انا البت الابوها دخل الجامع وقال عاوز عريس لي بتو. قادرين تتخيلو معاي المنظر ابوي. دخل الجامع وطلب من الامام انو يفتش ليو علي عريس لي بتو ولي هي انا طبعا الامام شال الميكرفون وقال ليهم :(السلام عليكم يا اهل الخير عندنا اخونا وزميلنا عاوز الستره لي بتو وعاوز ليها عريس يكون زو اخلاق وماعندو هم تاني غير كدا وحيعقدو من غير حفله ومن جوطه لو في زول حاسي انو مستعد للزواج يجي يطلبها من ابوها وقدام الناس دي ) الجامع كلو سكت مساافه بس بما انو ابوي كان معروف بانو زول متدين وزول طيب في واحد كبير من اصحابو في الجامع قال ليو انا بديو ولدي ومن اسع بتك يا مصطفي بقت بتي الامام قال ليو طيب اول شوفو راي البت والولد ..ابوي طوالي قال لي الامام انا بتي ماعندها مشكله ومن متين البنات بعترضو علي كلام ابوهم انا خلاص موافق بقا الراي راي محمد وولدو... محمد قال ليو ان شاء الله يامصطفي مابيحصل الا خير وانتظرو زيارتنا ليكم قريب
طيب دقيقه اوريكم وافهمكم الحصل انا بت واحده عند ابوي ومدلعني هو وامي شديد نحنا اسره ملتزمه جدا ابوي كان امام في الجامع دخلني مدرسه قرانيه. وبعديها دخلت الثانوي وهناا بدت القصه وقت كنت في تانيه ثانوي انا اسمي رهف عندي صحبتي اسمها لمياء مكان ما هي تمش انا معاها رغم انو عندي صحبات كتار بس هي اكتر واحده انا بحبها يلا هي كانت بتحب ليها واحد كل يوم بتجيب التلفون ووتتكلم معاو ورا المدرسه وانا بقعد جمبها بتونس معا صحبتي رغد ومرات رغد بتتكلم معا حبيبها وانا بقعد اعاين ليهم ومرات اعاين لبنات المدرسه. طبعا انا ماعندي لا تلفون ولا حتي فيس ولا واتس البرامج دي كلها بسمع بيها سمع عند صحباتي المهم دا ماعلينا القصه بدت يوم الخميس اخر اليوم بعد كنا طالعين من المدرسه لمياء ورغد قالو لي ورح الحمامات اول حتي نطلع قلت ليهم نمش الحمامات لشنو يعني رغد قالت لي رهف اجي الناس بتخش الحمام لي.المهم قلت ليهم خلاص امشو بنتظركم هنا مشو هي ولمياء الحمام وانا قعدت منتظراهم بعد نص ساعه حتي جو طالعين عاينت ليهم دا شنو العاملنو في وشكم دا لمياء قالت لي ماف حاجه قلت ليهم كيف تعملو روج في خشمكم انتو لسه صغار علي الكلام دا (طبعا انا ابوي محرم علي الحاجات دي ومفهمني انو دي حجات بنات كبار)لمياء قالت لي لو انتي شايفه روحك صغيرا يارهف فدي مشكلتك ونحنا حاليا في تانيه ناس واعين وكبار قالت لي اسع اختصري الموضوع وورح البيت طول الطريق انا بحاول اقنعهم انو يمسحو الروج بس ما رضو شويه كدا اشوفهم لفو بطريق غير طريق البيت عاينت ليهم بستغراب لمياء ورغد انتو جنيتو ولاشنو ماشين وين الاتنين في نفس الوقت قالو لي ماشين لي صحبتنا هنا عيانا قلت ليهم صحبتكم منو قالو لي ما بتعرفيها بس انتي ورح بنجي سريع مشيت معاهم علي اساس انو دي صحبتهم مشينا في شارع شبه فاضي مافيو ناس كتار لمياء جاها اتصل رد عليو اي نحنا وصلنا انتو وين... ايووا حاضرا منتظراك وقفلت الخط قلت ليها منتظره منو يا لمياء عاينت وسكتت شويه كدا وجو ثلاثه اولاد علينا انا افتكرتهم ناس ساي ماشين في الطريق بس استغربت وقت لقيتهم جو