اليوم عرس احمد ونور كاعدين من الفجر البيت مخبوص خوالهم بايتين وكومة نسوان... مين منمشي اكو تجمع كاعدات يسولفن
سوينة ريوك اني و عمتي و ويانة سمر بنت اختهة بس هاي حبابة بيهم و تساعد ولة اختهة نهى مدري شبيهة كارهتني كل متشوفني تخزرني عبالك كاتلة ابوهة
المهم التهينة بالشغل و بعدين راحت نور للصالون مرحت وياهة هالمرة ضليت اساعد عمتي... راحن وياهة بنات خالتهة و همة اصلا عشيرة راحو سيارتين مدري شبيهن مخبوصات عبالك عرسهن
ابد مكعدت من صبح شغل اول شي الريوك وراهة غسلنة المواعين و راهة بلشنا بالغدة و هم مواعين الغدة... رجعو من الصالون و اني بعدني ممبدلة خلصت شغلي على السريع و صعدت اركض حتة ابدل لكيت الغرفة تغص و تنبع متروسة بنات هاي التمكيج و هاي الي ترتب... اخذت هدومي و طلعت وية طلعتي لاكتني عمتي
امل...هاي يمة بعدج مبدلتي... يلة استعجلي رح تطلع الزفة
جنة... اي عمة رايحة بس الغرفة ملاينة عادي ابدل بغرفتكم
امل... عمج ديبدل بالغرفة... روحي بغرفة عمر ماكو احد.. طالع هو
جنة.... اي رايحة لعد
رحت لغرفتة عود متأكدة هو مموجود ماخذة راحتي فتحت الباب و فتت... نزعت الحجاب ورفتع الكلابية دا انزعخة جان تنفتح باب الحمام و طلع لابس بس شورت و شعرة نازل على وجهة ينقط مي ... ما احجيلكم على الفشلة لو تنشك الكاع و تبلعني هم ما ارتاح... رأسا غمضت عيني و انداريت
اجة تقرب وكف بظهري قبل ميحجي انطلقت اني اريد افسرلة اني مجاية علمودة
جنة... اسفة... اسفة... مادري بيك هنا
عمر... لعد وين اروح يابة غير غرفتي
جنة.. مو... شسمة... عمتي.. هي كالت ماكو احد... طالع
عمر....اي جنت طالع ورجعت... بس هم انتي متعدية على غرفتة
جنة... لا والله.. مو... شسمة...
انداريت عليه دا احجي و انضربت بصدرة يابوعلي و عاض شفتة يضم الضحكة.. شفتة هيج رجعت انداريت... مد ايدة وخر شعر من ركبتي و قرب راسة همس يم اذني
عمر... مو شنو
جنة... تأخرت.. و اريد ابدل... و البنات مجتمعات بغرفتي
بعدة راسة بركبتي يمشي خشمة على بشرتي و ايدة محاوطة خصري و يحجي بهمس
عمر... امممم.. و شتريدين هسة
جسمي كلة يرجف و صخنت لزمت ايدة اريد اوخرهة و انهزم
جنة... عمر... حباب وخر تأخرت والله
عمر... وين تروحين
جنة... ابدل
بأس ركبتي بوسة خفيفة خردلتني خلت جسمي يكزبر
عمر... يلة روحي بدلي بالحمام بين مابدل اني هنا
جنة... هاا
عمر... مو تريدين تبدلين
جنة... اي اي
اخذت هدومي وركضت للحمام بدلت و كلبي بعدة يدك سريع... شكد ثولة اني ليش دائما انحط بهيج مواقف
كملت بس السحاب ميقبل ينسد ضليت احاول اروح منا و اجي منا ماكو معاند... هسة شلون اطلع.. دك الباب كال يلة تأخرنة طلعت امشي صفح حتة ميشوف ظهري كلت اروح لغرفتي اخلي وحد من البنات تسوي
هو باوعلي بتساؤل
عمر... شبيج
جنة... ها
عمر... و وجعا شبيج تمشين هيج
جنة... لا ماكو شي.. اروح اكمل بغرفتي
عمر.. شو انداري
جنة.. ليش
اجة هو فرني
عمر... و تروحين هيج
جنة... مووو.. اخلي وحدة من البنات تسدة
محجة شي لزم السحاب وسدة على كيف و اصبعة يمشي على ظهري وية السحاب
بس كمل طلعت اركض لغرفتي لكيتهم مكملين و كاعدين يسولفون لفيت حجابي لفة مرتبة و حطيت مكياج سريع بس كحلة و مسكارة و حمرة و لبست حذائي و نزلت
رحت للصالة لكيت نور كاعدة طالعة ملاك تجنن
نور... وينج ليش عيفتني وحدي
جنة.. وين عايفتج حبيبتي.. هياتني جنت ابدل
