فصليتي ولكن الظروف.....

البارت السادس عشر

زهرة(ام محمد)

من اني وصغيرة اهلي حيل يكرهوني كله يصيحولي بنت الفكور والفكر والبايرة جنت كل شي اتحمل اكول ميخالف هذول اهلي اريد اكون بارة بيهم الله وصى بيهم ميخالف اتحمل هم نور عيوني بطلوني من المدرسة ورجعت بست الايادي والرجلين يله سمحولي اكمل
يدزوني بنص الليل اروح اجيبلهم فلوس واروح اشتغل ب بيوت العالم وابيع علج ومي بالشارع في سبيل اجيبلهم

روتيني جان عبارة عن اكعد من4صبح انظف البيت واروح اجيب البيض من الدجاجة واخبز واسويلهم ريوك يكعدون امي وابوية واختي جيلان يتريكون ويضلون يفشرون ويغلطون عليه لان اكعد اكل وياهم

اكوم من الاكل واني على لحم بطني من عشه البارحه اقره دروسي تصير بال6 اكوم احضر الغدة واكمله حتى من ارجع احمي واصبلهم واعزلي شوية اكل بره
جانت نومتي بره بالطرمة فراشي هم هدومي بالمخزن مع كل هذا جانن نظيفات حيل

بيوم من الايام رجعت شفت اطفال 2 عمرهم تقريبا سنتين او هيج شي مااعرف جانوا يبجون كبال باب البيت فوتتهم جوه وياي وبدت الحفلة مال اهلي
امي عاطت بيه....شكو مطببتهم لهل مجادية كبور تلفج بنت الفكور

ابوية هم ماقصر......بنت المطاية الله ياخذج جايبتلنا علل يالبايرة

ماجاوبتهم عكس النار اللي تسعر وتغلي بداخلي كمت خليت الاطفال على الفراش جنت مسويه وصل وشادتهن مثل السقيفة رحت بدلت ملابسي بالمخزن وطلعت البيت خايس ولاعبالك منظفته جلفته وصبيتلهم الاكل وطلعت للاطفال وكلتهم شوي وناموا

كمت اريد اغسل المواعين لزمتني امي وجيلان كسروا عليه المواعين كلهن وضلن يضربن بيه علمود الاطفال واني احمي وجهي مااريد يبين بيه شي مااريد احد يسأل شبيه ويتشمت مااريد طفل ينظلم مثلي ويشوف اللي شفته من جنت اتمرض وحدي اكوم اسوي مي حار واشربه حتى الحليب ممنوع اخذ منهم

كمت واني انزف بدون ماغسل لميت الكزاز واون نظفت وكملت فتت سبحت وطلعت على دكة الباب خليت الشال وطلعت فتحته جان رجال سبحان الخالقة يخبل طلع ابوهم للاطفال شافوا ركضوا عليه حضنوا راد فوته للبيت وصحت على اهلي كعد جبتله عصير وامي تخزر بيه لان ضيفته ههه عادي تعودت

راد يروح بعدين الاطفال ماقبلوا يرحون سبحان الله مصارلي كم ساعة من اخذتهم ولاعبتهم ووكلتهم وحبوني فهو شسوا اتفق انو اربيهم وينطيني مصرف صدك عاد ضليت اربي بيهم ومن ينطيني مصرف جان 1000دينار الاسبوعية انطي900لاهلي والباقي اليه بدون ميعرفون هاي ماعدا انو هو يجيبلهم ملابس

للاطفال واكل وكل احتياجاتهم مرت سنة واني ممقصر وياهم صعدت للسادس اعدادي اجوي خطبوني لبست ملابسي ودموعي تجري اصرار امي ميبطل طلعتلهم ولاكأن يخطبون عبالك سلعة عدهم وياخذوها حيل انقهرت على نفس انطوا مليون مقدم واتفقوا ياخذوني لازفة ولاشي مااعرف شنو اسوي خابرت على ليث