للحظات نسيت الزعل و المشاكل كلهة.. لمستة تخربط احوالي و اتيه الدنية كلهة... عود جنت واكفة بكل ثقة و متخصرة.. ضيع الهيبة كلهة بس لزمني.. هي ثواني محسيت غير ايد محاوطة خصري و الثانية مدفونة بشعري و يتفنن بالهجوم على شفايفي بدون اي مقاومة مني.. حسيت على نفسي تذكرت حجي نهى دفعتة من صدرة وخر بمزاجة لان يعني مستحيل دفعتي تأثر بي... دنجت راسي انهزم من عيونة كالعادة همست بصوت يرجف بس احاول أبين قوية
جنة... شدتسوي... ووو.. منو سمحلك تفوت
تقدم خطوة رافع تك حاجب.. هو تقدم اني رجعت
عمر... شبيج خايفة... مو واكفة تحجين بكل ثقة ليش تنهزمين
جنة... مخايفة... يلة اطلع.. اا.. اريد انام.. اطل...
احجي و ارجع ليورة و هو يتقدم...مستمرة ارجع ليورة منتبهت على السرير وراية وكعت.. صارت رجلي على الكاع و جسمي على السرير... ردت اكوم صار فوكاية حاط ايدة من الجانبين و وجهة فوك وجهي يفصلنة كم سانتيم... كمت امتمت ما اعرف شسوي
جنة.. اا.. ع.. عمر
باوع بعيوني مبتسم
عمر... نعم
جنة...وخر
عمر...ماريد... ليش اوخر
جنة... وخر حباب
عمر... هسة صرت حباب مو قبل شوي تطردين بية... هيج ينطيج كلبج تعوفيني بهالسهولة بدون متفهمين السالفة شنو
جنة... مو انت متحبني... شتريد مني
كام كعد و كومني كعدت بصفة... دار وجهي عليه يباوع لعيني
عمر... برأيج يعني اذا ما احبج ليش اسوي هيج.. منو جابرني ابقة وياج
نزلت دموعي
جنة... تنقهر علية عبالك ما الي احد اذا عفتني...يجوز شفتني تعلقت بيك كلت خطية خاف تنقهر من اعوفهة.. لا لتخاف عادي روح شوف حياتك اصلا متهمني
عمر...هاااا هيج صارت... لعد منو الي كالت احبة و اموت عليه
جنة... جنت تعبانة مو بوعيي
عمر... ماشي بكيفج ما اجبرج اذا تريدين من الصبح اكللهم فركشنة ماكو عرس... لو لا ليش اروح الحجز مال القاعة حرامات بس ابدل العروسة
فتحت عيوني على وسعهم و دموعي تصب كتلة بكيفك و كمت جان يلزم ايدي.. جرني و وكت بحضنة لف ايدة على خصري و بايدة الثانية مسح دموعي
عمر... اذا ما اهمج ليش تبجين لعد
مجاوبت بعد ماعرف شكول بس اباوع بعيونة
عمر... وداعتج عندي احبج بس انتي الي سكنتي كلبي... و مو هسة من زماان من اول مشفتج... من اول مرة ارتبكتي و رجفتي بوجودي... من اول مرة جتي عيني بعينج و هزمتي نضراتج... و جنت مقرر اخطبج من اخوج من قبل متصير سالفة خالد بس من صارت و عقدنة بضروف غلط مردت اخسرج و كلتلج على سالفة الاتفاق بس حتة متكرهيني
جنة... يعني مسويت هيج بس شفقة
عمر... ههه صار ساعة شدا احجي لعد... اي جوز سويتهة شفقة بس مو عليج على نفسي لان انتي بعيدة عني
ضحكت على حجية.. كرص خدي
عمر... شوفي هاي الضحكة ادفع عمري كلة بس حتة اشوفهة
ردت اكوم رجع جرني
عمر... وين وين... وين تنهزمين عدنة حساب
جنة... شنو
عمر... اول شي لازم تتعاقبين لان شلعتي كلبي من البارحة ليهسة متقبلين تسمعيني
جهم على شفايفي بس بوستة هالمرة صدك عقاب كطع شفايفي
عمر... ثانيا تنازلتي عني بسهولة بدون متفهمين السالفة
و هم رجع هجمة مرتدة
عمر.... ثالثا صارلي ساعة احجي و امدح و مسمعت ولا كلمة حلو حتة كلمة احبك مكلتيهة بوجهي يالظالمة
راد يهجم منجديد حطيت ايدي على حلكة
جنة.. كافي حباب
عمر...كوليهة و اعوفج
جنة... شنو
عمر... بكيفج لتكوليهة اني اسمعهة بطريقتي احلة
قرب وجهة قبل ميوصل الشفتي غمضت عيني و حجيتهة بسرعة
