طلعت من بيت خالي و اني مثل اللعابة بس جسد بلا روح يجروني وراهم وين ميريدون... خالي مصدك بيهم اتهمني و تبرة مني و ابنة كل متعتة بالحياة يذلني و يعذبني و ابن عمي الي تحاميت بي اجة كملهة عقد علية و تزوجني حتة بدون ميسأل ولا يبلغ احد من اهلة حتة أخوية ميدري بية تزوجت
كاعدة بالسيارة نمشي بالطريق لا هو الحجة و لا اني فتحت حلكي بس دموعي من وحدهة تنزل كل ما امسح وحدة تزل عشرة ببدالهة.. كل شوية يندار علية و يرجع يباوع للطريق يريد يحجي و يتراجع
عمر... متأذية.. بيج شي... اوديج للمستشفى
هزيت راسي بلا
عمر... لعد ليش البجي
كمت اشهك.. طبك السيارة على صفحة و اندار علية
عمر... مكافي دموع... فهمني شبيج
جنة... شبية هه... كلشي مابية سلامتك.. بس اهلي الي مأمنة بيهم صارلي سنين ذبو علية تهمة بس الله يدري بيهة و خالي مصدكهم تبرة مني و شمرني عليك حتة يخلص مني و ابنة مبقة مكان بجسمي صاحي يعاقبني على ذنب مادري شنو هو اصلا و يتشمت بية لان ماعندي احد يحميني.. و ابن عمي..
عمر... اي شبي ابن عمج... كملي ليش سكتي
جنة... انت مو كلت اني بظهرج و لتخلين احد يغصبج على شي متريدي
عمر... و بعدني عند كلمتي بس كلتي تعال طلعني شسويت اجيتج ركض و طلعتج من يمهم
جنة... عقدت علية... تزوجتني بدون متسألني...
عمر... وهذا الي غاثج... تدرين لو متأخر ساعة لخ جان نفس الشيخ بدال ميزوجنا يزوجج لابن خالج.. جان هسة انتي مرت خالد تدرين وراهة شيصير... بعد لو تجي عشاير العراق كلهة متكدر تخلصج من ايدة و لو يذبحج هم محد يكدر يحجي تدرين ليش.. لان الشي الي شفتة بموبايلج يخلي اي واحد بشوفهة يكلة حقك وعاشت ايدك و تستاهل اكثر
جنة... يعني انت هم صدكت... والله مو..
عمر... لو صدكت جان عفتج هناك يمهم ما اوكف بوجههم و اخذج
نزلت راسي مادري شديصير بية و شحيصير
عمر... جنة باعيلي... صح مصارلي هواية من عرفتج.. بس شفت تصرفاتج و عرفت اخلاقج... و بنت عمي الي اعرفه مستحيل تسوي هيج شي.. شوفي صح عقدت عليج بس ابد لتتخيلين نفسج مغصوبة على شي.. والعقد بس حتة اطلعج من بيت خالج بدون هوسات... و هسة من نرجع للبيت رح افهم اهلي انو هاي مجرد خطبة منا لحد ميخلص بيت اخوج و أءمن عليج...نكول متفاهمنة نفسخ الخطوبة و كلمن يروح بطريقة
صفنت بوجهة اصلا بشنو افكر ماعندي خيارات لو اقبل لو اقبل ماكو غير حل... رجعت نزلت راسي هو شغل السيارة و مشة دموعي متقبل توكف حتة عيوني غوشت..كل شوية يباوع علية و يرجع يندار و يتنهد.. على غفلة ضرب الستيرن و صاح كافي دموع الخاطر الله
اني من الفزة كمت امسح بدموعي بسرعة... سكتت وراهة مبجيت بعد.. والله طلعت عيوني يرادلهة عيطة يلة تسمع كلام متمشي بالعيني و اغاتي
وصلنة بيت عمي فتحت باب السيارة مشيت خطوتين و وكفت دخت كلش انتبه لية عمر اجة مفزوع
عمر... شبيج
جنة... مابية شي
عفتة وكملت طريقي بس بالكوة امشي فتت للصالة كلهم مجتمعين اجتي نور تركض
نور.. سلامتج حبيبي هاي شمسوين بيج.. الله لا ينطيهم ليش هيج
امل... سودة علية يمة تعالي تعالي ارتاحي
رحت كعدت يم بيبي حضنتني و نزلت دموعي بحضنهة و هي تمسد على راسي
كلهم عيونهم علية ينتضرون تفسير لشكلي الي صاير خرايط و اني عيني على عمر اريد اسمع رح يفسرلهم و شلون كللهم اتزوجنة
عادل... احجي يابة شصاير منو سوة بيج هيج
عمر... تعال يابة اني احجيلك
آخذة و راحو للاستقبال شوية و رجعو
عادل... يابة لتديرين بال ولا تقهرين نفسج.. هذا بيتج تكعدين بي معززة مكرمة محد يطخج بحجاية... و ان شاء الله يبين الحك.. عهد عليه اخذ حكج من عيونهم
