه بطير ودموعها ماوقفوش . ماعرفتش ع دنيا شي غير انها بنت قليبها اابيض . عاشت وتعبت .. وتألمت زيها واكتر .. كانت مش متمنيه شي غير انه الله يرضاعليها يشفيها ويردها تاني ليهم
خيرية :: ( كانت عايشة فرحة الام .. قليب خيرية الي طول رواية نشرح عليه .. الي كانت تفرح لي كل حد تحبه تقولي الفرحة ليها . ناضت ولبست وطلعت هيا ولبنات طول للمستشفى تبي تشوف جويرتها وتشاركها الفرحة وتشوف دنيا الي تربت ع اييديها ...
______________________________
( بيت تانــي )
..
( كان صالون هادي .. غير عن امس الي كان بأصوات رعد والمطر .. كان بأضاءة شمس الخفيفة ..
كان ساجــد حاضن جنــى وراقد .. كمية راحة الي كان فيها ماتنوصفش
جنـى كانت غــارســه راسها ف حضنه وشعرها ف عيونه وراقده براحة تامة مارقدتهاش طول فترة وجودها ف لحوش هذا ..
...
ساجـد :: ( فتح عيونه بشوية .. قعد يشبحلها بعيون نص مصكره )
جنـى :: ( تحركت بشوية وقامت راسها . )
ساجـد :: ( أبتسم ع منظرها وقعد ع وضعه ويشبحلها )
جنـى :: (فتحت عيونها و ع طول جت ف عيونــه .. )
ساجـد :: ( بهدوء تام وبنبرة تجنن ) صبـاح الخير ..
جنـى :: ( بأبتسامة تجنن وبهدوء يجنن ) صبـاح الورد ..
ساجـد :: رقدتي باهي ؟؟
جنـى :: هلبا .. قداش ليا مارقدتش مرتاحه هكي ..
ساجد :: ( ابتسم ونظراته كانت تجنن )
جنـى :: ( فاقت ع روحها وتحشمت . جت مقعمزة ) اسفه . قصدي يعني .. ( وقفت وشبحتله ) خلي .. خلي نشوف ندير فطور ( وطلعت تجري )
ساجد :: ( رقد ع ظهره ويضحك ... قعد يشبح للسقف وسرح في كل شي )
_______________________________
( بعد مــرور يومين ... )
..
مرام :: قتلك مليون مره صكره الموضوع .. خلاص عاد شي فات ومات علاش تفتح فيه تاني ( وجت خاشه )
رضوان :: ( شدها من ايدها وردها تاني ) قاعده تحبيه ؟
مرام :: رضواان خلاص عاد زودتها .. مانحباش ماانحباش خلاص معاش تسأل
رضوان :: ( شدها من مرفقها وقربها ويتكلم وهوا معصي ع سنونه ) عارفه انه انتي اتفه انسانه شفتها في حياتي
مرام :: ( تشبحله وساكته )
رضوان :: واااحقر وحده .. قربتي مني وخلتيني ننحبك ومش قااادر نقدم خطوووة من غيرك . وف الاخير يطلع كله ع خاطر عزز .. ولما عرفتي انه عز مش ليك تبي ترجعي . وانى حماار قبلتك تاني في حياتي وعطيتك فرصة نحسابك بني ادمه . ورجعتي رخيتي بيا اول ماسمعتي انه بيخطبوك ليه .. ججيت من اخر دنيا وقلبي بين رجليااا خايف نشوفك بديتي ليه وملكه خلاص .. لكن ربي ماينسى حد خلاك تراجي ورخي بيك زي مارخيتي بيا ...
مرام :: ( دموعها نزلو وملامحها المتأثرة بجديات .. ولي حست بعد هالكلام نتيجة الغلطة الي وصلتلها )
رضوان :: ( زاد قرب منها وانفاسه اقرب ) مش مسامحك .. وربي ماح نسامحك ع كل ليلة كذبتي فيها عليا وخلتيني نراجييك ورخيتي ..
مرام :: ( دموعها ينزلو وقلبه ماحنش عليها )
رضوان :: والله ياامرام . ع كبر حبي ليك و ع قد ماقاعد يككبر مااني مسامحك (ودفها من ايدها وطلع )
مرام :: ( وقفت لثواني بعدين خانوها رجليها وطاحت ع الارض .. دموعها ماوقفوش لحظة .. )
سهام :: ( خشت للمطبخ ف ايدها صفرة حطتها ع طاولة وجت لبنتها تجري قعمزت جنبها ) مممرام .. سمممله عليها بنتي خخخيرك ؟
مرام :: ( شبحتلها وتبكي بشكل مؤثر ) عع عل علاش انى ياماما ؟؟ ( حطت ايدها عليها ) علاش انى الي طلعت حقيرة هكي .. علاش كسرت قلبه وهوا كل الي يديره من يوم الي عرفني وهوا مستعد يفرحني بكل شي .. علاش اخترت طريق مش ليا وحلمت احلام ضددي .. علاش وجعته وكنت وحده ماتستاهلش الخير ف دنيا
سهام :: ( نزلت دمعتها وتتكلم بملامح استغراب ) شن الي تقولي فيه هذا ياماما ؟
مرام :: ( قعمزت ع ركبيها وشدت ايدين امها وترعش وتبكي ) ماما قوليلي .. قوليلي بالله عليك .. قوليلي علاش انى علاش ماعنديش حظ ف دنيا ياماما .. مم ممام ماما قوليلي علاش كل شي نديره يكون غلط ويضر كل ناس الي يحبوني ونخسرهم ونقعد برووحي ؟؟
سهام :: ( حضنتها بقوة ) لا ياماما.. لا ياروحي انتي بنت كويسه وحنينه . انتي بنتي الي نحبها وناس كلها تحبها ب(قصت عليها )
مرام :: انى ماحدش يحبني .. ( تشبح لي امها وتبكي ) ماحدش يحبني لانه مانستاهلش .. الي درته فيه مايستاهلش وتوا بيولي عليا ... ممم ام مام ماما .. ماما حبيته ياماما حبيته ( وتبكي بقوة )
سهام :: ( تبكي وتتكلم ) بب بنتي منو ع منو يابنتي ؟؟
مرام :: ( حضنت امها وتبكي ) حبيته وبعد الي درته فيه مستحيل يصدقني ياماما مستحيل
سهام :: ( جبدت بنتها وقابلتها ) ادوي منو .. من هذا وشن درتي فيه احكي ؟
مرام :: ( بدت تحكي وكلمة توقف فيها وكلمة تكملها .. حكت كيف ضحكت ع رضوان باش تخلي عز يغار وفي كل مره لقت عز مش ملاحظها )
سهام :: ( مصدومه في بنتها وفي لي دراته )
___________________________________
( المنطقة ... البيت )
..
( صالون )
..
معتز :: اااانتي مش من حقككك ادسي عليها ولا تجبري امها ماااتدويش ..
خيرية :: ماااتعيطش وتكلم بأسلوب احسنلك ...
معتز :: انتم خليتووو فيها اسلوب اصلا .. انتي وامي وسهااام .. كلكم لعبتوو ف البنت زي ماتبو .. انتي تحسابي لما ماتقوليش لي فرح كل شي معناها حميتيها ؟؟؟
..
سمـرا :: ( فتحت الباب ) خشي خشي والله انتي متع عار هههه
فرح :: ( تضحك )
سمرا :: ( سمعت صياح معتز ) شن في لداخل ؟
فرح :: مش عارفه .. ( خشت وراء سمرا )
...
