ضابط برتبه جحيم

البارت الخامس

بقلمي / ضوء القمر 💫

انه المكتوبله يعيش بأثر وجعه
انه البعيونه دمعه تسابك بدمعه

سوزان : احضرلك الحمام
ياسين باوعتلها بشك : منج من الشيطان كاعده تنتظريني لا و فوكها تحضريلي الحمام شنو راح تقوم القيامه
سوزان : هاي شبيك فوك ما اهتم بيك
ياسين : لا يا بوي و اني لاكي جيبي المنشفه مشكورين
دا اروح للحمام سوزان صاحت : ياسين
ياسين بدون ما يلتفت : نعم
سوزان : انته صدك راح تعقد على هاي البنيه
التافيت عليها و رفعت حاجبي : شمدريج
سوزان بتوتر : هاا مو مو سمعتكم من جبتلكم الجاي جنتوا تحجون و هاي
ياسين : ي و شنو يعني ب شنو يهمج
سوزان : طبعا يهمني مو زوجي انته
ياسين: سوزان اتمنى ما تنسين الاتفاق الي بينا
سوزان : ي بس ....
ياسين : لا بس ولا شي و ي اني راح اعقد ع البنت و هسه تفضلي برا اريد اسبح و انام عندي دوام
سوزان : ماشي ياسين بس ياريت تفكر ب مشاعري شويه

طلعت سوزان من الغرفه زفرت بضيق يعني اني شنو بيدي لازم اسوي هيج لخاطر سعد اوف يا سعد اوف دومك مورطني وياك بمشاكلك ب هل أثناء دك الفون باوعت نفس الرقم اهووو شلون سالفه رديت بغضب

ياسين : و التالي مو كايل ممنوع الاتصال بيه و اني بالبيت
...... : شسوي مشتاقلك انته ما تسال
ياسين : باجر التحق و امرلك
..... : اوك لعد راح احضر كلشي مثل كل مره
ياسين : ديالله روح هسه بعدين اخابرك
...... : اوك انتظرك لا تتاخر
ياسين : ماشي يالله مع السلامه

سديت الخط بدون ما اسمع جواب يالله هيه ملتمه ملتمه اوف اوف ربي ريح قلبي و بالي عاد ترا تعبت فتت سبحت و نمت ماكو ساعه و دك المنبه كمت بدلت و أخذت جنطتي و طلعت مريت من يم غرفه سوزان سمعتها تبجي

( ملاحظه / سوزان و ياسين كل واحد اله غرفه خاصه بيه بسبب حادثه راح نعرفها بالبارتات الجايه 😁 )

هي تعرف بالاتفاق و وافقت تزوجني ما جبرتها مثل ما اني متحمل كل الضغوط لازم هي هم تتحمل رحت ل غرفه ملاكي بستها و غطيتها زين و طلعت ل دوامي اول ما وصلت لكيت شهم موصي ع ريوك و دينتظرني

شهم بضحكه : واخيرا شرفت عمي وين الغيبه ما تسال اله نخابرك
ياسين بابتسامه: شسوي يا خويه تعرف بالمشاكل
شهم : معذور خويه معذور يالله حماتك تحبك تفضل
ياسين: ي والله ميت جوع
شهم : يخسه الجوع يالله بسم الله

تريكنا اني و شهم و حجيتله على السالفه من الألف للياء ضل صافن طبعا شهم صديقي من الطفوله حتى الكليه العسكريه دخلناها سوه لذالك يعرف كلشي عني و كذالك اني اعرف كلشي عنه

شهم : بس ياسين صدك خطيه سوزان
ياسين : شهم اني ما جبرتها ع شي من البدايه جان اتفاقنا شوكت ما يعجبني اتزوج اتزوج
شهم : ياخي يجوز البنيه تحبك و ما تريدك تتزوج
ياسين : سوزان و الحب مثل العمه و الجنه ابد ميتوالمن
شهم : شكد قاسي
ياسين : كوم ابو قاسي كوم يا ابو قلب حنين خل نشوف شنو العمليه الجديده
شهم : ماشي يالله

