النهارده عيد ميلاده ...حقيقي هو اللي محلي اليوم بوجوده ،كل عيد ميلاد بحب اعمل حاجه مختلفه بحب سعادته وهو بيشوف المفاجأه ..جهزت السطح وعملت قعده عربي وشلت وجبت اللاب ومستنيه نشغله ع اكتر فيلم كرتون بنحبه "سندريلا" وعملت " كباب حله " انا عارفه ان هو بيحبه وجبت بيبسي وفشار مكنش ينفع اعمل كل ده وهو موجود كان لازم ينزل ...هو بيحب شعري يكون طويل بس المرادي غيرت ف لونه خليته " بنفسج" معرفش ليه بس هو دايما يقول عليا مجنونه ف مش هتفرق
-انتِ فين يا بنتي
- دور وهتلاقيني .. انا جمبك
-خديجه انا بجد تعبان وعاوز انام يلا بقا تعالي
-عمرك ماتكمل المفأجاه للاخر ...اطلع يا استاذ انا ع السطح
-بتعملي اي ع السطح ف الوقت ده
-اطلع انت بس وتشوف بنفسك
كالعاده ف كل سنه بينسي عيد ميلاده ...طلع لاقاني واقفه وماسكه ف ايدي " الكاب كيك" عشان هو مالوش ف انواع الجاتو وحاطه فيه شمع عليه عمره " ٢٦ " انا لحد دلوقتي مش مصدقه إن بقالنا تلت سنين بس متجوزين اتربينا مع بعض طنط إيمان كانت من اروع الجيران اللي ممكن تقابلها ف حياتك وعمار طالع لها انا مشوفتش عمو احمد بس طنط ع طول بتحكي عنه وبتقول انه شبه عمار بالملي حتي نفس الطباع ،اول مره قابلت فيها عمار وقت ماعزلنا كان اكبر مني ب سنتين يومها طنط ليلي اتعرفت ع ماما وقالتلها بالحرف الواحد " ايد ع ايد تساعد " وفعلاً مسبتش ماما غير لما فرشنا الشقه كلها ومن وقتها واحنا مع بعض ف كل حاجه حتي مدرستي نقلت فيها عشان ابقي مع عمار الحاجه الوحيده اللي مكناش مع بعض فيها هي الكليه كان كل واحد ليه ميوله انا كنت عاوزه ادرس طب وهو درس اداره اعمال برغم كده جامعتنا كانت واحده ، دلوقتي انا شايفه وشه سعيد ب اللي انا عملته ...هو حقيقي قليل بس انا بحب البساطه ف كل حاجه ..
-كل سنه وانت طيب ياحبيبي ...ويارب تفضل معايا ع طول ومتسبنيش ابدٱ
-باسني ع خدي : وانتِ طيبه يا حبيبتي مكنش ليه لزوم تتعبي نفسك
-تعبك راحه ياحبيبي ... انا عملتلك كباب حله انما اي هتأكل صوابعك وراه
-طب استنيني هنزل اغير هدومي دي ونيجي نحتفل مع بعض للصبح
نزل غير هدومه وزي كل مره بيكون جايبلي معاه هديه معرفش امتي بيعمل كده رغم انه مبيبقاش فاكر عيد ميلاده
-عمار عاوزه اقولك ع حاجه
-قولي
-انت مش ملاحظ عليا حاجه متغيره بقالي كام يوم
-الصبح قولتيلي بطنك وجعاكي وهتريحي شويه ومش هتروحي الشغل
-حطيت ايدي ع بطني : اها عملت تحليل ...انا حامل
فضل دقيقه ساكت مبيتكلمش انا كنت مغمضه عيني ... لفينا ع دكاتره كتير من ساعه ما اتجوزنا كل اللي كانوا بيقولو الصبر ...لقيته اخد ايدي وقعدنا وعينه دمعت وبعدين قالي
-انا عاوز بنوته شبهك
- ليه متكونش شبهك انت
-عشان عاوزها نسخه منك ...وهخلي بالي منها كويس اوي زيك ...انا هبقي اب كويس صح
- مسكت خدوده وشدتها : انت هتبقي احسن اب ف الدنيا
-مسك ايدي اللي كانت ع خدوده وقربها ل شفايفه وباسها : ربنا يخليكم ليا ....
-يلا بقا بطل نكد وتعالي نتفرج ع سندريلي
-متجوز طفله ياربي يالا ياستي
# ياسمين فليفل