معتز :: فففرح من حقها تتعرف زي ما انتي عرفتي وااامي عرفت ...
فرح :: ( تشبح وساكته )
سمرا :: ( واقفين جنب الباب وساكتين )
خيرية :: شن تبيها تعرف ياباشا اااه ؟؟؟ ... تبيني ننقوللها والله ياافرح سامحيني .. لكن انتصار مرت ولدي وامك باعوك لانه كانو يبو فلوس ؟؟؟ .. تبيني نقول لي بنت امك بااعاتتك .. ولا انت تبي تقوللها انك ااامك انننتصار المحترم هيا رااس لبلي ..
فرح :: ( من ملامح عادية لي ملامح جثة هامده ووجهه بارد واصفر وعلامات صدمة )
سمرا :: ( وسعت عيونها وحطت ايدها ع فمها وكانت اسرع ردة فعل لي سمرا )
فرح :: كيف ؟! ... ( قالتها وبنفس الملامح جامده .. )
معتز :: ( تلفتت يمينه للباب . كان متوقع اي شي الا انه فرح تعرف بطريقة هذي ... )
خيرية :: (من غير ماتتلفت غمضت عيونها وكانت مش مستعده ابدا انها تواجه فرح بشكل هذا )
فرح :: ب بب ( تتكلم وتقدم ) باا باعتني ؟ .. ام ام امي باعتني ؟
سمرا :: ( غمضت عيونها ودموعها نزلو طول ومصكره ع فمها )
خيرية :: ( خدت نفس ع قد ماتقدر وشبحتلها )
فرح :: ك كيف يعني ؟؟ ( دموعها نزلو دفعه وحده ووجهه بدي يميل للبروده والبيوضيه المخيفه )
معتز :: ( عيونها بدو يلمعو دموع ) فف فرح ...
خيرية :: اي بنتي ... .. اكبر غلط انك سمعتيني وانى كنت نبي نحكيلك بطريقة الي تناسبك ..لكن مدام صارت .. اسمعي للاخير ..
معتز :: ( شبح لخيرية .. وبدي خوف فقدان فرح ينغرس فيه وكـأنه تخايل فرح يصير فيها زي دنيا )
فرح :: ( دموعها ينزلو وتشبح لخيرية )
سمرا :: ( حاطه ايدها ع فمها وفي مكانها ماتحركتش )
خيرية :: سهام اخت انتصار .. س ( بلعت ريقها ) سهام هيا امك . يوم الي تزوجت كان حظها عطيب وماكنش راجلها عنده حاجة عكس محمد راجل اختها انتصار ..
فرح :: ( عيونها بس الي كانو ليهم ردة فعل وهيا دموع اما باقي جسمها كان شبه واقف )
خيرية :: سهام حملت وربي عطاها من نصيب زوز بنات توأم ..
سمرا :: ( زادو عيونها توسعو لما تفكرت مرام .. )
خيرية :: انتي ومرام .. سهام ماكنتش لا زوجة ولا الام ولا المراءة الي تستاهل ف وقتها .. ( شبحت لي معتز ) وكانت تبكي ليل كله وهيا تفكر كيف بتبريكم مع خوكم الي جي قبلكم ب سنتين .. انتصار .. الوسواس عوذ بالله منه لعبت بعقل اختها .. وقالتلها لما تجيب تبيع وحده وتخلي وحده .. وطبعا ماحدش بيقول كيف ووين لانه بوك توفى قبل ماتجيب امك ب 5 شهور .. وامك وافقت ع طول قبل حتى ماتشوفك
فرح :: ( عيونها بدو يتصكرو شوي شوي وضباب بدي حوالين فرح ومعاش تشوف في شي من كتر دموع وعصرة القلب الي حستها في وقتها .. )
معتز :: ( كان واقف في ظهر فرح وكأنه كان مستنيها تستند عليه ويكون ليها العزوة الي طول مارجليها وخرو يكون هوا سند ليها )
سمرا :: (كانت متمنيه تقرب وتشد ايد فرح تحضنها وتصبرها . بس كيف ؟ كيف ممكن بعد كل شي سمعاته تقدر تسعدها )
خيرية :: ( دمعتها نزلت بس ملامح قوتها قاعده ) .. وجابت .. ( نزلت راسها وقماته ) خلت مرام وبعاتك لي زهرة .. وخدت مقابلك فلوس تعيش بيهم هيا ومرام وولدها .. ومن كتر ماكانو هلبا تقاسمت مع انتصار ..
معتز :: ( ملامح تقزز والوجع مش مفارقاته )
خيرية :: ويومين بس .. يوومين بس وجت لي اختها تبكي وتترجى فيها تعرف مكان بنتها .. تبي بنتها تبكي وتقول ليل مارقدتاش تبي بنتها ... تأنيب ضمير والاحساس الامومي .. لكن انتصار طول خلتها تنسى وقنعتها انك عايشه احسن عيشة وخير من انها تكون معاها .. وقتنعت وروحت سهام . وانى ف هذاكا اليوم عرفت كل شي .. وانتصار خليتها تقولي مكانك .. ولانك كنتي ف نفس المنطقة خليتها تكلم زهرة وتخليها تجي تأجر ف نفس شارعي ع اساس انها معرفة وهكي .. وانتصار كانت تنفدلي ف لي نقوله المهم مانفضحهاش .. وهكي بديتي جنبي ومعاي .. وقعدت كل ليله نفكر كيف نردك ونخليك معاي ..
فرح :: ( بدي توازنها شوي شوي يضعف .. وخرت خطوات وتبكي وكانت ملامحها هادية فمها مايرجفش وعيونها وكأنها نعسانه .. ) اان اانت انت انتم . انتم كلك كلكم زي ب بعض .. ( دموعها ينزلو ) عيشتوني اليتم لي ثالثت مره في حيااتي .. حسستوني اني رخيصه لي اكتر من مره ( وخرت وخلت معتز وخيرية قدامها ) .. عشت مره وقلت خلاص هيا هذي عيلتي وافرحي .. دخلوني ع لحشيش وخلو ولدهم يتحرش بيا كل يوم يحلاله .. هربت وسندني ولدك وقلت الحمد لله لقيت عيلتي .. حضن( سكتت وحطت ايدها ع قلبها تبي تاخد نفس ورجعت تتكلم ) حض حضنتيني وقلتيلي يابنتي وحلفتي ماترخي بيا . طلعتي وطلعتو كلكم تعرفو انى مني وكيف صار معاي وسكتو .. ام اما اما هيا ؟؟ . اما هيا امي بينكم ؟؟؟ ؟ ..... تعبت ( تبسط راسها وبكت اكتر وقامت راسها حاطه ايدها ع قلبها ) والله ووووالله والله تعبت ياااناس ..
سمرا :: ( تبكي ومش قادره تقدم )
فرح :: حرام .. ( قالتها وشبحت لي سمرا بعدين شبحتلهم ) هوا انى مش حرام يصير فيا هكي ؟ ... من عيلة لي عيلة ومن ام لي ام ومن كلام لي كلام . وب وبعدين ( تاخد في نفس بصعوبة ) نط نطلع بنت نبااعت وخدو في مكانها فلووس . الله ع رخص
معتز :: ( دمعته كانت تنزل وقبضة ايده كانت بتقطع عروقه من منظرها الي ماكنش يبي يوصل ويشوفه )
فرح :: خ خل( قالتها وتبسط راسها تصكر في عيونها وتفتح فيهم .. حست بكل شي ضباب ومعاش شافت شي .. حطت ايدها ع قلبها الي كان ينخص فيها بشكل رهيب .
