ضابط برتبه جحيم

البارت الرابع

بقلمي / ضوء القمر 💫

‏يلتم ﭑلتعب بيه و ﭑڪول ﭑيام وتعدييہ 🖤

ابو جمال : انتوا ما تريدون ابنك يتاذه صح
الشيخ ناصر : اكيد احنا ما نريد تصير دموم بينا و بالنهايه هذا قدر الله و قضائه
ابو جمال : و نعم بالله عندي حل يرضيكم و يرضيني
ياسين : كول عمي انته اؤمر و انه أنفذ
ابو جمال : اريد منكم تأخذون مرته و جهاله
ياسين : شنووو ما فتهمت
ابو جمال : يعني تعقد على مرت ابني و تاخذها هي و جهالها اني ما عندي امكانيه اصرف عليهم
ياسين : بس يعني عمي و اهلها للبنيه و منو يكول تقبل
ابو جمال : مو بكيفها تقبل و غصبا عنها

ضليت مصدوم بكلامه هذا كل عقله يحجي زين اهل البنيه وينهم ضليت صافن لا انطي ولا اخذ حجي عمي الشيخ باوع عليه و حجى بصوت ناصي

شيخ ناصر : ادخل ؟
ياسين : ياريت
شيخ ناصر : احم احم يعني انتوا هذا شرطكم حتى تنهون السالفه بدون دم ؟
ابو جمال : لا مو بس هذا شرطنا و تدفعون 50 مليون
شيخ ناصر : تمام و احنا موافقين
ياسين : هااا
شيخ ناصر : بس احنا عدنا طلبين اذا ما تصير زحمه
ابو جمال : تفضل
شيخ ناصر : اول شي البنيه مرت المرحوم تكمل عدتها حسب الاصول و الشرع
ابو جمال : ماشي
شيخ ناصر: ثاني شي محد منكم يتعرض ل ابنا باي شكل من الأشكال
ابو جمال : موافق
شيخ ناصر : من طول اتفقنا نرفع الزحمه و نترخص

رجعنا للبيت و اني بعدني ما مستوعب الكلام الي صار هذا كل عقله يحجي كعدنا ب الديون باوعت على الشيخ ناصر

ياسين : صدك تحجي عمي شلون توافق على كلام هذا الخبل
شيخ ناصر : هذا احسن حل
ياسين : لو ناطيهم سعد يكتلوه ولا هل حل
شيخ ناصر : عيب هل حجي مهما يكون هذا اخوك و لازم تتحمل
ياسين : والله يا عمي تعبت و حرت وياه شلون ما اجيه اعوج
شيخ ناصر: زوج البنت اله من يشيل مسؤليه راح يعقل
ياسين : هه ازوجها اله والله يا عمي حقك تحجيها ما تدري الي اني ادري خليها سكته
شيخ ناصر: لعد منو يعقد على البنت
ياسين : اكو غيري يعني
شيخ ناصر: والله يا ابني هاي بعد بينكم و اني راح احجي ويا سعد و ان شاء الله يعقل و نعدل
ياسين : عمي اذا ذيل الجلب انعدل اخويه ما ينعدل

ترخصت من عمي الشيخ صعدت ارتاح و عمي الشيخ ضل يحجي ويا سعد رحت ل غرفتي نمت بملابسي حتى ما بيه ابدل كعدت على صوت الفون يدك باوعت لكيته صديقي شهم جاوبت بسرعه

ياسين : ها شهم خوما اكو شي
شهم : لا يمعود ماكو شي بس دا اسال شسويت بموضوع اخوك
ياسين : اوف يا شهم لا تذكرني وربي راح اتخبل
شهم : ليش
ياسين : اجي للدوام و احجيلك
شهم : ماشي انتظرك
ياسين : تمام مع السلامه
شهم : الله وياك

كمت باوعت ع الساعه ب 11 حيل هاي اني شكد نمت كمت سبحت و بدلت نزلت جوه كلهم ملتمين اجوا الجهال سلموا عليه كعدت شويه