ضميت راسي بحضن بيبي ماريد يشوفوني هيج
عادل... ادري بيج تعبانة يابة بس اريد احاجيج بشغلة
رفتع راسي اباوع علية
عادل... شوفي بنيتي الله يشهد على كلامي اني حاسبج حسبة بنتي واعز.... فمستحيل ارضة باذيتج... شوفي.. عمر حجالي على بيت خالج و شلون مأذيج و كالي ملتكيت غير حل حتة ياخذج منهم.. و الصراحة حجية مضبوط.. و لو عايفج هناك اني ما ارضة عنة
دنجت راسي معرفت شنو اكول
عادل... عمر رجال حوك و ينشد بي الظهر... مو لانة ابني احجي هيج لا والله.. سألي العالم كلة رح يكلولج نفس الحجي.. و انتي هم بنيتي معدلة ماعليج زود.. و مالكة احسن منج تصير مرة لابني.. لو شتكولين ام عمر
امل...يمة.. يوم المنة... وين الكة مثل جنة
عادل...ها يمة و انتي شنو رأيج
أمينة... جدر ولكة غطا... بالمبارك يمة
كلهم ضحكو على حجي بيبي بس اني بعالم ثاني عيني على عمر اريد اشوف شيكول بس هو هم جامد ماعندة اي ردة فعل
عادل... بيهة الخير ان شاء الله... يلة يابة روحي ارتاحي شويه
كمت امشي خطوات ممتاوزنة لزمتي دوخة كمت ماشوف طرقي و صلت لباب الصالة و وكعت اخر شي حسيت على عمر كمز و صاح باسمي وراهة غبت بدنية ظلمة
فتحت عيوني شفت عمر يباوعلي بقلق باوعت يمنة يسرة كلهم واكفين داير مدايري و اني مددة بالكاع و راسي بحضن عمر... استحيت من وضعي ردت اكوم لزمتني الدوخة من جديد لزمت راسي
عمر... اوكفي اوكفي... على كيفج لتكومين رأسا
سندني وكفت بس بعدني دايخة كللهم يحضرون اكل و صعدني شوي شوي للغرفة
عمر... شكد صارلج مماكلة
جنة... من جنت هنا
عمر... استغفر الله.. شلون متحملة صارلج يومين مماكلة شي
جنة... مادري... محسيت
دخلني للغرفة و كال ارتاحي هسة تجي نور تجيب اكل تاكلي كلة مفهوم
هزيت راسي و هو طلع و سد الباب
شوية و اجتي نور جايبة صينية ملاينة
نور... سلامتج حبيبتي شلون صرتي
جنة... الحمدلله
نور... تعالي اكلي يلة عمر كال تاكلي كلة ترة اصيحة يجي هو يوكلج
تحجي و تغمز
جنة... شبيج نحولتي
نور... شو مكلتيلي اكو مشاعر و أحاسيس بينج و بين أخوية هاا.. مو عيب عليج تضمين علية
جنة... والله اسألي اخوج هو حتة اني مادري
نور... يا عزة بعينج شكلج مراضية
جنة... لا بس يعني صارت بسرعة
نور....ها عبالي معاجبج أخوية ترة اخنكج
جنة... ههه.. هسة اكل لو بعد اكو حجي
نور... هو بعد اكو هواية بس اكلي اول
طلعتي ملابس كالت من تخلصين بدلي و ارتاحي و هي نزلت تسوي عشة
اكلت شوية و عفتة ماشتهي بعد فتت للحمام سبحت و بدلت ملابسي وطلعت شلت الصينية دا انزلهة بس فتحت الباب صار عمر بوجهي هسة ملكولي غير الغرفة الي كبال غرفتة كل ما طلع الكا كدامي... غلست محجيت وياة مشيت بس هو اجة و تقدم علية وكف كبالي
عمر... شلون صرتي
جنة... الحمد لله
عمر... ليش مماكلة
جنة... لا اكلت
عمر... ميصير بابا صارلج يومين مماكلة
جنة... شبعت والله
عمر.... بكيفج.. جيبي الصينية اني انزلهة
اخذهة ونزل
رجعت اني للغرفة تمددت ضليت افكر بحياتي المخربط شي طاب بشي كل ما اكول تعدلت و تعودت على العيشة تنكلب راسهة على رجليهة
يتبع
أنت تقرأ
جنة الشيخ عمر 💕
Romanceتجيني اوقات اكول ليش اني هنا شنو عايشة بالحياة بس حتة اتعذب من كثر الهم نفقد الأمل بس حاشا ربي ينسة عبدة سبحانه الي كال ان بعد العسر يسرا مهما طال التعب لابد يجي اليوم الي نرتاح بي قصة عراقية لبنية تعذبت من طفولتهة و عانت هواية ياترى رح يجي الي اليو...