سمـرا :: فف ففرح ؟؟؟ ( قدمتلها وشدتها من ايدها )
فرح :: ( تواني وفقدت توازنها ونفسها وطاحت ع سمرا )
معتز :: ( قرب طووول قاامها )
خيرية :: ( تبكي وتمسح ف دموعها ) بسرررررعةةة اااطلع بيها سيااارة هيااا ..
سمرا :: ( مشت تجري وجبدت كبوطها غطتها بيه وطلعو يتجاارو لدرجة خلو باب الحوش مفتوح )
___________________________
( البيت تاني )
.
جنـى :: هيا هي جاية ... ( فتحت )
مؤيد :: ( دفها وخش صكر الباب ) انى يابنت الكلب تمشي تبلغي فيا ( ضربها كف لين طيحها بيه )
جنى :: ( بدت تبكي وحاولت تنوض وتهرب منه )
مؤيد :: ( شدها من شعرها ويجبد فيها ) اانى يااحقيرة تعطي افادتك عليا ع خاااطر واحد كلب زي الي واخدتيه
( وبدي يضرب فيها بشكل وحشيـ مستحيل نقدر نوصفه
.. كان يضرب بي ايده وبسبته وبي اي حاجة جنبه .. بدايتها كان صوت جنى الي تبكي وتترجى فيه يخليها . صوتها وهيا تستنجد بي اي حد والحوش كان فاضي وهيا بس فيه .. وبعدين بدي صوتها يختفي .. وبدت انفاسها تنقص ودم ينزل من كل مكان في وجهه .. وقف مؤيد وقف نبضه من الخوف اول ماشاف جنى فاقده الوعي ودم ينزل من راسها ........................
_____________________________
قبل يـــوم
..
( مركز شرطــة )
..
فراس :: جنى .. انتي لازم تخشي بروحك . زي مافهمتك لما جيتكم الحوش الافادة تتقدم كل واحد بروحه ..
جنى :: ( ساكته وتشبحله )
فراس :: تراجعتي ؟
جنى :: لا طبعا .. عطيت وعد لبسمة وساجد مستحيل نوخر . بس انى نبي ساجد يخش معاي ..
فراس :: ( كيف بيتكلم )
ساجد :: شن صار معاكم ؟ ( قالها ووقف جنب جنى )
فراس :: مزال ماخشتش .. .رجعت جددت االافادة ؟؟
ساجد :: اي ( شبح لي جنى ) خيرك .. ماصارليكش ؟
جنى :: ( شبحتله وبعدين شبحت لفراس ) انتم خيركم ماعندكمش ثقة فيا . ع فكرة انى هيا الي عرضت عليك ترجع تفتح القضة وقتلك بنعطي افادتي .. بس انى مانقدرش نخش بروحي نخاف
ساجد :: ( بدون شعور أبتسم .. وشبح لي فراس بعدين شبحلها ) بالك تبيني نخش معاك ؟
جنى :: وانت شن رأيك ؟
ساجد :: ( ضحك ع جنب ) هنا مافيش خش معاي .. هذي مش مدرسه . هنا بتخشي بروحك لانه قانون
جنى :: لا ( قالتها بلطافة ) مش خاشه لو بروحي ..
فراس :: انى ح نكون موجود مكلفني ساجد بالمووضوع ماتخافيش ..
جنى :: ( شبحت لي فراس ) اقعد انت وخليه هوا يخش
فراس :: ( شاد ضحكته ويشبح لي ساجد )
ساجد :: باه تمام .. ( قالها ويشبحلها بنظرات تجنن ) شوفلنا زميلك يافراس .. ( شبح لفراس ) بنخش معاها
فراس :: ( ابتسم لصاحبه وبدون مايناقشه مشي طول . لانه فراس بعد طول هالفترة طويله شاف نظرة حلوة في عيون ساجد لجنى وكأنه صاحبه بدي يرجع زي قبل وهذا شي طمنه وفرحه اكتر )
________
( شوية وخشت جنى ومعاها ساجد .. جنى قعمزت وساجد قعد واقف جنبها )
جنى :: ( شبحت لفراس الي قعمز قدامها وشبحت للشرطي الي مقعمز ع لمكتبه وبعدين شبحت لي ساجد ) وانت وين بتقعمز ؟
ساجد :: ( شاد ضحكته ) انى مانبيش نقعمز هكي مرتاح
جنى :: (شبحت لفراس وأشرت ع كرسيه ) قعمز هنا ..
مالك (شرطي ) :: ( حاط ايده ع فمه وبيضحك )
فراس :: ( بلعها وناض طول جي لي ساجد وتكلم بشوية ) برا قعمز وانت مرتك مش طايقتني بكل
ساجد :: ( ضحك بشوية ومشي قعمز قدامها )
جنـى :: ( ابتسمت بشكل انوثى برئ .. )
ساجد :: ( تكى ع لكرسي وتكى ايده وقعد يشبحلها )
( وهما يسألو وجنى كانت ترد وتجاوب ع كل شي بكل صدق )
____________________________________
( نرجعو للواقع )
..
ساجد :: المفروض قعدتي ياأمي مدام انى رفعت بسمة اليوم ..
سميحة :: خلاص وليدي مره جايه يمشي واحد منا ..
ساجد :: ( شبح لبسمة ف لمرايا ) بسمة تبي حاجة قبل مانروح ؟
بسمة :: (ابتسمت وهزت راسها بممعنى لا )
ساجد :: ( كمل طريقه وباله في جنى وقلبه مش مطمن انها بروحها لين جاها اتصال .. )
..
ساجد :: اهلين عمي خيري ..
خيري :: ساجد ولدي وين انت ؟
ساجد :: كيف مروح للحوش .. توصي حاجة ؟
خيري :: عيلتك ف لحوش ياوليدي ؟
ساجد :: لا العيلة معاي .. ( تفكر جنى وكيف بيتكلم قاطعه خيري )
خيري :: ماه ياوليدي حوشكم بابه مفتوح ع وسعه راه .. وسامحني تبصت لجنان لقيت الباب الي لداخل حتى هوا مفتوح
ساجد :: ش شنن تقول انت ياعمي خيري .. ( زاد في سرعة وبدي يجتاز ف سيارات ) خخخ خخخش يااعمي خيري خخخخش بسررعة مرتي قاعده الداخل
خيري :: ( خخش يجري بتلفون بدي يخبط ع لباب ولما مالقاش صوت بدي يخش ينادي يقول يااختي لين وصل لي صاله )
سااجد :: للقيتها ... عمممي خيري لقيتها ؟؟؟؟( ويجتاز في سيارات وسرعته كانت مخيفة والعيلة ف سيارة يتكلمو ومايردش عليهم )
خيري :: لاحولا ولاقوة الا بالله .
ساجد :: ( ملامح الخوف بدت لي ملامح تانيه صعب وصفها . سرعته نقصت وكان يستنى في كلمة تانيه . كان يتنسى في كلمة مايبيش يسمعها )
خيري :: ( حاط ايده ع راسه )
ساجد :: ش شن شن فيه ؟؟
بسمة وسميحة :: ( يشبحوله ومش فاهمين شي )
خيري ::....................