رحنا اني و شهم على مكتب العميد محمد دخلنا و بعد ما ادينا التحيه العسكريه كعدنا و بدأ العميد يحجي

العميد محمد : شهم و ياسين اني اختاريتكم لان واثق من كفائتكم و متاكد راح تبيضون وجهي
ياسين: شكرا ع هاي الثقه سيدي
العميد محمد: هاي المره العمليه على شبكه دعاره الها أطراف بكل المحافظات تقريبا بس المركز بغداد و هاي الشبكه مو بس للدعاره لا و للتجاره بالاعضاء و بالبشر و بالمخدرات و السلاح
شهم : طيب سيدي اكو معلومات نكدر تستفاد منها لو نعتمد على نفسنا
العميد محمد: بصراحه يا شهم ما كدرنا نجمع أكثر من الي كتلكم عليه لان كل شخص دنقبض عليه من هاي الشبكه ثاني يوم يلكوه منتحر بجرعه سم
ياسين : شلون يوصله السم
العميد محمد: هذا الي راح يخبلنا احنا نجردهم من كلشي و محد يدخل الهم بس مع ذالك ينتحرون
ياسين : معناها اكو جاسوس
العميد محمد: هم شاك ب هذا الشي لان كل عمليه اقتحام و تطويق تفشل و يهربون قبل الهجوم بوقت قصير جدا
ياسين : سيدي عندك ثقه بينا صح
العميد محمد: لو مو ثقتي بيكم قويه ما اكلفكم ب هيج مهمه
ياسين : خلص سيدي عوفها علينا لعد
العميد محمد: تمام يا ابطال شوفوا شغلكم

طلعنا من غرفه العميد و رحنا ل مكتبنا اني و شهم ب نفس المكتب نشتغل جمعنا فرقتنا و وزعت عليهم المهمات المراقبه فقط بعد ما انصرفوا كعدنا اني و شهم

شهم : بشنو دتفكر
ياسين: اني نطيتهم فقط مهمات المراقبه لان اني و انته بس الي راح نشتغل ب هاي المهمه و اعتمادنا عليهم راح يكون شي ثانوي في حال صار شي ما نتوقعه
شهم : فهمتك
ياسين : لذالك احبك
شهم : تفكيري وصخ

ضلينا اني و شهم نشاقه صار الليل بسرعه ساعه 8:20 مساءا شهم راح يجيب عشى و اني بقيت بالمكتب ارتب الخطه ببالي دك فوني باوعت هم هذا الرقم زفرت بقله حيله

ياسين : يا نعم
...... : هاي شبيك مو اتفقنا تجيني زياره
ياسين : عندي شغل هسه بس افرغ اجيك
....... : بس اني مشتاقلك و ما راح اصبر تحب اجي للمركز و اسويلك سالفه
ياسين: حتى تكسر ايديك و رجليك
....... : لعد تعال انتظرك و بالمناسبه حضرت كلشي ع مزاجك و مثل ما تحب
ياسين: ماشي فد ساعتين هيج و اجي
..... : ولو هواي بس شسوي انتظر و امري لله
ياسين : ديالله هسه مع السلامه
....... : باي

ويا ما سديت الخط دخل شهم جايب العشى كعدنا تعشينا و ضلينا نسولف لما صارت ب 10 ترخصت من شهم كتله عندي مشوار و طلعت يمكن هذا الشي الوحيد الي ضميته على شهم لان ادري راح يضل يلوم بيه و يحجي رحت على الشقه مالتي محد يعرف بيها دكيت الباب و ....

يتببببع 😁

ياترى منو صاحب الرقم الي كل شويه يتصل ب ياسين ؟؟
و ليش شهم ميعرف ب هذا الشي ؟؟
البارت الجاي اعرفكم على شهم لان اله دور قوي بالقصه 🤭

لا تنسون تصويت و متابعه حتى اكمل القصه
🥰😘🥺👈⭐

النـه الله الما ينام
يشوفنه وعينه علينه
احنه غير الله شبدينـه ؟🖤