جنة... احبك والله احبك.. كافي حباب
ضحك ضحكة طويلة
عمر... ماشي اعوفج اليوم و نتلاكة باجر
كام وصل للباب و اني صافنة عليه قبل ميطلع اندار
عمر... عود نامي زين ورانة سهرة باجر
غمز و طلع سد الباب وراه
شمرت نفسي على السرير و كلبي يدك ميت الف دكة بالدقيقة... شعور كلش حلو قبل ساعة جنت كارهة الدنية هسة اريد اطير من السعادة
كعدت الصبح على صوت نور
نور... يلة يلة كومة ست عروسة
جنة...كمت كمت لتصيحين حبابة
نور... بسلا بعد متعاركة وية عويمر... كولي تصالحتو مو
جنة... ايي
نور... مو اكلج ثولة كلبتي الدنية و خربتي الحنة و اجة بكلمتين صالحج.. و هسة كاعدة كدامي تضحكين مثل الهبلة
جنة... يووو هسة المهم تصالحنة... كومي يلة
سبقتني و نزلت اني هم كمت غسلت و بدلت و نزلت وراهة وصلت للدرج لاكاني و هو صاعد
جنة... صباح الخير
عمر... صباح العسل يا عسل انت
ابتسمت كرص خدي و تقرب يريد يبوسني رجعت خطوة ليورة
جنة... شدتسوي... ليشوفنة احد
عمر... و اذا مشافو مرتي و داصبح عليهة شكو بيهة
جنة... لا حباب.. عيب
عمر... ماشي يابة وين تروحين مني كلهة كم ساعة و اجيبج يمي
جنة.... اا.. شسمة.. تأخرت دينتضروني
عمر... يلة نزلي تريكي بين ما ابدل واخذكم
هزيت راسي و كملت طريقي لكيت نهى واكفة بنهاية الدرج و عينهة علينة مخنزرة تريد تاكلنة... غلست محجيت واهة عفتهة و مشيت
تريكنة و اخذنة للصالون طول الطريق مشغل اغاني و و عينة علية بالمراية كل ما ارفع راسي يغمز لو يبتسم... وصلنة و بدو يشتغلون المكياج و الشعر بس شسورتة لان رح البس حجاب.. لبست البدلة كلش نازكة مو كلش منفوشة وبيهة ردن كاملة و سوتلي الحجاب تركي و حطت فوكا البركع طلع كلش حلو.. كملنة و خابرنة عليهم اجة احمد اخذنة من شافني دمعت عينة مثل الاب ديشوف بنتة عروسة و اني هم لازمة دمعتي بالكوة حسيت ابوي لازم ايدي مو أخوية
وصلنة للبيت و كعدوني بالصالة ببيت احمد و بيبي يمي تباوع بوجهي مبتسمة... جتي عمتي تهلهل و بوستني تكول اليوم عرس بتي و عرس ابني.. و جايات نسوان هواية قليل اعرفهم هم باركولي
كاعدة شوية و جتي نهى بيدهة كلاص عصير سوت روحهة عود دتباركلي و طشت العصير على البدلة.. كامو كلهم يرزلون بيهة و شلون تسوين هيج و هي تباوعلي بشماتة... اخذتة نور غسلتهة شوي شوي و جابت فير نشفت المي والله رجعت نضيفة بعدنة بغرفتهة سمعنة صوت المزيقة و كالو جتي الزفة طلعنة ركض رجعتي المكاني و انفتح الباب... فات عمر لابس قاط و كالعادة كلة هيبة يمشي بثقة و عينة علية مبتسم.. وصل يمي باس راسي وشاورني
عمر.. مبروك عروستي
اخذني و طلعنة و النسوان ورانة يهلهلون و يهوسون و المزيقة تمشي ويانة.. صعدني بالسيارة و صعد هو من الجهة الثانية و انطلقت الزفة اغاني و هوسات تخبل..
وصلنة للقاعة و أجواء حلوة بدتة المراسيم و الناس كل شوية تجي تبارك.. واكفين اني ويا بالكوشة و الابتسامة واضحة على شفايفي بس اختفت من شفت خالي و مرتة و وياهم خالد.. كلت هاهية خربت
يتبع
أنت تقرأ
جنة الشيخ عمر 💕
Romanceتجيني اوقات اكول ليش اني هنا شنو عايشة بالحياة بس حتة اتعذب من كثر الهم نفقد الأمل بس حاشا ربي ينسة عبدة سبحانه الي كال ان بعد العسر يسرا مهما طال التعب لابد يجي اليوم الي نرتاح بي قصة عراقية لبنية تعذبت من طفولتهة و عانت هواية ياترى رح يجي الي اليو...