_______________________________
( المستشفـــى )
..
( غرفة دنيا .)
..
سهير :: والله بصعووبة كبيرة وزعتهم وبعتهم للحوش يبدلو ويجيبولك حوايج ..
دنيا :: ( مبتسمه )
سهير :: سند برا بيخش يشوفك .. انى بنطلع بنليخ عيب نقعد ( ضحكت وطلعت )
دنيا :: ( خدت نفس طويل وشبحت للباب )
سند :: ( خش قدم شوي شوي لين وصل وشبحلها )
دنيا :: ( تشبحله وعيونها تعبو دموع . )
سند :: ( دمعته نزلت طول .. قرب وجي جنبها )
دنيا :: ( تشبح لي شكله وعيونه ولحيته وملامحه الي واضح ماكانوش مرتاحين )
سند :: ( يشبحلها ومش مصدق انها فاتحه عيونها )
دنيا :: بب بتقعد تشبحلي هلبا ؟؟ ( قامت ايديها بهدوء وفتحتهم وكأنها طفلة شافت بوها واقف ورفعت ايديها باش يقيمها ويحضنها )
سند :: ( يشبحلها ويبكي )
دنيا :: تعالى عندي .. است استحشتك ( وبدت تبكي )
سند :: ( قرب بسرعة تجنن حضنها وقعمز جنبها يبكي .. كان حاضنها وكأنها ماتت ورجعت عاشت .. كان يشم في ريحتها ويبكي . .قوة حضنه كانت مستعده تقطع نفسهم الاثنين ..)
دنيا :: سا سامح سامحني انى اسفه .. ( وتبكي )
سند :: ( يبكي ) اااشاشش خليك هك هكي بس .. خليك هكي بالله عليك ..
( وكانو حاطين وجعهم في حضن واحد وشفاء بينهم )
...................................................................
( مكان تاني في المستشفى )
..
سمـرا :: لما نكلمك توقف ... ( وقفت قدامه ) توا مش وقت انك تحاسبها .. لا انت ولا معتز .. توا وقت انكم تسندو بنت الخالة . توا وقت تكونو عزوتها حق .. (شبحت لي معتز ورجعت شبحت لي عز ) ... البنت الي ملوحه ف لغرفة الدااخل عاشت ف لمستشفياات ااكتر ماعاشت بينا وفرحانه
معتز :: ( يشبح لي باب غرفتها ويبكي بهدوء )
سمـرا :: ( دمعتها نزلت ) تحملت الي انت ويااه ماعشتوشي .. سمعت الي عمرك ماتتوقع انه اي حد يسمعه ومايموتش فيها .. الي ف دااار هاذي ( ونزلت دمعتها بقوة ) هذيييي امها باااعتها وحكمت عليها تتعذب وتشوف شي هيا مش ذننبها فيه
عز :: ( تبص راسه وخانقاته لعبرة .. ومش قادر يبلع الي دراته امه ولا قادر يسند البنت الي طلعت بنت خالته )
سمـرا :: الي بيطلع من هنا ويمشي لطرااابلس .. ينسى حوش اميمه ومعاش يفكر يرجعله .. ( شبحت لي عز ) .. فرح اهم من كل شخص انتم ناوين تحاسبوه .. فرح اهم عندي منك ومن خوك ومن ميمه ومن امك ومن خالتك .. ( تبكي ووتتكلم بخنقه ) ان انى انى ماعنديش اي استعداد نخسر فرح .. ولا عندي استعداد نشوفها متوجعه تاني ...
عز :: ( ساكت ومسح دمعته والغصه ف قلبه )
سمـرا :: يااا فرح وسعادتها وراحتها من اليوم .. يا طرابلس ومعاش ترجعو منها ..
خيرية :: (طلعت من الغرفة ) سمرا تعالي اقعدي جنب فرح بنمشي نجيبلها حوايج لانه بيرقدوها اليوم ..
معتز :: عع علاش خيرها .. شن قال دكتور ؟ ( قالها وقدم وعيونه الحمر )
خيرية :: ماتخافش مافيها شي . انى مش ح نخليها تطلع من هنا لين تكون كويسة .. صارلها تسارع ف دقات القلب بس الحمد لله دكاترة ماقصروش ..
عز :: ( شبح لي سمرا ) معتز برا انت ارفع حناي .. انى بنقعد هنا
سمرا :: ( فرحة بعزوتها الي قاعد وشايل عليها الهم )
____________________________________
( مكان تـاني بعدنــا عليه فترة )
..
(المنطقة )
..
بتول :: ( واقفه ف لطبـخ . بتحديد ع لغاز وديـر ف قهوة .. سرحت شوية وتفكرت الي صـار )
..
( قبل يومين .. )
..
جـاد :: ( روح للحوش وباله فيه مليون الف مشكلـة .. خش حط مفاتيحه وقابلاته مقعمزه ع صالون .. .. كانت كالعاده بشكلها الي يجنن . وخدودها الحمر بسبب دموعهها الي محليــنها)
بتول :: ( شبحتله ووقفت ) عطلت هلبا
جاد :: ( بملامح جديه ) انشغلت ..
بتول :: (مسحت دموعها ) اتصلت بيك بس مارديتش ..
جاد :: ( جي وقف قدامها ) قلتلك انشغلت .. ( شبح يمينه ويسار وتكلم بهزوة ) وين شناطيك .. انى توقعت حتى كلمتي حد جي روح بيك .
بتول :: مانيـش وقحة باش نتصرف هكي ( ونزلت دمعتها )
جاد :: ( قعد يشبحلها وساكت )
بتول :: ( تبسط راسها وشبحتله ) وبعدين انى مانبيش نروح .. نبي نقعد هنا .. ( قالتها ودموعها نزلو )
جاد :: وتقعدي تشكي ع طالعه ونازله . ولا ؟!
بتول :: مش بأيدي .. ماتكلمنيش وكأنه مافيش شي خلاني نكون هكي .. ( دموعها ينزلو ) ليل الي انت كنت ترقد فيه هنا ع صالون وتكلم فيها و ( سكتت ودموعها ينزلو بشكل مخلي جاد مش قادر يتكلم حرف .. ) نسمع في كل حرف منك وكل كلمة غزل كانت تنقال .. نوم الي انت كنت ترقد فيه بعد ماتسمع صوتها انى ماكانش ليلي ليل اصلا ..
جاد :: ( اكتر وقت حس بيه جاد وجع بتول ولسانه ارتبط )
بتول :: ورسـايل .. ( حركت راسها وتكلمت بغصه ) انى مش شكاكه ياجاد .. انى نحبك .. ولانه نحبك تحملت طول سنين الي عشتهم اسم بس زوجتك .. تحملت خيانتك ليا وتحملت عشقك لي حده تانيه .. ولما سامحتك .. سامحتك لانه نحبك . ولو انى بنقعد هنا ف ح نقعد لانه نحبك .. صعب . صعب نقدر نتعود ونوثق بسرعة الي انت متخيلها . بس انى متأكده انه مع الوقت ح نتغير ونوثق وننسى ... بس سؤال هنا . انت ح تتحملني لين ننسى زي ماتحملتك ؟
جاد :: ( سرحان فيها لي ثواني وبعدين حط ايده ع راسها وسحبها لحضنــه لي اكتر مكان كانت ترتاح فيه بتول .. )
بتول :: ( تبكي. .لفت ايديها على جاد بهدوء حضن البنت لي بوها )
جاد :: يوم كامل وانى قدام الحوش ماتحركتش .. وكل دقيقه فاتت عليا كنت خايف فيها ينفتح الباب وتطلعي .. كنت نستنى في ردة فعل انى مانبيهاش ..