نور... اي صدك بلة شنو هالجمال طالعة احلة مني
جنة... وين اكو بجمالك عيني.. الله يساعد أخوية عليج اليوم
نور... سكتي رجاءً لتذكريني... ميتة رعب من سيادة النقيب... يجوز اعوفكم و انهزم بالزفة
جنة... يا خبال... مو البارحة جنتي تركصين و شايلة خشمج علينة هسة تريدين تنهزمين
نور... اي مو صارت صدك
جنة.. هههه لتخافين مياكل بشر
نور... ضحكي ضحكي.. عود نشوفج بيوم عرسج شتسوين
دنسولف و سمعنة المزيقة شوية وفات احمد للابس قاط و معدل شعرة.. يمشي بخطوات واثقة و ابتسامة خفيفة كلة هيبة... من شفتة عيوني من وحدهة دمعت بحياتي متخيلت ارجع التقي بي لا واشوف و هو عريس.. احس نفسي بحلم
وصل لعروستة بأس راسهة و اخذهة من ايدهة و طلعو.... توزعنة علة السيارات صعدنة اني وعمتي بسيارة عمر و انطلقت الزفة للقاعة... وصلنة و بدت حفلتهم أجواء تجنن و الفرحة مالية المكان
كعدت يم عمتي عمر وصلنة و طلع برة مكعد.. عود عيب يحضر عرس اختة مادري شنو السبب و منو حط هذا القانون بس الي اعرفة المفروض انو هذا اهم يوم بحياتهة المفروض اخوهة يساندهة و يشاركهة سعادتهة مو يعوفهة وحدهة بس هي العادات هيج
المهم بلشت الحفلة و احمد و أصدقائه شعلو الجو يركصون و يتشاقون وياه لو فقرة الجوبي تجنن.. بالمختصر عرس يجنن ولا اروع من هيج
خلصت الحفلة و طلعو العرسان و احنة طلعنة اني وعمتي ندور عمر حتة نصعد ويا شفناه من بعيد لازم خالد من ياختة و مبينين ديتعاركون... هسة هذا شجابة لازم يسوي مصيبة ويخرب فرحتنة... ركضنة عليهم
امل... استهدى بالرحمن يمة شبيكم
عمر... روحو صعدة بالسيارة معليكم
خالد.... اهلا اهلا... شلونج بنت خالي... شخبارج ان شاء الله مرتاحة
عمر... كلت روحو يلة
خالد... شبيك خلينة نسلم... مو كتلك شبعت منهة و شمرتهة الك بس سلام ترة
منحس غير عمر نايم فوكا ويضرب بي بكل قوتة... عمة تلزم بي و يوخرهة ويكمل ضرب لحد مصار وجهة خريطة من كل مكان ينزف عافة و كم ديمشي بس وكفة صوت خالد
خالد... هسة ارتاحيت بردت كلبك.. بس حتة لو تموتني هم مرح يتغير شي... زوجتك العزيزة صارلهة فوك العشر سنين يمي شمدريك شنو...
بعدة مكمل و هجم علية من جديد
عمر... لك عار لتجيب طاريهة على لسانك النكس
ضربة بوكس وكعة بالكاع و اجة جرني و مشة... دموعي تزل عشرة عشرة ردت احجي ابرر
جنة... عمر..
عمر... اششش ماريد اسمع صوت
لازم ايدي و يمشي سريع و عمتي تمشي ورانة تهدي بي بس ماكو ميفيد بركان فاير
صعد بالسيارة شخطهة و مشة رأسا للبيت حتة مشفنة نور ولا وصلناه للفندق عفناهة وحدهة.. خرب فرحتنة الحقير الله ينتقم منة
وصلنة للبيت فارغة ماكو احد بس عمي سأل شكو مكلنالة شي.. عمر صعد لغرفتة رأسا و ركع الباب وراه بحيث سمعنة صوتهة و احنة جوة... اني هم صعدت لغرفتي كعدت على القريولة ودموعي تصب نزعت الحجاب و شمرتة بقوة... نزلت كعدت بالكاع حضنت رجلي لصدري و دفنت راسي اريد اوكف الدموع ماكو متوكف... مينسمع بس صوت شهكاتي... يعني ليش مكتوب علية العذاب حرام علية الفرح
يتبع
أنت تقرأ
جنة الشيخ عمر 💕
Romanceتجيني اوقات اكول ليش اني هنا شنو عايشة بالحياة بس حتة اتعذب من كثر الهم نفقد الأمل بس حاشا ربي ينسة عبدة سبحانه الي كال ان بعد العسر يسرا مهما طال التعب لابد يجي اليوم الي نرتاح بي قصة عراقية لبنية تعذبت من طفولتهة و عانت هواية ياترى رح يجي الي اليو...
