#خو_مرت_بوي
#الجزء_العاشر_والاخير
خشت ميسم لي دارها وجها مايتفسرش كان المسج من رمزي وكاتب صورك وفيدوهاتك كلها عندي تحسابي ضحكتي عليا حاننشر كل شي
اتصلت ميسم وهيا ترجف وتبكي
رمزي يستفز فيها قالها ميسم خيرك كل مكان درتيلي بلوك كويس كلمتك بي رقم غريب
ميسم تبكي وتقوله احدفهم استر عليا اعتبرني اختك كانت نزوا وكل حد في حاله
رمزي بصوت عالي نزوا صار الايفونات والفلوس والحوايج يلي دفعتهم عليك تي صرفت دم قلبي عليك ويتريت هكي تلعبي من وراي
ميسم ترعش اني غلطت بس مش هكي دير يا رمزي ماكنتش هكي اني مالعبتش من وراك
رمزي ضحك بي هستيريا مالعبتيش منو يلي وافقت تتطلع لي مقابله شرعيه وتتزوج ولد شارعي ومشكله جي سألني اني وقالي مارضيتش فيه الولد محترم ياخد وحده رخيصه زيك
ميسم فاتحه فمها وعيونها معبيات دموع مصدومه فيه ونادية تنادي عليها
سكرت تليفونها تجري ومسحت دموعها وطلعت لي امها
ناديه بي خنس وينك بكري نادي عليك كله طرش وهيره خليقتك مقلوبه
ميسم بصوت تاعب ومخنوق قالتلها لا ماسمعتكش كنت فاتحه تسجيلات قرايتي
ناديه قالتلها الهم ندى مهناش وضروري الحوايج ينغسلو والغساله فسدت من هروب ضي وخوك وبوك مهناش نبيها تغسلهم بي يديها ياريتها مكسورا
ميسم متنحه وامها تدوي وهيا مش معاها تفكر في فضيحتها
......... ....... ................
خشت نور في سور وفقدت الوعي وسياره ولت رابش وكان دم على وجها كله
سعفها واحد فايت ورفعها لي اقرب مصحه
وطلع وخلاها خير مايبتلش فيها ويخش في سين وجيم
طلع عندها نزيف داخلي وتوفت وبيتصلو بي اقاربها بس لاعندها تليفون ولا بطاقة معاها
........... ......... ..............
كانت ندى راقده في المربوعه وتحديدا عالكنبه
قرب منذر ويشوف فيها زي الملاك كانت متلكمته صقعانه
حط يده على كتفها وقرب منها فتحت ندى عيونها
منذر توتر قالها نوضي من هني خشي داخل
قعدت ندى تشوفله ومستغربه فيه وخشت
............ ........... ..................
وليد يحك في جسمه عطيني اي حبه تفوتني مش قادر الخاتم ذهب تصرف
ضحك مروان قاله خاتم مايجيبش حتا 50دينار تي على من تضحك الحبه سعرها 200تصرف ماعندكش فوتها
وليد بدي يتجد في مروان ويعيط يقوله عطيني يامروان مش قادر
مروان دفه وركب سيارته فتح روشن قاله لما تجيب حقها الحبه تعالا مانصدقش فيهم اني