بتول :: ( بعدت وشبحتله )
جاد :: ( حط ايديه ع خدها ) نحبك يابنت .. والله ماعارف امتى حبيتك وركبتي فيا خوف انه نفقدك .. .. ومانبيش نعرف لانه حلو فكرت حبك
بتول :: ( ابتسمت بشكل جميل ودمعتها الاخيره للحزن نزلت )
جاد :: ( يمسح ع خدها ) ماتفكريش ولا تتخايلي انه اصلا مممكن نخليك تمشي .. الي حسيته بكلامك ووجعني عارف انه نفس شي حستيه ووجعك .. ونستاهل لانه حسيت بنفس لوجع باش نفهمك
بتول :: ( حضناته ) خلاص انى معاش نبي شي الا انه كل مشكله تنحل هنا ومع بعض ومعاش حد يدس ع حد حاجة ..
جاد :: من عيوني .. ( ابتسم ) وانتي هكي خليك كل ماتلقيني مشيتي رديني تاني ..
بتول :: ( شبحتله ) وعد حاضر ...
جاد :: ( باسها بين عيونــها ونغرســت بينهم وفيهم راحة الحب )
____________________________________
( نرجعو للحـاضر )
..
(بيـت,, )
..
( درس ساجد بسرعة كبيـرة فتح بابه ونزل وخخلاه مفتوح . نزلت سميحة ومعاش عرفت تخش وراء ولدها ولا .. تقعد مع بسمة مسكينه الي مش قادره تنزل ولا يكون ليها ردة فعل )
..
ساجد :: ( خش لي حوشهم ويشبح لي خيري وراجل تاني جنب الباب لخارجي .. ثقـلو خطواته لما وصل للباب داخلـي ومايسمعش ف حس . قدم شوي شوي لين خش لصالـه .. وشـافها
جنـى :: ( كانت مقعمزة ورأسـها ملفوف بشــاش ابيـض ومصكره عيونها متكيـه راسها ع صالون .. )
ياسمين :: ( تقيم ف لحاجات ) اكبر غلط انه داويتك هنا كان لازم تمشي للمستشفى ضروري .. عموما مش مشكله لم(قامت راسها وشافت ساجد ) اها اهو ساجد جي
فاطمة :: ( طلعت من لكوجينه وفي ايدها طاسة مياه ) جيت وليدي .. باه الحمد لله اهو جي تو يرفعك طول (ومشت لي جنى )
جنى :: ( قامت راسها وشبحتله )
ساجد :: ( ولا كلمة يشبحلها وساكت وملامحه مش متفسره نهائي )
سميحة :: ( خشت بخطوات سريعة وبسمة ع لكرسي معاها .. تشبح لي حوشها ومش فاهمه شي .. خشت طول قابلتها فاطمة وبنتها ياسمين وجنى ع لكرسي ) سمممله عللليك بنننتي شن فففي ؟؟؟ ( ومشتلها تجري )
فاطمة :: ساامحيني ياسميحة خشيت حوشك وكوجينتك والله خيري قريب هبل قعد يعاود لي ساجد ومعاش حصله جي يكلم في ياسمين جيت معاها ...
سميحة :: ( حضنت جنى ) خيرها جنى شن صاار معاها ؟
ياسمين :: ( شبحت لي ساجد بعدين شبحت ل سميحة ) جنى تعرضت لضرب بوحشيـة وهذا واضح في علامات وجهها .. لو ماكنتش مزال مامشيتش للمستشفى وجاني بابا وجيتها ..كنا لاسمح الله فقدناها .
فاطمة :: خشينا لقيناها ملوحه هنا وراسها جي ع طاوولة ..
سميحة :: ( شبحت لي طاولة وشافت دم جنى ) بسم الله بسم الله ع بنتي ياااربي من ولد لحرااام هذا منو ؟؟
ياسمين :: ( وشوشت لي ساجد ) ساجد ممكن تجي معاي برا ؟
ساجد :: ( عيونه ف جنى واحساسه بالخوف كان واضح . شبح لياسمين وطلع وراها )
..
سميحة :: بنتي .. بنتي ردي عليا شن تحسي ..؟؟ ( وتمسح ع خد جنى)
جنى :: (كانت مش قادره تتكلم وعيونها مفتوحات هكي وخلاص )
فاطمة :: خودي مني درتلها مياه وسكر .. ( عطتها لي سميحة)
..
ساجد :: ( واقف ومصدوم ف كلام ياسمين )
ياسمين :: كنت كيف مروحه ب سليمان ولد اختي .. شفته خش لكن بعدين معاش ركزت طلع او لا ... لكن زي ماقتلك بعده هوا بوي لقي الباب مفتوح ومرتك هكي
ساجد :: ( ضغط ع ايده ) كيف شكله ؟
ياسمين :: طويل اسمر ومانجيبش تفاصيل تاني بحكم المسافه .. بس سيارته كانت ***** بيضاء ...
ساجد :: ( ع طول عرفه ... سرح شوية وبعدين تكلم ) منورة ياسمين سامحينا تعبناك ..
ياسمين :: مصحك انت وخيي .. وخويلة سميحة افضالها علينا كبيرة .. هذا جزء بسيط ف حقكم ..
ساجد :: ماتقوليش هكي مدام خوك . معاش تحسبيها ..
ياسمين :: ( ابتسمت ) يالله رد بالك عليها . ولازمها المستشفى ضروري . صح نزل منها دم هلبا ووقف الحمد لله . بس هذا مايعنيش انه ممكن يكون بسيط ..
ساجد :: تمام ..
..
( ليــالينا )
..
( المنطقــة ... وكميـــة العشــق الي في ليالينا )
..
جاد :: ( كان حاضن بتول وسارح )
بتول :: جاد .. !
جاد :: روح جاد ...
بتول :: ( نزلت دمعتها ) زعما فروحه شن يصير فيها توا ؟
جاد :: ( حضنها اكتر ) بعون الله مش ح يخلوها .. ماتخافيش .
بتول :: نصدمت في مرت عمي بشكل كبير .. كيف ممكن شخص يكون حقير هكي ؟ معقول ع خاطر لفلوس ؟
جاد :: في اكتر من هكي وحياتك . ربي ياخد فيهم الحق البنت كويسه ماتستاهلش ..
بتول :: ( شبحتله بعيونها الي يلمعو ) صغارنا مش ح نخليهم حتى يباتو في دار تانيه .. هنا جنبي وجنبك ..
جاد :: ( ابتسم .. قرب باسها ع راسها بهدوء وتكلم جنب عيونها بهمس .. ) وحياتك غير يجوني بس ومانخليكم يووم واحد بعاد عليا ... انتي بنتي الاوله وهما صغاري الي بعدك من حضني ماليكمش مكان تاني ..
بتول :: ( ابتسمت بغمازاتها الي تجنن وتكلمت بهدووء يجنن ) نمووت فيك وربي ..
