💠السادس عشر
الأجواء فمحطة ٱكادير ما مختالفاش على الأجواء اللي خلات وراها...نفس الوجوه نفس الحركة و نفس النظرات. هبطات و توادعات مع الشاب بعدما تبادلوا أرقام الهواتف. الشاب واعدها انو غيكون رهن الاشارة وقتما حتاجتو و اكثر من هذا عرض عليها تكون ضيفة فدارهم مع والديه!!! واش مجرد مجاملة او أنه من عائلة منفتحة عادي عندهم يكون الضيف بنت غريبة؟ سؤال جا على بالها و اكتفات بالشكر....
خرجات من المحطة و مشات خذات طاكسي صغير باش يوصلها لأقرب أوطيل بثمن مناسب....لحسن الحظ ما زال ما بداش فصل العطل و التخيام و ما كانتش أي صعوبة باش تلقى أوطيل كيستاجب للميزانية ديالها....سائق الطاكسي كان ودود و كلامو ما تجاوز نطاق شغلو...وصلها و نعت ليها الاوطيل و ديمارا....
بعد الادلاء ببطاقتها الوطنية خذات الساروت و اتاجهات للغرفة...كانت خايفة طيح فظروف إقامة مزرية لكن تطمأنات ملي لقات الغرفة نقية و مهوية...سرير مفرش بشكل انيق و غطاء نقي...تلفزة و طبلة و كرسي..دوش سخون و نافذة كبيرة بستار....
سدات الباب حيدات حوايجها و دخلات للدوش...بقات مدة تحت الماء الدافئ بحالا كتزول عليها سنوات من التعب الجسدي و النفسي. و هي كدوش تبسمات!! هاذي اول مرة غدوش بالماء بوحدو!! لا صابون ولا شمپوان ولا زيوت ولا عطور! ربما هي بداية لمرحلة جديدة فحياتها...
سالات و ترددات واش تستعمل الفوطة ديال الاوطيل اللي معلقة فالدوش و لا دير بلاش و تسنى تا تنشف بلا فوطة!!! هذا ماشي وقت الإختيار!!! خذاتها و تخشات فيها و تلاحت فوق السرير و غرقات فالنعاس.....
💠السابع عشر
_دادا رحمة دادا رحمة فينك!!؟
_ هانا فالكوزينة....
_ أجي شوفي هاذ القفطان واش جا معايا....
جميلة ما بقى والو لعرسها و شهر ما كافيش باش توجد راسها كما بغات. قتارحات عليها ماماها تاخذ قفاطن جاهزة و رفضات. مستعدة تدفع اي ثمن للمعلم باش يوجد طلباتها فأقرب وقت و بصعوبة لقات معلم اللي قبل إخصص وقتو كامل للاستجابة لطلبها...
رحمة خلات شغلها و لحقات عليها لبيتها. شافت القفطان و عجبها و عارفة ان جميلة محتاجة فقط اللي يطمنها واخا اللي لبسات تجي معاها...
-رحمة: تبارك الله و حجاب الله واتاك القفطان جيتي غزالة...
- جميلة: بصح أدادا؟؟ جا معايا؟
رحمة: والله ابنتي إلى جاك غزال و الخدمة متقونة. تا الشكل و اللون ما عندي ما نقول...
جميلة: عرفتي من إمتى و نا حاطة عيني على هاد الفصالة!!؟ قبل كاع ما نتخطب هههههه كنت باغا نصاوبو باش نمشي بيه للعرس ديال بنت عمي و ها هي جات المناسبة!! راه باقي جوج خرين قريب إوجدو....
رحمة: مالك عذبتي راسك!؟ ياك النگافة غتكلف بكلشي!!!
جميلة: واخا هاكاك بغيت شي حاجة تكون ديالي و بذوقي! و زيدون مازال ما عرفتش شنو بغا موسى! واش العرس غيكون عائلي و لا غنعرضو على الناس! و الله ما عرفت....
رحمة: واش العرس قرب ونتي مازال ما عارفة كيف غتروحي!!؟
جميلة: إيوا أدادا رحمة راك عارفة عائلتنا! حنا ما عندنا تا قرار. القرارات كتجي من الفوق و اللي علينا هو نفذو و صافي!!!
رحمة: إيوا تا هذا كلام! عرفتي خاص العشية نتجمعو و نهضرو فكل التفاصيل. لواه حنا ماشي شوية باش نتلفو هاذ التلفة!! واش بغيتو نوليو ضحكة قدام الناس!!؟ الى بقينا على هاد الحال الفام غتحل و يوليو يخلقو قصص راك عارفة بنادم اش مقابل! غيقولو داها باش يستر عليها! لا لا خاصني نهضر مع الحاجة، هذا ماشي كلام...
جميلة: كيفاش أدادا رحمة؟ ما فهمتش اشنو بغيتي تقولي بالسترة؟؟
رحمة: هممم و نا كنقول كتفهميها طايرة!! إيوا بنتي كما قالوا اللولين شرح ملح ما يخناز!
دابا إلى رحتي حسي مسي بنادم غيهضرو! غيقولو زواج بنت الحاج العوفير ما هو غير صفقة. موسى ولد الحاج العربي باش يستر فضيحتو ناض كتب عليها. تبغي الناس يهضروا فيكم و يبقاو يشككو فشرفك!!
جميلة بحالا ضرباتها بشي مطرقة: وايلييي!!! لهاذ الدرجة كاع!!؟
رحمة: بنادم أبنتي خايب و الحسد كيعمي العينين. علاش نوصلو لهاذ المواصل والله ميسر لينا و ما خاصنا خير! اللي تخليك خليها...
جميلة: هممم أنا كاع ما فكرت فهادشي و حتى ماما و بابا...
رحمة: حيث نتوما ناس نية و قلوبكم صافية. سوليني انا اللي كنتحاك مع الناس و عارفة شنو واقع فالحومة. السن يضحك للسن و القلب فيه الخديعة. نتي أبنتي الغرام عمى عينيك و ما بقيتي تشوفي و تحلمي غير بموسى(جميلة تزنگات) الغلط ماشي ديالك، الغلط ديال الحاج و الحاجة....
جميلة: لواااه ادادا و قيلة غير زدتي فيه ما وصلناش لهاذ الدرجة و اللي ما قدو فم يدير جوج! ما دينا لحد ما كيتسالنا حد....
رحمة: ورااه هاذي هي المشكلة! هضرة الناس واخا تبغي تنساها و تغمض عينيك ما كيفارقوك تا يحطموك
جميلة: يا ربي تحفظنا من الحساد! صافي ديري اللي بانليك!
خرجات رحمة و هي كتمتم واخا كتبان ما مسوقاش للي كيصرا فالدار، لكن فالحقيقة عينيها على الصغيرة و الكبيرة و كتدخل فاللحظة الأخيرة باش ترجع المياه لمجاريها. كلشي كيقدرها و يحتارم رايها و اللي ديما كيكون رأي سديد و فيه منفعة
جميلة رجعات قدام المرايا كتقاد و هي كدندن أغاني كلاسيكية غرامية.....
أنت تقرأ
لا تدهسوا أنوثتي (بالدارجة)
Short Storyنرجس تتميز بشخصية قوية و لا تستسلم للضغوطات! تواجه كل من حاول المس بسلامتها بكل ما لديها من قوة حتى لو اضطرت إلى **العنف