ياسين : اني راح اروح للمستشفى اشوف امي
سعد نط بسرعه : اجي وياك .... مشتاق ل امي
ياسين : يالله كوم
سوزان : ليش ما تروحون باجر هسه دنيا ليل و كلشي يصير هذا طريق
ياسين : ترا اني ما رايح غير دوله و ثاني شي باجر عندي دوام عود حضري جنطتي
سوزان : ماشي
ياسين : خويه رهام قفلي البوب لما نرجع
رهام : صار خويه

نزل سعد مبدل رحنا طول الطريق ساكتين وصلنا لكيت مصطفى خطيه من التعب نايم على الكرسي كعدته و كلت ل سعد يرجعه للبيت و يبقى هو يم امي لان اني باجر اداوم صدك راحوا و اني دخلت يم امي كعدت و حطي راسي بحضنها

ياسين : يمه تعبان يمه يالله كومي مشتاق ل حضنج من اطبطبين عليه و تلعبين بشعري كل تعب يروح يمه والله ما اسوا شي بدونج بروح ابوي لا تعوفيني تعبان يمه ابنج تعبان معقوله ما جاي تحسين بيه

كمت بست راسها و طلعت كعدت بالممر ضليت ادعي ربي يكومها بالسلامه ضليت للفجر يمها خابرت على سعد راسا اجه

ياسين : سعد
سعد : ها
ياسين : خليني مره وحده اعتمد عليك و ما أندم ابقى يم امي و دير بالك عليها
سعد : صار خويه بعيوني احطها
ياسين : و لا تخلي مصطفى يجي يبات هنا من يوم الحادث لليوم هو هنا ابقى انته مكانه
سعد : حاضر
ياسين : يالله اني راح اروح عندي دوام
سعد : ياسين
ياسين : ها سعد

راسا حضني و كام يبجي حضنه

سعد : سامحني ياسين والله اني ما اريد المشاكل بس هي هيج تجي وياي والله اني مو قصدي انته تعرفني رجل دجاجه ما احل مو انوب اكتل بشر سامحني فدوه
ياسين : ولك سعد والله اني احبك انته اخويه و حزام ظهري لا عبالك ارتاح من اضربك والله استحي بس اذا انته خط مايل شسويلك اني بعمرك لا عندي أخ أكبر مني ينصحني ولا اب يعلمني و جنت شايل مسؤليه أكبر من طاقتي و مع ذاك ما يوم سويت مشكله يا خويه إلى متى تضل هيج باجر عكبه تزوج و يصير عندك جهال برايك راح يفتخرون بيك و انته ابو مشاكل صير رزن و عوف هذول الهتليه الي تمشي وياهم التف الدراستك
سعد : حاضر خويه كل الي كلته راح انفذه بس لا تزعل مني
ياسين : اني لو زعلان منك ما ادوخ نفسي بسالفتك و اشيل همك و لو زعلان منك ما اجي انصحك لو زعلان منك جان حتى بوجهك ما باوعت و هسه يالله اني لازم اروح دير بالك على نفسك و على امي
سعد : صار خويه الله وياك

رجعت للبيت لكيت سوزان دتنتظرني بغرفتي ستغربت منها من الشيطان راسا اجت يمي

سوزان : احضرلك الحمام
ياسين باوعتلها بشك : منج من الشيطان كاعده تنتظريني لا و فوكها تحضريلي الحمام شنو راح تقوم القيامه
سوزان : هاي شبيك فوك ما اهتم بيك
ياسين : لا يا بوي و اني لاكي جيبي المنشفه مشكورين
دا اروح للحمام سوزان صاحت : ياسين ........

يتبع ......😳
شنو تريد سوزان ؟؟
و منو البنت الي ياسين راح يعقد عليها ؟؟
و منو هذا شهم صديق ياسين ؟؟

صوتوا حتى تعرفون 😊👈⭐

انه احب حزني وعتمتي
ولوني الاسمر وكل تفاصيل البچي الـ بعيوني
انه احب روحي الكئيبة الطافية
انه غيمة بس ابد مو صافية 🖤