علينا وسلمو علي لمياء ورغد وجو يسلمو علي عاينت لي لمياء ورغد بزعل واتلفت علي الاولاد وقلت ليهم مابصافح 😕لمياء قالت لي رهف دا احمد حبيبي ودا طارق حبيب رغد ودا اسامه صاحبهم مارديت عليها وسكت لمياء قالت ليهم دي رهف قالو لي. اتشرفنا يارهف برضو بقيت سااكته وفي نفس الوقت خاايفه موت ماحصل طلعت معا ولد ولا حصل اتكلمت معاهم شويه كدا لمياء مشت معا احمد بعيد ورغد مشت معا طارق وخلوني معا اسامه يلا هناا انا الخوف قتلني يعني الشارع فاضي وانا قاعده معا ولد خفت ابوي يشوفني في الحاله دي اسامه بقي يحاول يفتح معاي مواضيع بس انا ولا عبرتو زحيت منو بعيد وقعدت في المسطبه وبقيت منتظرا رغد ولمياء وقت اتاخرو قلت امشي البيت قبل ابوي يقتلني وانا ماشا. اسامه جا علي قال لي علي وين قلت ليو ماشا البيت قال لي انتظري شويه اسع بجو عاينت ليو وتميت باقي مشيني جا لاحقني قال لي خلاص انا بوصلك البيت قلت ليو انت متخلف ولا شنو بصفتك منو تقدمني قال لي ماتفهميني غلط بس خايفت عليك تمشي براك في الشارع دا قلت ليو ماعندك بي دخل ومتخاف علي وزي ماعارف اهل مكه ادري بشعوبها فاكيد انا ادري بروحي ومشيت وخليتو وصلت البيت وانا جسمي برجفي ما صدقت انو اليوم دا عدا علي خير اليوم البعديو كان جمعه قضيتها معا امي في الطبيخ ومشينا الجامع صلينا الظهر وجينا راجعين رقدت شويه ابوي جا يصحيني عشان اصلي العصر جماعه صليناو وبدا يفسر لينا في سوره يوسف وكيف انو اخوانو كادو عليو وكيف هو راي في المنام احدي عشر كوكب والشمس والقمر راهم ليو ساجدين وكان قاصد بالكواكب اخوانو السبعه وبالشمس والقمر قاصد امو وابو وفعلا الرؤيه دي اتحققت وكيف ربنا خلا اخونو يركعو ليو بعد العملو فيو وكيف قدر يرجع ليو حقو وزي ماقال يعقوب فصبرا جميلا والله المستعان .(ابوي كان كل مره بيفسر لينا سوره او ايه البيقدر عليها )المهم عدا يوم الجمعه والسبت بدون شي يذكر ودا شي طبيعي بالنسبه لي واحده ما عندها تلفون ولافيس ولا واتس ولا بتحضر تلفزيون جا يوم الاحد ومشيت المدرسه طبعا كنت زعلانه من لمياء ورغد شديد من موقف يوم الخميس مشيت قعدت في اخر الفصل في كرسي براي شويه كدا وجو يتكلمو معاي عاينت ليهم وسكته بعد تحانيس حتي رضت اصالحهم حضرنا الحصه وبعد انتهت قعدنا اتونسنا لمياء قالت طبعا يارهف ماوريتك قلت ليها خير في شنو قالت لي طبعا اسامه قال معجب بيك شديد وقال عاوز يربط معاك قلت ليها استحاله طبعا حاولو يحنسوني قلت ليهم ما تفكرو تقنعوني عشان انتو عارفين رائ في الموضوع دا شنو واحسن تغيرو الموضوع عشان ماازعل منكم تاني وفعلا غيرنا الموضوع بعد انتهي الدوم طلعنا من المدرسه عشان نمش البيت لقينا اسامه واحمد عاينت لي لمياء نظام دا شنو قالت لي والله العظيم يارهف انا ماعرفه انهم جاين واحمد ماوراني قلت ليها خلاص يازوله امشي وماتتكلمي معاهم قالت لي خلاص ونحنا ماشين وهم ماشين ورانا وانا كل ما اعين ليهم واشوفهم ورانا بخاف اكتر وجسمي بعرق شديد قلت لي لمياء امشي كلميهم مايجو يتابعونا وفعلا مشت بس شويه كدا وجا اسامه سلم علي رغد جا يسلم علي طنشتو وعاوزه امش من جمبو قال لي رهف دقيقه بس من وقتك عاوز اتكلم معاك عليك الله اسمعي انا عاوز اقول شنو وامشي رغد قالت لي رهف اسمعي هو عاوز يقول شنو واذا كلامو ما عجبك فوتي وخلي قلت ليها طيب انجز قبل ما زول يشوفك واقف معاي رغد مشت وخلتنا برانا قعد يتمتم شويه ر..