جاد :: ( بنفس صوت ) وكان تشوفي انى ياأم ولادي
بتول :: ( رجعت رقدت في حضن جاد وغمضت عيونها وسرحت في فرح ... وحب جاد .. وصغارها .. وحياتها )
جاد :: ( رجع حضنها بقوة وسرح كيف مايخليهاش يوم الا وضحكه ع وجهه )
_______________________
( المستشـفى )
..
سمـرا :: ( سرحانه في لفراغ الي قدامها .. ومقعمزه ع كرسي في لحديقه .. كل تفكيرها راح لي فرح وجنى الي بتهبل وتوصل فيها )
عز :: ( قعد واقف وراها لي ثواني ويفكر كيف بنته وحب حياته عاشت كل هاتعب وقعده تعاني . كيف كبرت قبل وقتها وكل يوم مايتمش الا ودمعتها ع خدها .. قرب حط جاكيته ع كتافها )
سمرا :: ( انتفضت ) ااه .. خلعتني
عـز :: ( جي قعمز جنبها .. لف ناحيــتها ومسك أيديــها حضنهم بأيديه لكبـار .. شبح لي ايديها وبعدين قام عيونه ليها وهوا مبتسم ودمعته نزلت بلع ريقه بغصه .. ) سامحيني ..
سمـرا :: (شبحتله بخوف ) ع شنو ؟
عز :: ماعرفتـش نحافظ عليكم . ولا عرفت نخليكم فرحانين . ولا عيشتكم الي تستاهلوه .. سامحيني لانه كان المفروض توا ف لحوش انتم ومقعمزين مع بعض .. كلكم جنبي وماحدش منكم تاعب
سمـرا :: ( عيونها تعبو دموع ابتسمت .. سحبت ايدها وحطتها ع خده ) نموت فيها حنيتك ياروحــي ...
عـز :: ( شــد أيدها بأيده .. بــاس كف ايدها وحطها في حضنه ) والله مانتحمـل نشوفكم هكي ... فرح .. فرح المسكينه قداش تعبت وقداش حاولنا نفرحوها ولما بدت تتأقلم رجعت المستشفى خدتها منا تاني ياسمرتي .. ( نزلت دمعته ).. بنت خالتي الي مانعرفهاش كانت جنبي وفي حمايتي وخوفي عليها وربي كان كبير .. كيف امي الي نحبها ومحترمها ومش قادر نشوفها الا صح في كل شي .. هيا الي ادير هكي ؟؟
سمـرا :: ( لفتله ومقربه تتكلم بهدوء وتبكي ) حبيبي اننت .. فرح كانت تحبكم لانه حست بحمايتك وخوفك .. ولي مخلي فرح معانا هوا ثقتها فيكم .. معاش تفكر انه كان لازم ولازم ولازم .. انت درت الي عليك واكتر .. ولو انت مش كويس ماكنتش توا جنبي ومريحني . انت راحتي وفرحي والحب الحلو الي طلعت بيه من دنيتي .. لو ضحكت في يومي تأكد ياأما انت سببها او لانه تفكرتك او لانه تكلمت عليك .. لو انى مرتاحه توا ف هذا لانك جنبي ..
عـز :: نحس في روحي تاعب .. وربي تاعب ياسمرتي ..
سمـرا :: ( ضغطت ع ايده ) وانى جنبك ومعاك وف ظهرك وفي دعائي انت الاساس .. كل ماتحس انك تاعب الجألي ..انى مانبيش شي من دنيتي الا نريحك ...
عـز :: وهذا الي درتيه ( ابتسم ) نحبك ...
سمـرا :: مش اكتر مني ... ( مسحت دموعها ) يالله خلينا نشوفو ميمه وفروحه اكيد فاقت ..
عـز :: هي .. ( قام صبعه مسح دمعته )
________________
( ف طابق تاني ... الغرفة ثالثة )
..
معتـز :: ( شاد ايد فرح وحاط رأسه عليها )
فرح :: ( فتحت عيونها شوي شوي ... )
معتز :: ( كان ضاغط ع ايدها ومغمض عيونه )
فرح :: ( شبحت يمينها وشافت معتز كيف راقد ع ايدها .. كان مضبب شوي بعدين تصفى .. نزلو دموعها دفعه وحده لين بدي أنين بكاها يتعلى )
معتز :: ( فتح عيونه وقام راسه بخلعه .. وقف وحط ايده ع راسها ويردد ) فففرح .. خلاص حبيبي بالله عليك . .خلاص ياروحي معاش تبكي ..
فرح :: ( تبكي ومغمضه عيونها وتردد في ) باعت باعتني يااامعتز باعتني .. بااعتني امي وخدت بدلي فلوس .. لفلوس ليها اااهم مني ياامعتز
معتز :: ( حضنها بقوة ومانع دموعه تنزل .. يبوس فيها ع راسها ويمسح ع شعرها ) وحياتك عندي مااتبكي ياوردتي .. ماتتبكيش بالله عليك ماحدش منهم يستاهل وجععك وتعبك ..
فرح :: علاش انى يامعتز .. علاش حرممتني من كل شي في دنيا باش تعيش هيا فرحانه .. علاش انى يامعتز .. علاش اختارت اختي وخوي يعيشو تحت رضاها وخوفها وانى لا . علاش ( تبكي وحاضنه معتز )
معتز :: ( ضاغط عليها بقوة ودمعته نزلت قام راسه وساكت )
____________________________________
( الممر )
..
سمرا :: ميمه ؟؟ ( قالتها لي حناها مقعمزة ع كرسي )
خيرية :: كيف حالك توا ( قالتها لي سمرا ولي عز )
سمرا :: ( شبحت لي عز )
عز :: ماشي حالي .. ( مش قادر يرد عليها كل مايتفكر انها تعرف وسكتت )
خيرية :: ( تشبح لي عز بكسرة خاطر )
سمرا :: (بتغير الموضوع ) فروحه فاقت ؟
خيرية :: خليتها راقده .. معتز معاها لداخل ( سكتت شوية بعدين ) ماباش يخليني معاها بروحي
سمرا :: ( تأثرت لي وجع حناها .. )
عز :: ( لف ووقف بعيد شوية ع لحيط )
_________________________________
( البيــت تاني )
..
سميحة :: (باستها ع راسها ) حبيبتي لو تبي حاجة ناديني باهي ..
جنى :: تمام .. ( تغطت وحطت راسها ابتسمتلها ) نبيك بس تتصلي بي ماما وطمنيني عليها ..
سميحة :: من عويناتي ياماما .. هي ارقدي شوية .
جنى :: ( فرحانه بحنية سميحة ) حاضر
سميحة :: ( طفت ضي ولعت ضي خفيف وصكرت الباب وطلعت لي دار بسمة باش ترقدها . وبعدين خشت لي دارها )
...
( بعد ساعة بـــس )
..
جنـى :: ( فاقت ع صوت أنفاس كانت موجوده في نفس دار .. فتحت عيونها بهدوء وشبحتله .. كان مقعمز ع لكرسي وحاط ايديه ع رجليه وشابكهم ويشبحلها .. عيونه كانو حمر وملامحه اول مره تبــان لي جنى هكي .. )
ساجد :: ( يشبحلها وعيونه الحمـر دمعتهم بتنزل .. يضغط ع ايده كل مايركز ع تفاصيل جروح الي في وجه جنى .. وراسهاا الملفوف بي شاش .. وعيونها تاعبات الي مش قادره تفتحهم )
جنـى :: ( تكلمت بهدوء وكأنه الخوف الي في ساجد توضح لي جنـى وكانت تبــي تخفف خوفه ) شن قال دكتور بسمة اليوم ؟
ساجد :: ( يشبحلها بي نفس نظرة وماردش عليها )
جنـى :: ( تكلمت بهدوء اكتر وصوت دايخ تاعب ) مافيا شي
ساجد :: ( دمعته نزلت وطبـس راسه طول مسحها وقعد ثواني يشبح للارض )
جنـى :: ( ناضت بشوية وشاده راسها .. ) سا ساجد !
