هو عارف اني بحب البحر جداً، بس مش اكتر منه، كان قايل ليا من بليل اصحى بدري واجهز عشان عاوز يخدني مكان هيفرحني، حاولت اسأله اي هو المكان لكن هو غامض ك العاده، كلامه قليل، ضحكته حلوه، ملامحه بسيطه بس بتشدني، صوته لوحده موال، انا واقعه ف حب سعادته، طبعا معرفتش انام من الحماس كنت عاوزه اعرف ب اي طريقه اي هو المكان اللي ممكن يفرحني ومعرفش، قعدت اقرأ روايه وبعدين قومت شوفت انا هلبس اي، تقريبا طلعت كل اللي ف الدولاب وقلبت الاوضه وف الآخر استقريت ع جمبسوت اسود وتحتيه بوكليت زيتي وبعدين قعدت اكمل قرأه لحد م النهار شقشق، جهزت نفسي قبل مايجي ب ساعه وفضلت مستنيه، رن عليا حتى مستنتش ورديت من اول رنه وصوتي كله حماس " أنا جاهزه ونازله اهو" نزلت لقيته واقف وساند نفسه ع العربيه ونبتسم ابتسامته اللي بتأخد عقلي من جمالها، ده اي الصباح الحلو ده ، حقيقي ايامي كلها حلوه بوجوده!
-صباح الخير ياكتكوته
-كتكوته! قولي بس هتوديني فين وبعدين نشوف حكايه الكتكوته دي
-اركبي بس عقبال م اجيب حاجه وجاي
-هتفضل غامض كده كتير
-قرب مني وهمسلي : متقلقيش هتعجبك ياحبييي يلا اركبي بقا
قعدت ف العربيه وانا نظراتي عليه، لقيته داخل محل حلويات وطلع ب شنط كتير مليانه شبسيهات وشكولاتات، وقعد جمبي وساق وطول الطريق بسأله هتودينا فين ومش راضي يقول برضو، لحد ما شوفت اليافطه ع الطريق " اسكندريه" بصتله وانا مبتسمه لولا اني مكسوفه كنت قومت حضنته دلوقتي ابتسم وهو بيقولي "مينفعش حبيبتي يبقى نفسها ف حاجه ومتتنفذش" وصلنا ل شاطيء المعمورة وركنا العربيه ف مكان هادي ونزلنا فتح شنطه العربيه وطلع منها حاجات كتير من ضمنهم الفطار والحلويات، طب احضنه دلوقتي ف الطريق ونتمسك فعل فاضح ف الطريق العام ولا اي، قعدنا قدام البحر بالظبط وفضلت مبتسمه وبتأمله، البحر طبعاً مش عمار، من ساعه ما قابلته وهو بيحاول يعمل اي حاجه تفرحني اتخطبنا وبعدين كتبنا الكتاب، عمري ما كنت أتصور أن جواز الصالونات هيبقى حلو ب الشكل القمر ده
-اللي واخد عقلك قالها وهو بيخبط كتفي ف كتفه
-انت!
-اي
-انت واخد عقلي ومتهني بيه كمان
-بعد ما كان قاعد جمبي وقف قدامي وهو بيضحك : اي ده اي ده لا ده انا اجيبك كل يوم البحر عشان تقوليلي كلام حلو زي ده
-اتكسفت وانا شايفاه مقرب مني اوي : طب ممكن تهدي وتقعد عشان نفطر.. عصافير بطني بتصوصو
-خديجه!
-نعم
-انتِ حلم جميل هفضل مستني انه يتحقق لحد مانتجوز، برغم أنك دبش بس انا بحب كلامك اوي اسلوبك ف الكلام معايا، طريقه كلامك لوحدها كفايه، طفوليه ل ابعد حد بتفرحي من اقل حاجه، عمري م آمنت ب الحب بس معاكِ انا طاير ف عالم تاني المهم اني معاكِ وخلاص، رقتك، هدوئك ساعات بتبقي مجنونه وبتتحمسي ل كل حاجه حتي لو الحاجه دي اتفهه حاجه ف الدنيا، طريقتك وانتِ بتحاول تهديني لما بكون متعصب بتضحكني اكتر وبنسي عصبيتي، انا بنسي نفسي اصلا معاكِ هتعملي فيا اي تاني
-انا معملتش حاجه ياباشا، هي كل الناس بتحبني ف طبيعي انت كمان تحبني
-الغرور ياااا
-عمار انا حلوه عشان عيونك اللي شيفاني، انا حلوه بيك ومعاك
-بس حلو الشراب ده
-اه انت لابس زي ليه
-مينفعش مراتي تبقى تافهه اكتر مني
-مراتك!
-اه، تحبي اوريكي القسيمه
-ضحكت ع ملامحه وانا بقول : وأنت ماشي ب القسيمه معاك ليه
-كده انا فخور بيها عندك مانع، بس ليه استغربتِ كلمه مراتي
-عمرك ما قولتها
-عجبني نطقها وخصوصا لو ليك ِ
سكتت هي ومعرفش ترد وصوت موج البحر مع صوت ام كلثوم جاي من بعيد وهي بتقول " وقابلتك انت لقيتك بتغير كل حياتي، معرفش ازاي حبيتك، معرفش ازاي ياحياتي، من همسه حب لقيتني بحب وادوب ف الحب وصبح وليل ع بابه" ابتسموا وهما بيبصوا ل بعض دي احلى اغنيه وصفت حالهم جات ف وقتها!
# ياسمين فليفل
