لا تدهسوا أنوثتي (بالدارجة)

الفصل الأول

حرم الرحمان الرحيم وأدي
لكن أبي أوفى بالعهد
كي يصون ميراث جدي
و لا يمسسه جن ولا بشر
سيكون الوريث من بعده ذكر
قدري ولدت أنثى....
و سأكون أنا الذكر
___________
العنوان: #لا_تدهسوا_أنوثتي
تأليف: ستوريز_أمين
_______
🔘 الجزء الأول

بخطوات ثقيلة غادي تجاه دارو اللي جات فراس الدرب. حاني راسو و شفايفو كتمتم كلام غير مفهوم. اللي داز من حداه كيحييه و ما كيتلقاش التحية بالمثل. ماشي من عادتو هاذ الإنطواء لكن شي حاجة شاغلاه. فالغالب هو شخص اجتماعي و عزيز عليه يحاور و يناقش أيا كان. شنو اللي شاغل بالو؟ و علاش اليوما الجو عندو مكدر و ما حاملش يتلاقى مع شي حد! كاع اللي قابلو لاحظ هاد التغيير و حس أن الحاج موسى ماشي بگانتو. كاين اللي اكتفى بالتحية و كمل طريقو و كان اللي ماهناهش خاطرو و باغي يعرف و سول و ما تلقاش جواب. فقط نظرات و تجاهل من السي الحاج موسى و اللي كتعني: دخل سوق راسك ماشي شغلك.....
وصل باب الدار و كالعادة حنحن قبل ما يحل، جبد السوارت و بدا يتمعن فيهم بحالا أول مرة غيفتح هاد الباب و بحركة مترددة دور الساروت حلو و دخل. صوت نسائي جاي من قاع الدار و ما حدو كيقرب و الصوت كيزيد يوضح. الدار رياض من النوع اللي قلالو بالمدينة. اغلبهم تحولوا إقامات أو تهدموا و عاودوا ردوهم شقق صغيرة معروضة للبيع أو للكرا. الملايين تعرضات على الحاج موسى باش يبيع و كان ديما رافض. ما يمكنش يتخلى على الرياض اللي خلاه جدو الاول و عاشوا فيه أجيال ولو يتعرض عليه مال الدنيا. فالجلسة وسط الدار كانت نسيبتو الحاجة رقية و معاها مرا غريبة ما عمرو شافها. سلم و جلس و من نظراتو للحاجة رقية فهمات قصدو و جاوباتو:
_سيد الحاج هادي للا فاطمة القابلة هي اللي إن شاء الله غتگبل جميلة. على ما قالت علامات الوجع بدات يمكن هاذ الليلة يمكن غدا الصباح. ما تقلقش يكون خير إن شاء الله....
الحاج موسى طأطأ راسو بلا ما ينطق بكلمة.....
فهاد الأثناء دخلت بنت صغيرة كتجري و ترمات عليه و كتقلب فجيابو. عنقها و وخلاها تكمل البحث ديالها حتى لقات الكنز! حلوة و شكلاط. خذاتو فرحانة و بعدات لبلاصتها المعتادة و بدات تحل و تاكل. الحاج بقا يشوف فيها و بدون شعور زفر زفرة طويلة كأنو نادم على شي حاجة.....