ساجد :: ( قام راسه . .بنظرة تجنن ومدمعه )
جنى :: ( قامت ايديها بطفولة جنى المعتاده ) تعالى ...
ساجد :: ( ماحسش انه متردد للحظة .. ناض برجلين راافعينه بقوة .. جي جنبها وقعد يشبحلها )
جنى :: ( مقعمز جنبها وتشبحله .. تكلمت بشوية ) انى كويسه مافيا شي
ساجد :: ( يشبح لي تفاصيلها . قام ايده وحطها ع وجهه يمسح ع جروحها ودمعته نزلت . تكلم بصوت ملياان غصه رجوليه ) اخ بس لو تعرفي قداش خفت عليك ...
جنى :: ( بلمعة عيونها ورموشها الي يتحركو شوي شوي )
ساجد :: لو تعرفي قداش خفت مانلحقش عليك حت(سكت شوية وقرن حواجبه . نزل راسه ودمعته نزلت مسحها طول وشبحلها )
جنى :: (ابتسمت بشوية وتكلمت بتعب ) لكن انى اموري تمام الحمد لله
ساجد :: ( تبص راسه وتنهد .. شوي وقام راسه يشبحلها ) مش ح نتحمل نخسرك حتى انتي ...
جنـى :: ( ركزت وخافت وتوترت من كلام ساجد وتبي تغير المووضوع ) .. ماتخافش مافيا شي .. عارفه انه انى مسؤوليتك بس شوف انى(قص عليها بصوت هادي وحاد )
ساجد :: مسؤولية شنو ؟؟ .. انتي تشوفي في خوفي عليك هذا كله لانك مسؤوليتي ؟؟
جنى :: ( كان قلبها يبيها تفهم بس عقلها رافض ويبيها تغير الموضوع ) لانه هذا صح
ساجد :: لا هذا مش صح .. انتي ماكيش مسؤوليتي بس باش نخاف عليك .. اي صح .. ممكن ف لبدايه وضحت هكي والغلط مني ... لكن(قصت عليه )
جنى :: ( قامت ايدها ع صدره ودفاته بشوية ) ساجد شوف .. كلامك هذا مش ليا لا ( شبحتله ودمعتها بتنزل ) بسمة هيا الي مفروض تسمع مش انى .. انى .. انى لازم تتفكر مني نكون . انى الي مفروض جبتها هنا بس باش نعانيها ونهتم بيها انى الي تبي تنتقم منها لانه خوها كان سبب في الي وصلتله .. انى مش(قص عليها .. )
ساجد :: اششششش مانبيش نتفكر ( قرب منها وحط جبيــنه بجبينها ويتكلم وعيونه مغمضات بصوت هادي وغصه )
جنى :: ( قامت ايدها تاني تبيه يوخر ) سا ساجد . اط اطلع توا ونتكلمو صبح . انت تاعب توا
ساجد :: ( بعد شوية بس .. يشبح لي عيونها ويتكلم وانفاسه وترت جنى ) من توا اطلبي شن تبي الا نبعد
جنى :: انت .. ( سككتت وركزت ف عيونه ونظرته الواضحه ) ا ان انت مش مركز توا وكلامك ( سكتت أول ماحط ايده ع فمها )
ساجد :: اششش .خلاص اسكتي . لانه توا بذات كلامي مركز فيه ...
( يشبحلها ونظراته كانت واضحه .. احساسها ولكلام الي يبيها تفهمه كان واضح وضوح شمس )
جنى :: ( دمعتها نزلت..)
ساجد :: ( قام ايده مسح دمعتها وقربها منه .. حضنها وأول ماحط رأسها ف حضنه غمض عيونه وتنفس بعمق )
جنى :: ( حاضناته ودمعتها تنزل وتكلمت بشوية ) غغغ غلط . اانى ناخد في حق مش ليا . بسمة تستاهلك مش انى
ساجد :: ( بعدها شوية وشبحلها . وكانت عيونها في عيونه ) شن لو بسمة هيا الي اخترات تكون بعيده ومش انى ؟
جنى :: ( دمعتها تنزل ) انت تحبها وهذا الي مخليك تتزوجني وتبع انتقامك ..
ساجد :: ردي ع سؤالي ... شن لو بسمة هيا الي تبي تبعد عليا .؟
جنى :: مستحيل .. بسمة تعالج باش ترجع زي قبل ..
ساجد :: ترجع زي قبل .. مش ترجعلي
جنى :: لما ترجع زي قبل بترجعلك ..
ساجد :: ( قرب منها ورجع حط جبينه بجبينها ويتكلم بشوية ) اسكتي لانه في هلبا حاجات انتي ماتعرفيهاش
جنى :: ( سكتت وتوترت من قرب ساجد ليها .. كانت بتتكلم بس المره هــاذي قاطعها ساجد بطريقــته هوا ...
..
( تعاـلو للمــود ولميوزكــ الخاصــة بالبــارت )
...
الحــب زي الوتــر ...
تعزف عليــه الحــان ...
وتلف بيــه العالم ..
من غير ماتروح مكان...
وتشوف معاه العجب ...
تسمع اصول طرب...
من قلب .حب .وطب .وداب .وغناه في كل مكـــان ...
...
ساجد :: ( بعد عليها بشويــــه .. ورجع حط جبينـه ع جبينها وتكلم بشوية ) ماسكتـيش الا هكي ..
جـنى :: ( مغمضه عيونها وماكنتش مستوعبه الي صار.. لي اولـ مره. أولـ أحساس . ودقـة قلب .. )
ساجد :: ( بعد وسحبــها بشوية لين رقدها ع صدره وحاضنها بأيديه زوز . غمض عيونه وأبتسم بشوية )
جنى :: ( مغمضه عيونها .. وسرحانه في الي صار ولي داره ساجد )
ساجد :: الله محلاه شعور انك جنبــي تاني .. معاش نبي نحس بي الي حسيته وانى جايك مبكري .. مستحيل مزال نطلع وانتي مش معاي ..
( زاد ضغط عليها اكتر كل مايتفكر الي صار )
جنى :: ( هاديـــه جدأ في حضـــن ساجد واستسلمت كليــا للحب الي بتعيــشه ومش ح تكون مستوعبه تعب الي مع الحب هذا ..
معقوله في حب ع كتــر ماهوا حلو .. ع كتــر ماتعبه ح يكون هلبه ؟؟ )
ساجد :: ( ف عالم تاني من راحة . وجودها في حضنه . طفلته الي ماسمعش منها الا كلمة ( نخاف ) من كل شي .. )
....
( طرابـــلس )
..
رضوان :: ( ناض من جنب العيلة لي داره وصكر الباب .. ) مش قتلك مليون مره معاش تتصلي ولا ؟
مرام :: ( تبكي وصوتها مش واضح ) رر رضوان ..
