عمار هو انا ممكن اسألك سؤال؟
اه طبعاً قولي
هو ليه الحب متعب يعني ليه منأخدش الموضوع بسهوله، ليه كل حاجه لازم نتعب فيها، مينفعش احب من غير معوقات ونفضل نحارب مع بعض عشان يقولو علينا دول انفصلوا ورجعوا ولسه بيحبوا بعض، انا مبقتش فاهمه حاجه، هو الحب وحش للدرجادي؟
قرب مني وهو بيديني فنجان القهوة اللي نسيته من ساعه ما جه عشان مشروع التخرج أخذته منه وانا بحاول ادفي نفسي ف ليالي الشتاء اللطيفة اللي زي دي ومستنيه إجابته
الحب انك متخافيش مع اللي بتحبيه حتى لو عدت عليكم أوقات صعبه، انه بيحاول يفرحك مهما كانت الظروف، الحب اني أعجز معاكِ واشيب ومشتكيش منك أبدا مع انك ممكن تكوني مطلعه عيني، الحب ان مهما قابلتنا مشاكل ف علاقتنا انا هفضل ماسك ايدك، الحب عامل زي الورد كل ماتسقيه بيطرح حب اكتر فهمتي؟
اه الحب زي الورد!
هو ده بس اللي فهمتيه
قالها وهو بيضحك ورأسه رجعت ل ورا انا حسيت انه ممكن يقع ع الارض من كتر الضحك، اول مره اركز مع ملامحه كده، ضحكته حلوه، ملامحه نفسها حلوه عيونه عسلي أو للتوضيح ممكن نقول ان هي بني فاتح عنده طابع حسن بيظهر كل مايضحك شعره مفلفل وطويل وانا بحب النوع ده من الشعر، اما انا ف ملامحي مش جذابه أو ممكن نقول ان محدش بيتشدلها لبسي كله طويل وواسع بشرتي ممكن نقول اني خمريه عيوني بني فاتح زيه بس تفرق ان صحابي بيشوفوها زي فنجان قهوه، عندي غمازات ويمكن ده اللي بحبه ف وشي كله، كل مره اسمع حكاوي صحابي عن حبهم بحس اني عاوزه اتحب دلوقتي بقرأ قصص وروايات كتير وتقريبا ده اللي مخليني حالمه ورومانسيه زياده، كل مره بقرأ روايه بحب البطل اكتر من البطله ذات نفسها، انا عارفه انه هيجي يوم واحب واتحب زي العالم دول..
-طرقع بصوابعه قدام وشي وهو بيقول : انا عارف اني حلو متبصليش كده
- اتنحنت وانا بحاول اخبي خجلي منه وقولتله: طب اي مش يلا نشوف المشروع
- لا مشروع اي بقا الساعه بقت 8 وكمان انا تعبتك معايا
- طب استنى اعمل سحلب عشان يدفيك
- لا خلاص بقا
وكان بيلم حاجته ف ماما نادت عليه من المطبخ وقالتله اقعد انا بحضر العشاء اقعد هنتعشي مع بعض وقالتلي نادي ع طنطك ريهام تنزل،احنا جيران ف نفس العماره انا وعمار دخلنا نفس الكليه بمحض الصدف أو ممكن نقول التنسيق، جينا هنا كان عندي 10 سنين وقتها ماما ومامته صحاب من وقتها اما احنا ف كان بيجمعنا الثانوي والكليه بس بيأخدني معاه وهو نازل وبنرجع مع بعض اهو فاضل سنه ونتخرج وهو عمره ماسبني ف مره اروح لوحدي، كان دايما معايا مها وجهتني مشاكل هو بيقدر يحلها معايا، انا ممتنه لوجوده ف حياتي حقيقي…
-اما انا عامله صنيه جلاش باللحمه ياواد ياعمار هتأكل صوابعك وراها
- حبيبتي ياطنط تسلم ايدك.. انا مكنتش جعان بس دي صنيه جلاش يعني مقدرش أقامها وخصوصاً لو منك انت.. وبعدين سكت لما لقاني مش موجوده معاهم وسأل ماما : هي خديجه مش هتأكل ولا اي
- لا يابني أصلها عامله حميه
- ضحك وعلى صوته عشان اسمعه : حميه!! حميه ياخديجه
- اه حميه ياعمار انت عارف اكل طنطك عفاف كله بالسمنه البلدي
- تعالى بس وانتِ مش هتندمي
- يلا ياخديجه اقعدي مش هيحصل حاجه من مره يعني
قعدت جمبه وانا بحاول اتهرب من نظراته وشكله وهو بيضحك كده خائف قلبي اكتر اصلآ
عاجبك كده انا هتخن ومش نلاقي حد يحبني
مختلفناش طب م انا بحبك
كنت بأكل الاكل وقف ف دوري وفضلت اكح من كلامه.. يعنى مش كفايه هو حلو.. وكلامه كمان حلو ف اداني كوبايه المياه وهو بيضحك.. يااخي حسبي الله ونعم الوكيل هو ده وقته
انت قولت اي
انا قولت كلام كتير ماتفكريني انتِ
عمار!!
قولت اني بحبك فيها حاجه دي
طب بطل هزار عشان المواضيع دي مش للضحك
ومين قال اني بهزر
يعني اي؟
يعني فيه واحده متخلفه كده كان عندها 10 سنين لمضه جات قالتلي وطى شويه عشان عاوزه اقولك حاجه وهي مطلعتش من بالي من ساعتها
انت اللي طويل ع فكره
يعني مش انتِ اللي اوزعه
لا… وبعدين انت مقرب ليه كده ماتيجي تقعد ع حجري احسن
ياريت
عمار!!
عمار قلبه تعب معاكِ والله
- سلامتك يا قلب خديجه
اه قلبي… يابنتي ابعدي عني انا مش قدك
طب ماتوريني كده صنيه الجلاش دي بتقول اي
مال عليا وهو بيغمز وهمسلي : بتقولك بحبك
# ياسمين فليفل