🔘 الجزء الثاني

خلاهم ودخل لبيت النعاس عند مراتو جميلة اللي كانت جالسة فوق الناموسية بصعوبة باين من حالتها انها محنة و كتسنى ساعة الخلاص. سلم عليها و حاول يشجعها بكلمات كلها حنان و ذكرها ان ماشي الولادة الأولى ليها. هزات راسها و شافت فيه بحزن وقالت: الحاج عرفتك باغي ولد و كانت هاذي أمنيتك من اول ولادة ليا. الله هو وحدو قادر يعطي الذكر و يعطي الأنثى و قادر على كل شي. كان بودي نجيب ليك ولد و لكن الحمد لله على ما قدر! حنا باقيين صغار و الى ما جابش الله هاذ المرة يجيب مرة خرى!!!
كان جوابو: ٱمنا بالله! علاش ما باغياش تولدي فالسبيطار و فضلتي القابلة تجي للدار؟
جميلة: الحاجة فاطمة معاها البركة و النص فولاد حومتنا جا للدنيا بفضل الله على يديها و انا براسي وحدة منهم. معرفتش اش نقوليك و لكن حاسة بأمان معاها....
الحاج: واخا اللي يريحك
جميلة: الله يحفظك لينا الحاج و ينقي طريقك من الشوك! نتا ولد الناس، و كلشي كيقولها. كون واحد اخور ماغاديش يصبر بحالك، كراه تزوج الثانية و الثالثة و الرابعة...
حس بنوع بالندم و بصراع داخلي بين حبو لجميلة و بين العهد اللي قطع على نفسو باش اسم العائلة يبقى خالد . مدة طويلة و هو كيحلم بوريث ذكر يحمل اسمو و يكون وصي على ميراث العائلة من بعدو. لكن الله شاء و قدر باش جميلة تولد جوج بنات و الثالثة قريبة توصل. اكثر حاجة كتغيظو و تعكر گانتو هي ملي كيسمع الناس كيعيطوا وراء ظهرو ها هو بات البنات جاي ها هو بات البنات غادي. ولات شتيمة!!!!
كان كيتمنى ما يعرفش جنس المولود حتى يتزاد و لكن الطبيبة اللي كانوا متبعين معاها كانت زربانة تبين علمها و بلا ما يسولوها بدات تحرك فالصورة فالشاشة و تشرح : ها القليب، ها الرجيلات، بلاتي!!! هممم مبروك عليكم البنوتة!!!
و مع زاعمة عليهم بحكم المعرفة القديمة بغات تزيد تفرحهم و غمزات الحاج: إيوا السي الحاج راك باقي بصحيحتك!!!
الحاج حس بالاحراج و كان غيكون الرد صادم كون ما اتق الله....
🔘 الجزء الثالث
رجعات بيه الذكريات لايام العزوبية و كيفاش كان ضارب الدنيا بركلة و ما هاز هم. ما تفوقش فالدراسة. حدو الثانية إعدادي و التحق مباشرة بالبزار ديال الوالد الحاج العربي اللي اصلا ما كانش ناوي يخليه إكمل قرايتو. فنظرو باش تعلم اصول التجارة و تاخذ الحرفة خاصك تبداها صغير. اما الى تسنيتي تا تكبر عاد تبداها ما عمرك تنجح. عياو صحابو يشرحوا ليه أن هاد الفكرة قديمة و ان هاذ الوقت تبدلات امور كثيرة و التسيير ديال زمان ما بقاش واكل و خاص موسى يكمل قرايتو باش يقدر يسير تجارتو بشكل عصري. بحالا كتكب الما فالرملة!! الحاج العربي راسوا قاسح و الى قرر تا حد ما يقدر يجاحدو...
التحق موسى بالمحل و بدا يتعلم اصول الحرفة و بدا يتعرف بين التجار و الكليان بنزاهتو و كلمتو و قدر يواجه المنافسة خصوصا ان البزار مرتابط بالسياحة. الى النشاط السياحي ازدهر المداخيل كتزاد و الى كان شي ركود المداخيل كتقل لهذا خاص تكون عارف كيفاش تبيع فوقت الشدة هادشي كان موسى ناجح فيه. بين على نباهتو الشي اللي خلا الحاج العربي يبدا يبعد شوية بشوية عالبزار و ياخذ الراحة للي كان محتاجها بالخصوص انو بدا يحس بالعيا زيادة على البروستات اللي معذبينو و ضروري يدير عملية كما نصحوه الأطباء.
موسى صدق معلم كبير رغم سنو و حقق ارباح كثيرة و بدات علامات الثراء كتبان عليه.
الشي اللي غيخلي أصدقاء المصلحة و الانتهازيين يبداو يتقربوا منو و يدخلوه فعالمهم. الزهو و النشاط و الليالي الملاح. غيبدا اول سيجارة و اول كأس و اول علاقة (....) و بحال هاد الأخبار دغيا كاتنشر و كتولي حديث العادي و البادي طبيعي غتوصل للوالد الحاج العربي اللي ما غاديش يقبل ان سنين من العمل و الجهد تمشي فرمشة عين بسبب ولدو اللي حاط عليه كل أمالو و عن جهل أو حسن نية خلا راسو ضحية لصحابو اللي ما غادي يرتاحو حتى يخليوه على الضس!!! خاص الحاج العربي يتصرف دغيا قبل ما يفوت الفوت!!