رضوان :: (خاف ) خخخيره صوتك ؟
مرام :: رض رضوان انى مريضه ( وتبكي )
رضوان :: ( الخوف ف قلبه زاد ) مم مر مريضه شنو ؟؟ .. تكذبي عليا زي مامتعوده ولا ؟
مرام :: ( تبكي بالقوة وحاطه ايدها تانيه ع فمها .. بعدتها وشدت ورقة قدامها وتكلمت بشوية ) يي يا ياريت
رضوان :: مرام .. مرام بالله عليك . بالله عليك مادريش فيا هكي مش ناقص ...
مرام :: رضوان .. ( خدت نفس ) تح تحاليل طلعو ( رجعت تبكي ) نتيجتي .. انى مريضة ورم ...
رضوان :: ( من قرنة حواجب لي ملامح صدمممة ومعاش حس ب شي جنبه ولا صوت سمعه بعد هالكلمة ) و ور ورم؟!
مرام :: ( نزلت ايدها للارض الي كانت مقعمزة عليها وتكت ع باب دارها الي مصكراته ومقعمزه ع الارض جنبه )
رضوان :: ( عيونه تعبو دموع )
مرام :: دك دكتور قالي ف لمرحلة ثالثة .. انى(قص عليها)
رضوان :: كذاا ب.. مممش كل دكتتتور يقول في لحق .. كذاب انى متأكد ... ( نزلت دمعته وابتسم ) ورم شني يااحبيبتي انى قااعد مافرحتش بيك ..
مرام :: ( نزلو دموعها تاني بس بقوة اكبر ) رض رضو رضوان
رضوان :: عيووونه وروووحه وحيااته لو تبيها خديها المهم ماتخليشي .. ووربي من غيرك ماايسوى حاجة ياازهرتتي .. ( دموعها نزلو بهدوء وقارن حواجبه . متكي ايديه ع لكرسي وحيله نهد )
مرام :: ن نح نحبك انى .. والله نحبك .. نحبك بس انى كنت ( قص عيلها )
رضوان :: اااششش خلاص .. هي . هي خليني نفكر نبي .. نبي ( وقف ويلف حواليه ) نبي جوازي .. جواز سفر.. وانتي نوضي هيا وتي روحك مااكيش قاعده هنا هيا .. هيا انى تو نجي نتكلم مع امك وووخوك
مرام :: رض رضوان اسمعني بس بالله عليك ( حطت راسها بحيل مطفي نهائي )
رضوان :: ماااانيييش سااامع شي الا يوم خبر شفاااك ان شاء الله .. نووووضي بالله عليييك ياضي عيوني خليني نعالجك ونطمن عليك ...
مرام :: م مافيش علاج ( قالتها وتبكي صوتها مخفي )
رضوان :: شني ؟ ( قالها ووقف ف نص داره )
مرام :: قالولي معاش في علاج يمشي معاي .. وان(بتكمل كلامها بس خانها ضعف وتعب .. وغابت عن الوعي وهيا متكيه ع لباب )
رضوان :: ( حط ايده ع قلبه ويتكلم بخوف ) مم مرا مرام ؟
مرام :: ( مافيش ولا صوت )
رضوان :: مرام ؟؟ ؟. ( طلع من دار جري جبد مفاتيح سيارته ويجري لي سياارته ) مممرام ردددي بالله عليك .. ( زادو دموعه خانوه ونزلو اكتر ) .. مرووومتي ... مرووومتي حبيبي .. مرووومتي مزال وقتتتي معاك مستحيل يتم هكي .. بالله عليك بالله عليك ردي عليا بالله عليك .. اسمعيني اسمعيني بس والله ماعاد نزعلك ولا نوجعك .. عادي انتي ارجعيلي وجعيني وجعيني نبيه وجعك انى .. نبيه المهم مااتخليينيش .. اااكذبي عليا وحبيني المهم مات(سكت ودموعه ينزلو بقوة ويجري بسياارة ويجتاز ) مراامي .. مرااامتي .. حبيبتي نوضيلي بالله عليك ماتخ(قصت عليه )
مرام :: كك كوك كويسة .. انى كو كويسة ( قالتها وعيونها نص مغمضات )
رضوان :: ( يمسح بكم ايده ف دموعه ) مرامي . مرامي اسمعيني ااشبحي جنبك .. احدفي اي حاجة .. احدفي الي قدامك بسرعةةةة خليهم يسمعوووك اكيد ف دااارك وكالعاده مممصكره الباب
مرام :: ( شبحت جنبها ودنيا كانت ضباب . قامت ايدها برزن كبير وحدفت ســـهاره لكبيرة .. تكسرت وصوتها كان عالي . بعدين خانها وجعها تاني وفقدت الوعي )
رضوان :: مرررام .... حبيبي وين مشيتي ... ياربي لا (قالها وسرعة زادت اكتر )
.......................................................................
( تــــاني يوم ...
هل وجع جديد ؟ .. حب جديد ؟؟؟ ... ام صدمة ! )
..
( المنطقة )
..
سميحة :: ( تخبط ع رجليها وجهه ) شنننن تقووول انت ؟
ساجد :: ااسكتي يااام خيرك مانبيهاش تتتتسمع هكي
سميحة :: ححححرمتها من شوووفتها . حرمممتها من شوووفت امها ياولييييدي .
ساجد :: ( كااره روحه وسااكت ومش قادر يرد )
سميحة :: يااااربي .. ياااربي كيف تبيني نقوللهاله بس .. كيف تبيني نقوللها ااامك توووفت راااهو ااامها راهوو امها ياوليدي .. حرام عليك
جنى :: ( واقفه تشبحلها وهمـا واقفين في لمطبخ ) ام امي ؟!
ساجد :: ( طول شبحلها .. )
سميحة :: ( حطت ايدها ع فمها )
جنى :: ( تشبح ب تعجب لي سميحة ) ام امي انى ؟
ساجد :: ( غمض عيونه وشبح جيهة تانيه )
.........................................................................
( المستشفى )
..
خيرية :: ( تشبح لي فرح )
فرح :: انى مسامحاتك لانك مادرتيش شي غلط ...
خيرية :: ( ابتسمت براحة )
فرح :: لكن عندي شرط .. .لو تبوني بجديات نقعد بينكم .. عندي شرط
عز :: انتي بنت خالتي اكيد نبوك بينا ... واشرطي شن تحبي دلالك لييك كله ...
فرح :: نبي نمشيلها ...
سمرا :: ( شبحت لي عز .. .كانت مقعمزة جنب فرح وشاده ايدها )
معتز :: لا ... انى مااانيش مستغنني بااش تمرضيلي تاني ( قالها وناس الي حواليه كلهم )
فرح :: معناها نطلع من هنا وانتم ف طريق وانى ف طريق ..
عز :: ضم فمك انت ( قالها لي معتز وشبحلها ) تم ..بس حتى انى بتوعديني بي شي
فرح :: ( ساكته وتشبحله )
عز :: زي مابنرفعك ع رجليك .. تقولي لي تبيه وطلعي الي في خاطرك والي تبيه انى فيه .. لكن ترجعي معاي ع رجليك وومااافيككش سوو
سمرا :: ( ابتسمتله ) كلام عز صح ... وانى معاه
خيرية :: وشرطي نمشي معاك ( شبحولها كلهم .. ) ماتشبحوليش .. مش مستغنيه ع بنتي
فرح :: ( ابتسمت بغصه ) تمام ...
____________________________________
#يتبع
#سلمى
