حسنه مش طبيعي ...مره قعدنا ع البحر وجابلي فشار وورد كنت مبسوطه بيهم اووي ساعتها سألته " ليه ياعمار جبتهم " قالي انا عاوزك تكوني مبسوطه برغم انه طالع عينه ف الشغل وزهقان قولتله بس انت مش مبسوط قالي " يكفيني إنك سعيده ده عندي بالدنيا" ابتسمت وسرحت ف حياتي معاه بقالنا سنتين مخطوبين بس كل يوم انا بحبه اكتر بيستحمل هرموناتي وزعلي منه رغم انه مش غلطان بس هو بيقولي جمله واحده " مقدرش ازعلك" بابا مكنش موافق عليه ف الاول بس هو فضل وراه لحد ماوافق كان عندنا ف مره من المرات كان واخدني عشان يحرجني بس انا كنت لسه بلف الطرحه وهو قعد مع بابا عقبال ما اخلص بابا بيقوله "اي الحب من وجهه نظرك ياعمار " ابتسم كده وقاله كلمه واحده " خديجه" بابا ضحك وطبطب ع كتفه وقاله " انا عارف إنك هتشلها ف عينك غير كده مكنتش وافقت عليك" عمار قاله " وانا إن شاء الله هكون عند حسن ظن حضرتك وهسعدها دائما" انا كنت واقفه وسامعه كل حاجه قبل ما امشي معاه بابا ابتسملي وباسني ع جبيني وهمس ليا" مش هتلاقي زيه ف حياتك" انا عارفه كده ومتأكده منه يكفيني اني لما ازعل منه بيقولي " اعملك اي عشان ارضيكي" الجمله دي بتأخد قلبي وخصوصا منه هو !!
# ياسمين فليفل
