-كان ممكن تقوليلي انتِ اللي اختارتِ تسكتي
-اقولك اي.. اني كنت بشوفك بس من بعيد وانت مع صحابك وواقف بتهزر معاهم وسايبني اطبش ف الكليه من اول يوم ليا.. اقولك اني بقعد اتأمل ف صورك قبل م انام واقول يارب يبقى من نصيبي، ولا اقولك اني واقعه فيك من صغري بس انت مش واخد بالك مني اصل، اقولك اني كنت غلطانه لما اتنيلت ع عيني وحبيتك ولا اقولك اي
ومين قالك اني مش واخد بالي، اكتر واحد واخد بالك من تفاصيلك اللي بتحاول تخبيها ع الكل بس انا عارفك اكتر منهم ياخديجه، عارف انك بتضايقي لما اسيبك لوحدك ومسألكيش عملتي اي النهارده ف يومك، بس انتِ اللي بعدتيني ب تصرفاتك، كنتِ بتتكلمي معايا بالعافيه أفضل قاعد مستنيكي تدخلي تقوليلي حاجه وكذا مره اقول ل نفسي ادخل يا واد كلمها وارجع اقول ل نفسي طب ما هي ممكن تحرجني وتقولي مشغوله هكلمك لما اخلص ومبيحصلش، خديجه انتِ اكتر واحده تعباني ف الحياه ومع ذلك مستحمل عشان بحبك
قال كلامه وسابني ومشى من غير حتى مايسمع ردي، كنت عاوزه اترمي ف حضنه واقوله بحبك بس هو مدنيش فرصه عمار ابن عمي هما ف العيله فاكرنا اخوات، بس احنا ابعد عن مفهوم الأخوات، عمار أكبر مني بسنتين بس عقله عقل طفولي ويمكن اكتر مني.. بيزعل وبيتضايق من اقل حاجه ماعدا مشاكلي بيتعامل معاها بصدر رحب عشان يحلها.. يمكن هو اكتر واحد قريب مني ف العيله دي، مين قال اني ببعده عني، انا بس كنت متلغبطه بس مكنتش عاوزه يبعد طلعت ل شقه عمي فوق فتحتلي طنط عفاف وهي بتضحك هي الوحيده اللي عارفه اني بحب عمار وبتساعدني
-اتخانقتوا تاني صح
-يعني اعمل اي ف ابنك اللي دماغه ناشفه ده بيرميلي دبشتين من بتوعه ويقوم رازع الباب وراه وماشي
-طول عمركم أطفال مش هتعقلوا ابدا
-طب ماتقولي لي يافوفا اعمل اي عشان ابنك كرهني ف عيشتي خلاص
-هقولك!
دخلت المطبخ وعملتله رز بلبن عشان بيحبه، الحاجه الوحيده اللي اتعلمتها عشانه لكن نقول اي جبله مبيحسش، بعد ماخلصت رشيت عليها قرفه انا اول مره اشوف حد بيحب القرفه ع الرز بلبن كل مره اسأله ليه يقولي بيخلي ليها طعم، انا وهو ميولنا مش واحده كل واحد بيحب حاجه مختلفه يعني انا مثلاً بحب السينبون وهو مابيحبوش الحاجه الوحيده اللي اتفقنا عليها هي المحشي بكل أنواعه، عمار عصبي إنما أنا هاديه مسالمه كده زي القطط هو دايما يقولي كده، والنبي فيه حد يزعل حد يعمله رز بلبن ده انا كرامتي بتقولي ارحميني.. دخلت اوضته اللي مليانه ب ريحته وزي كل مره بلاقي الكتب مش مترتبه اه فيه حاجه تانيه نسيتها انه فوضوي بطريقه بشعه كذا تيشرت ع كذا بنطلون مرمى ع السرير طبقتهم وحطتهم ف الخزانه بتاعته وقعدت ع مكتبه اللي مش بيرضي حد يفتح إدراجه بس المرادي لقيتها مفتوحه اتلاقيه نسي يقفلها فتحتها لقيت صورنا واحنا صغيرين وكل صوره عليها تاريخها وإحداث اليوم وحقيقي دي أفضل حاجه شوفتها وفيه صوره ليا لوحدي كان تقريبا عندي 5 سنين مكتوب عليها " ماليش غيرك وطن تاني ولا صاحب ولا مطرح" ده طلع بيحبني بجد مش كلام وخلاص ولقيت نوت مكتوب فيها ذكرياتنا كلها اول مره نطقت فيها اسمه، اول مره اقوله بحبك وحاجات كتير وكل ما بقرأ دموعي بتزيد اكتر لقيت حد بيتنحنح ع باب الاوضه ومبتسم جه لحد عندي وقومني من ع الكرسي ومسح دموعي ب ايده ومازال مبتسم يابني بقا يابني هتوقف قلبي ف مره من ضحكتك دي
-بتعيطي ليا
-ضربته ع صدره وانا بقوله : عشان بكرهك
-ياشيخه قولي كلام غير ده
-ليه مقولتش ليه سبتني اتعذب معاك
-عشان انا مفتري
-ايوه انت مفتري ومش طايقاك وبكرهك وابعد عني كده عشان انزل
-طب عيني ف عينك كده.. ده انا شامم ريحه الرز باللبن من ع السلم
-اه عشان انا مهزأه… المفروض مكنتش اعملك حاجه اصلا
-حطيتي قرفه
-اه ي اخويا حطيت لك الحب بتاعتك
-اي ده يعني حطيتي نفسك
-عمار!!
-نعم ياعيون عمار
-اتلم ها ووسع كده عشان الهوا
-لا انا حلو كده
-قولت من غير ما اقصد : انت حلو ع طول
-ف ضحك وهو بيقولي : كانت فيه واحده بتكرهني هنا راحت فين
-ع فكره مش هأكلك من الرز باللبن وهأخده معايا
-مفيش مشكله بعد الجواز تبقى تأكليني
-جواز!!!
-اومال
-عمار انا مش بهزر
-ولا انا
-انت متأكد من القرار ده
-ده انا مش متأكد غير من اني عاوزة جمبي ف أقرب وقت
# ياسمين فليفل