ه..ف وانا طبعا خايفه وماكنت ناقصاو قلت اتكلم سريع ولا امش اخليك قال لي والله يارهف. انا اعجبت بيك من اول نظرا عاينت ليو وعايزه امش قال لي رهف انتظري شويه ماكلمت كلامي انا بحبك وعاوز اربط معاك وواوعدك انك طول ما انتي معاي حتكوني سعيدا حاحبك من كل قلبي وما حاحب واحده غير عليك الله اديني فرصه بس اثبت ليك كلامي دا قلت قليو ياود الناس انت متخلف انا ماعاوزه احب كدا انا سعيدا وما محتاجه لي انسان زيك يكون سبب في سعادتي الحمدلله بعرف كيف اسعد روحي ومشيت خليتو جا لحقني اديتو كف قلت ليو انت لو راجل تاني حاول تمشي وراي ومشيت منو لمياء ورغد جو لحقوني حاولي اتكلمو معاي بي موضوعو كتير بس طنشتهم لحدي ماوصلت البيت... بقيت اعيش روتين يومي امشي المدرسه اطلع منها القي اسامه منتظرني جمب المدرسه بحاول يتكلم معاي وكل يوم انا برفضو بقينا علي الحال دا اكتر من شهرين وانا حرفيا كدا اتعودت عليو يعني بقيت بنتظر وقت البيوت دا بفارق الصبر عشان اشوفو في يوم طلعت من المدرسه لقيتو مافيش بقيت افتش فيو جمب المدرسه مالقيتو لمياء قالت لي رهف بتفتشي علي شنو قلت ليها ولا حاجه قالت لي كذابه يارهف متاكدا انك بتفتشي علي اسامه قلت ليها يابت انتي جنبتي انا ماصدقت انو شاف ليو شغله غيري رجعت البيت واسامه ليو اسبوع ماظهر ماعارفه بس افتقدو شديد وقررت خلاص اني اسال منو لمياء قالت لي ماعرفه والله حصل ليو شنو بس امسكي اتصلي عليو بعد تردد. وتشجيع من لمياء ورغد شلت اتصلت عليو اتصلت عليو وقلت ليو معاك رهف اتصلت اسال عليك طبعا هو فرح شديد بتصالي وقعدنا اتونسنا شويه لحدي ماجرس الحصه ضربت فصلت منو ومشينا الحصه يلا من الاتصال دا بقينا يومي نتلاقي جمب المدرسه ونتونس وكل يوم بيتصل علي بتلفون لمياء ومرات رغد لحدي ما في يوم من الايام جاب لي تلفون في البدايه رفضتو بس في النهايه شلتو منو وبقيت بتونس معاو وقت القي البيت فاضي وباليل وقت الناس ينومو وفي المدرسه يعني حرفياا اساامه دا بقي محور حياتي وغيرا لي كليا بقيت بعمل روج وبدره وكحل دا كلو عشان هو يشوفني حلو المهم في يوم كنت ماشا معا اسامه في الشارع ونضحك ونتونس وورانا قاعده رغد ولمياء قاعدين برضو بيتونسو اي واحدا معا حبيبها شويه كدا واشوف ابوي جاي علي وكان بيتونس معا صحبو اول ماشافني معا الولد ولابسه بنطلون وعامله روج اتخلع فيني بس انا بقيت استشهد قلت خلاص الليله ابووي حيقتلني في مكاني دا بس الغربيه مشا فيني وكانو مابعرفني وانا بعد الموقف دا جريت البيت جري غيرت هدومي وقعدت اصلي وادعي انو الله يعديها لي علي خيرر وتاني والله ما حاطلع معا اسامه انتظر مسافه ابوي ما جااء وكل ما الوقت يمر انا قلبي بوجعني اكتر ماخليت سوره في المصحف وماقريتها وماخليت دعاء وماقلتو شوويه كدا واشوف باب البيت اتفتح
