Ice Cream

4

Felix 's POV.

အချစ်ဆိုတာ ဘာလဲ?

ဒီမေးခွန်းအတွက် သေချာ‌ရေရာတဲ့အဖြေတစ်ခုရှိမနေပါဘူး။
ဒီလိုပဲ ကာလအပိုင်းအခြားအသီးသီးကလူတွေဟာ သူတို့ရဲ့စိတ်ခံစားချက်အတိုင်း အချစ်ဆိုတဲ့ အရာကို အဓိပ္ပါယ်အမျိုးမျိုးဖွင့်ဆိုကြတယ်။

ပေးဆပ်ခြင်း...
ရယူခြင်း...
စွန့်လွှတ်ခြင်း...
ငေးကြည့်ခြင်း...

အချစ်ဆိုတာ ဘာလဲလို့ ကျွန်တော့်ကိုမေးလာခဲ့ရင်တော့ ကျွန်တော့်ရဲ့မိဘတွေရယ် Channie Hyung ရယ်နဲ့ ရေခဲမုန့် လို့ပဲဖြေမယ်။
ကျွန်တော့်ဘဝရဲ့အရေးအကြီးဆုံး‌သောအရာတွေဟာ အချစ်ပဲ။
ဘယ်နည်းဘယ်ပုံ ဘယ်လိုအချစ်မျိုးနဲ့ ချစ်တယ် ဆိုတာ ခွဲခြားမနေပါ။ ခွဲထုတ်ဖို့လဲ မစဉ်းစားခဲ့။
အကုန်လုံးဟာ ချစ်တယ် ဆိုတဲ့‌ခေါင်းစဉ်တစ်ခုတည်း အောက်မှာပဲ တည်ရှိနေကြတယ်။

မိုးရေစက်တွေအဆက်မပြတ်ကျဆင်းနေတဲ့ နေ့တစ်နေ့မှာ ဘဝရဲ့အရေးကြီးဆုံးအရာတစ်ခုဖြစ်လာမယ့် ကျွန်တော့်မိဘတွေရဲ့ဘဝထဲကို ဝင်ရောက်ခဲ့တယ်။
မိုးရေစက်တွေအပြင်းအထန်သွန်းနေတဲ့နေ့တစ်နေ့မှာပဲ ကျွန်တော့်ဘဝရဲ့အနှစ်အသက်ဆုံး အရာတစ်ခုကိုအကြောင်းပြုလို့ Channie Hyung နဲ့တွေ့ဆုံခဲ့တယ်။

မိုးရေစက်တွေဟာ လမ်းပြကြယ်ငယ်လေးတွေလိုပဲ...
ကျွန်တော့်ဘဝရဲ့အရေးအကြီးဆုံးအရာတွေကို တွေ့ဆုံနိုင်အောင် လမ်းပြပေးတယ်။

...........

နေရောင်ခြည်လေး‌တွေကို သဘောကျတယ်။
သူတို့က နွေးထွေးတယ်...

နေရောင်ခြည်လေးတွေကို မြင်တိုင်း Channie Hyung ကိုသတိရတယ်။
သူ့ရဲ့အနားရောက်တိုင်း အမြဲလိုလိုနွေးထွေးလုံခြုံသွားတယ်လို့ခံစားရတယ်။

' Hyung က နေရောင်ခြည်ဆို ကျွန်တော်ကတေးဆိုငှက်လေးဖြစ်ရမလား? ကျွန်တော့်အသံက မကောင်းပေမယ့် Hyung ရဲ့ဘေးနားမှာအမြဲရစ်ဝဲနေဖို့တော့ အာမခံတယ် '

‌မနက်ခင်းလေပြေနုတွေဖြည်းညှင်းညှင်း ဖြတ်တိုက်သွားတဲ့ အတွေးစတစ်ခုက ကျွန်တော့်ရင်ကိုနွေးစေပြီး အပြုံးလေးတစ်ခုကိုလဲပွင့်စေတယ်။